Ngdirk Sebechem el Ngmai a Klubelem er a Uchetemel a Osisechakl er a Biblia?

1. Sera omsubii a klemerang er a Biblia e ngera ngrirellii er kau osisechakl er a Biblia?

A UCHETEMEL a osisechakl er a Biblia mla ngodechii a klengar er kid. El ua tiang, sera desuubii el kmo a ngklel a Dios a Jehovah e kede ngiluu sel kot el bakes el mo sechelil. (Isa. 42:8) Sera desuubii a mera el blekerdelir a rulekoad e ngmlo diak dolechedech el kmo a rebetik er a rengud el mla mad te chuarm er a ringel me a lechub ngdiak. (Oli. 9:10) E sera desuubii a telbilel a Dios el kirel a Baradis er tia el chutem e ngmlo diak debekikl el kirel a klengar er kid er a ngar medad. Ngmlo ulterekokl a rengud el kmo ngdiak di bo dekiei el mo 70 me a lechub ng 80 el rak kede bai mo kiei el diak a ulebengelel.—Psa. 37:29; 90:10.

2. Ngmekera 2 Petrus 1:​12, 13 e ochotii el kmo a Rekristiano el mla mesiou er a Jehovah el kemanget el taem a dirk sebechir el ngmai a klungiolir er a uchetemel a osisechakl er a Biblia?

² Ngkmal diak el kired el mo merrekakl a uchetemel a osisechakl er a Biblia. A apostol Petrus a lilechesii a ongeru el babilengel el mora Rekristiano el tir a “mesisiich el oltirakl er a klemerang.” (Monguiu er a 2 Petrus 1:​12, 13.) Engdi tiakid el taem e ngmla er ngii a reklsuul el sensei me a diak lechedaol el chad er a chelsel a ongdibel el mle sorir el melai er a rudam el mo cheroid er a klemerang. (2 Pe. 2:​1-3) Me a Petrus a mle soal melisiich er a rudam me a rudos er ngii me bo lsebechir el mukerreu er a blulak el osisecheklir. Me ngulemeklatk er tir er a bebil el osisechakl el bla lesuub. Aika el osisechakl a mo ngosuterir el mo melemolem el loba blakerreng el mora ulebongel.

3. Momekesiu er a uchul me a rokui el Kristiano a kirir el melemolem el melebedebek a uchetemel a osisechakl er a Biblia.

³ A lsekum kede mla ngar er a klemerang el kemanget el taem e ngdirk sebeched el suub a beches el tekoi er a uchetemel a osisechakl er a Biblia. Ngsebeched el lomekesiu er ngii er tiang: A chef me a chad el dirk mesuub el mo meduch el meruul a kall a locha mo ousbech a basic el ingredients sel loruul a kall. Engdi klemengetel a taem a uchul me ngika el chef a mla mo klou a experience er ngii e mla suubii el mo meduch lousbech aika el osisiu el ingredients el meruul a kakerous el beches e ungil a chazi er ngii el kall. Ngdi osisiu, tirke el mla mesiou er a Jehovah el kemanget el taem me a redirk ulemuchel el mesuub er a Biblia a locha mo kakerous a rolel e te omes a uchetemel a osisechakl er a Biblia. A blekerdelel a klengar er kid me a lechub ngileakl el techall er omesiou el dolab a locha mla mengodech er a demetecholb el mei. Sel dolatk osisechakl er a Biblia el desiluub er a ngar er a mong e ngsebeched el mes a beches el rolel e ngngosukid er chelechang. Ka domes a rolel e ngsebechir tirke el mla mesiou er a Jehovah el kemanget el taem el ngmai a klubelir er a kldei el uchetemel a osisechakl er a Biblia.

A JEHOVAH A ULEMEOB

4. Kid el mla mo medengei el kmo a Jehovah a Ulemeob ngera ngmla rullii el mei er kid?

⁴ “Ngikel riruul a rokuil tekoi a Dios.” (Heb. 3:​4, BT) Kede medengei el kmo a planet er kid me a klengar el ngar er a chelsel a lebileob a mellomes a rengul e mesisiich el Ulemeob. Ngmilebid me ngungil el medengelkid. A ngaruchei er ngii ngomekerreu er kid. Ngmedengelii sel kot lungil el kired. Me kid el mla mo medengelii tia el beot el klemerang el kmo a Jehovah a Ulemeob a mla ngodechii a klengar er kid er a betok el rolel e mla meskid a mera el belkul me a moktek er a klengar.

5. Ngera el klemerang a sebechel ngosukid el mekurulii a klengariourreng? (Isaia 45:​9-12)

⁵ Tia el klemerang el kmo a Jehovah a Ulemeob a dirrek el sebechel losisecheklid er a klengariourreng. A Job er a di bo lolatk er ngii me a rebebil er a rechad e a Jehovah ulemeklatk er ngii el kmo Ngii a Ulemeob el olab a bek el klisiich. (Job 38:​1-4) Tia ngilsuir a Job el mo mesa el kmo a rolel a Dios a lmuut el kmal ngarbab er a rolir a rechad. A profet Isaia milluches el kmo: “Chutem ng oker er a omeob olekang el kmo, ‘Ngera ke meruul er ngii?’”—Monguiu er a Isaia 45:​9-12.

6. Oingerang e ngkmal tokubets el klou a ultutelel a bo dolatk er a klungel a llemesel me a klisichel a Ulemeob? (Dirrek el momes a siasing.)

⁶ A Kristiano sel lorael el mo klou a experience er ngii e ngsebechel lomuchel el mo di ultuil er a uldesuel er a bai lomes el bedul a Jehovah me a Tekingel el kirel a ulekrael. (Job 37:​23, 24) Me ngmekera mo ngosuir a bo le dmolech el melatk er a Jehovah el Ulemeob me a llomeserreng er ngii me a klungel a klisichel? (Isa. 40:22; 55:​8, 9) Tia el klemerang a mo ngosuir me ngmelemolem el ngariou a rengul e mo oba melemalt el uldasu el kirel a kuk di uldesuel.

7. Ngera ngmirruul er ngii a Rahela me bo lsebechel kongei er a beches el ulekrael?

⁷ A Rahela el kiei er a Slovenia a mlo metik el kmo a omelebedebekel el kirel a Ulemeob er ngii a mla ngosuir el mo kongei a omelodech el loruul a cheldebechel. Ngmelekoi el kmo: “A lebebil e ngdiak el beot er ngak a kongei omelilt el loruul a rudam el omekrael. El ua tiang, mo lmuut er a uriul er a kisang a 2023 Governing Body Update #8, ngkmal dirk mlo mechas a renguk er a kkot el mesa chesechesomel el odam el loltobed a cheldecheduch. Me ak milluluuch el mora Jehovah me lengesukak el mo kongei er tia el omelodech.” A Rahela mlo mtebengii el kmo a Jehovah el Ulemeob er a eanged me a chutem a kmal sebechel el omekrael er a cheldebechelel el ngar er a kot el ungil el rolel. A lsekum ke metik el kmo ngmeringel er kau a kongei er a beches el klemedengei me a lechub e ngmeringel er kau a kongei er a beches el ulekrael, e moba klengariourreng el melebedebek er a ngarbab el llemesel me a klisichel a Ulemeob.—Rom 11:​33-36.

UCHUL ME A DIOS A OMECHEI A RINGEL ME NGNGAR NGII

8. Kid el mla suubii a uchul me a Dios omechei a ringel ngmekera uchul a klungioled?

⁸ Ngera uchul me a Dios a omechei a ringel me ngngar ngii? A rebebil er a rechad el diak lodengelii a nger er tia el ker a mla mo kesib a rengrir er a Dios me a lechub e te omdasu el kmo ngdiak a Dios! (Osi. 19:3) Engdi kau a mla suubii el kmo ngklengit el duldiukes er ngii me kid el diak demecherrungel a uchul me ngngar ngii a ringel, ngdiak el Jehovah. Ke dirrek el mla suubii el kmo a kllourreng er a Jehovah a uchul me a rebetok el miliol el chad a mla mo medengei el kmo a Jehovah mo okngemedii a ringel me ngmo diak el mo cherechar e mla suubii a rolel e ngmo rullii tiang. (2 Pe. 3:​9, 15) Aika el klemerang a mla chemolodau e okedau er ngii.

9. Chelsel choua ngera el blekeradel e ngungil dolatk er a uchul me a Jehovah omechei a ringel me ngngar ngii?

⁹ Kede medengei el kmo ngkired el oba kllourreng el mengiil er a Jehovah el mo okngemedii a ringel. Me nguaisei engdi sel lsekum kid me a lechub ngrebetik er a rengud a mo chuarm er a ringel, diak el melemalt el omeruul, me a lechub ngmad a betik er a rengud e kede locha mo melatk el kmo ngera me a Jehovah diak lorechedii. (Hab. 1:​2, 3) Choua ikakid el taem e ngolechotel a llomeserreng a dolatk er a uchul me a Jehovah omechei er a remelemalt me te chuarm er a ringel.a (Psa. 34:19) Ngdirrek el sebeched el melatk er a moktek er a Jehovah el mo okngemedii a ringel me ngmo diak el mo cherechar.

10. Ngmekera Anne e mla outekangel er a kodellel a delal?

¹⁰ A klemerang el kirel a ringel a dirrek el ngosukid loutekangel. A Anne el kiei er a iungs er a Mayotte el ngar er a Indian Ocean a kmo: “Sera lemad a delak er a sesei el rak er uchei e ngkmal mlo mekngit a renguk. Me nguaisei engdi ak blechoel el di ngak lomeklatk er ngak el kmo a Jehovah diak luchul a ringel. Ngkersos a rengul el mo olekngemed a rokui el bedengel a ringel e olekiis er a rebetik er a rengud. Alta ngmekngit a renguk engdi ngmechas a renguk er a budech el kbetik er ngii sel kulebedebek aika el klemerang.”

11. Ngmekera klemedengei er kid el kirel a uchul me a Dios a omechei a ringel e ngosukid el melemolem el omerk er a klumech?

¹¹ Sel bo dodengelii a klemerang el kirel a uchul me a Dios a omechei a ringel e ngsebechel el odbechid el mo melemolem el omerk er a klumech. A uriul er a lesodii a uchul me a kllourreng er a Jehovah a uchul osobel el mo er tirke el obult, e a Petrus a dilu el kmo: “Ngkol kirel el mo ua ngera el chedaol a blekerdeliu me a omerelliu el olecholt a omeluu er a Dios.” (2 Pe. 3:​11, NW) A berkel a klumech a uldimukl er a ‘omeruul el olecholt a omeluu er a Dios.’ Kede di ua Demad el betik a rengud er a rechad. Ngsoad a bo lekiei er a beches el blekeradel er a Dios. A Jehovah oba kllourreng el bedul a rechad el kiei er a territory er kau e omesterir a techellir el mo mengull er ngii. Ngmera el ileakl el techall omobang el loureor el kldemel a Dios e olengeseu er a rokui el sorir el mo mesuub el kirel er a uchei er a lemei a ulebongel!—1 Ko. 3:9.

KEDE KIEI ER A “URIUL SILS”

12. Kid el mla suubii el kmo kede kiei er a “uriul sils” ngera ngmla ngosukid er ngii?

¹² A Biblia ouchais er a mo teletelir a rechad er a taem er a “uriul sils.” (2 Ti. 3:​1-5, BT) Sel domes a blekerdelir a rechad el meliuekl er kid e kede bleketakl el mesa el kmo tia el ulaoch a toutang. Sel domes a blekerdelir el merael el lmuut el mo mekngit e ngmenga el mo ulterekokl a rengud el kmo a Tekingel a Dios a kmal sebeched el ultuil er ngii.—2 Ti. 3:​13-15.

13. Ngmekera okesiu er a Jesus el ngar er a Lukas 12:​15-21 e sebechel ngosukid?

¹³ Kid el medengei el kmo kede kiei er a uriul sils a uchul me kede oba orechudel el reng. Molatk aike el sebeched el suub el kirel a orechudel el reng er a okesiu er a Jesus el ngar er a Lukas 12:​15-21. (Monguiu.) Ngera uchul me a Jesus a millekoi er ngike el merau el chad el kmo ng “kebelung”? Ngdiak losaod er ngii el merau e ngbai melekoi er ngii el dimlak lemelemalt a priority er ngii. Ngika “mengudel a kerruul el di [kirel e dimlak] le merau er medal a Dios.” Ngera uchul me tia el tekoi a mle orrechudel? A Dios a dilu er ngii el kmo: “Chelechal kesus e a klengar er kau a mo mengai er kau.” Ngmekera tia el okesiu e sebechel ngosukid er chelecha el taem? Ngmla mo kosekodel a taem. A ulebongel a di kmedung e ngmei. Me ngungil a di lekid el oker el kmo: ‘A turrekong er ngak ngochotii el kmo a kumes er a taem el orechudel? E aike el turrekong el kulisechakl er a rengelekek el mo olab? Ngak a kuusbech er a klisichek, temek, me aike el ngar ngii er ngak el mengudel a kerruul el kirek me a lechub ak mengudel a mekreos el kloklek er a eanged?’

14. Ngua desa er a experience er a Miki, ngera uchul me ngolechotel a llomeserreng a dolebedebek aike el bades el meketeklii el kmo kede kiei er a uriul sils?

¹⁴ Ngsebeched el ngodechii a osenged el kirel a klengar er chelechang sel dolatk a sioko el kmo kede kiei er a uriul sils. Tiakid a dilubech el mora odos el Miki. Ngmelekoi el kmo: “Sera ktobed er a high school e ngkmal mle soak a lebo er ngii a urerek el ngii a mo uchul e ngsebechek el mesuub a charm. Ngdirrek el mle turrekong er ngak a mo regular pioneer e mesiou er a beluu el lousbech a ngeso. A rebebil er a rudam me a rudos er a ongdibel er ngak a millisiich er ngak el mo kerekikl el melatk el kmo ngmera el sebechek el nguu a ureor el soak e a osisiu el taem e ngsebechek el mo pioneer e mo mesiou er a beluu lousbech a ngeso. Te ulemeklatk er ngak el kmo tia el beluulechad a di kmedung e ngmo nguemed me a chelsel a beches el blekeradel e ngsebechek el mesuub a rokui el charm el soak el diak a ulebengelel. Me ak ngileltii a skuul el di kekedeb a prokuram er ngii el ngilsukak el suub a duch el sebechek el lousbech. Tia mlo uchul me ngsebechek el metik er a ureor el support er ngak e ak regular pioneer e a uriul e ak millukl el mora Ecuador el mo olengeseu a beluu lousbech a ngeso.” A Miki me a bechil a mesiou er chelechang el loldingel ongdibel er tia el beluu.

15. A rechad el dirkak lebo er ngii a klemeriarreng er tir er a ungil chais te locha mo mekerang? Mouchais er a ta er a example. (Dirrek el momes a siasing.)

¹⁵ Ngdiak el kirel mo mechitechut a rengud a lsekum a rechad a diak el sorir a ungil chais. A rechad a sebechir el mengodech a uldesuir. Molatk er a half brother er a Jesus er a Jakobus. Ngmilsa Jesus el mukeroul el mo klou e mo Mesias e diak a chad el lolisechakl el uai ngii. Ngdi a Jakobus a mle betok el rak el diak loltirakl er a Jesus. Ngdi mle uriul er a lebekiis a Jesus e ngmlo ta er a disaiplo. Ngika kmal mlo blak a rengul el disaiplo!b (Jn. 7:5; Gal. 2:9) Me ngkmal klou a ultutelel olak em give up er a rechedam el diak a klemeriarreng er tir er a ungil chais e lak meterob el melasem el lomerk el mo er tirke el dimlak el sorir el lorrenges er kau. Lak mobes el kmo kede kiei er a uriul sils, me a bereked er a klumech a kmal orechudel. Aike el mdu er tir a locha mo ngar ngii a lerellii el mo er tir er uriul, el locha mo uriul er a lomuchel a kloul ringel.c

MOLEMOLEM EL LOBA OMERENG EL SAUL EL KIREL A ULEKLATK ER A JEHOVAH

16. Ke mekera mla ngmai a klungiolem er a uleklatk er a Jehovah? (Dirrek el momes er a baks “Mousbech el Lolengeseu er a Rebebil.”)

¹⁶ A bebil er a kall er a klereng el lomeskid a cheldebechel a mleketmokl el kirir tirke el dirkak a ta lerenges a uchetemel a klemerang er a Biblia. El ua tiang, a cheldecheduch el mora buai el loltobed er ngii er a bek el sandei, article me a video el loltobed er a jw.org, me a magazine el mora buai a mleketmokl el kirir a rechad el diak el Sioning. Me nguaisei engdi kede dirrek el melai a klungioled er a uleklatk el lomeskid. Aika rullii a bltkil a rengud el mora Jehovah el lmuut el mo dmolech, smisichii a klaumerang er kid er a Tekingel, e ngosukid el lmuut el mo ungil olisechakl er a klemerang er a Biblia el mora rebebil.—Psa. 19:7.

17. Chelsel choua ngera el blekeradel e ke locha mo melatk a uchetemel a osisechakl er a Biblia?

¹⁷ Kid el Resioning er a Jehovah a kmal mo dmeu a rengud sel lebo er ngii a beches el omesodel a klemerang er a Biblia. Engdi kede dirrek el kmal oba omereng el saul el kirel aike el uchetemel a osisechakl er a Biblia el ulekedid el mei er a klemerang er a uchelel. A lsekum ngmo soad el melisiich er a di uldesued er a bai dekengei er a ulekrael el mlara cheldebechelel a Jehovah e bo lengariou a rengud e lak dobes el kmo, ngike el omekrael er a cheldebechel a Ulemeob el olab a bek el klisiich me a rokui el llomeserreng. E sel lsekum kid me a lechub ngbetik er a rengud a outekangel a ringel e dolebedebek a uchul me a Jehovah a omechei a ringel me ngngar ngii. E sel bo dolilt er a rolel e kede mo ousbech a temed me aike el ngar ngii er kid e lak dobes el kmo kede kiei er a uriul sils me a taem a kosekodel. A uleklatk er a Jehovah lolemolem el lomekllomes er kid e lesisichid e lodbechid el mo melemolem loba blakerreng el mesiou er ngii.