“Lomekedong er a Re Mechuodel”

1. Ngmekera Jehovah e ochotii el kmo, a resib er ngii a mekreos er osengel?

A RESIB er a Jehovah mekreos er osengel. Ngulemechar er tir loba rsechel a Jesus e ulemekngerachel er a remechuodel er a ongdibel el mo omekerreu er tir. (Rel. 20:​28, NW) Ngmla tutkii a Jesus el mo bdelul a ongdibel. Tir el terung a sorir a remechuodel a bo lemedemedemek omerellir el mora resib. Me a remechuodel oltirakl a ulekrolel a Jesus e olengeseu er a resib el mo melemolem el mesisiich a deleuill er tir me a Jehovah.—Isa. 32:​1, 2.

2. A Jehovah ngtokubets el melatk er a rua techang? (Esekiel 34:​15, 16)

² A Jehovah a kmal omekerreu el kirir a rokui el sib er ngii tokubets tirke el chuarm. Ngolengeseu er tirke el chuarm er a tekoi er a klereng loeak a remechuodel. (Monguiu er a Esekiel 34:​15, 16.) Me nguaisei engdi ngsoal kid el rokui a bo dosiik a ngeso sel bo dousbech er ngii. Ngsoal a doluluuch lolengit a ngeso er ngii e dirrek el kmal soal a dolengit a ngeso er a re ‘klekerengel a sib, mar . . . sensei’ er a ongdibel.—Efe. 4:​11, 12, BT.

3. Ngmekera mo klungioled sel dorriter er a rolel e a Jehovah ousbech er a remechuodel?

³ Ngar tia el suobel, e kede mo mesaod er a rolel e a Jehovah ousbech er a remechuodel lolengeseu er tirke el mla mo mechitechut a deleuill er tir me a Jehovah. Kede mo onger aika el ker: Ngoingerang e ngungil dolengit a ngeso er a remechuodel? Ngera uchul me ngungil el dolengit a ngeso er tir? Ngmekera lolengeseu er kid? Mo lmuut me a lak dechelebangel a ringel er chelechang, me a nger er aika el ker a mo ngosukid el lmuut el mo oba klou el omereng el saul el kirel a rolel e a Jehovah ousbech er a remechuodel lolengeseu er kid. Kede dirrek el mo mesaod aike el kired el meruul sel bo dousbech a ngeso er tir.

NGOINGERANG E NGKIRED “LOMEKEDONG ER A RE MECHUODEL”?

4. Kede mekerang medengei el kmo a Jakobus 5:​14-16, 19, 20 a melutk el kirel a chad el smecher er a klereng? (Dirrek el momes a siasing.)

⁴ A disaiplo el Jakobus a smodii a rolel e a Jehovah ousbech er a remechuodel el olengeseu er kid. Ngmilluches el kmo: “Ng ngar ngii er a delongeliu a smecher? Lomekedong er a re mechuodel er a ikelesia el mei.” (Monguiu er a Jakobus 5:​14-16, 19, 20.) Ngika mesaod er a chad el smecher er a klereng. El ua tiang, a chad el smecher a ledu er ngii me ngomekedong er a remechuodel ngdiak el toktang. Kede dirrek el lmuut el mesa el kmo ngmesaod er a chad el smecher er a klereng e le ngdmu el kmo, ngmo ungil er a secherel sel lemusubes a kngtil. Sel dolatk er ngii e a rolel a chad a bo lungil er a klereng a kmal di uai a chad el smecher. Sel desecher e kede mo omes er a toktang e smaod a symptoms er kid el mo er ngii, e mo oltirakl a tekingel. Ngdi osisiu, sel desecher er a klereng e kede mo omes er a ta er a remechuodel, smodii el mo er ngii a blekeradel el dengar ngii, e mo oltirakl a ulekrael er a Biblia el lebeskid.

5. Ngmekera sebeched el mo medengei el kmo a deleuill er kid me a Jehovah mla mo mechitechut?

⁵ Tia el teletael el mla meketmokl el losaod er ngii a 5 el bliongel er a Jakobus a melisiich er kid el mo mengedecheduch er a remechuodel sel bo de feel el kmo ngmerael el mo mechitechut a deleuill er kid me a Jehovah. Ngolechotel a llomeserreng a dolengit a ngeso er tir er uchei er a doridii a kengei er a Jehovah! Ngkired el mo honest el merriter er kid. A Bades a melekoi el kmo ngsebeched el di kid el cholebeldid el kmo ngmesisiich a deleuill er kid me a Jehovah alta mera er ngii ngdiak el mesisiich a deleuill er kid me Ngii. (Jak. 1:22) Tiakid a dilubech el mora Rekristiano er a Sardis. Te ulemdasu el kmo te daijob engdi a Jesus a dilu er tir el kmo te mla mo diak loldeu er a rengul a Jehovah. (Och. 3:​1, 2) Me ngmekera sebeched el mo medengei el kmo ngua ngera deleuill er kid me a Jehovah? A ta er a rolel a sel de compare er a klemeriarreng er kid el kirel omengull er kid er chelechang el mora dekot el metecholb. (Och. 2:​4, 5) Ngsebeched el di kid el oker: ‘Ngak, ngmla mo mechitechut a klemeriarreng er ngak el menguiu e melebedebek er a Biblia? Ngak, ak mora rokui el miting? E sel kngar er a miting, e ak prepared el kirel? Ngdmeu a renguk el lomerk el ua ngar er a mong me a lechub ngbai soak el mengoit a taem el meruul a lmuut el bebil er a tekoi? Ngak ak di melatk el kirel ku udoud er chelechang?’ A lsekum a nger er kid er a ta er aika el ker a choi, e ngbelkul a kmo a deleuill er kid me a Jehovah a mla mo mechitechut. A lsekum ngdiak el sebeched el di kid el smisichii a deleuill er kid me a Jehovah me a lechub kede mla rullii a tekoi el ngii a diak el soal, e ngungil dolengit a ngeso er a remechuodel.

6. Ngera kirir el meruul er ngii tirke el rullii oberaod el klengit?

⁶ Me nguaisei ngar ngii a bebil el klengit el kmal oberaod me a chad a sebechel mesuld a ngklel er a ongdibel a lsekum ngdiak lobult er a kngtil. A lsekum kede mla rullii chouaitia el klengit e ngkired el mengedecheduch er a remechuodel. (1 Ko. 5:​11-13) A chad el rullii oberaod el klengit a diak el sebechel di ngii el sumecheklii a deleuill er ngii me a Jehovah. A lsoad el nguu a klausubes er a Jehovah loeak a olubet e ngkired el meruul aike el tekoi el ‘ochotii el kmo kede mla obult.’ (Rel. 26:20) E a ta er aika el tekoi el kired el meruul er ngii a lsekum kede rullii oberaod el klengit a mo ouchais a remechuodel.

7. Ngtecha dirrek lousbech a ngeso er a remechuodel?

⁷ A remechuodel a diak di lolengeseu er tirke el mla rullii oberaod el klengit te dirrek lolengeseu er tirke el mo mechitechut er a klereng. (Rel. 20:35) El ua tiang, ke locha medakt el kmo ke mo el mo mechitechut er aike el olengibes er kau. Ngulterekokl el kmal mo meringel er kau a lsekum a uchei er a omsubii a klemerang e ke mle addict er a mekngit el kar, ulemes a siasing er a remeau, me a lechub ke kiliei el ngar er a deleboes. Lak medakt lolengit a ngeso. Ngsebechem el mengedecheduch er a ta er a remechuodel el moumerang er ngii el kmo ngmo kerekikl lorrenges er kau, meskau a ungil advice, e olterekokl er a rengum el kmo ngkmal sebechem el otngakl aika el mengesuseu er kau e odeuir a rengul a Jehovah. (Oli. 4:12) A lsekum ngmla mo mesaul a rengum el di oldechelakl a ngelbesel a rengum, e a remechuodel a sebechir el omeklatk er kau el kmo a Jehovah a kmal dmeu a rengul er kau lolengit a ngeso. Ngochotii el kmo ngngariou a rengum e omekerreu el kirel a deleuill er kau me a Jehovah.—1 Ko. 10:12.

8. Kid, ke dousbech el mo mengedecheduch er a remechuodel el kirel a rokui el cheleuid el tekoi el deruul? Mosaod.

⁸ Ngdiak dousbech el mo mengedecheduch er a remechuodel el kirel a rokui el cheleuid el tekoi el deruul. El ua tiang, okmo ke dulii a diak lungil el tekoi el mora odam me a lechub e ngodos er kau me a lechub ngkesib a rengum loldiu er tir. A lsekum tia duubech e ngdiak mousbech el mora ta er a remechuodel bai moltirakl er a ulekrael er a Jesus e bo mongedecheduch er ngii lolengit a klausubes. (Mt. 5:​23, 24) Ngsebechem el research el kirel a delemedemek, kllourreng, me a ulserechakl el reng me bo lsebechem el lmuut el mo ungil lolecholt ngii el blekeradel er a ngar medad. Me nguaisei engdi a lsekum ngdirk diak el sebechem el sumecheklii a mondai er kau e ngsebechem lolengit er a ngelsuil a ta er a remechuodel. A apostol Paulus a ullengit er a ta er a odam el ngar er a babilengel el mora ongdibel er a Filipi me lengesuir a Euodia me a Sintikei el sumecheklii a mondai er tir. A ta er a remechuodel er a ongdibel er kau me nglocha dirrek el sebechel ngosukau.—Fil. 4:​2, 3.

NGERA UCHUL ME NGKIRED LOMEKEDONG ER A REMECHUODEL?

9. Ngera uchul me ngdiak el kired el mecherei a rrenged me bo luchul e ngdiak bo dongedecheduch er a remechuodel? (Osisechakl 28:13)

⁹ Kede ousbech er a klaumerang me a blekeu el mo olengit a ngeso sel derellii oberaod el klengit me a lechub a lsekum kede mo feel el kmo ngmla mo diak el sebeched el mtok a chelitechetud. Ngdiak el soad el mecherei a rrenged me bo luchul e lak bo dongedecheduch er a remechuodel. E ngerang? E le Jehovah mla meskid a remechuodel el mo olengeseu er kid el mo melemolem el mesisiich a deleuill er kid me Ngii. Me sel bo dongedecheduch er a remechuodel e kede ochotii el kmo kede oumerang e olengesenges er a Jehovah. Kede ochotii el kmo kede ousbech er a ngelsuil el mo melemolem el meruul a llemalt. (Psa. 94:18) E a lsekum kede mora klengit e kede mo nguu a klechubechub er a Jehovah sel douchais a kngtid e decheridid er ngii.—Monguiu er a Osisechakl 28:13.

10. Ngera sebechel duubech a domart a kngtid?

¹⁰ Sel douchais er a remechuodel a kngtid e a Jehovah sebechel lousubes er kid me kid a sebechel lmuut el mo ungil a deleuill er kid lobengkel. Engdi a lak dongedecheduch er tir e domart a kngtid e ngsebeched el rullii a blekeradel lmuut el mo mekngit. A King David er a lolasem el lomart a kngtil e ngmlo chuarm a uldesuel me a rengul me a bedengel, e miltemall a deleuill er ngii me a Jehovah. (Psa. 32:​3-5) Ngdi ua secher me a lechub e ngtelemellel a bedenged el lmuut el kmal mo meringel el kired a lak demereched el omkar er ngii, ngdi osisiu el kired a lsekum kede rullii oberaod el klengit e diak demereched el mo osiik a ngeso er a remechuodel. A Jehovah diak el soal tiang a leduubech a uchul me ngmengelechel er kid el mo mengedecheduch er a remechuodel, e le ngousbech er tir lmuut el mesumech er a deleuill er kid me ngii.—Isa. 1:​5, 6, 18.

11. Ngera dirrek el duubech sel lak douchais er a remechuodel el kirel oberaod el klengit?

¹¹ A lsekum kede omart er a oberaod el kngtid e ngsebechel mo uchul a telemellir a rebebil. Ngsebeched el mo olekebai er a chedaol reng er a Jehovah me ngdiak lemimokl el remurt er a chelsel a ongdibel e dirrek el mo melemall er a budech er a rudam me a rudos er kid. (Efe. 4:30) Ngdi osisiu, a lsekum kede mo medengei el kmo ngngar ngii a chad er a ongdibel el mla rullii oberaod el klengit, e ngkired el melisiich er ngii me bo longedecheduch er a remechuodel.a A lsekum ngika el chad a diak bo longedecheduch er tir e ngkired louchais er a remechuodel e le lak e ngsebeched el mo chelsechusem er a kngterir. (Lev. 5:1) Kid el betik a rengud er a Jehovah a uchul me kede mo mengedecheduch er a remechuodel e ouchais er tir el kirel. Tia mo olengeseu el meruul er a ongdibel me ngmelemolem el klikiid e ngosuir ngike el mlora klengit el lmuut el mo ungil a deleuill er ngii me a Jehovah.

TE MEKERA REMECHUODEL A LOLENGESEU ER KID?

12. Ngmekera remechuodel a lolengeseu er tirke el mechitechut er a klereng?

¹² A Biblia melekoi er a remechuodel me bo lolengeseu er tirke el mechitechut er a klereng. (1 Th. 5:14) A lsekum ke mla rullii a klengit e te mo oker er kau a ker el melasem el mo understand aike el ngar er a uldesuem me a rengum. (Osi. 20:5) Nglocha diak lebeot er kau a mengedecheduch er a remechuodel. Ke locha sekemerur me a lechub ke kmal merur el mesaod er a tekoi el mla duubech. Engdi ke mo ngosuterir sel mouchais er a tekoi el mchelebangel er ngii. Lak obekikl el kmo ngmo el mo “terrekakl” a cheldechedecham. (Job 6:​3, NW) A remechuodel a diak di lemereched el mo remuul a uldesuir te bai mo kerekikl lorrenges er kau e melasem el mo medengei a rokui el tekoi er a uchei er a lomeskau a ulekrael er a Biblia. (Osi. 18:13) Te mtebengii el kmo a chad el lolengeseu er ngii a ousbech a taem me te medengei el kmo nglocha mo betok er a ta el taem el longedecheduch er ngii.

13. Ngmekera remechuodel e sebechir el ngosukid loeak a nglunguchir me a ulekrael er a Biblia el lomeskid? (Dirrek el momes a siasing.)

¹³ A remechuodel a diak el sorir el meruul er kau el lmuut el kmal mo mekngit a rengum er a tekoi el mrirellii. Te bai mo meluluuch el kirem. A Jehovah mo orrenges a nglunguchir el ngii a “kmal klou a le rellii.” Nglocha kmal mo mechas a rengum e le nglunguchir a mo smisichau e chemolodau. A ngelsurir a dirrek el uldimukl er ngii a “oba ngklel a Rubak el [choiltau] er a cheluch.” (Jak. 5:​14-16) Tia el “cheluch” a melutk el kirel a klemerang el Tekingel a Dios. Me a remechuodel a mo olab a bades er a Biblia el mengelaod er kau e ngosukau el lmuut el sumechii a deleuill er kau me a Jehovah. (Isa. 57:18) A ulekrael er tir el mengai er a Biblia a sebechel smisichau el mo melemolem el meruul a llemalt. Ngoeak a remechuodel e ngsebechem el rongesii a Jehovah el ua lolekoi er kau el kmo: “Tiakid a rael. Bo morael er ngii.”—Isa. 30:​21, NW.

14. A doltirakl er a Galatia 6:1 (NW), e te mekera remechuodel a lolengeseu er a chad el ‘mla touchakl’? (Dirrek el momes a siasing.)

¹⁴ Monguiu er a Galatia 6:1 (NW).b A Kristiano el ‘mla touchakl’ a dikea lorael loltirakl a melemalt el llechul a Jehovah. A mla touchakl a sebechel melutk er a omelilt el ngii a diak lochotii a llomeserreng me a lechub ngoberaod el klengit. A Rekristiano el mechuodel el betik a rengrir er a odam er tir a “[oba] reng er a delemedemek el sumecheklii.” A tekoi er a Grik el lousbech er ngii el moiuid el “sumecheklii” a dirrek el sebeched lousbech er ngii el mesaod er a rolel a toktang omeklemalt er a chiuesel a chad el mla mo chebirukel me lsebechel mo ungil mo mechubs. Ngdi ua ungil el toktang el kerekikl sel lomeklemalt er a chiuesel a chad me lak lluut el kmal mo meringel, a remechuodel a melasem el olengeseu er a chad el ngar er a rolel e ngdiak el lluut el melechel a ringel el mo er ngii. A Biblia dirrek el dmu er a remechuodel el kmo, “bo mkerekikl er kemiu.” A remechuodel sel lolengeseu er kid el omeklemalt er a roled e te mtebengii el kmo tir me te dirrek el diak lemecherrungel me te dirrek el mo remuul a cheleuid. Me te kerekikl me ngdiak bo lomdasu el kmo te lmuut lungil er ngike el lolengeseu er ngii. Te bai melasem el mo ngariou a rengrir e olecholt er a klechubechub.—1 Pe. 3:8.

15. Ngera kede locha mo meruul er ngii sel lebo er ngii a mondai er kid?

¹⁵ Ngkmal sebeched el loumerang er a remechuodel er a ongdibel. Tirka bla le train er tir me ngdiak losaod a berrotel el tekoi er kid, me a ulekrael er tir a mengai er a Biblia el diak el uldesuir, me tir a mo melemolem el olengeseu er kid el mengol a berraod er kid. (Osi. 11:13; Gal. 6:2) Alta ngkakerous a blekerdelir me a experience er tir engdi ngsebeched el mimokl el mengedecheduch er a ngii di el mechuodel sel lebo er ngii a mondai er kid. Me nguaisei engdi ngdiak bo dorael er a delongelir a remechuodel el melai a kakerous el advice el dimerekmo denguu sel soad el advice. A lsekum kede meruul er tiang e kede kmal di mo uai a rechad el di sorir lorrenges aike el sorir lorrenges e diak el sorir el lorrenges aike el lolisechakl er kid a Jehovah er a Tekingel. (2 Ti. 4:3) Sel bo dongedecheduch er a mechuodel el kirel a mondai er kid e nglocha mo oker er kid el kmo kede mla mengedecheduch er tirke el bebil er a remechuodel el kirel me a ngera te dilung. E a klengariourreng a locha mo odbechii el kot e ngmo olengit a advice er a kuk ta er a remechuodel.—Osi. 13:10.

NGERECHELED

16. Ngera kirel a derta er kid el meruul er ngii?

¹⁶ Me alta remechuodel omeskid a advice e olengeseu er kid sel lebo er ngii a mondai er kid, engdi ngdiak bo louchais er kid el kmo ngngera kired el meruul er ngii. A derta er kid a kirel lochotii el mora Jehovah el kmo ngbetik a rengud er ngii e soad lodeuir a rengul loeak aike el dolekoi me a doruul er a klengar er kid er a bek el sils. E ngii a kmal mo ngosukid el meruul a mellomes el omelilt e mo melemolem loba blakerreng el mo er ngii. (Rom 14:12) Seikid a uchul me a remechuodel a diak louchais er kid a kired el meruul te bai ousbech er a Biblia el ngosukid el mo medengelii a uldesuel a Jehovah e mechikid me kede di kid el melilt. Sel doltirakl a ulekrael er a Biblia e kede train er kid el mo meduch el “tiriter a ungil ma mekngit” e mo mellomes el melilt.—Heb. 5:14.

17. Ngera soal a doruul er ngii a Jehovah?

¹⁷ Kede mera el oba omereng el saul el Jehovah kmal omekerreu er kid el di ua ungil mengkerengel a sib a lomekerreu a chermel el sib. A Jehovah ulderchii a Jesus el ngike el “ungil mengkerengel a sib” el me kokedir olubet el kired me bo lsebechel mo er ngii a techelled el nguu a diak a ulebengelel el klengar. (Jn. 10:11) A Jehovah dirrek el mla meskid a remechuodel er a ongdibel el mo omekerreu er kid el ua letilbir el kmo: “Ak mo meskemiu a remengkerengel a sib el tir oltirakl er a renguk, te mo omeka er kemiu er a klemedengei me a sekutaberreng.” (Jer. 3:​15, NW) Sel demechitechut me a lechub e kede smecher er a klereng e ngdiak el kired el omai er a rengud a mo mengedecheduch er a remechuodel lolengit a ngeso. Derellii er a rengud el mo mui el ngmai a klungioled er a remechuodel er a ongdibel el bla lebeskid tir a Jehovah.