1925​—Dart el Rak er a Mla Me Mong

METEMALL A OMELATK

A Remesuub er a Biblia ulemdasu el kmo a 1925 e a beluulechad el rokir a mo baradis. E ngerang? A Brother Albert Schroeder el uriul e ngmlo mesiou el ta er a chedal a Governing Body a dilu el kmo: “Aki uluumerang el kmo a 1925 e tirke el medechel el rengellitel a mo mengai el mora eanged e tirke el uleba blakerreng er a irechar el ua Abraham, David, me a relmuut el bebil a mo mekiis el mo omekrael er a rengar tia el chutem.” Sera lak el duubech tia el tekoi e ngkmal mlo mekngit a rengrir a rebebil el odam me a odos.—Osi. 13:12.

Me nguaisei alta ngmlo mekngit a rengrir engdi a ruumesingd er a Remesuub er a Biblia a millemolem el mechesang el omerk er a klumech. Te mlo mtebengii el kmo a ngerechelir el sioning el kirel a Jehovah a mle kot el klou a ultutelel el tekoi el kirir el meruul er ngii. El ua tiang, ka molatk er a ureor lurruul er ngii el broadcast er a klemerang el mora cheroid el beluu loeak a razio.

NGLMUUT LOBERK A BROADCAST LOEAK A RAZIO

Sera lemeteketek a WBBR el radio station e te betok el chad a ulerrenges er ngii. Me a 1925 e a Remesuub er a Biblia a tileketekii a lmuut el ta er a radio station er bita er a Chicago, Illinois. A WORD a mle ngklel tia el beches el station. A Ralph Leffler el ullengeseu el meleketek er tia el radio station a dilu el kmo, “A temel a winter, el sel klebesei el kmal mekelekolt e a rechad el kiliei er a kmal cheroid a ulerrenges er a WORD.” El ua tiang, a ta el telungalek el mle 3,000 el mael a cherridir el kiliei er a Pilot Station el beluu er a Alaska a ulerrenges er a ta er aike el kot el broadcast. A uriul e tia el telungalek a lilechesii a babier el mo er tirke el uluureor er tia el station el mereng a sulir el kiltmeklii e otebedii a prokuram el ngii a kmal millisiich er tir e ngosuterir el mo medengei a lmuut el betok el kirel a Dios me a Biblia.

A The Watch Tower er a December 1, 1925 a smodii a uchul me a rebetok el chad a mlo sebechir rongesii tia el prokuram: “A WORD a ta er aike el kot el mesisiich a antenna er ngii el station er a beluu er a Merikel. Ngremurt er a 5,000 el watts. A Ongos me a Ngebard er a beluu er a Merikel me a dirrek el Cuba me aike el kmal cheroid el beluu er a Alaska a sebechel nguu a signal er tia el station. Tekoi el lerirenges er tia el station a uchul me a rebetok el dirkak el lerengesii a klemerang a mlo semeriar.”

Ngar tia el osisiu el taem e a Remesuub er a Biblia a dirrek el mle sorir el lousbech er a razio el lomerk er a ungil chais er a Canada. Me a 1924 e te tileketekii a CHUC radio station er a Saskatoon, Saskatchewan. Tia ta er aike el kot el radio station er a Canada el kirel a klechelid. Engdi a 1925 e ngmlo kirir losiik er a lmuut el klou el basio. Me a cheldebechel a ngileklii el mora Regent Building, el mechut el theater er a Saskatoon el lebilecherar e renovate er ngii el mo radio station.

Ngoeak tia el radio station e ngmlo sebechir el rongesii a ungil chais a rechad el kiei er aike el cheroid e mekekerei el basio er a delengchokl el bereberriid er a Saskatchewan. El ua tiang, ngar er a kekerei e cheroid el basio el blil a delengchokl e a Mrs. Graham a milluches el request aike el babilenged er a uriul er a lorrenges er a ta er a broadcast. A Brother George Naish a kmo, “A ongtil a kora kmal mle tekoi er a reched me aki uldureklii a rokir el set er a Studies in the Scriptures” el mo er ngii. Ngdi mle telkib e a Mrs. Graham a mlo omerk er a klumech er a Renged el mora beluu el lmuut el ngar er a cheroid.

OBEKETAKL A KLAUMERANG ER KID

Ngtilobed a kmal klou a ultutelel el suobel er a The Watch Tower er a March 1, 1925 el dai er ngii a kmo “Birth of the Nation.” Ngera uchul me tia el suobel a kmal mle klou a ultutelel? A Remesuub er a Biblia a mle medengei el kmo a Satan a ngar ngii a cheldebechelel el uldimukl er ngii a remekngit el anghel, klsuul klechelid, kabelment, me a tekoi er a siobai er tia el beluulechad. Me nguaisei engdi ngoeak tia el suobel e a “blak a rengul e mellomes a rengul el mesiou” a ngilsuir a klodam el mo mesa el kmo a Jehovah me ngdirrek el ngar ngii a cheldebechelel el ngii a uldimukl er ngii a remesiungel el ngar er a eanged me a ngar er a chutem. Tia el cheldebechelel a Jehovah a separate er a beluulechad er a Satan, me a rechedal a dmak loureor el support er a Jehovah e omtok er a Satan me a rultirakl er ngii. (Mt. 24:45) Me a lmuut kung a blak a rengul e mellomes a rengul el mesiou a silodii el kmo, a Rengedel a Dios a milteketek er a 1914 me tiakid el rak e ngdilubech a mekemad er a eanged sei a uchul me a Satan me a remekngit el anghel er ngii a mlodik er a eanged el mei er a chutem e diak el sebechir el mo er.—Och. 12:​7-9.

A rebebil a mle meringel er tir a kongei er tia el beches el klemedengei. Seikid a uchul me tia el suobel a dilu el kmo: “A lsekum te ngar ngii a menguiu er tia el Watch Tower el meringel er tir a kongei aika el tekoi el llechukl, e ngungil loba kllourreng e loumerang el ulsirs er a Jehovah e lolemolem el mesiou er ngii loba blakerreng.”

A Tom Eyre el ta er a colporteur (el chelechang ngokedongall el pioneer) er a Britain, a ouchais a mle uldesuir a Remesuub er a Biblia el kirel tia el suobel: “A rudam a kmal mle dmeu a rengrir er tia el omesodel a Ocholt 12. Sera ki bo modengei el kmo a Renged a mla meketmokl er a eanged e ngliluut el kmal mo somam lomerk er a ungil chais el mora rebebil. Nguldbechemam el mo menglou er a ureram el omerk e ngilsukemam el mo mesa el kmo a Jehovah omekrael er a rechedal el mo meruul a meklou el tekoi.”

SIONING EL KIREL A JEHOVAH

A Resioning er a Jehovah er chelecha el taem a kmal ungil medengei aike el lolekoi a Isaia 43:10 el kmo: “Kemiu a sioning er ngak; ak millilt er kemiu el mesiungek.” Me nguaisei engdi aike el rak er uchei er a 1925 e aika el babilenged a dimlak el blechoel el mesaod er tia el bades. Engdi tia mlengodech. Ng 11 el suobel a tilobed er aike el The Watch Tower er a 1925 el mesaod er a Isaia 43:10 me a 12.

A ulebengelel a August 1925 e a Remesuub er a Biblia a mlo kldibel er a convention el mla er ngii er a Indianapolis, Indiana. A tekingel a Joseph F. Rutherford el outkeu er a rechad el llechukl er a prokuram er a convention a dilu el kmo: “Kede mla ngmai er tia el convention . . . omelisiich er a Rubak me bo lsebeched el lmuut el mo omerk er a klumech el mla mukbeches a klisiched el mo sioning er ngii.” Temel tia el eai el klebesei el convention e a rokui el mla er ngii a lullisiich er tir el mo ousioning el kirel a Jehovah er a bek el techall.

A Sebadong el August 29 e a Brother Rutherford a ultebedii a cheldecheduch el dai er ngii a kmo “A Call to Action.” Ngmillisiich er a klungel a ultutelel a ureor er a berkel a klumech el kmo: “A Jehovah a dmu er a rechedal el kmo . . . : ‘Kemiu a sioning er ngak . . . Ngak a Dios.’ E mocha melekoi er tir aika el kmal oberaod el tekoi: ‘Modars olangch me bo lodengei a rechad.’ Ngdiak a ngodech el chad el sebechel locholt olangch ngdi ta el [rechedal], el tirke el loba chedaol reng er a Rubak, e sioning er ngii.”—Isa. 43:12; 62:10.

A uriul er a cheldechedechal a Brother Rutherford e ngchiliuii a babier el dai er ngii a “Message of Hope.” A rechad a kilengei a tekoi el mildung er tia el babier el ngii a dmu el kmo ngdi ta el Rengedel a Dios a mera el omelatk el mo meskid a “budech, diak a ulebengelel el deurreng, me a ilmokl e dirrek el mo rullid el mo ungilbesud, e ungil a klengar me a health er kid.” Tia el babier a mloiuid er a uriul el mo betok el omelekoi e te print er ngii el tract el lousbech er ngii el lomerk er a klumech. Te rirous a bekord el 40 el miliol el copy er ngii.

Ngmlo chuib a lmuut el bebil el rak e a Remesuub er a Biblia a ngildechii a ngklir el mo Resioning er a Jehovah. Me nguaisei engdi te miltebengii el kmo ngngerechelir el mo sioning el kirel.

MO LMUUT EL MO OLDINGEL ER A RESEMERIAR

Sera lorael el mo betok a Remesuub er a Biblia el meliuekl er a beluulechad el rokir e a cheldebechel a millisiich er tir me lluut el mo oldingel er tirke el ulechotii a klemeriarreng er a ungil chais. Uriul er a bo lemerek a campaign el merous er a tract el Message of Hope, e a Bulletina a dilu el kmo: “Mluut el mo oldingel aike el blai el bilecherei a copy er a Message of Hope el tract.”

A Bulletin el tilobed er a January 1925 a mle uldimukl er ngii a report el mlara ta er a Remesuub er a Biblia er a Plano, Texas. Ngdilu el kmo: “Ngkmal mechas a rengmam e le aike el basio el kim liluut el mo er ngii a lmuut el mle ungil a dbechel er aike el beches el basio el ki bo momerk a klumech er ngii. Ngar ngii a kekerei el basio er a delengchokl er a territory er kemam el mla mo eim el taem el ki bo er ngii er a chelsel aika el mereko el teruich el rak. . . . A Sister Hendrix me a delak a kmal dirk liluut el mo omerk er ngii e rirous a kmal betok el babier.”

Ngar er a beluu er a Panama e a ta el colporteur a milluches el kmo: “A rebetok el chad el dimlak el sorir el orrenges er a kkot el mong a mlengodech a uldesuir er a kluut el mong, er a mong me ngongerung me a lechub e ngongedei el taem. Chelecha el dirk mlo merek el rak e ak milengoit er a klou el temek el omerk el mo er tirke el blo kuldingel er tir er a ngar er a mong e kmal ngar ngii a ungil experience er ngak lobengterir a rebebil er tir.”

MELATK ER A NGAR MEDAD EL TAEM

Ngar er a babilengel a Brother Rutherford er a bek el rak el mora re colporteur e ngmilsaod er a ureor el mla meketmokl me a ureor el merael el mei. Ngdilu el kmo: “Chelecha el dirk mlo merek el rak e ngmla er ngii a ileakl el techelled el mengelaod er tirke el mekngit a rengrir. Tia el ureor a mla meskid a kmal klou el deurreng . . . Chelecha el mera el mei el rak a mo meskemiu a lmuut el betok el techall el mo sioning er a Dios me a rengedel e ochotii el kmo ngtecha mera el mengull er ngii. . . . Mada dedak el rokui el lousbech a ngered el oldanges er a Dios me a King er kid.”

A ulebengelel a rak er a 1925 e a rudam a millib el mo menglou er a Bethel er a Brooklyn. A 1926 e te mo mechelii sel kot el klou el ureor el lomekedechor el bla loruul er ngii a cheldebechel.