Lak Mobes el Meluluuch el Kirir a Rebebil

1. Kede mekera medengei el kmo a nglunguched a meklou a ultutelel er a Jehovah?

A NGLUNGUUCH a mengasireng el sengk. Ka di molatk er tiang: A Jehovah mla mesterir a rechanghel a ngerechelir. (Psa. 91:11) Ngdirrek el mla msang a ngelekel a oberaod el ngerachel. (Mt. 28:18) Me nguaisei engdi a Jehovah a mla eklii a nglunguuch el di kirel. Ngdiak lomekngerachel er a nglunguuch el mora ngii di el chad. A Jehovah el “orrenges a nglunguuch” ingii a orrenges a nglunguched.—Psa. 65:​2, NW.

2. Ngoeak a ngera el rolel e a apostol Paulus a ungil kerebai el kirel a meluluuch el kirir a rebebil?

² Me alta ngsebeched el mimokl el mora Jehovah el mesaod er ngii aike el ngar er a uldesued me a rengud, me nguaisei ngdirrek el kired el meluluuch el kirir a rebebil. Tiakid a lurruul er ngii a apostol Paulus. El ua tiang, ngmilluches el mora ongdibel er a Efesus el kmo: “Ak melatk er kemiu er a nglunguchek.” (Efe. 1:16) A Paulus a dirrek el milluluuch el kirir a rederta el chad. El ua tiang, ngdilu er a Timothy el kmo: “Ak mereng a sulel a Dios sel kululuuch el kirem er a llomes ma klebesei.” (2 Ti. 1:3) A Paulus a mla er ngii oberaod er a uldesuel el lululuuch el kirel. (2 Ko. 11:23; 12:​7, 8) Me nguaisei engdi ngmilengoit a taem el meluluuch el kirir a rebebil.

3. Ngera uchul me kede locha mo obes el meluluuch el kirir a rebebil?

³ A lebebil e kede locha mo obes el meluluuch el kirir a rebebil. E ngerang? A odos el Sabrinaa ouchais er a ta er a uchul. Ngkmo: “Kede kmal mo mechesang er a klengar. Kede locha kmal di mo melatk a mondai er kid me kede di meluluuch lolengit aike el dousbech.” Tia lebebil e ngduubech el mo er kau? A leuaisei e tia el suobel a sebechel ngosukau. Tia el suobel a (1) mo smodii a uchul me ngklou a ultutelel a doluluuch el kirir a rebebil e (2) meskid a ngeso er a uldasu el kirel a rolel e ngsebeched el meluluuch el kirir a rebebil.

NGERA UCHUL ME NGKLOU A ULTUTELEL A DOLULUUCH EL KIRIR A REBEBIL?

4-5. Ngmekera nglunguched el kirir a rebebil e “kmal klou a le rellii”? (Jakobus 5:16)

⁴ Ng “kmal klou a le rellii” sel doluluuch el kirir a rebebil. (Monguiu er a Jakobus 5:16.) Ngmera el ngar ngii a lerellii sel doluluuch el kirir a rebebil? Chochoi ngkmal ngar ngii. A Jesus a mle medengei el kmo a apostol Petrus a mo otngeklii me ngdilu er ngii el kmo: “Ngdi ngak a mla meluluuch el kirem e Simon, me lak bo mechitechut el oumerang.” (Lk. 22:32) A Paulus a dirrek el mle medengei el kmo a nglunguuch a sebechel ngodechii a tekoi el duubech el mora chad. Sera bo lak el melemalt a omeruul el mo er ngii e lemekelebus er a Rom e ngmilluches el mora Filemon el kmo: “Kmelatk el kmo a Dios a mo remenges a nglunguchiu el rokui mak lmuut el ekong.” (Flm. 22; momes er a study note el “for I am hoping that through your prayers.”) Tiakid a dilubech. A Paulus a mlo mimokl e liluut er a smechel lomerk er a klumech.

⁵ Me nguaisei engdi tia diak lebelkul a kmo a nglunguched a mo oremelii a Jehovah el mo remuul a tekoi el dolengit. Ngika omtab aike el tekoi el remesiungel a suebek a rengrir el kirel e ngar ngii aike el taem e ngmo melilt el meruul ongterir. Kid sel bo dutebengii tiang e ngmo ngosukid el mo blak a rengud el meluluuch el kirel a tekoi el dolatk er ngii e mecherei er chimal a Jehovah.—Psa. 37:5; momes er a 2 Korinth 1:11 me aike el study note er ngii.

6. Sel doluluuch el kirir a rebebil e ngera ngrullii er a uldesued el kirir? (1 Petrus 3:8)

⁶ Sel doluluuch el kirir a rebebil e ngngosukid el mo “bekokuii” er a reng. (Monguiu er a 1 Petrus 3:8.) A chad el bekokuii er a reng a mtab a ringelel a chad e soal ngosuir el mo kebekakl er ngii. (Mk. 1:​40, 41) A Michael el ta er a remechuodel a melekoi el kmo: “Sel kululuuch el kirir a rebebil me aike el lousbech e ngngosukak el mo ungil medengei aike el lechebangel me a bltkil a renguk el mo er tir a lmuut el medechel. Alta te diak lodengei, tia rullak el mo feel el close er tir.” A Richard el dirrek el ta er a remechuodel a mesaod er a lmuut el ta er a klungiolel. Ngmelekoi el kmo: “Sel doluluuch el kirel a chad e ngodbechid el mo ngosuir.” Ngdochelir el kmo: “Sel dengesuir a chad el doluluuch el kirel er a tekoi el kmal lousbech er ngii, e ngua dolengeseu el longer er a nglunguched el kirel ngii el chad.”

7. Ngmekera doluluuch el kirir a rebebil e ngosukid el mo diak di dolatk a di mondai er kid? (Filipi 2:​3, 4) (Dirrek el momes a siasing.)

⁷ Sel doluluuch el kirir a rebebil e ngngosukid el mo melemalt osenged el kirel a mondai er kid. (Monguiu er a Filipi 2:​3, 4.) Kid el kiei er a beluulechad el longedereder er ngii a Diabelong a uchul me a rederta er kid a ngar ngii a ringel el lechebangel. (1 Jn. 5:19; Och. 12:12) Sel derellii el mo blekerdeled el meluluuch el kirir a rebebil e ngmo omeklatk er kid el kmo “a re bebil er [kid] el oumerang el ngar a beluulchad el rokui a dirrek el chuarm osisiu el ringel el [dengar] ngii.” (1 Pe. 5:9) A Katherine el pioneer el odos a kmo: “Sel kululuuch el kirir a rebebil e ngomeklatk er ngak el kmo tir me ngdirrek el ngar ngii a ringel el lechebangel. Tia ngosukak me ngdiak di kulatk a mondai er ngak.”

TE OUSBECH A NGLUNGUCHEM

8. Mouchais er a rebebil el sebeched el meluluuch el kirir.

⁸ Ngtecha sebeched el meluluuch el kirel? Ngsebeched el meluluuch el kirir a rebliongel er a rudam me a rudos er kid, el uai tirke el smecher, chelebangel omelenguul me a lechub ngorimel er a skuul, me a lechub a rechuarm er a ringelel a cheluodel. A rebetok er a rekldemed er a klemerang a ngar ngii a rumtok er tir, el locha rechedal a telungalek er tir me a lechub e ngkabelment omtok er tir. (Mt. 10:​18, 36; Rel. 12:5) A rebebil er a rudam er kid a mlo kirir el chemiis e chemoit a blirir e le ngdilubech a uldikel er a basio lengar ngii. A rekuk bebil a chuarm e le ngdilubech a tellemall er a beluu. Nglocha diak dodengei el kmo tirka te rua techang engdi sel doluluuch el kirir e kede ochotii el kmo kede olengesenges er a tekingel a Jesus el mo “kaubltikerreng.”—Jn. 13:34.

9. Ngera uchul me ngungil doluluuch el kirir tirke el odam lomekrael er a cheldebechelel a Jehovah me a rebecherir?

⁹ Ngkmal dirrek el sebeched el meluluuch el kirir tirke el odam lomekrael er a cheldebechelel a Jehovah. Tirka uldimukl er tir a Governing Body me a re helpers er tir, re Branch Committee, re overseer el ngar aike el branch office er kid, re circuit overseer, remechuodel er a ongdibel, me a re ministerial servant. A betok er tirka el odam a ngar ngii a tekoi el lechelebangel e a osisiu el taem e te meringel loureor el kired. (2 Ko. 12:15) El ua tiang, a Mark el ta er a circuit overseer a kmo: “A ta er a tekoi el kmal melsemai er ngak, a ngak el kiei er cheroid er a rechad er a blik el mechudelang. Te di diul ngar ngii a secherel a bedengir. Alta ochedak me a bechil omekerreu er tir, ngkmal mekngit a renguk le ngdiak kngar bita er tir el olengeseu er tir.” Me a dodengei aike el lechebangel tirka el odam el meringel loureor el kired me a lak, me ngkired el diak dobes el meluluuch el kirir. (1 Th. 5:​12, 13) Ngdirrek el sebeched el meluluuch el kirir a rebecherir tirka el odam, el tir oba blakerreng el support er tirka el odam me ngsebechir el melemolem el meruul a ngerechelir.

10-11. A di le general a nglunguched el kirir a rudam me a rudos er kid e ngodeuir a rengul a Jehovah? Mosaod.

¹⁰ Ngua bla desaod, kede blechoel el meluluuch el kirir a bliongel er a rechad. El uai tiang nglocha diak bo dosaod er a re specific el chad kede bai olengit er a Jehovah me ngolengeseu er tirke el kelebus me a lechub ngmengelaod er tirke el mla mad a betik er a rengrir. A Donald el ta er a remechuodel a kmo, “Te kmal betok a rudam me a rudos er kid el chelebangel a ringel me a lebebil e ngdi general a nglunguched me bo lsebeched el meluluuch el kirir tirke el rokui el chuarm.”

¹¹ Chouaika el nglunguuch ngodeuir a rengul a Jehovah? Chochoi! Ngdiak dodengei el kmo ngngera te ousbech a rederta el odam me a odos er kid. Me a di le general a nglunguched el kirir a rudam me a rudos er kid a ungil. (Jn. 17:20; Efe. 6:18) Aika el nglunguuch a meketeklii el kmo ng “betik a [rengud] rar udam.”—1 Pe. 2:​17, BT.

SEL DOLULUUCH EL KIRIR A REDERTA EL CHAD

12. Ngmekera bo lebiusech a medad e mo ngosukid el mo specific a nglunguched?

¹² Bo lebiusech a medam. Kede meluluuch el kirir a rebliongel er a rudam me a rudos er kid engdi ngdirrek el ungil a doluluuch el kirir a rederta er tir loeak a dousbech a ngklir. Ngngar ngii a ngar er a ongdibel er kau el oberaod a secherel? Ngngar ngii a ngalek er a ongdibel el mechitechut a rengul le ngii el chelebangel orimel er a skuul? Ngar ngii a mesobil el loungalek el meringel el melasem el lomekeroul er a ngelekel el “oba omellach ma osisechakl er a Rubak”? (Efe. 6:4) Sel bo lebiusech a osengem e ke lmuut el mo bekokuii er a reng el mora rebebil e tia mo odbechau el mo meluluuch el kirir.b—Rom 12:15.

13. Ngmekera sebeched el meluluuch el kirir tirke el chad el dirkak a ta el de meet er tir?

¹³ Moluluuch el kirir a re specific el chad loeak omousbech a ngklir. Tia dirk sebeched el meruul er ngii el kirir tirke el chad el dirkak a ta el de meet er tir. El ua tiang, molatk er a rudam me a rudos er kid el kelebus el uai tirke el ngar er a beluu er a Crimea, Eritrea, Russia, me a Singapore. Ngsebechem el metik a ngklir er a jw.org.c A ta er a circuit overseer el ngklel a Brian a kmo: “Ak mla metik el kmo sel klechesii a ngklel a ta er a kldemed el kelebus e kulekoi er ngii el klou a ngerek e ngngosukak me ngdiak kubes el meluluuch el kirel sel bo kululuuch.”

14-15. Ngmekera sebechel mo specific a nglunguched?

¹⁴ Molengit a specific el tekoi. A Michael el dulsaod er ngii er a uchei a kmo: “Sel kunguiu er a jw.org el kirir a rudam el kelebus e ak melasem el imagine el kmo ngmo uangerang a feeling er ngak okmo mle tir. Ak medengei el kmo ak kmal mo bekikl el kirel a bechik, e kmal soak el mo make sure el kmo ngngar ngii aike el lousbech. Tia ngosukak me ngmo er ngii a specific el tekoi el kulengit sel kululuuch el kirir a rudam el kelebus el bechiil.”—Heb. 13:3.

¹⁵ Sel dolasem el imagine el kmo ngua ngera klengar er a rudam el kelebus er a bek el sils e ngdirrek el sebeched el metik a lmuut el bebil er a specific el tekoi el sebeched el meluluuch el kirel. El ua tiang, ngsebeched el meluluuch me tirke el mengkar er a blil a kelebus bo lungil omerellir el mora rudam me a tirke el olab a klisiich bo lekengei er a rudam me lemimokl el meruul a omengull er tir. (1 Ti. 2:​1, 2) Ngsebeched el meluluuch me a rechedal ongdibel er tirka el odam lengai omelisiich er a blakerreng er tir me a lechub tirke el diak loumerang leues a blekerdelir tirka el odam e bo lorrenges er a klumech el dobang. (1 Pe. 2:12) E uaisei el dirrek el sebeched el meruul er a osisiu el tekoi sel doluluuch el kirir a rudam me a rudos er kid el chelebangel a ringel. Sel bo lebiusech a medad, e doluluuch lousbech a ngklir, e doluluuch lolengit a specific el tekoi e kede ochotii el kmo ng “klou a bltikerreng er [kid] el mor a rokui.”—1 Th. 3:12.

TABESUL OSENGED EL KIREL A NGLUNGUCHED

16. Ngmekera sebeched el melemolem loba tabesul el uldasu el kirel a nglunguched? (Mateus 6:8)

¹⁶ Kede mla mesa el kmo a nglunguched a ngar ngii a lerellii; ngsebechel ngodechii a blekeradel el kirel a chad. Me nguaisei, engdi ngkired el mo oba tabesul el uldasu. Kid sel doluluuch e kede ouchais er a Jehovah a tekoi el already ngmedengei, me ngii a diak lousbech a advice er a bo loruul er ngii el kirel. A Jehovah a medengei aike el lousbech a remesiungel er a uchei er a bo lodengei el kmo te ousbech er ngii. (Monguiu er a Mateus 6:8.) Me a leuaisei, ngera uchul me ngkired el meluluuch el kirir a rebebil? Ngkmal di oltirakl er aike el bla desaod er tia el suobel. Ngdirrek el rolel e kede ochotii el kmo kede omekerreu er a rebebil. A bltikerreng odbechid el mo meluluuch el kirel a tang me a tang. A Jehovah a dirrek el kmal mo dmeu a rengul sel lesekid loukerebai er a bltikerreng er ngii.

17-18. Ngmekera domekesiu er a nglunguched el kirir a rudam me a rudos er kid?

¹⁷ Mo lmuut me a lsekum a nglunguched a ua lak lengildechii a blekeradel me nguaisei ngdirk ochotii a bltikerreng er kid el mora rudam me a rudos er kid e a Jehovah mtebengii tiang. Ngsebeched lomekesiu er ngii er tiang: Ka molatk er a telungalek el reteru ngelekir el chimo el sechal me a chimo el redil. A sechal a smecher el mechiuaiu er a bet. Ngika el redil a meringel lolengit er a demal el kmo: “Please mngesuir a brother er ngak. Ngkmal smecher!” A chedam a already ngomekerreu er a ngelekel e le ngbetik a rengul er ngii. Me nguaisei engdi ngkmal dmeu a rengul sel lesa el kmo a ngelekel el redil a kmal betik a rengul er a ochedal me ngolengit er ngii el mo ngosuir.

¹⁸ Tiakid a lolisiich er ngii er kid a Jehovah el mo kaukerreu e meluluuch el kirel a tang me a tang. Sel doruul er tiang e kede ochotii el kmo ngdiak di dolatk er a di kid ngbai kmal betik a rengud er a rudam me a rudos er kid, me a Jehovah mtebengii tiang. (2 Th. 1:3; Heb. 6:10) E dirrek el ua bla dosaod, a nglunguched a sebechel ngodechii a blekeradel el kirel a chad. Mada lak dobes el mo meluluuch el kirel a tang me a tang.