A Ker el Mla er a Remenguiu

Ngera me a omesodel a Mateus el kirel a uchelel a klengar er a Jesus a kuk mle ngodech er a omesodel a Lukas?

A omesodel a Mateus el kirel a cherellel me a uchelel a klengar er a Jesus a mle ngodech er a omesodel a Lukas, e le tirka el milluches a milsaod a uldesuir a reteru el kakerous el chad me a tekoi el ble lechelebangel.

A omesodel a Mateus a di milsaod aike el tekoi el lurruul a Josef. Ngmesaod er a uldesuel a Josef er sera bo lodengei el kmo a Maria a mle dioll. Ngdirrek el milsaod er a lomeketakl er a blekeradel er a berrusel, me sel rolel a loltirakl a ulekrael er a anghel. (Mateus 1:19-25) Ngdirrek el mesaod er a rolel a lomeklatk er ngii a anghel el oeak a berrous me lechiis el mo er a beluu er a Ekipten ngii me a telungalek er ngii, me a rolel a lolengesenges. A Mateus a uluuchais el kmo a Josef a dirrek el ulemerrous el kmo a anghel a dilu er ngii me luut el mo er a beluu er a Israel me ngmlong e millilt el mo kiei er a Nasareth ngii me a telungalek er ngii. (Mateus 2:13, 14, 19-23) Me ngar er aike el kot el eru el bliongel el Ebangkelio er a Mateus, e ngmilsaod er a ngklel a Josef el eai el taem, e di milsaod er a Maria el eua el taem.

Me nguaisei, engdi a Lukas a mle blechoel el mesaod er a Maria. Ngmesaod er sel taem el anghel el Gabriel er a bo lomes er a Maria, me sel taem el Maria a mlo omes er a chedal el Elisabeth, me a dirrek sera loldanges er a Jehovah. (Lukas 1:26-56) Ngdirrek el mesaod aike el lullekoi a Simeon el mo er a Maria el kirel aike el bo lecharm a Jesus er a ngar medal el taem. E a Lukas a kuk mesaod er sel taem el Jesus a mlo er a templo el obengkel a telungalek er ngii er sera el 12 a rekil. E dirrek el ngar er tia el babier, e a Lukas a millekoi a tekingel a Maria el diak el Josef, e ouchais er kid el kmo a Maria a kmal mlo mekngit a rengul er aika el tekoi el dilubech. (Lukas 2:19, 34, 35, 48, 51) Me ngar er aike el kot el eru el bliongel el Ebangkelio, e a Lukas a milsaod er a ngklel a Maria el 12 el taem, e a Josef a di mle 3 el taem. Me a Mateus a di mle oumesingd el mesaod er a uldesuel a Josef me a tekoi el lechilebangel. E a Lukas a kuk di milsaod er a uldesuel a Maria me a tekoi el lechilebangel.

Ngdirrek el ngodech a omesodel aika el eru el Ebangkelio el kirel a telungalek er a Jesus. A omesodel a Mateus el kirel a klengelakel er a telungalek er a Josef a ochotii el kmo, a Jesus el Josef a riredelii a ngar er ngii a llemeltel el okiu a llach el mo er a omengederederel a David. E ngera uchul? E le Josef a mla er a klengelakel er a King el David el okiu a ngelekel a David el Salomon. (Mateus 1:6, 16) Me nguaisei, engdi a omesodel a Lukas el kirel a klengelakel er a telungalek er a Maria a ochotii el kmo, a Jesus a ngar er ngii a llemeltel el mo er a omengederederel a David e le “ng mlechell el rsechel a David.” (Rom 1:3) E ngera uchul? E le Maria a mla er a klengelakel er a King el David el okiu a ngelekel a David el Nathan. (Lukas 3:31) Engdi ngera uchul me a Lukas a dimlak el llechesii a Maria el ngelekel a Heli, el demal? E le reksi e ngblechoel el di uldimukl er ngii a sechal er a telungalek. Me a Lukas er sera losaod er a klengelakel er a Josef e losaod er ngii el ngelekel a Heli, e a rechad a ulemdasu el kmo a Josef a mle bechil a ngelekel a Heli.​—Lukas 3:23.

A omesodel a telungalek er a Jesus el ngar er a Ebangkelio er a Mateus me a Lukas a meketeklii el kmo, a Jesus a ngike el Mesias el mle telbilel a Dios. Tia el uldasu el kmo a Jesus a mla er a klengelakel er a King el David a ble lodengelii a rebetok el chad a uchul me a Refarisi me a Resadusi a dimlak el sebechir el omtok er ngii. A omesodel a Mateus me a Lukas el kirel a telungalek er a Jesus a melisiich er a klaumerang er kid, e oterekokl a rengud el kmo aike el rokui el telbilel a Dios a mo tmaut.