Ke Medengei el Kmo Ngerang?

Ngera me a Jesus a uluukerrekeriil er tirke el mirruul a telbiil?

A LLACH er a Moses a milsterir a techellir a rechad me te meruul a telbiil e olsiich ngii el telbiil lousbech a tekoi el ua “Ngokiu a Dios e ak ulsiich a tekingek,” me a lechub “Ngokiu a ngklel a Jehovah e ak ulsiich a tekingek.” Me nguaisei, engdi ngar er a taem er a Jesus, e a omeruul el telbiil a di mle blechoel el ngar er ngii el mlo uchul me a Rechijudea a kongei er a rokui el tekoi el lolekoi. Te mirruul er tiang el meruul aike el lullekoi el bo doumerang, engdi Jesus a uluukerrekeriil er tia el diak a ultutelel el omeruul el eru el taem. Ngullisechakl el kmo: “Di mdu el kmo ‘Choi’ ma lechub e mdu el kmo ‘Ng diak.’”​—Mateus 5:33-37; 23:16-22.

A doltirakl er a Theological Dictionary of the New Testament, e a Talmud a ngosukid el mo mesa rolel e a Rechijudea a di mirruul a telbiil el kmo aike el tekingir a mle klemerang. Tiang a uaisei e le Talmud a mo ungil smodii el kmo ngera el telbiil a mle sebechir el meruul me aike el kuk bebil el mle sebechir el melemall.

Ngdimlak el dil Jesus a uluukerrekeriil er tia el cheleuid el omeruul. El ua tiang, a Flavius Josephus el chad er a reksi a milluches el kirel a cheldebechel er a Rechijudea el milengeroid er tir er a omeruul el telbiil. Me a rechedal tia el cheldebechel a uluumerang el kmo, a omeruul el telbiil a kuk mle mekngit er a domulak. Te ulemdasu el kmo a lsekum a chad a kirel el meruul a telbiil me a rebebil bo loumerang er ngii, e nglocha cheblad. A Jewish apocryphal writing Wisdom of Sirach me a lechub a Ecclesiasticus, (23:11) a melekoi el kmo: “A chad el blechoel el melekoi a telbiil a mera el bulak el chad.” A Jesus a uluukerrekeriil er a omeruul el telbiil el kirel a diak el meklou a ultutelel el tekoi. Me a lsekum kede blechoel el melekoi a klemerang, e ngdiak el kired el meruul a telbiil el meruul a tekoi el dolekoi el mo klemerang.