Me tia el ileakl el cheldecheduch a debetik er ngii er a eua el Ebangkelio el ngar er aike el Bades el tekoi er a Grik me a lechub e ng Beches el Testament. Me aika el tekoi, ngmera el dilubech? Tiang a kmal klou a ultutelel el ker. A lsekum aika el tekoi a dimlak el duubech e a omelatk el kirel a klengar er a Baradis el mo cherechar a kmal di ua leberrous el tekoi e merekong. (1 Korinth 15:14) Engdi a lsekum ngmera el dilubech e ngbelkul a kmo ngar er ngii a ungil el omelatk el kirel a klechad, el kau a uldimukl er ngii. Me a leuaisei, e aikang ngmera el dilubech me a lechub e ngdi delbochel el cheldecheduch?

A KLEMERANG EL TEKOI A UTEBENGALL

Me aika el Ebangkelio a kmal dmolech e dirrek el melemalt a omesodel el diak el ua di cheldecheduch el chelid. Ngmesaod el kirel a mera el beluu el sebeched el mesarech er chelecha el taem, e dirrek el mesaod er a remera el chad, el rechad er a reksi a meluches el kirir.​—Lukas 3:1, 2, 23.

A rechad er a reksi er a irechar a dirrek el milluches el kirel a Jesus.a A omesodel a kodellel el ngar er a Ebangkelio a di osisiu a omesodel er sel rolel a longelebus er a rechad, a rechad er a Rom. Te dirrek el milsaod el kirel a cheleuid el omerellir a rebebil el disaiplo er a Jesus. (Mateus 26:56; Lukas 22:24-26; Johanes 18:10, 11) Me aika el tekoi a meketeklii el kmo a remilluches a Ebangkelio a mle melemalt el chad e millekoi a klemerang el kirel a Jesus.

E KUK MEKERANG A OKISEL A JESUS?

Me alta e te betok el chad a kongei el kmo a Jesus a mera el kiliei e mlad, engdi a rebebil er tir a diak loumerang el kirel a okisel. Mo lmuut er a rechapostol er ngii me te dirrek el dimlak loumerang a chais el kmo ngmla mekiis er a kodall. (Lukas 24:11) Engdi te mlo oumerang el okiu sera lesang el mla lmuut el me chad. Me a ta er a taem e ngmlo duum er mederir a rekuk betok er a 500 el chad.​—1 Korinth 15:6.

Me a redisaiplo er ngii a mlo ocherur a kodall, engdi te mle bekeu el ouchais er a okisel a Jesus el mo er a rokui el chad el uldimukl er tirke el chad el milekodir. (Rellir 4:1-3, 10, 19, 20; 5:27-32) Me a omomdasu, e tirka el disaiplo te mlo bekeu el ouchais el kirel a okisel a Jesus a lsekum ngdimlak loumerang er ngii el tekoi? Me chelecha el taem e a Rekristiano a dirrek el oba blekeu el ouchais el kirel tia el tekoi, e le te oumerang el kmo a Jesus a mera el milekiis er a kodall.

Me a Ebangkelio el kirel a kodellel me a okisel a Jesus a olengchelel a kmo, ngmera el tekoi el dilubech. Me a bo dekerekikl el menguiu er ngii e kede mo oumerang el kmo aika el tekoi a mera el dilubech. Me a klaumerang er kau a lmuut el mo mesisiich sel bo mungil el medengelii a uchul me ngdilubech aika el tekoi. Me a ongingil el suobel a lmuut el mo mesaod er ngii.

Ke mo kmo ngerang a lsekum a chad a oker er kau el kmo, “Ngsoam el kiei el mo cherechar?” A rebetok el chad a locha kongei el sorir el kiei, engdi te omdasu el kmo tiang a diak el sebechel el mo tekoi. Te omdasu el kmo, a kodall a tedebechel a klengar me a lsoad me a lechetid me kid a di mo mad.

E ka kuk molatk oleko a ker a kmo, “Kau, ke kltmokl el mo mad?” A ruumesingd el chad a kmal diak el sorir el mad. Me tiang ngolechotel a ngerang? Kede ulebeob el soad el melemolem el ngar, alta kede mo chelebangel a ringel. A Biblia a ouchais el kmo, a Dios a milebid el ngar er ngii a urunguled el soad el kiei el mo cherechar. Ngdmu el kmo “Ng mla meskid a urunguled el mo medengelii a ngar medad.”​—Olisechakl 3:11.

Engdi chelechang e a rechad el rokui a di mo mad. Me ngera dilubech? E a Dios ngmo sumecheklii tia el tekoi? A Biblia a meskid a kmal ungil el nger er aika el ker, e dirrek el smodii a uchul me a Jesus a mlo chuarm e mad.

NGERA DILUBECH?

A uchelel a babier er a Genesis a ouchais er kid el kmo, a Dios a milsterir a rekot el obekel el Adam me a Eva a omelatk er a diak a ulebengelel el klengar, e dirrek el ulechotii er tir a rolel e ngsebechir el melemolem el kiei. Ngdirrek el smodii a rolel e ngmlo diak lolengesenges er a Dios, el uchul me te urridii tia el omelatk. Tiang a kmal beot el cheldecheduch, me a rebebil a omes er ngii el ua lak a belkul. Engdi a babier er a Genesis a di ua Ebangkelio el ngar er ngii a olechotel el kmo ngmesaod a tekoi el mera el dilubech.a

Me ngerang a telemellel a omerellel a Adam? A Biblia a kmo: “A klengit a siliseb er a beluulchad el okiu a tal chad, ma kodall a ulekiu a klengit el mei, ma kodall a ulemerk el mor a re chad el rokui, ele rokui a mlor a klengit.” (Rom 5:12) Me sera bo lak lolengesenges er a Dios, e ngurridii a techellel el mo kiei el mo cherechar e mlad. Me tiaikid a uchul me kid el ngelekel a di mechell e ngar er a klengit, e dirrek el mo smecher e mo chuodel e mad. Me tiaikid el omesodel a tekoi a lekengei er ngii a re scientist el kirel sel rolel e a ngalek a mechell el chelutel er a rechad er a blil. Me a leuaisei, e ngera ngmla remuul a Dios el kirel tia el tekoi?

AIKE EL BLA LERUUL A DIOS

A Dios a mla kutmeklii a rolel e ngsebechel el moluut sel tekoi el lurridii a Adam, el ngii a omeltkir a rengelekel el mo kiei el mo cherechar. Me ngmilekerang a Dios er a loruul er tiang?

Ngar er a Rom 6:23 e ngkmo: “Ele omeksullel a klengit a kodall.” Me ngbelkul a kmo a blsel a klengit a kodall. Me a Adam a mlo er a klengit me ngmlad. Me ngdi osisiu, kede rokui el ngar er a klengit me kede dirrek el mo mad. Engdi a klengit a dimlak el kngtid, kede bai milechell el ngar er a klengit. Seikid a uchul me a Dios a ulderchii a Ngelekel el Jesus el me kokedir a belsel a klengit el kired. Tiang ngmekera e mo uaisei?

A ta el cherrungel el chad el Adam a mlo diak lolengesenges, me ngmlo uchul a klengit me a kodall. Sei a uchul me kede ousbech er a cherrungel el chad el olengesenges el mo lmuut er a kodellel, me bo el sebeched el mengubet er a blsel a klengit. A Biblia a mesaod el kmo: “Ng oeak a orrengesmengoit er a di tal chad, e a re betok el chad a mlo mekngit; me ng dirrek el ua isei el oeak a blekongesenges er a di tal chad e a re betok el chad a mo muklemalt er medal a Dios.” (Rom 5:19) Me a Jesus a ngika el “di tal chad.” Ngchilitii a delengcheklel er a eanged e mlei er a chutem el cherrungel el chad, e kilengei el mad el kired.b Me tiaikid a uchul me ngsebechel el mo er ngii a ungil el deleuill er kid me a Dios, e lmuut el mo er ngii a techelled el kiei el mo cherechar.

A UCHUL ME A JESUS A MLO CHUARM E MAD

Me ngera uchul me ngmlo kirel a Jesus el mad? Ngera me a Dios a dimlak di lekengei er a rengelekel a Adam me lsebechir el kiei el mo cherechar? A Dios a ngar er ngii a llemeltel el meruul el uaisei, engdi tiang a sebechel el mo tomellii sel llechul el kmo a blsel a klengit a kodall. Tia el llach a diak el kora klekool me di lebeot el mengodech. Tiang a mera el rolel a llemalt.​—Psalm 37:28.

Me a lsekum a Dios a ngildechii a uldesuel el kirel tia el tekoi, e a rechad a mo omdasu el kmo ngdi sebechel el mengodech a uldesuel el kirel a bebil er a tekoi. El ua tiang, ngmo tabesul a omelilt er ngii el kirir a remo suobel el ngelekel a Adam? Ngsebeched el ultuil a klaumerang er kid er a telbilel? A Dios el kiltmeklii a rolel e kede mo suobel el okiu a llemalt, a uchul me ngulterekokl a rengud el kmo ngdi blechoel el meruul a llemalt.

Me ngokiu a tengetengel a Jesus, e a Dios a mekengii a techall er a diak a ulebengelel el klengar el ngar er a Baradis el chutem. Ka momtab a tekingel a Jesus el medung er a Johanes 3:16 el kmo: “Ele Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.” Me a kodellel a Jesus a diak di lolechotel a melemalt el omerellel a Dios, e ngdirrek el olechotel sel klou el bltkil a rengul el mo er a rechad.

Me nguaisei, engdi ngera uchul me a Jesus a mle kirel el mo chuarm e mad? Ngii el kilengei el kmal mo chuarm e millemolem el blak a rengul a mlo uchul, e ngulenger er sel chelebeldil a Satan el kmo a rechad a diak el sebechir el melemolem el blak a rengrir el mo er a Dios er sel taem el bo lechelebangel a ringel. (Job 2:4, 5) Ngsebeched el mo omdasu el kmo a Satan a millekoi a klemerang e le ngii el mle sebechel el chobeldir a Adam. Engdi a Jesus a mle cherrungel el ua Adam, engdi ngmillemolem el blak a rengul el mo er a Dios alta e ngkmal mlo chuarm. (1 Korinth 15:45) Me ngulechotii el kmo a Adam a dirrek el mle sebechel el olengesenges er a Dios. Me a Jesus a milecherei a kmal ungil el kerebai el kired el oltirakl er ngii. (1 Petrus 2:21) E a Dios a ulemekngeltengat er a Ngelekel e milsa diak lengemed el klengar el ngar er a eanged.

NGMEKERANG E MO UCHUL A KLUNGIOLEM?

A Jesus a mera el mle chad e mlad, me ngar er ngii a techelled el mo kiei el diak a ulebengelel. Me kau, ngsoam el kiei el diak a ulebengelel? A Jesus a milsaod a tekoi el kired el meruul er a ledu el kmo: “A diak a ulebengelel klengar a belkul a kmo, bo lodengelkau el di ta el meral Dios, e bo lodengelii a Jesus Kristus el ngikel mulderchii el mei.”​—Johanes 17:3.

A remirruul er tia el babier a mengemedaol er kau el mo mesuub a lmuut el betok el kirel a mera el Dios el Jehovah me a Ngelekel el Jesus Kristus. A Resioning er a Jehovah el ngar er a beluam a kmal dmeu a rengrir el ngosukau. Ngdirrek el sebechem el metik a lmuut el betok el omesodel aika el tekoi el ngar er a website er kemam el www.jw.org/pau.