A Bebe a kmal mle kmes a deleuill er ngii me a demal. E tia el tekoi a ledillii a ta er a sechelil el millasem el mengelaod er ngii. Engdi tiang a bai liluut el mekrengelii a uldesuel a Bebe. Me ngmelatk el kmo, “A kodellel a demak a kmal diak lungil el tekoi.” Me a betok el rak er a uriul e ngmilluches el kirel tia el tekoi el dilubech, e mlo melechesuar el kmo ngdirk mekngit a rengul el kirel a demal.

Me ngsebechel el kmal mo mekngit a rengud el kemanget el taem, el ileakl a lsekum ngike el mlad a kmal kmeed er kid. A Biblia a mesaod er a kodall el “cherarou.” (1 Korinth 15:26) Me ngkmal sebechel el di mereched el metemall a klengar er kid sel lak dekltmokl el kirel a tekoi el mo duubech. E diak a ta er kid el sebechel el torebengii. Me ngdiak el kirel el mo mechas a rengud er a chad el melasem el outekangel er a kngtil a rengul er a kodall me a telemellel a kodall.

Me ke locha mla ta el molatk el kmo: ‘Ngua ngera klemengetel el taem e a chad a mo diak lemekngit a rengul? Ngmekera chad e outekangel er a kngtil a rengul? Ak mekerang e ngosuterir a rebebil el mla mad a rebetik er a rengrir? Ngar er ngii a omelatk el kirir a rebetik er a rengud el mla mad?’

Ngmla ta el bo msecher e di mle mereched el mo ungil? Ke locha di mle mereched el mo ungil me ke mla obes er ngii. Engdi a klengiterreng a diak el uaisei. Ngar er a babilengel a Dr. Alan Wolfelt el Healing a Spouse’s Grieving Heart, e ngdmu el kmo: “Ngdiak el sebechel el mo diak el mekngit a rengud” sel lemad a betik er a rengud. Ngdirrek el dilu el kmo: “Ngdi cherengel a taem me a dirrek el omelisiich er a rebebil e ngsebechel el mo mechelaod a rengud.”

Ka di molatk er a Abraham er a lemad a bechil er a Sara. A Biblia a kmo: “Ma Abraham a milengemeldiil er ngii.” Me a tekoi el ‘mengemeldiil’ a ochotii el kmo a Abraham a mle kemanget el taem el lemekngit a rengul er a bechil.a Ka molatk er a Jakob, el milecheblad me ngmlo omdasu el kmo a tebelik el charm a mla mekodir a ngelekel el Josef. Ngmilengeiung er a ngelekel el “kmal mle kemanget el taem,” e a rechad er a blil a dimlak el sebechir el chemolodii. Me a betok el rak er a uriul e ngdirk mekngit a rengul er a Josef.​—Genesis 23:2; 37:34, 35; 42:36; 45:28.

Me ngdi osisiu er chelechang, te betok a dirk mekngit a rengrir el kirel a betik er a rengrir el mla mad. Me bo dosaod a tekingir a reteru el chad.

• “A bechik er a Robert a mlad er sera July 9, 2008. Seikid el tutau er a uchei er a bo el accident el mad, e ngdi mle ua bek el sils. A uriul er a ki momengur e ngmirrael el mo oureor, me aki mle kaiuechull e ketungel mad e kasmesumech. Me a 6 el rak er a uriul, e ngkmal dirk mekngit a renguk. A kumdasu e ngkmal diak el sebechek el obes er ngii.”​—Gail, el 60 a rekil.

• “Alta ngmla mo 18 el rak er a lemad a bechik, engdi ngkmal dirk mekngit a renguk e oureng er ngii. Me a bek el taem el kisa klebokel el blebelel a Dios e ak mo melatk er ngii. Ak dirrek el mo melatk el kmo nglocha mo uangera uldesuel sel lomes aika el tekoi el kumes.”​—Etienne, el 84 a rekil.

Me ngbleketakl el kmo ngdiak a kngtil a lemekngit a rengud er a rebetik er a rengud el kemanget el taem. A rebek el chad a kakerous a rolel a lolecholt er a kngtil a rengrir, me ngkmal diak el kired el oukerrekeriil er a rolel a chad a lochotii a kngtil a rengul. E a osisiu el taem e ngdiak el kirel el di kid el oukerrekeriil er kid er a rolel a dolecholt er a kngtil a rengud. Me ngmekerang e mo sebeched el outekangel er a klengiterreng?

Ngbetok a tekoi el mla medung el kirel tia el tekoi, engdi ngdiak el ngii el rokui a mo uchul a klungioled. El ua tiang, a rebebil a locha mo melekoi el kmo ngkirem el kilmeklii a kngtil a rengum e diak mlangel. E a rekuk bebil locha mo orrimel er kau el mo ouchais er a rechad aike el dmolech el uldesuem. Engdi a Biblia a bai meskid a tabesul el ulekrael, el di ua ike el bla letiriter a remesuub a tekoi er chelechang.

Ngar er a bebil el beluu e ngmekngit el tekoi a lsekum a sechal a lmangel. Engdi tiang ngmera el tekoi? Ngmekngit a delangel er mederir a rechad? A remesuub a tekoi a medengei el kmo a rechad a blechoel el lmangel sel lemad a betik er a rengrir. E tia el tekoi a sebechel el ngosuterir el mo outekangel, alta ngkmal mekngit a rengrir. Me ngbai sebechel el tomellid a lsekum kede mengelmekl er a kngtil a rengud. A Biblia a diak lolisiich er a uldasu el kmo, a resechal a diak el kirir el lmangel. Ka molatk er a Jesus. Sera lemad a sechelil er a Lasarus e nglilangel, alta ngmla er ngii a klisichel el olekiis er ngii er a kodall!​—Johanes 11:33-35.

A rebetok el chad a dirrek el mo kesib a rengrir sel lemad a betik er a rengrir, el ileakl a lsekum ngmle bkaischemrungel a kodellel. E ngar er ngii a kakerous el uchul me a chad a mo kesib a rengul. A lebebil e ngmo kesib a rengul er a mekngit el tekingel a chad el mo er ngii. A chad er a South Africa el Mike a ngklel a kmo, “Sera lemad a demak e ngmle 14 a rekik. Me ngar er a kemeldilel, e ngike el chad er a klechelid el milengedecheduch a dilu el kmo, a Dios a ousbech er a rungil el chad me ngmelai er tir er a dirk lemekekerei el chad.a Me ngkmal mlo kesib a renguk, e le kemam a mera el mlo metacherbesmam er a bo ledibus a demmam. Me alta e ngmla chuib a 63 el rak, engdi ngdirkak bo lemechelaod a renguk.”

Sel taem el chad a di mereched el mad e a rebetok a dirrek el mo ouuchel a rengrir. Te locha mo melatk el kmo, ‘Ulekum ak rirellii tiang, e nglocha dimlak el mad.’ Me a lsekum kom mle kautoketok el di telkib el taem er a uchei er a lemad, e nglocha kmal mo meringel a uldesuem.

Me a lsekum ngkesib a rengum me a lechub e ke ouuchel er a rengum, e ngdiak el kirem el di lmuk. Ngbai kirem el mengedecheduch er a ta er a sechelim el ungil el orrenges er kau, e sebechel el omeklatk er kau el kmo te betok a mo uaisei a uldesuir sel lemad a betik er a rengrir. A Biblia a kmo: “A sechelid a di blechoel el oubltikerreng, e a ta er kid el sechal a ngosukid er a chelebuul.”​—Osisechakl 17:17.

Ngike el Ulemeob er kid el Jehovah el Dios a sebechel el mo kot el ungil el Sechelim. Me moluluuch el ouchais a kngtil a rengum el mo er ngii, e le “ng kerekikl el omekerreu er kemiu.” (1 Petrus 5:7) Ngtibir el kmo, tirke el meruul el uaisei a mo melechesuar “a budech er a Dios, el diak el sebechel a chad el mo cherrungel el medengelii.” (Filipi 4:6, 7) A Dios a dirrek el sebechel el ngosukau el okiu a Tekingel el Biblia. Ka moluches a bebil el bades el kmal soam. E locha sebechem el mo chausbengdik a bebil er ngii. (Momes er a baks.) A chouaika el bades a sebechel el mengelaod er kau sel di lekau el tang me a lechub e ngmekngit a cheliuem.​—Isaia 57:15.

A 40 a rekil el Jack, a dirk mlad a bechil el mle smecher el kasinoma. A lebebil er a taem e ngkmal mo sabisi, engdi a nglunguuch a ngosuir me ngoutekangel. Ngdmu el kmo, “Sel kululuuch el mo er a Jehovah e ngmo diak sabisi. Ak blechoel el mekar sel leklebesei e diak el sebechek el imiit a medak. Me ak mo menguiu er a Biblia e melatk a bebil el bades el melisiich er ngak. E sel kululuuch el ouchais aike el rokui el uldesuek, e ak mo melechesuar a budech el cholleklii a renguk me a uldesuek, me ngmo sebechek el lmuut el mo mechiuaiu.”

A kekerei el redil el Vanessa a dirrek el mlo smecher a delal. Me ngmla mo medengelii a klungel a ultutelel a nglunguuch. Ngdmu el kmo, “A lebebil er a taem e ngkmal mo meringel a uldesuek me ak di mekedongii a ngklel a Dios e lmangel. Me a Jehovah a rirenges a nglunguchek, e silsichak me ngmo sebechek el outekangel.”

A rebebil el chellimosk a melisiich er tirke el chormang a uldesuir me bo longoit a temir el olengeseu er a rebebil. E tiang a sebechel el mengelaod er tir e mo uchul a deuil a rengrir. (Rellir 20:35) Me a rebetok el Kristiano a dirrek el mla mo mechelaod a rengrir, e le tir el mlo blak a rengrir el olengeseu er a rebebil.​—2 Korinth 1:3, 4.

Ngmla ta el mobengkel a chad el mla mad a betik er a rengul, e diak modengei el kmo ngungil a cho mdu el kmo ngerang? Me ke locha di liluk e dimlak a ngera el mdung. Me nguaisei, engdi ngar er ngii a tekoi el sebeched el meruul el mo olengeseu er tir.

A lebebil er a taem e ngungil a di dongoit a taem el obengterir e dochotii el kmo ngmekngit a rengud er tir. Me ngar er a betok el beluu, e sel domechull er tir me a lechub e kede orreked a chimorir e te mo medengei el kmo ngbetik a rengud er tir. Me a lsekum ngsorir el mengedecheduch, e ngungil a dekerekikl el orrenges er tir. Ngdirrek el kmal klou a lengesuir a lsekum e kede ngosuterir el remuul aike el kirir el meruul. El ua tiang, nglocha sebeched el meruul a kelir, e obetiterir a rengelekir, me a lechub e kede kutmokl aike el tekoi el kirel a kemeldiil a lsekum ngsorir. A chouaika el tekoi a locha lmuut el klou a lerellii er a ungil el cheldechedechad.

Cherengel a taem e nglocha mo soam el mesaod er ngike el mla mad el chad. Me a lsekum ke mesaod aike el mle ungil el blekerdelel me a tekoi el dilubech, e nglocha sebechem el rullii ngika el chad el mo ungil a rengul. A Pam el bechil a mlad er a 6 el rak er a uchei a kmo, “A lebebil er a taem e a rechad a ouchais er ngak aike el ungil el tekoi el lurruul a Ian el dimlak kudengei. Tiang a rullak el kmal mo dmeu a renguk.”

A remesuub a tekoi a ouchais el kmo, sel lemad a chad e te betok a mo olengeseu er tirke el ngar er a klengiterreng, engdi sel lemereko rokui el tekoi e a resechelirir a lmuut el mo mechesang a klengar er tir me ngmo diak a temir el ngosuterir. Me a leuaisei, e ngkmal ungil a lsekum ke melemolem el melatk er tir er a uriul er a loridii a betik er a rengrir.a Tia el omeruul a kmal klou a lerellii e le ngmesterir a techellir el mo mengedecheduch el kirel a kngtil a rengrir el dirk melemolem.

Ka molatk er a kekerei el redil er a Siabal el Kaori. Ngkmal mlo mekngit a rengul er a lemad a delal, e a ta el rak me a edei el buil er a uriul e a chudelel me ngdirrek el mlo smecher. Ngdmeu a rengul e le resechelil a millemolem el olengeseu er ngii. A ta er tir el Ritsuko el klou el redil a dilu er a Kaori el kmo, ngsoal el mo sechelil. Me a kot el uchul e a Kaori a mlo chetil tia el tekingel, me ngdmu el kmo, “Ngdimlak el soak a ngii di el chad a bo lomtechei er a delak, e le ngdiak a ta er tir el sebechel el mo uai ngii. Engdi cherengel a taem e a ungil el omerellel a Ritsuko el bedul ngak a rirellak el mo kmeed er ngii. Bek el sandei e aki dilak el omerk er a klumech, e dmak el mo er a miting er a Rekristiano. Aki dirrek el dilak el melim a tea, e ngmeruul a kelek, e milluches a betok el tengami el me er ngak. Me a omelisiich er a Ritsuko a mera el ngilsukak.”

Me chelechang e ngmla chuib a 12 el rak er a lemad a delal a Kaori, me ngii me a bechil a omerk er a klumech el mui el taem. Ngdmu el kmo, “A Ritsuko a dirk melatk er ngak, me sel kbo er a beluak, e ak blechoel el mo oldingel er ngii e aki kasisiich er a delongelam.”

A Poli el ta er a Resioning er a Jehovah el ngar er a beluu er a Cyprus a dirrek el mla er ngii a resechelil el millemolem el olengeseu er ngii. A bechil er a Sozos a kmal mle ungil a omerellel el Kristiano el mle blechoel el mengemedaol er a remelakl dil me a rediak a redemerir me a rederrir el ngalek el me omengur er a blirir. (Jakobus 1:27) Engdi a Sozos a mlo smecher er a bo el 53 a rekil el kasinoma a uchul. Me a Poli a kmo, “Ngika el bechik a mle blechoel el blak a rengul er ngak er a chelsel aike el 33 el rak el ki mdilak.”

Me a uriul er a kemeldilel a Sozos, e a Poli a millukl el mo kiei er a Canada, ngii me ngike el kot el kekerei el ngelekel el Daniel el mle 15 a rekil. A Poli a kmo, “A rudam me a rudos er sel ongdibel el ki blo er ngii, a dimlak a ngera el lodengei el kirel a klengar er kemam er a uchei me a ringelel a uldesuam. Engdi te kmal uluuetkeu er kemam e mle ungil el mengedecheduch er kemam e dirrek el ngilsukemam er aike el ki mousbech. Ak kmal mereng a sulir el kirel a ulengesurir el ileakl sel taem el ngelekek a kmal uluusbech er a demal! Me a rudam el olab a ngerachel er a chelsel a ongdibel a dirrek el mle kerekikl er a ngelekek. A ta er tir a mle blechoel el melatk er a Daniel e melekoi er ngii me bo ledak el milil.” Me chelechang e a Poli me a ngelekel a dmeu a rengrir el Kristiano.

Me ngbleketakl el kmo, ngbetok a sebeched el remuul el ngosuterir e mengelaod er tirke el ngar er a klengiterreng. Me a omelatk el lebeskid a Biblia el kirel a ngar medad el klebesei a dirrek el sebechel el mengelaod er tir.

Ngar er a ta er aike el oeakuchei el suobel e kede milsaod el kirel a Gail el mla mo kemanget el taem el lemekngit a rengul er a kodellel a bechil el Rob. Me nguaisei, engdi ngmengiil er sel taem el mo sebechel el lmuut el mesang er a chelsel a beches el beluulechad el bla letibir a Dios. A Gail a dilu el kmo, “A kot el soak el bades a Ocholt 21:3, 4.” Tia el bades a kmo, “A Dios a ngii a mo obengterir, e mo Dios er tir. Ng mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel. A di mla tekoi a mla mo diak.”

A Gail a dirrek el dilu el kmo, “Tia el bades a ungil el smodii a omeltkir a Rekristiano. Me ak kmal chubteterir tirke el mla mad a rebetik er a rengrir, e diak lodengei el kmo ngsebechir el lmuut el meseterir.” Me a klaumerang er a Gail a rullii me ngmengoit er a klou el temel el ouchais er a retonari er ngii el kirel tia el telbiil el kmo: “Ng dikea lluut el mor ngii a kodall.”

Nglocha meringel er kau el mo oumerang er tia el tekoi. Engdi ka molatk er a uldesuel a Job. Ngikang a kmal mlo smecher. (Job 2:7) Me alta nguluureng el mad, engdi ngmle medengei el kmo a Dios a ngar er ngii a klisichel el okisii er a kodall me nglmuut el me chad er tia el chutem. Ngdilu el kmo: “A le chulekum ke mertak er a belurir a re mla mad; . . . Cho bo momekedong, e ak mo onger er kau, ng mo ungil a rengum er ngak, el blebelem.” (Job 14:13, 15) Me a Job a mle ulterekokl a rengul el kmo, a Dios a soal el lmuut el mo mesang me ngmo olekiis er ngii er a kodall.

Ngdi kmedung a Dios el mo rullii tia el chutem el mo baradis, e olekiis er a Job me a relmuut el bebil el mla mad me te mo kiei er a chelsel. (Lukas 23:42, 43) A bades er a Rellir 24:15 a oterekeklii el kmo, a rebetok el chad “a mo mekiis er a kodall.” Me a Jesus me ngdirrek el dilu el kmo, “Lak le mechas a rengmiu er tiang, e a belsechel a mei el tirkel rokui el mla mad a mo rongesii a ngerel me te mo tuobed er a debellir.” (Johanes 5:28, 29) A Job a mo mesa otutel tia el telbiil. A bedengel a “lmuut el mo mesisiich” el di ua klisichel a ngeasek, e melemolem el uaisei el diak a ulebengelel. (Job 33:24, 25) Me ngokiu a klechubechub er a Dios, e tirke el rokui el olecholt a omereng el saul er tir el kirel aika el telbiil, a mo sebechir el kiei er tia el chutem el mo cherechar.

A lsekum ngmla mad a betik er a rengum, e a tekoi el bla desaod a locha diak el sebechel el di mereched el rullau el mo ungil a rengum. Engdi a lsekum ke melemolem el melatk a telbilel a Dios el ngar er a Biblia, e ngsebechel el meskau a omelatk el kirel a ngar medam, e smisichau me ngmo sebechem el outekangel er a kngtil a rengum.​—1 Thesalonika 4:13.

Ngsoam el mo medengei a lmuut el bebil el tekoi el ngosukau el mo outekangel er a kngtil a rengum? Ngmla ta el molatk el kmo, “Ngera uchul me a Dios a omechei a mekngit me a ringel me ngmelemolem?” Aki olengit er kau me bo er a website er kemam el jw.org/pau, e le omesodel a Biblia el kirel aika el tekoi a sebechel el melisiich er kau.