Ke dirk melatk er a taem er a omrebet er sera dirk mkekerei? Nglocha mildobech a chimam me a lechub e ngmiltabt a ochim. Ke dirk melatk er a delam er a longelaod er kau? Nglocha ngiltechii tia el telemall e muidii er a bandage. Me ke lmangel e ngii a ungil el mengedecheduch er kau e mechulau me ngmlo ungil a rengum. Me sel taem, e ke di mle mereched el metik a ongelaod.

A klengar a lmuut el mo meringel sel dorael el mo meklou. A mondai a meleketek e mo meringel a debetik a ongelaod. Engdi ngklengiterreng, e le mondai er a remeklou el chad a diak el sebechel el mesmechokl el di okiu a chedil el omechull me a bandage. Me bo dosaod.

• Ngmla ta el moridii a urerem? A Julian a dmu el kmo, sera kuridii a urerek, e ak kmal kilebetiekl e mlo mekngit a renguk. Ngmlo omdasu el kmo, ‘Ngmekerang a kumekerreu er a telungalek er ngak? Ngera uchul me ak kmal meketeketa el oureor e chelechang e a kombalii a oltobed er ngak?’

• Ke locha dirrek el mekngit a rengum e le ngmetemellang a chebechiielem. A Raquel a dmu el kmo: “A bechik er a lechitak er a 1 el rak me a 6 el buil er a mla memong, e ngkmal mlo mekngit a renguk e kmal milecham a renguk. A ringel me a chelebuul el blo kulechesuar a kmal diak a ringel el mo mekesiur.”

• Me alta e ngar er ngii a secherem el diak el mukar. A lebebil e ke locha mo ua Job el dilu el kmo: “Ng mla tmurk a renguk el chad; ng dikea le soak el melemolem el chad.” (Job 7:16) Me a lechub e ke ua uldesuel a Luis el 80 a rekil el chad, er a ledu el kmo: “A lebebil er a taem e a kumdasu el kmo ak di mengiil er a kodellek.”

• Me a lechub e ngkodellel a betik er a rengum a uchul me kosiik a ongelaod. A Robert a dmu el kmo: “Ngkmal dimlak kuumerang el kmo a ngelekek a mlad er sera le accident a skoki. Me a ringel el blo kchelebangel er ngii a di ua sel ringel el losaod er ngii a Bades el kmo, ngkedorm el oles el merus el tomellii a renguk.”​—Lukas 2:35

A Robert, me a Luis, me a Raquel, me a Julian a miltik a ongelaod er a taem er a chelebulir e tia el ongelaod a mla er ngike el Dios el Olab a Bek el Klisiich. Ngmekera e meskid a ongelaod? Ngsebechel el mo meskau a ongelaod?

A apostol el Paulus a mesaod er a Jehovaha el kmo: Ng “Dios er a bek longelaod el mengelaod er kid sel de ngara chelsel a ngiidil ringel.” (2 Korinth 1:3, 4, BT) Me a Biblia a oterekokl a rengud el kmo kede rokui el sebeched el nguu a ngelsuil a Dios, e dirrek el ngika el Demad el ngar er a eanged a di sebechel el chemolodii a rengud er a chelsel a ngii di el ringel.

Me nguaisei, engdi ngar er ngii a tekoi el kired el meruul a lsekum e ngsoad el nguu a ongelaod er a Dios. Ngmekerang a toktang e mo sebechel el ngosukid a lsekum e ngdirkak a ta el bo domes er ngii? A profet el Amos a uleker el kmo: “Ng sebechir a re terul chad el mo dmak el ngar omerael el di dimlak bo le ta rengrir el kirel ngiil omerael?” (Amos 3:3) Me a Bades a mengelechel er kid el kmo: “Molekeed er kemiu er a Dios, me bo lekeed er kemiu.”​—Jakobus 4:8.

Me ngmekerang e mo ulterekokl a rengud el kmo a Dios a olekeed er ngii er kid? A kot el uchul, e ngbetok el taem el lomelekl el mesaod el kmo ngsoal el ngosukid. (Momes er a baks.) E a ongerung, e ngokiu a tekingir a rechad el tir a mla nguu a ongelaod er a Dios, el rechad er chelecha el taem er kid me a dirrek el irechar.

Me a rebetok a osiik a ongelaod er a Dios er chelechang el di ua King el David el mlo chelebangel er a klou el chelebuul me ngmle ta el loluluuch el mo er a Jehovah el kmo: “Mrengesii a ongtik a kumekedong el olengit a ngesou er kau.” Me a Dios, ngulenger er ngii? Ochoi, e le David a dilu er a uriul el kmo: “Ak mla nguu a ngesou, mak kmal oldanges, e mengitakl el mereng a sulel.”​—Psalm 28:2, 7.

A NGERECHELEL A JESUS EL MENGELAOD ER A RENGAR ER A KLENGITERRENG

Ngmle moktek er a Dios el soal a Jesus a bo longelaod er a rechad. Me ngmilsang a bebil el ngerachel, engdi ngdirrek el mle soal a Jesus a bo el “omkar a chelemuurreng” e bo ‘longelaod er a rokui el mengeiung.’ (Isaia 61:1, 2) Me ngua lolekoi a ulaoch, a Jesus a kmal mle semeriar er a rechad, el ileakl tirke el “chorma er oberaod el chelungel.”​—Mateus 11:28-30.

Me a Jesus a milengelaod er a rechad el uleba llomeserreng me a ungil el omeruul, e dirrek el mla er ngii a taem el lulemekungil er a resmecher. A ta er a klebesei e a chad el mle chebedes a mlo er a Jesus e ullengit er ngii el kmo: “Chomko ng soam, e ng sebechem el kikidak.” Me a Jesus a kmal mlo chubur me ngdilu er ngii el kmo: “Ng soak, me bo mklikiid!” (Markus 1:40, 41) Me ngika el chebedes a mlo ungil er a rektel.

Me alta e a Ngelekel a Dios a diak lengar tia el chutem el mengelaod er kid. Engdi a Demal el Jehovah “el Dios er a bek longelaod” a melemolem el mengelaod er tirke el ousbech a ngeso. (2 Korinth 1:3, BT) Me bo dosaod a eua el tekoi el lousbech a Dios el mengelaod er a rechad.

• A Biblia. “A ikel ngar a Chedaol Llechukl a melluches el olisechakl er kid, me ng mo sebeched el melatk e mengiil el klou a rengud e meduch a rengud el ultuil er a Chedaol Llechukl.”​—Rom 15:4.

• A Chedaol Reng er a Dios. Telkib er uriul er a kodellel a Jesus e a ongdibel er a Rekristiano a mlo er ngii a budech er a chelsel. E ngera uchul? E le “ng uleak a ngelsuil a Chedaol Reng ma omeluu er tir er a Rubak.” (Rellir 9:31) Me a chedaol reng er a Dios el ngii a oureor el klisichel, a kot el mesisiich me ngsebechel el ousbech er ngii el mengelaod er a rechad er a chelsel a ngii di el ringel.

• A Nglunguuch. A Biblia a omeklatk el kmo: “Lak el sebek a rengmiu er a ngii di le ngerang, e bai molengit er a Rubak er a bek el nglunguchiu, a ikel mousbech, el di blechoel el mereng a sulel. E a budech er a Dios, el diak el sebechel a chad el mo cherrungel el medengelii, a mo mtebechel a rengmiu ma uldesuiu.”​—Filipi 4:6, 7.

• A Rekldemed el Kristiano a sebechir el mo ua mera el sechelid el mengelaod er kid er sel taem el dechelebangel a ringel. A apostol el Paulus a milsaod er a rudam er ngii el kmo, ‘ngkmal klou a bla le ngesukak er ngii’ er a rokui el ‘chelebulek ma ringelek.’​—Kolose 4:11; 1 Thesalonika 3:7.

Engdi ke locha mo melatk el kmo ngmekera e sebechel el mo tmaut aika el tekoi. Me bo dosaod a tekoi el dilubech el mo er a rechad el mle chelebangel a mondai el dulsaod er a uchelel. Kid, a uai tir el sebeched el suubii el kmo a Dios a dirk oltaut er tia el klebokel el telbilel el kmo: “Ak mo chemolodau er a Jerusalem el ua chedil a longelaod er a ngelekel.”​—Isaia 66:13.

SEL BO LAK A URERED

A Setha a dilu el kmo: “Ngak me a bechik a dul mlo diak a ureram er a osisiu el taem. Me ngmle eru el rak el lolengeseu er kemam a rechedemam, e aki dirrek el milengereker el meruul a mekekerei el ureor. Me tiang a mlo uchul a ringelel a uldesuel a Priscilla, me ngak a mlo omdasu el kmo ngkmal diak a ultutelek el chad.

A Seth a dirrek el dilu el kmo: “Aki milekerang e outekangel? A Priscilla a mle blechoel el melatk er a tekingel a Jesus el ngar er a Mateus 6:34 el milsaod el kmo, ngdiak el kired el mo suebek a rengud er a klukuk, e le klukuk a ngar er ngii a sebekreng er ngii. Me a dmolech el nglunguchel a dirrek el millisiich er ngii el mo outekangel. E ngak a kuk mlo mechelaod a renguk er a bades er a Psalm 55:22. Ak di ua ngike el milluches er a Psalm, el ngilai a rokui el berraod er a renguk el msa Jehovah e mlo melechesuar el kmo ngolengeseu er ngak. Me alta e ngmla mo er ngii a urerek, engdi aki melasem el omekbeot a klengar er kemam el oltirakl er a ulekrael er a Jesus el ngar er a Mateus 6:20-22. E a ngaruchei er a rokui el tekoi, e ngkmal mla mo kmes a deleuill er kemam me a Jehovah me a dirrek el deleuill er kemam el terung.”

A Jonathan a dilu el kmo: “Ngkmal mlo suebek a renguk el kirel a ngar medemam el klebesei, er sera lemetemall tia el siobai er a telungalek er kemam. Ngtelemellel a keizai er a beluu a uchul, e tia el siobai er kemam el mla ngar er ngii el 20 el rak a di mlo diak a belkul. Me ngak me a bechik a di mlo kautoketok el kirel a udoud, e dirrek el mlo diak el sebecham el ousbech a credit card el omechar a klalo, e le aki bekikl a bo loltngakl er ngii.

“Engdi a Tekingel a Dios me a chedaol reng er ngii a ngilsukemam el mo ungil el melilt a tekoi el ki moruul. Ak kilengei el mo meruul a ngii di el ureor, e mlo diak ki momechar a diak a ultutelel el klalo. Me kemam el Sioning er a Jehovah a uchul me a rudam me a rudos er kemam a ullengeseu er kemam. Te kmal millisiich a rengmam e dirrek el ngilsukemam sel lesal mo metacherbesmam.”

SEL LEMETEMALL A CHEBECHIIL

A Raquel a dilu el kmo: “Ngkmal miltemall a renguk e mlo kesib a renguk er sera lechitak a bechik. Ngdirrek el kmal mlo mekngit a renguk. Engdi a kullekeed er ngak er a Dios, me ngmilengelaod er ngak. Me a budech er a Dios a milengelaod er a renguk er a bek el sils sel kululuuch el mo er ngii. Me ngua dedu el kmo ngliluut el sumecheklii a miltemall el renguk.

“Ak dirrek el kmal mereng a sulel el kirel a Tekingel el Biblia, e le ngilsukak me ngmo diak el kesib a renguk e kulemolem el ouketui er a chad. Ngkmal soak a tekingel a apostol el Paulus el ngar er a Rom 12:21 el kmo: “Lak bo mechitechut er a mekngit; e bai bo mesisiich er ngii el meruul a ungil tekoi.”

“A ta el kmeed el sechelik a ngilsukak el mo mtebengii el kmo ngkirek el melemolem er a klengar er ngak. Ngulechotii a bades er a Olisechakl 3:6 e dilu er ngak el kmo ngmo er ngii a taem el mo kired el chemoit a uldasu el mle soad. Me alta e ngmle meringel er ngak engdi ngtekoi el ngak a uluusbech er ngii. Me chelechang e ngmla mo er ngii a ngodech el moktek er a klengar er ngak.”

A Elizabeth a dmu el kmo: “Ke kmal mo ousbech a ngeso sel lemetemall a chebechiielem. A ta el kmal kmeed el sechelik a mera el mle bek el sils el olengeseu er ngak. Nglmangel lobengkek, e mengelaod er ngak, e rirellak el mo melechesuar a bltikerreng me ngmlo diak kumdasu el kmo ak mla motngakl el chad. Me ak kmal oumerang el kmo a Jehovah a uluusbech er ngii el melisiich er a renguk el kmal miltemall.”

A TAEM ER A SECHER ME A CHELUODEL

A Luis el dulsaod er ngii er a suobel er a uchei a kmal smecher a chaidirengul, e mla mo eru el taem el kileed e ngmad. Me chelechang e ngkirel el ousbech er a oxygen el 16 el sikang er a ta el sils. Me ngdmu el kmo: “Ak di blechoel el meluluuch el mo er a Jehovah, e a uriul er a kululuuch el mo er Ngii e ak mo melechesuar a klisichel el ngosukak. Me a nglunguuch a smisichii a renguk me ngsebechek el melemolem el outekangel, e le kuumerang er Ngii e dirrek el medengei el kmo ngomekerreu er ngak.”

A Petra el bekord el 80 a rekil a mesaod el kmo: “Ngkmal soak el meruul a betok el tekoi engdi ngdikea el sebechek. Ngkmal meringel er ngak sel kumelechesiu er ngak el di merael el mo mechitechut. Ngdirrek el kmal mo mechitechut a renguk sel kulatk el kmo a klengar er ngak a di ultuil er a kar. Me ak di blechoel el melatk er sel uldesuel a Jesus er a lolengit er a Demal me lecheridii a ringel el ble lechelebangel er ngii. Engdi a Jehovah a milsa klisichel a Jesus, me tiang a kmal melisiich er ngak. Me a nglunguuch a di ua keruk er a bek el sils, e le sel uriul er a kululuuch el mengedecheduch er a Dios, e ngmo mechelaod a renguk.”​—Mateus 26:39.

A Julian el mla smecher er a rakt el multiple sclerosis el mla mo kmeed el 30 el rak a dirrek el uaisei a uldesuel, me ngdmu el kmo: “A deruchellek er a urerek a kmal mle ngarbab, e chelechang e ak dengchokl er a wheelchair. Engdi a klengar er ngak a ngar er ngii a belkul er chelechang, e le a kuusbech er ngii el mesiou er a rebebil. Me sel dorous el mo er a rechad e ngmo diak di dolatk a ringeled, e a Jehovah a melemolem el oltaut er a telbilel el mo melisiich er kid er sel taem el dousbech er ngii. Me ak di ua apostol el Paulus el sebechek el dmu el kmo: ‘Ng ngar ngii a klisichek el remuul a ikel rokui el mer ngak el okiu a klisiich el lomeskak.’”​—Filipi 4:13.

A TAEM ER A KLENGITERRENG

A Antonio a dmu el kmo: “Ak kmal kilebetiekl er a bo kudengei el kmo a demak a mla metuchel er a mlai e mad. Ak mlo omdasu el kmo tia kmal diak lemelemalt el tekoi, e le ngikang a diak a telemellel el chad el mirrael er a omerollel. Engdi ngkmal diak a ngera el sebechek el rullii. Ngmle 5 el klebesei el diak lodengelii a rengul e mlad er a uriul. Me ak di milengemekl er a kngtil a renguk me lak lesang a delak, engdi sel di bo lengak el tang e ak di lmangel, e melatk el kmo ‘ngera uchul me nguaisei a tekoi?’

“Me ngar er a taem el lemekngit a renguk, e ak di blechoel el olengit er a Jehovah me lengesukak e lebeskak a budech er a renguk. Seikid e ngmo mechelaod a renguk. Ak dirrek el melatk er a omesodel a bades el kmo ‘a taem ma techall a mor a re bek el chad.’ Engdi a Dios el ngii a diak lomulak a oterekeklii a renguk el kmo, ngmo er ngii a techellek el lmuut el mo mesang a demak er sel taem er a okiis.”​—Olisechakl 9:11; Johanes 11:25; Titus 1:2.

A Robert el dulsaod er ngii er a uchei a dirrek el mle uaisei a uldesuel. Ngdilu el kmo: “Ngak me a bechik er a Maribel, a mlo melechesuar a budech er a uldesuam el ua losaod er ngii a Filipi 4:6, 7. E tiang a mlo er ngii el okiu a nglungucham el mo er a Jehovah. Me tia el budech er a rengmam a ngilsukemam el mo ungil el smodii a omelatk el kirel a okiis el mo er a rechad el meluches a chais er a beluu. Me alta e a skoki el miltemall a mlo uchul a kodellel a ngelekam el sechal, engdi ngdirk dmeu a rengmam el melatk aike el ungil temam el dilak, me aki blechoel el melatk aika el ungil el tekoi.

“Me sel taem el rekldemam el Sioning a dilu er kemam el kmo, te milsekemam el kmal mle chelellakl a rengmam e smodii a klaumerang er kemam er a chais el tilobed er a TV, e aki dilu er tir el kmo ngulterekokl a rengmam el kmo, ngokiu a nglunguchir a rebetok e ngmlo sebecham el kutmeklii tia el tekoi. Aki kmal oumerang el kmo, a Jehovah a ngilsukemam el okiu a diak lemochur el nglunguchir a rebetok.”

Me aika el tekoi el bla desaod a meketeklii el kmo, a Dios a sebechel el mengelaod er a rechad el chelebangel a kakerous el mondai me a omelsemai er a klengar. E kau a kuk mekerang? Alta e ke mo chelebangel a ngii di el mondai er a klengar, engdi lak mobes el kmo ngkmal ngar er ngii a ongelaod el sebechel el ngosukau er sel taem.b Mada molengit a ngeso er a Jehovah, el ngii a “Dios er a bek longelaod.”​—2 Korinth 1:3, BT.