Ulekrael el Kirir Tirke el Oltobed a Cheldecheduch er a Omesuub el kirel a Omesiunged el Mo er a Dios
Ngomuchel er tiakid el Omesiunged el kirel a Renged, e ngmo beot a omesodel a bldeklel a Omesuub el kirel a Omesiunged el Mo er a Dios. Aika el ulekrael me a uleklatk el beldukl er iou a mo omekbeches e omeketakl a tekoi el medung er sel suobel el dai er ngii a kmo “Ngmekerang a Deketmeklid el Kirel a Omesuub el kirel a Omesiunged el Mo er a Dios,” el tilobed er a May 2009 el Omesiunged el kirel a Renged.
◼ Cheldecheduch: Tiang a cheldecheduch el mlengai er a mla moterekokl el suobel engdi ngdiak el bo er ngii a ker me a nger. Ngike el mo mengedecheduch a kirel mesaod aike el tekoi el klou a lengesuir er a rechad er a ongdibel.
◼ Ker me a Nger: Tiang a di ua Omesubel a Ongkerongel, el di mo kedeb a omesodel a uchelel me a orokiolel, e mo er ngii a ker er a rokui el parakurab. Ngike el oltobed er a cheldecheduch a diak el kirel el betok a tekoi el losaod. A lengar er ngii a taem, e ngkirel el mechuiu aike el meklou a ultutelel el bades. Ngdiak a omengiuel a parakurab a lsekum e ngdiak a ulekrael el mo meruul el uaisei.
◼ Omesaod: Tia el cheldecheduch a diak el di el cheldecheduch me a omesaod el oeak a ker me a nger e le merekong, ngbai kirel ngike el odam el oltobed er ngii el mo oker a bebil el ker er a rechad er a ongdibel.
◼ Demonstrations me a Interviews: A ulekrael el kirel a demonstrate a belkul a kmo ngike el odam el mo oltobed er a cheldecheduch a ngerechelel el kutmeklii a demonstration; engdi ngdiak el belkul a kmo ngii a kirel el oltobed er ngii. Tirke el lolilt er tir el mo olengeseu er ngii a kirir el ungil a blekerdelir, e ngii a kirel el di me a medal e melekoi er tir. Ngungil a lak mousbech er a rebeches el chad me tirke el dirk ulemuchel el omerk a klumech el mo meruul er a demonstration, e le ke melatk el omesterir a techall me bo el sebechir el mo er a medal a ongdibel, ngbai sebechem el ousbech er tir el ua el chad er a blai. A rechad el mo meruul er tia el demonstration a kirir el kerekikl el meruul er ngii el chemau a rechad er a ongdibel. Tirke el lousbech er tir er a interview a diak di ledengchokl e longedecheduch, e te bai kirir el mo er a medal a ongdibel. Ngkirir el melasem er a uchei el meruul aika el demonstrations me a interviews. A odam a sebechel el kodebengii a cheldechedechal, a lsekum a miting a mla engelakl er a temel, engdi ngbai diak el kirel el mengoit a demonstration me a interview. A rudam el olengeseu er a remechuodel a kirir el omes er ngike el tebechelel a chelechad er a remechuodel me a lechub a ta er a remechuodel er a uchei er a lolilt er a rechad el kirel a demonstration me a interview.
A lsekum e ngngar er ngii a cheldecheduch el ileakl a ulekrael el kirel, e ngkmal kirel el motirakl. A rudam a mo sebechir el rullii a Omesuub el kirel a Omesiunged el Mo er a Dios el mo ungilbesul e ungil a bldeklel sel loltobed a cheldecheduch er a Omesuub el kirel a Omesiunged el Mo er a Dios el oltirakl er aike el ulekrael el mla medung er bab.—1 Ko. 14:40.