A Babier el Mla er a Chelechad er a Ruungerachel

Betik er a Rengmam el Kldemam el Sioning er a Jehovah:

Ngmera el dmeu a rengud er aika el taem el dekiei er ngii er chelechang! Ngkmal dmeu a rengmam el oureor el obengkemiu el “rokui” el rudam me a rudos el mengebkall er a Demad el ngar er a eanged el Jehovah.​—Sef. 3:9; Jn. 14:12.

A deuil a rengud sel dosiou er a Jehovah a diak el belkul a kmo ngdiak a mondai el dechelebangel. Ngar er tia el mlo merek el rak er a omesiou, e a bebil er kemiu a mlo chelebangel a ringel el oeak a desiu, me a ieleb, me a ses el eolt, me a lmuut el bebil. (Mt. 24:7) A rebetok el chad a chuarm a bedengir er a secher me a chelitechetul a cheluodel er a bek el sils. Kid el rokui a kired el outekangel aika el di merael el mo klou el “ringel ra cheroll.” (Mt. 24:8) Ngar er a bebil er a beluu el uldimukl er ngii a Armenia, me a Eritrea, me a South Korea, e a rebetok er a rudam er kid a ngar er a kelebus el kirel a klaumerang er tir.​—Mt. 24:9.

Ngerang a mla ngosukid el mo oba melemalt el uldasu alta kede chelebangel aika el meringel el taem? Sel bades er a rak er a 2010 a ulemeklatk er kid er a ta er a klou a ultutelel el tekoi el kmo: ‘A bltikerreng a outekangel a rokuil tekoi. A bltikerreng a diak a ulebengelel.’ (1 Ko. 13:7, 8) Nguaisei, a bltikerreng er kid el mo er a ta me a tang, me a bltikerreng er kid el mo er a Jehovah, a melisiich er kid el mo sebeched el outekangel.

A rebetok el leko te Kristiano a mechas a rengrir er a klungel a ureor er a berkel a klumech el doruul er ngii el ngii a meketmokl el okiu a osisiu el blekeradel er a chelsel a kakerous el beluu. Alta te diak el oba osisiu el uldasu el kirel aike el doumerang me aike el dolisechakl, engdi a rebebil er tir a melekoi el kmo, “Kemiu el chad a meruul er a ureor el kiram el meruul er ngii!” Ngerang a ta er a tekoi el ngosuterir a Resioning er a Jehovah el melemolem el omerk er a klumech er a bek el sils? A nger er tiang a bltikerreng. Me ngdi ua Demad el ngar er a eanged, kid me ngdirrek el diak el soad a ngii di el chad a bo el ngemed. (2 Pe. 3:9) A urunguled el soad a rokui el chad a bo el nguu a bult a mocholt er a beches el ildisir a rechad el mla mo oldingel a obliil el 7,508,050 er tia el mlo merek el rak er a omesiou. Ngerang a lmuut el ta er a klechelid el rechedal a kongei el ousbech a temir el mo omerk er a klumech el mo er a rechad?

Ngkmal melisiich er kid sel desa tia el ulaoch el melemolem a otutel el llechukl er a Isaia el kmo: “A ngar medad el sils, e sel rois el le dechor er ngii a Templo a kot el mo metongakl er a rokuil rois. Ng betok el beluu a mei el ua lomaoch omoachel el mor ngii.” (Isa. 2:2-4) Uldimukl er sel klou el ildois er a rechad el merael el mo er a blil a Jehovah a tirke el 294,368 el chad el miltecholb er tia el mlo merek el rak er a omesiou. Kede kmal outkeu er tirka el chad el mei er a telungalek er kid. Me bo el sebechel sel bltikerreng er kid el Kristiano el ngosukid el melemolem el olengeseu er tirka el bebil er kid el omtok a ultekengel a cherroued el ngii a Satan el Diabelong.​—1 Pe. 5:8, 9.

A rechad el mlo er a Chedaol el Blsoil er a Ongeru el Ureor, er a March 30, 2010 el 18,706,895 a ildisir, a ochotii el kmo ngngar er ngii a techellir a rebetok el miliol el chad el me obengked el mengull er a Jehovah. Ngmera el dmeu a rengud e le Jehovah dirkak el temellii tia el mekngit el blekeradel er a beluulechad! Me nguaisei, a bltikerreng er kid a ngosukid el mo melemolem el outekangel el meruul er tia el ureor.​—2 Th. 3:5.

Aike el Edei el Sils el Meklou el Ongdibel el dai er ngii a kmo “Molemolem el Kmeed er a Jehovah” el mla er ngii el meliuekl er a beluulechad er a rak er a 2010, a millisiich er a deleuill er kid me a Demad el ngar er a eanged, el Jehovah. Ngmera el klemerang aike el lolekoi a milluches er a Psalm el kmo: “Te ngeltengat a re chad el Dios er tir a [Jehovah].” (Psa. 144:15) Me a ngii di el ngerang el mo duubech er a ngar er a medad el klebesei, engdi kid a ulterekokl a rengud el kmo a lsekum e kede melemolem el kmeed er a Jehovah, e ngdiak a ngera el bo demedakt er ngii. (Psa. 23:4) Ngdi kmedung e a Jehovah, el oeak a Ngelekel a mo “tomall a urerel a Diabelong.” (1 Jn. 3:8) Nguaisei, kede kmal oureng me lemei sel sils! Engdi chelechang, e ngkmal betok a urered el kired el mechesang el meruul.​—1 Ko. 15:58.

Bo lulterekokl a rengmiu el kmo ‘ngdiak kimekimd’ el melatk er kemiu er a nglungucham. (Rom 1:9) Molemolem el “omekedelad er kemiu ra chelsel a bltikerreng ra Dios; e mongiil ra klechubechub ra Rubak er kid el Jesus Kristus el dimerkmo cho mnguu a diak a ullebengelel klengar.”​—Jud. 21.

Ngbetik a rengmam er kemiu el rokui!

Rudam er kemiu,

Chelechad er a Ruungerachel er a Resioning er a Jehovah