Moltirakl a Kerebai er a Reprofet—Hosea
1. Ke locha mla oker er a ngera el ker?
1 ‘Ngera el tenget ak kengei el oldars el mo er a Jehovah?’ Alta ke mla oker er tia el ker sel molebedebek el kirel a klungiolel a ungilreng me a klechubechub er ngii. (Psa. 103:2-4; 116:12) A Hosea a kilengei el meruul aike el ledilu er ngii a Jehovah, alta e ngmle kirel el melenget aike el soal el tekoi. Ngmekerang a doukerebai er a Hosea?
2. Kede mekerang a doltirakl er a ungil el kerebil a Hosea el melemolem el omerk er a klumech?
2 Momerk a Klumech er a Mekngit el Blsechel: A klemechel a Hosea a di mlo er aike el teruich el kebliil er a renged er a Israel, el mochu nguemed a mera el omengull er ngii. A King el Jeroboam II a mirruul a mekngit er medal a Jehovah e millemolem a omengull el ngelekel a kerbou el lulemuchel er ngii a Jeroboam I. (2 Ki. 14:23, 24) Tirke el ongingil el king a millemolem er tia el mekngit el omeruul er aike el teruich el kebliil er a renged el mo lmuut er sera lemokngemed er a rak er a 740 er a uchei er a Kristus. Me alta ngmle klou a klsuul el omengull, engdi a Hosea a mle blak a rengul el mesiou el profet el bekord el 59 el rak. Me kid, ngblak a rengud el omerk a klumech er a bek el rak, alta kede mo chelebangel a ultok me a lechub a rechad a diak el semeriar?—2 Ti. 4:2.
3. Ngmilekerang a klengar er a Hosea e ochotii a klechubechub er a Jehovah?
3 Molatk er a Klechubechub er a Jehovah: A Jehovah a dilu er a Hosea me bo lebechil ‘a redil el mo mengoit er ngii.’ (Hos. 1:2) Me alta e a bechil er a Gomer a milechelii a ngelekel el sechal, engdi uriul e ngmilechelleterir a reteru el ngalek er a chereomel. A Hosea el kilengei el ousubes er a bechil a ulechotii a klou el klechubechub er a Jehovah el bedul a Israel er sera lobult er a kngterir. (Hos. 3:1; Rom 9:22-26) Kid kede kongei el mechei aike el soad el tekoi me bo el sebeched el meketeklii a klechubechub er a Jehovah el mo er a rebek el chad?—1 Ko. 9:19-23.
4. Ngera bebil er a tenget el sebeched el odars el mo er a Jehovah?
4 A rebebil el mesiungel a Jehovah a mla mechei a ungil el ureor me bo el sebechir el mengoit a klou el taem el kirel a omesiungir. A rekuk bebil a di melemolem el mesobil me a lechub e ngdiak bo loungalek e le ngsorir el nguu a Renged el mo kot. Me sel dolebedebek er a klengar er a Hosea, e kede locha mo melatk el kmo, ‘Ngkmal diak el sebechek el rullii sel tekoi el lerirellii.’ Engdi sel lorael el mo klou a omereng el saul er kid el kirel a blekokeuii er a Jehovah e dultuil er a chedaol klisichel el kirel a omelisiich, e nglocha sebechel el mo ousbech er kid el remuul a tekoi el dimlak domdasu el kmo ngsebeched el remuul, el di ua Hosea.—Mt. 19:26; Fil. 2:13.