A cheldebechelam a meruul e oltobed a betok el miliol el Biblia me a lmuut el bebil er a babier er a bek el rak el diak el ocheraol. Aki omekedechor e mengetmokl a Blil a Ongdibel me aike el obis er a Resioning er a Jehovah. Aki dirrek el olengeseu er a rebetok el chad el oureor er a Bethel me a remissionari, e olengeseu er a rudam me a rudos er kemam sel lengar er ngii a klou el tellemall er a beluu. Me ke locha mo melatk el kmo, ‘Aki ngmai a udoud er ker el meruul aika el ureor?’

Ngdiak ki molecha ongeltacher e diak a chad el merael el melai a tenget. Me alta e aki ousbech a betok el udoud el mengetmokl er tia el ureor er a berkel a klumech, engdi ngdiak ki morael el olengit a udoud er a rechad el kirel. A ongeru el otebedel a babier el Ongkerongel el tilobed er a kuk betok er a dart el rak er a mla me mong a millekoi el kmo, aki oumera el kmo a Jehovah a ngike el olengeseu er kemam me “ngdiak ki bo mongeluch er a rechad el olengit a udoud el kirel tia el ureram,” e dirkak a ta el ki moruul el uaisei!​—Mateus 10:8.

A ureram a meketmokl el okiu a tengetengir a rechad. A rebetok el chad a oba omereng el saul el kirel a ureram el olisechakl er a Biblia me te melenget el kirel. Me a Resioning a dmeu a rengrir el melenget a temir, klisichir, ududir me aike el ngar er ngii er tir el mo meruul er a soal a Dios er a beluulechad el rokir. (1 Kronika 29:9) Ngar er a Blil a Ongdibel me a dirrek el ngar er aike el ta el sils el ongdibel me a meklou el ongdibel er kemam, e ngngar er ngii a blil a tenget el tirke el sorir a sebechir el mo melecha tengetengir er ngii. Ngdirrek el sebechem el melenget el ousbech er a website er kemam el jw.org. A oumesingd er aika el tenget a mla er tirke el chad el diak el sal ungilbesrir, el di uai ngike el chebuul el melakl el dil el lulsaod er ngii a Jesus el lilecha teblo el sens er a blil a tenget er a templo. (Lukas 21:1-4) Me ngsebechel a ngii di el chad el “imakl a bebil er a udoud” el bo lolenget el “oltirakl er a telbilel a rengul.”​—1 Korinth 16:2; 2 Korinth 9:7.

Ngulterekokl a rengmam el kmo a Jehovah a mo melemolem el melisiich a rengrir tirke el sorir el ‘mengull er ngii el okiu omelenget el ikel kot el ungil’ er tir el olengeseu er a ureor er a Renged, me bo el sebechel el mo tmaut a moktek er ngii.​—Osisechakl 3:9.

• Ngera klekakerous er a cheldebechelam me a kuk bebil er a klechelid?

• Ngmekerang aki mousbech a tengetengir a rechad?

A klou a ultutelel el osisechakl er a Biblia el soadel er a Blil a Ongdibel a mesaod el kirel a Rengedel a Dios, el ngii a mle uchetemel a omesiungel a Jesus.​—Lukas 8:1.

Ngbasio er a mera el omengull el ngar er a chelsel a beluu. A Resioning er a Jehovah a ngar er aika el Blil a Ongdibel e mengetmokl a ureor er a berkel a klumech er sel beluu lengar er ngii. (Mateus 24:14) Aika el Blil a Ongdibel a kakerous a meklungel me a teletelel, engdi ngii el rokui a di beot a okedecherul, e sebechel el kuk betok er a ta el ongdibel a ousbech er ngii. Ngar aika el merekong el rak, e aki mla omekedechor a betok el telael el beches el Blil a Ongdibel (el kesengil e ngeim er a ta el sils) e le ngklou el ildisir a rechad er a ongdibel a uchul. Ngmekerang e meketmokl tiang?​—Mateus 19:26.

Ngmeteketek el okiu a tengetengir a rechad el kongei el melenget. Aika el tenget a modurokl el mo er a obis er a Resioning er a Jehovah, me bo el sebechel a udoud el mo er aike el ongdibel el ousbech a ngeso el kirel a okedecherul me a lechub e ngukbechesul a Blil a Ongdibel er tir.

A rechad el kakerous a blekerdelel a klengar er tir el diak el uduudel a omekedechor aika el Blil a Ongdibel. Ngar er a betok el beluu, e a Cheldellir a Rechad el Omekedechor e Omekbeches a Blil a Ongdibel a mla meketmokl. Tirka el rudam me a rudos el mesiou el omekedechor a Blil a Ongdibel me a rebebil el melenget a temir el mo olengeseu, a ngar er a ta er a ongdibel el mo er a kuk tang er a chelsel a ta el beluu el mo olengeseu el omekedechor a Blil a Ongdibel. Ngar er a bebil er a beluu, e a rengar er ngii a duch er tir el Sioning a mla metutk el mo oungerachel a okedecherul me a ukbechesul a Blil a Ongdibel el ngar er aike el beluu el mla moterekokl er tir. Me alta e te betok a ngar er ngii a duch er tir el ngar er aike el beluu el iliuekl er tir el melenget a temir el oureor el omekedechor, engdi a ruumesingd el chad er a ureor a chad er sel ongdibel. A chedaol reng er a Jehovah me a blakerreng er a rechedal a uchul me aika el rokui el tekoi a meketmokl.​—Psalm 127:1; Kolose 3:23.

• Ngera uchul me a blil a omengull er kemam a okedongall el Blil a Ongdibel?

• Ngmekerang e sebechel el obekedechor a Blil a Ongdibel el meliuekl er a beluulechad el rokir?