Moltirakl a Kerebai er a Reprofet—Nahum
1. Ngera sebeched el suubii er a babier er a Nahum?
1 A telemellel a Ninive er a irechar a ochotii el kmo ngdi uaike el lulemlaoch a Nahum, a Jehovah a mo melaitechei er a recherrouel me ngmo lmuut er ngike el kot el mesisiich el cherrouel a diak el sebechel el mo omtok er Ngii. (Nah. 1:2, 6) A dekerekikl el omes er a ulochel a Nahum e ngsebechel el osisecheklid el kirel a omesiunged.
2. Ngmekerang e a klumech el domerk er ngii a mo uchul a omelatk?
2 Meskid a Ongelaod me a Omelatk: A kot el osenged er ngii, e a babier er a Nahum a kora di ouchais er a telemellel a Ninive, el belurir a remekedidai a rengrir el chad er a Asiria. (Nah. 1:1; 3:7) Engdi tia el subed a mle ungil chais el kirir a rechedal a Jehovah. A Nahum, el belkul a kmo “Ngmengelaod er a rechad,” a ulterekeklii er a rekldemel el chad er a Judea el kmo ngdi kmedung e a recherrouir a mo mokngemed! A Nahum a liluut el oterekeklii el kmo a Jehovah a “cheuotelir a re chedal er a taem er a chelebuul.” (Nah. 1:7) Sel domerk er a klumech, e kede ouchais a ungil chais e melisiich er a rechad el mo osiik a osebechakl el ngar er a Jehovah.—Nah. 1:15.
3. Ngmekerang a doukerebai er a Nahum sel dousbech a okesiu me a lechub a olechotel a tekoi?
3 Mousbech a Okesiu me a Olechotel a Tekoi: A Jehovah a ulemekrael er a Nahum el mo omekesiu er a rebetel a Ninive el mo er sel mats er a Ekipten er a Thebes, el lulekngemedii a Asiria er a uchei. (Nah. 3:8-10) Me kid sel dongedecheduch er a rechad el kirel a ulebengelel tia el kmal mekngit el blekeradel, e ngsebeched el ocholt a ulaoch er a Biblia el kmo a Jehovah a oltaut a tekingel el mo lmuut er aike el kmal mekekerei. El ua tiang, a rechad er a Babilon me a Media er a bo loumekemad er a mats er a Ninive er a rak er a 632 er a uchei er a Kristus, e a klou el chull a ielebii a Omoachel el Tigris, el mlo uchul a telemellel a mesisiich el tedebechel a cheotelel tia el mats. Me a Ninive a di mle mereched el metemall, el di ua lulemlaoch a Jehovah.—Nah. 1:8; 2:6.
4. Ngmekerang a bo lebleketakl a cheldechedechad me a rechad bo lodengei?
4 Bo Bleketakl Me Bo Lodengei a Tekoi el Dosaod: A blekerdelel a Nahum er a loluches a tekoi a mle smiich e bleketakl. (Nah. 1:14; 3:1) Me kid me ngdirrek el soad el ousbech a tekoi el beot er a rechad el mo medengei. (1 Ko. 14:9) Sel dekot el mengedecheduch er a rechad, e ngsoad el meketeklii a uchul me kede oldingel er tir. Me sel mosuub a Biblia el obengterir a rederta el chad, e mngesuterir el mo mekurulii a klaumerang er tir er a Jehovah me a Tekingel me bo loba omereng el saul el kirel a rolel a suobel a lolutk el kirir.—Rom 10:14.
5. Ngera el ulterekokl el tekoi a debetik er a ulochel a Nahum?
5 A Nahum a kmal uluumerang er a ulterekokl el otutel a tekingel a Jehovah e tiang a bleketakl el meues er a babier er a Biblia el ousbech er a ngklel. Me chelecha el lolekedang a ulebengelel tia el blekeradel er a Satan, e bo dengai a ongelaod er a tekingel a Dios el kmo: “Ng diak a re cherrouel el mo erul le bekiis el mo omtok er ngii.”—Nah. 1:9.