Ngtecha Mikael el Ngike el Bderrir a Rechanghel?

A BIBLIA a diak el betok a omesodel el kirel ngika el anghel el ngklel a Mikael. Engdi sel losaod el kirel ngika el anghel e ngblechoel el ngar er ngii a tekoi el loruul er ngii. Ngar er a babier er a Daniel, e a Mikael a oldechelakl er a remekngit el anghel. E ngar er a babier er a Jude, e ngkaititekangel ngii me a Satan. E a babier er a Ocholt a kmo, ngoumekemad er a Diabelong me a remekngit el anghel er ngii. Me a Mikael el mesebechakl er a omengederederel a Jehovah e oumekemad er a recherrouel a Dios, a mera el lotireklii a belkul a ngklel el kmo, “Ngtecha ua Dios?” Me nguaisei, engdi ngtecha ngika el Mikael?

A lebebil er a taem, e a rechad a betok a ngklir. El uai tiang, a mle ta er a ngklel a Jakob a Israel me a apostol el Petrus a dirrek el mle Simon a ngklel. (Genesis 49:1, 2; Mateus 10:2) Me a Biblia ochotii el kmo, a Mikael a ta er a ngklel a Jesus Kristus, er a uchei me a uriul er a lemei er a chutem. Me domes a bebil er a bades el mo meketeklii tiang.

Ngike el Bderrir a Rechanghel. A Tekingel a Dios a melekoi el kmo a Mikael a “bderrir ar anghel.” (Jude 9, BT) Mutebengii el kmo a Mikael a ngike el bderrir a rechanghel. Tia belkul a kmo ngdi chimo a anghel el bderrir a rokui el anghel. Me a Biblia sel losaod el kirel ngike el “bderrir ar anghel” e ngmelekoi el kirel a di chimo el anghel. E a Jesus a blechoel el losaod er ngii el ngar tia el deruchall. Ngar er a 1 Thesalonika 4:16, BT, e ngmesaod el kirel a Rubak el Jesus Kristus el kmo: “Le Rubak a ngii a ngara eanged el me metengel loba kedul, ma ngor ra bderrir ar anghel.” Me a ngerel a Jesus a losaod er ngii el kmo ngerel ngike el bderrir a rechanghel. Me ngkmal bleketakl el ngar er a bades el kmo, a Mikael el ngike el bderrir a rechanghel a melutk el kirel a Jesus.

Merreder er a Urrurt er a Mekemad. Ngar er a Biblia e ngmelekoi el kmo “Mikael ma re anghel er ngii a uluumekemad er a drakon, . . . ma re anghel er ngii.” (Ocholt 12:7) Me a leuaisei, a Mikael a merreder er a urrurt er a reblak a rengrir el anghel. A babier er a Ocholt a dirrek el mesaod er a Jesus el Merreder er a urrurt er a reblak a rengrir el anghel. (Ocholt 19:14-16) E a apostol el Paulus a milsaod el kirel a “Rubak el Jesus” me a “re mesisiich el anghel er ngii.” (2 Thesalonika 1:7) Me a leuaisei, e a Biblia a mesaod el kirel a Mikael me a “re anghel er ngii” me a Jesus me a “re anghel er ngii.” (Mateus 13:41; 16:27; 24:31; 1 Petrus 3:22) Me a Tekingel a Dios a kmal diak losaod el kirel a eru el urrurt er a reblak a rengrir el soldau el ngar er a eanged me a uchul me ngsebeched el melekoi el kmo, a Mikael a melutk el kirel a Jesus Kristus sel lengar er a deruchellel er a eanged.