A Adam me a Eva a mlo betok a rengelekir er a uriul er a letobed er a sers er a Eden. A kot el ngelekir el sechal el Kain a mlo chad er a sers e a ongeru el ngelekir el sechal el Abel a mlo mengkerengel a sib.

A ta er a klebesei e a Kain me a Abel a mirruul a tengetengir el mora Jehovah. Kau, ke medengei el kmo ngngera tenget? A tenget a ileakl el sengk. A Jehovah a mle dmeu a rengul er a tengetengel a Abel engdi ngdimlak lungil a rengul er a tengetengel a Kain. Tia uchul me a Kain a kmal mlo kesib a rengul. A Jehovah dilu er a Kain el kmo a ngesechel a rengul a sebechel mo uchul e ngrullii a mekngit. Engdi Kain a dimlak lorrenges.

A Kain a bai dilu er a Abel el kmo: ‘Me mobengkek el mora ked.’ Sera lebo el di el tir el tang el ngar er a ked e ngmilekodir a Abel. Me ngera ngmo meruul er ngii a Jehovah? Ngmilelsii a Kain loeak a lodikii el mo cheroid er a telungalek er ngii. A Kain a dimlak el sebechel lmuut el mo remei.

Ngngar ngii a sebeched el suubii er tiang? Nglocha mo kesib a rengud sel lak el duubech a tekoi el mo oltirakl er a soad. A lsekum kede mo melechesuar el kmo ngomechela el kesib a rengud me a lechub a rechad el omes er kid a dmu er kid, e ngkired el di mereched el mo ngodechii a uldesued e mtebechelii a rengud er a uchei er a bo longedereder er kid a rengud.

A Abel el mle betik a rengul er a Jehovah e mirruul a llemalt a uchul me a Jehovah kmal diak bo lobes er ngii. A Dios sel lebo lerellii a chutem el mo baradis e ngmo lmuut el lolutii a klengar er ngii.

Cherengel a taem e te mlo betok a rechad er a beluulechad. A ruumesingd er tir a mle mekngit el chad. Mo lmuut er a rebebil er a anghel me te mlo mekngit. Te chilitii a delengcheklir er a eanged e mei er a chutem. Ke medengelii a uchul me te mirruul er tiang? Me bo lsebechir el mo olab a bedengir a rechad e mo becherir a redil.

Tirka el anghel me tirka el redil a mlo er ngii a rengelekir el sechal. A rengelekir a mirrael el mo meklou el mo mekoar e bully er a rechad. Te millemall er a rechad. A Jehovah dimlak el sebechel mechei aika el tekoi me lolemolem el ngar ngii. Me ngmillib er a mo oba ieleb el olekngemed er a remekngit el chad.

Engdi ngmla er ngii a chimo el chad el mle ngodech er tir. Ngika mle betik a rengul er a Jehovah. A ngklel a Noah. Ngmla er ngii a bechil me a retedei el ngelekel el sechal el Sem, Ham, me a Jafeth el tir a dirrek el di diul mla er ngii a rebecherir. A Jehovah dilu er a Noah me lokedecherur a arhe me bo lsebechel ngii me a telungalek er ngii el suobel er a Ieleb. A arhe a klou el ua teletelel a baks el sebechel lombibechakl er bebul a ralm. A Jehovah dirrek el dilu er a Noah me lotuu a betok el charm er a arhe me lak lengemed.

Me a Noah di mle mereched el mo oureor el omekedechor er a arhe. Ngmle bekord el 50 el rak a klemengetel a taem el Noah me a telungalek er ngii a ulemekedechor er a arhe. Te rirellii lotirakl aike el ledilu Jehovah er tir. Chelsel tiakid el taem e a Noah milengelechel er a rechad el kirel a Ieleb. Engdi ngdimlak a ta el chad el lorrenges er ngii.

Seikid e ngmocha taem el bo lesiseb er a arhe. Ka me domes el kmo ngngera dilubech.