Te tela el Sioning er a Jehovah omodengelterir? A rebebil er kemam a locha obengkemiu el ngar er a skuul, tonari er kemiu, chad er a ureriu, me a lechub aki mla mengedecheduch er kemiu el kirel a Biblia. Aki rua techang, e ngera uchul me aki mesaod er a klaumerang er kemam el mo er a rechad?

Aki di ua rebek el chad. Ngkakerous a blekerdelel a klengar er kemam. A rebebil er kemam a mla er a ngodech el klechelid, me a rekuk bebil a dimlak loumerang er a Dios. Engdi uchei er aki bom Sioning, e aki rokui el chiloit a taem el kerekikl el merriter a osisecheklel a Biblia. (Rellir 17:11) Aki kilengei aike el tekoi el ki msiluub, e millilt el mo mesiou er a Jehovah el Dios.

Aki ngmai a klungiolam sel ki mosuub er a Biblia. Ngngar er ngii a mondai er kemam el ki mchelebangel me a dirrek el chelitechetemam el ua rebek el chad. Engdi aki mla metik el kmo sel ki moltaut a omellach er a Biblia er a chelsel a klengar er kemam er a bek el sils, e ngrullii a klengar er kemam el kmal mo ungil. (Psalm 128:1, 2) Sei a uchul me aki ouchais er a rebebil el kirel aike el ungil el tekoi el ki bla msuub er a Biblia.

Aki kiei el oltirakl a omellach er a Biblia. Aike el omellach el mosisechakl er a Biblia a melisiich a omengull el mo er a rebebil, me a melemalt el omeruul, me a blekokuii me a dirrek el tekoi el di mo uchul a klungiaol. Ngdirrek el sebechel el mo uchul a klisichir me a ungil el blekerdelir a rechad, e melisiich er a kltarreng er a telungalek me a tekoi er a kldung. Ngulterekokl a rengmam el kmo a “Dios a meral di osisiu er a rengul a re bek el chad” a uchul me aki chedal a klodam el ngii a modak el okiu a klaumerang er kemam, el diak a klekakeakl me a tekoi er a balatiks er a chelsel. Me alta e aki di ua rebek el chad, engdi sel ki bo mdak e aki toketekii a ileakl el cheldellir a rechad el kuk ngodech er a rokui el chad.​—Rellir 4:13; 10:34, 35.

• Ngera el tekoi a lekaisisiu er ngii a Resioning er a Jehovah me a rebebil?

• A Resioning te mla suub a ngera el omellach el oeak a omesubir er a Biblia?

A rebetok el chad a omdasu el kmo a Resioning er a Jehovah a ngklel a beches el klechelid. Nguaisei, engdi a betok er a 2,700 el rak er a mla me mong, e a remesiungel a di ta el mera el Dios a lulsaod er tir el “sioning” er ngii. (Isaia 43:10-12) A rechad a mle medengelkemam el Remesuub er a Biblia el mo lmuut er a rak er a 1931. Ngera uchul me aki ngiluu tia el ngakl el Resioning er a Jehovah?

Ngolecholt er a Dios er kemam. A doltirakl aike el babier er a ngar er a mong, e a ngklel a Dios el Jehovah, a llechukl el betok er a euid el telael el taem er a Biblia. Ngar er a betok el oidel a Biblia, e te miltechir a ngklel el olab a dui, el uai a Rubak me a lechub e ng Dios. Nguaisei, engdi ngika el mera el Dios a ulechotii a ngklel el Jehovah el mo er a Moses, e dilu el kmo: “Tiakid a ngklek el mo cherechar.” (Exodus 3:14, 15, momes er a footnote) Ngoeak tiang, e ngulechotii el kmo ngii a ngodech er a rokui el klsuul el chelid. Me ngkmal dmeu a rengmam el olecholt er a chedaol el ngklel a Dios.

Ngmesaod er a tekoi el kiram el meruul er ngii. Te betok el chad er a ngar er a mong a ullecholt a klaumerang er tir er a Jehovah, el omuchel er a melemalt el chad el Abel. Ngar er aika el mereko el betok el dart el rak, e a Noah, Abraham, Sara, Moses, David me a relmuut el bebil a mlo teloi er tia el “klou el ildois er a re chad el mlo chemolt el mesisiich el oumerang el iliuekl er kid.” (Hebru 11:4–12:1) Me aki kmal kltmokl el omerk er a klemerang el kirel a Dios er kemam, el di ua chad el mo er a kort el mo sioning el kirel a diak a telemellel el chad.

Aki oukerebai er a Jesus. A Biblia a omekedong er ngii el “blak a rengul e meral ocholt.” (Ocholt 3:14) Ngii el Jesus a dilu el kmo ngulechotii a ngklel a Dios e millemolem el “ouchais er a klemerang” el kirel. (Johanes 17:26; 18:37) Sei a uchul me a remera el oltirakl er a Kristus a kirir el oba ngklel a Jehovah e olecholt er ngii. Tiaikid a tekoi el loruul er ngii a Resioning er a Jehovah.

• Ngera uchul me a Remesuub er a Biblia a ngiluu a ngakl el Resioning er a Jehovah?

• Ngmla mo ua klteketel a ngera el taem el lengar er ngii a resioning er a Jehovah er tia el chutem?

• Ngtecha ngike el kot el ngarbab el Sioning er a Jehovah?

A Biblia a ulemlaoch el kmo a uriul er a kodellel a Kristus, e a reklsuul el sensei a mo duum er a delongelir a rekot el Kristiano e choudur a klemerang er a Biblia. (Rellir 20:29, 30) A cherengel a taem e ngmlo uaisei. Te uleldak a osisecheklel a Jesus me a uldasu er a klsuul el klechelid, e milechelii a cheleuid el rolel a Klekristiano. (2 Timothy 4: 3, 4) Ngmekerang e mo ulterekokl a rengud er chelechang el kmo kede oba melemalt el klemedengei el kirel aike el mera el lolisechakl a Biblia?

A taem a mlei el kirel a Jehovah el mo olecholt er a klemerang. Ngulemlaoch el kmo “ikal tekoi a kirel berotel el diak bo lecholt el dimerkmo le me ulebongel.” (Daniel 12:9, 10) Sera 1870, e a kekerei el cheldellir a rechad el osiik a klemerang a mlo medengei el kmo a betok el osisecheklel a ikelesia a dimlak lemengai er a Biblia. Me seikid e te mlo omuchel el osiik a klemedengei el kirel a mera el osisecheklel a Biblia, e a Jehovah a ngilsuterir el mo ungil el omtab a bades.

A rechad a mle kerekikl el mesuub er a Biblia. Tirka el odam er kid er a uchei el mle blak a rengrir el mesuub er a Biblia, a uluusbech er a rolel a omesuub el dirk dousbech er ngii er chelechang. Te milsaod a derta el suobel er a Biblia, e sel bo el meringel er tir el mo medengelii a bades, e te ulsiik a kuk bebil er a bades el mesaod er ngii. Me sel bo el ta uldesuir el oltirakl aika el bades, e te luchesii. Me sera lebecherei a Biblia me lomekrael er tir, e te liluut el metik a klemerang el kirel a ngklel a Dios me a Rengedel, me a moktek er ngii el kirel a klechad me tia el chutem, me a blekerdelir a rulekoad, me a omelatk er a okiis. Tiang a mlo uchul e te mlo mimokl er a betok el klsuul el osisechakl me a omeruul.​—Johanes 8:31, 32.

Sera 1879 e a Remesuub er a Biblia a miltebengii el kmo ngmla mo taem el bo loberk a klemerang. Me sel taem, e te ulemuchel el meruul er a babier el A Ongkerongel Ouchais er a Rengedel a Jehovah, e tiang a dirk lolemolem el meruul er ngii. Me chelechang e aki omerk er a klemerang er a Biblia el mo er a rechad el ngar er a 240 el beluu el okiu a kuk betok er a 750 el omelekoi. Ngkmal mla oberk a mera el klemedengei er chelechang!

• A uriul er a kodellel a Kristus, e ngngera dilubech el mo er a klemerang er a Biblia?

• Ngerang a mla ngosukemam el lmuut el mo medengelii a klemerang er a Tekingel a Dios?

A Resioning er a Jehovah a uluusbech e uleltobed e mirrous a kakerous el oidel a Biblia el kemanget el taem. Engdi aki milsang el kmo ngusbechall a beches el oidel a Biblia el mo ngosuterir a rechad me “bo lodengelii a klemerang,” e tiang a soal a Dios el kirir a rokui el chad. (1 Timothy 2:3, 4) Me sera 1950, e aki ulemuchel el oltobed a dertelkib er tia el Biblia er kemam el New World Translation. Tia el Biblia a mla moiuid el ngar er a melemalt el rolel el kuk betok er a 130 el omelekoi.a

Ngmle usbechall a Biblia el beot a bo dodengelii. A cherengel a taem e ngsebechel el mengodech a omelekoi me a betok el oidel a Biblia a ousbech a tekoi el diak a rechad el medengei me a lechub e ngdikea lousbech. Me a lmuut el tang, a babier er a irechar a bla lebetik el ngii a kmeed el osisiu a tekoi er ngii me aike el kot el omelechesel a Biblia, el ngosukid el mo ungil el medengei a belkul aike el tekoi er a Biblia el ngar er a Hebru, Aramaic, me a Grik.

Ngmle usbechall a Biblia el uleltirakl er a tekingel a Dios. A ruliuid er a Biblia a kirir el oltirakl er a kot el omelechesel er a bai lolodech a mlukreng el tekingel a Dios. Nguaisei, engdi a oumesingd el oidel a Biblia a diak lousbech er a chedaol el ngakl el Jehovah.

Ngmle usbechall a Biblia el mo oldanges er Ngike el Milluches er ngii. (2 Timothy 3:16) A Biblia el New World Translation a ousbech er tia el ngakl el Jehovah el bekord el 7,000 el taem el oltirakl aike el Biblia er a irechar, el ua lemocholt er tia el siasing el ngariou. (Exodus 3:14, 15, momes er a footnote) Me a uriul er a betok el rak el lorriter e longetmokl er tia el Biblia, e ngkmal dmeu a rengud el menguiu er ngii e le ngbleketakl el olecholt er a uldesuel a Dios. Me a lengar er ngii a New World Translation er a omelekingem me a lak, e aki melisiich er kau el mo blechoel el menguiu er a Tekingel a Jehovah er a bek el sils.​—Josua 1:8; Psalm 1:2, 3.

• Ngera uchul me aki ulemdasu el kmo a beches el oidel a Biblia a mle usbechall?

• Ngera kirel a chad el meruul er ngii er a bek el sils a lsekum e ngsoal el mo medengei a soal a Dios?