A rebetok el chad a dikea el bo er a ikelesia er tir e le ngdiak el sebechir el metik a ongelaod me a lechub a nger er aike el meklou a ultutelel el ker el kirel a klengar. Me ngngera uchul me ngkirem el mo er aike el miting er a Resioning er a Jehovah? Ngera ke mo nguu er aika el miting?

Deurreng el mo er ngii e le kau el teloi er a rechad el olecholt a bltikerreng me a ulekerreu. A irechar, e a ongdibel er a Rekristiano a mileketmokl, e mla er ngii a miting er tir el mo mengull er a Dios, e mesuub er a Biblia, e kasisiich. (Hebru 10:24, 25) Me sel ledak el ngar er a bltikerreng, e te ulemelechesiu er tir el ngar er a delongelir a remera el sechelirir, el Kristiano el rudam me a rudos er tir. (2 Thesalonika 1:3; 3 Johanes 14) Aki oltirakl er a kerebai er a Rekristiano er a irechar e oba osisiu el deurreng.

Klungiaol el mo er ngii e le kau el mesuub er a rolel a omoltaut a omellach er a Biblia. Me ngdi uaike el lurruul er a taem er a Biblia, e chelechang e a resechal me a redil me a rengalek a mo kldibel, e a remeduch el sensei a ousbech er a Biblia el ngosukid el mo omtab er a rolel a doltaut aike el omellach er ngii er a chelsel a klengar er kid er a bek el sils. (Duteronomi 31:12; Nehemia 8:8) Ngsebechir a rokui el chad el mo teloi aike el omesodel a suobel er a ongdibel e mengitakl, e tiang a meskid a techall el mo olecholt er a omeltked a Rekristiano.​—Hebru 10:23.

Klengeltengat el mo er ngii e le ngmo mesisiich a klaumerang er kau er a Dios. A apostol el Paulus a millekoi er a ta er aike el ongdibel er a taem er ngii el kmo: “Le kuureng el mesekemiu . . . e ak mo ngosukemiu me kemiu a mo ngosukak el mo mesisiich el oumerang.” (Rom 1:11, 12) Sel deblechoel el obengterir a rudam me a rudos el ngar er aike el miting, e ngsmisichii a klaumerang me a blakerreng er kid el mo kiei el oltirakl a omellach er a Biblia.

Aki olengit me bo el sebechem el mei er a ongingil el miting er kemam me bo el sebechem el mes aika el tekoi. Aki kmal outkeu er kau. A rokui el miting a diak el ocheraol e diak a rechad el merael el melai a tenget.

• Aika el miting er kemam, ngmengai a uchetemel er a ngerang?

• Kede mekerang e ngmai a klungioled sel debo er aike el miting er a Rekristiano?

Aki blechoel el mo er a miting er kemam alta e ngmekngit a eanged me a lechub e ngmo kiram el melisebekl a chereomel. Ngera uchul me a Resioning er a Jehovah a melasem el mo obengterir a rekldemir er a klaumerang el kasisiich, alta te chelebangel a ringelel a klengar me a lechub e ngmesaul a bedengir er a uriul er a ureor?

Ngungil el kiram. A Paulus er sera ledu el kmo “bo de kaukerreu” e ngmillekoi el kirir tirke el dobengterir er a chelsel a ongdibel. (Hebru 10:24) Tia el tekoi a belkul a kmo ngkired el mo kaodengei kid me a derta el chad er a ongdibel. Me aika el tekingel a apostol a melisiich er kid el mo kerekikl el melatk er a rebebil. Me sel bo dodengelterir a rebebil el ngar er a ongdibel, e kede mo medengei el kmo a rebebil er tir a mle sebechir el mo mesisiich er a osisiu el mondai el dechelebangel me ngsebechir el ngosukid el mo mesisiich er ngii.

Ngmo uchul a mesisiich el deleuill. Ngar er aike el miting er kemam, e aki mo dmak el obengterir a rekmeed el sechelimam. E a lebebil er a taem, e aki dmak el obengterir el ngar er a ungil el rolel a omilil. Ngera el klungiaol a mo er ngii el oeak a chouaisei el omilil? Aki mesuub el mo oba omereng el saul el kirel a ta me a tang e tiang a smisichii a bltikerreng er a delongelam. Seikid e sel bo el chelebangel a mondai a resechelimam, e aki kltmokl el ngosuterir e le ngmla moak a mesisiich el deleuill er kemam. (Osisechakl 17:17) Me sel ki mdak el obengterir a rokui el chedal a ongdibel er kemam, e aki olecholt el kmo aki “kaukerreu.”​—1 Korinth 12:25, 26.

Aki melisiich er kau el mo melilt er a resechelim el tir a meruul a soal a Dios. Ke mo metik er a chouaitirka el chad er a delongelir a Resioning er a Jehovah. Me a leuaisei, e lak becherei a ngii di el ngerang me leterebengau me lak be mteloi er kemam.

• Ngera me ngmo uchul a klungiolam aki bo mdak el ngar er a miting?

• Ngoingerang e ngsoam el me obengkemam el ngar er a miting?

A miting er a Rekristiano er a irechar a mle beot a oketmeklel. Te di milengitakl, e dilak el meluluuch, e menguiu e mesaod a Bades. (1 Korinth 14:26) Ngsebechem el omes a osisiu el tekoi el meketmokl er aike el miting er kemam.

A osisechakl er ngii a mengai er a Biblia e sebeched el ousbech er a klengar er kid. Sel Sandei, e a derta el ongdibel a mo dmak e orrenges er a 30 el bung el cheldecheduch er a Biblia el mesaod a rolel e ngsebeched el oltaut a Bades er a klengar er kid me a taem el dekiei er ngii er chelechang. Kid el rokui a muchelechel el mo ousbech er a Biblia er kid er sel taem el dorrenges er tia el cheldecheduch. Uriul er a cheldecheduch, e ngngar er ngii a ta el sikang el Omesubel a “Ongkerongel,” el rokui el chad el ngar er a ongdibel a sebechir el teloi er a omesodel a suobel el mlengai er A Ongkerongel. Tia el omesaod a ngosukid el mo oltaut a ulekrael er a Biblia er a klengar er kid. A osisiu el suobel a losuub er ngii er a chelsel aike el kuk betok er a 110,000 el ongdibel er kemam er a beluulechad el rokir.

Aki mongeseu el mo olengeriakl er a rolel aki molisechakl. Aki dirrek el mo dmak er a ta el kebesengei er a temel a ureor er a bek el sandei el kirel a miting el ngii a blii el mo edei el kakerous el prokuram el dai er ngii a kmo A Klengar er Kid a Rekristiano me a Omesiunged, el mengai er a suobel el ngar sel Subeled er a Miting er a Klengar me a Omesiunged. A kot, e sel Mekreos el Tekoi el Ngar er a Biblia, a mo ngosukemam el mo ungil medengei a bebil el bades er a Biblia el ki mulenguiu er seikid el sandei. E a ongingil, e sel Moltaut er Ngii er a Omesiungem a mo oltobed a bebil er a rolel aki mosaod er a Biblia el obengterir a rebebil. E ngike el oungerachel a mo ouchais a tekoi el sebechel el ngosukemam er a omengiuam me a rolel aki mongedecheduch. (1 Timothy 4:13) E a orokiolel, e sel Mkiei el Ua Klengar er a Rekristiano, a mo mesaod a rolel e ngsebecham el oltaut a omellach er a Biblia er a klengar er kemam er a bek el sils. Tiang a uldimukl er a ker me a nger el ngosukemam el mo ungil medengelii a Biblia.

Sel omei er aika el miting, e ke ulterekokl el mo ungil a rengum el remenges a meklou a ultutelel el osisechakl er a Biblia.​—Isaia 54:13.

• Ngera el tekoi a sebechem el mo remenges er aike el miting er a Resioning er a Jehovah?

• Ngera er aika el miting a soam el mo er ngii?

Ke mla mes aike el siasing er a chelsel tia el babier el olecholt er a Resioning er a Jehovah el kmal ungil el oubail sel lebo er aike el miting er tir? Ngera uchul me ngkiram el kerekikl a omengetmeklam me a rolel aki moubail?

Ngolecholt a omengull el mo er a Dios er kemam. Ngmera el tekoi, a Dios a omes a tekoi el engelakl er aike el sebechir a rechad el omes. (1 Samuel 16:7) Sei a uchul me sel ki bo mdak el mengull er ngii, e ngsomam el olecholt a omengull el mo er ngii me a rekldemam er a klaumerang. Omko ngmo kiram el mo dechor er a medal a chad er a kerrekeriil, e aki ulterekokl el mo ungil el kutmeklemam el olechotel a omengull el mo er ngii. Me ngdi osisiu, a oketmeklel a bilam el mo er a miting a olecholt a omengull er kemam el mo er “Ngikel oukerrekeriil er a beluulchad el rokir,” el Jehovah el Dios me a dirrek el blil a omengull er ngii.​—Genesis 18:25.

Kiei el oltirakl a meklou a ultutelel el tekoi. A Biblia a melisiich er a Rekristiano me “bo lulengeasek a teletelel a bilir” el olecholt el kmo te “oltirakl er a Dios.” (1 Timothy 2:9, 10) E tiang a belkul a kmo aki olecholt a omengull el okiu a rolel aki moubail, me ngdiak ki moubail a olechaumad el bail. Ngdirrek el sel lulserechakl a rengmam e ngmo sebechel el tabesul a osengam sel ki molilt a bilam. Ngar er ngii a betok el bedengel a ungil el bail el sebecham el oubail. Me a ungil el omengetmeklam a sebechel mesiich a “osisechakl el kirel a Dios el Osobeled” e dirrek el “oldanges” er ngii. (Titus 2:10; 1 Petrus 2:12) Me sel ki mungil el oubail el mo er a miting e ngngar er ngii a lerellii er a osengir me a uldesuir a rebebil el kirel a omengull el mo er a Jehovah.

Lak bechei a bilem me bo el uchul e lak bo er a Blil a Ongdibel. Ngsebeched el oubail a ungilbesul el bail el diak el sal meringel a cheral.

• Ngua ngera klungel a ultutelel a teletelel a biled sel dongull er a Dios?

• Ngera el omellach a omekrael er kid sel dolilt a biled me a rolel a dongetmokl er kid?

A lsekum e ke mesuub a Biblia el obengkel a ta er a Sioning er a Jehovah, e ke locha mengetmokl el kirel a omesubiu er a uchei. Ngdirrek el ungil a omosuub er a uchei er a omei er a miting me bo el sebechem el ngmai a klungiolem er ngii. Ngmo klungiolem sel moterekeklii a temel a omesubem el kirel a miting er a bek el sandei.

Moterekeklii a basio me a temel a omesubem. Ngoingera el taem e ngsebechem el ungil el melebedebek a suobel el mosuub? Ngdirk tutau, el uchei er a omomuchel el meruul a urerem, me a lechub e ngsel taem el bla bo lemechiuaiu a rengalek? Alta e ngdiak el sebechem el mesuub el kemanget el taem, engdi ngungil a omoterekeklii a klungel a taem el mousbech er ngii el mesuub, e lak bechei a ngii di el ngerang me lechesengkau. Msikii a basio el diak a cherrodech er ngii, e mokoad a razio, TV, me a cell phone. Ngdirrek el ungil a omoluluuch er a uchei er a omosuub me lengesukau el mo diak molatk a mondai er kau me bo el sebechem el ungil el melebedebek a Tekingel a Dios.​—Filipi 4:6, 7.

Mosuub er a suobel e mketmeklau el mo onger. Ngkmal ungil sel momuchel el suubii a suobel el mo medengelii. Molatk er a dai er a suobel me a bek el bliongel me bo modengei el kmo ngmesaod el kirel a ngerang, e momes a siasing me aike el omelekl el ker el melisiich aike el meklou a ultutelel el tekoi. Monguiu a derta el parakurab e mosiik a nger er a ker. E monguiu aike el bades e momtab el kmo ngmekerang a lolisiich er a suobel. (Rellir 17:11) Me sel obetik er a nger er kau e ngsebechem el lemuches a olengchelem er aike el meklou a belkul el tekoi el ngii a sebechel el ngosukau el mo onger. E sel obo er a miting e ngsebechem el oldars er a chimam e onger el ousbech a di tekingem.

Ngoeak sel mosuub a kakerous el suobel el soadel er aike el miting er a bek el sandei, e ngsebechem el dochelii a klemedengei er kau er a Biblia.​—Mateus 13:51, 52.

• Ngera sebechem el meruul me bo mkltmokl el kirel a miting?

• Ngmekerang e sebechem el kutmeklau el mo onger er a miting?

A Jehovah a di mla soal a bek el telungalek a ledak el melisiich er a deleuill er tir el obengkel me a dirrek el deleuill er tir el telungalek. (Duteronomi 6:6, 7) Sei a uchul me a Resioning er a Jehovah a mla kutmeklii a taem er a chelsel a bek el sandei, el ledak el telungalek el mengull, e mesaod a tekingel a Dios el kirel aike el lousbech. Ngar er a chouaika el taem e ngsebechem el melilt a tekoi el soam el mesuub er a Biblia a lsekum e ngkuk di kau el tang el kiei.

Ngtaem el dolekeed er kid er a Jehovah. “Molekeed er kemiu er a Dios, me bo lekeed er kemiu.” (Jakobus 4:8) Ngsebeched el mo ungil el medengelii a Jehovah sel dosuub el kirel a blekerdelel me a tekoi el loruul el ngar er a llechukl el Tekingel. A ta er a beot el rolel e ngsebechiu el mechelii a temel a omengull er kemiu el telungalek, a oeak sel mongoit a taem el dmak el menguiu er a Biblia el oltirakl er a omengiuel a Biblia el ngar er a miting er a Klengar me a Omesiunged. Ngsebechiu el ouderta er kemiu el menguiu, e a uriul e ko mo dmak el mesaod a tekoi el msiluub.

Ngtaem el dolekeed er kid er a rechad er a blid. A rebechiil el chad, me a ruungalek me a rengelekir, a sebechir el smisiich a delongelir sel ledak el mesuub er a Biblia. Tiaikid el taem a kirel el uchul a deurreng me a budech, e dirrek el tekoi el lesemeriar el meruul er ngii er a bek el sandei. A ruungalek a sebechir el ngmilt a bebil er a tekoi el bo losaod, el uaike el ngar er A Ongkerongel me a Awake! me a website er kid el jw.org el ultuil er a rekrir a rengelekir. Ngsebechiu el dmak el mesaod a mondai el blo lechelebangel a rengelekiu er a skuul me a rolel e ngsebechiu el sumechokl. Ngsebechiu el omes er a ta er a prokuram er a JW Broadcasting (tv.jw.org) e dmak el mesaod er ngii er a uriul. Ngdirrek el sebechiu el oldeu a rengmiu el mengitakl aike el chelitakl el bo dousbech er a miting, e remuul a sesei el kall el bo mongang er a uriul er a temel a omengull er kemiu el telungalek.

Tia el ileakl el taem el mdak el telungalek el mengull er a Jehovah er a bek el sandei a mo ngosukemiu el mo dmeu a rengmiu el mesuub er a Tekingel a Dios, e ngii a mo omekngeltengat aike el moruul.​—Psalm 1:1-3.

• Ngera uchul me ngkired el oterekeklii a temel a omengull er kid el telungalek?

• Te mekerang a ruungalek e rullii tia el taem el mo uchul a deurreng?

Ngera me ngkmal dmeu a rengrir tirka el chad? E le tir el ngar er a ta er aika el meklou el ongdibel er kemam. Aki kmal semeriar el mo er aika el ongdibel el di ua remesiungel a Dios er a irechar el mle kirir el mo kldibel el edei el taem er a ta el rak. (Duteronomi 16:16) Meliuekl er a beluulechad el rokir, e a bek el rak e ngar er ngii a eru el ta el sils el ongdibel er kemam me a dirrek el klou el ongdibel er kemam. Aki mekerang e ngmai a klungiolam er aika el ongdibel?

Ngmelisiich er a klodam er kemam el Kristiano. Aki di ua rechad er a Israel el uleldeu a rengrir el oldanges er a Jehovah er a “chelsel sel klou el ongdibel,” e le aki dirrek el dmeu a rengmam el mengull er ngii el ngar er aika el ileakl el ongdibel. (Psalm 26:12; 111:1) Aika el kldibel a meskemam a techall el mo medengelterir a Resioning el ngar er a bebil er a iungs. Sel lesueleb, e aki oldeu a rengmam el dmak el omengur er a basio el ngar er ngii a ongdibel er kemam, e tiang a meskemam a techall el mo medengelterir a rebebil. (Rellir 2:42) Ngar aika el ongdibel, e aki mesa sel bltikerreng el oldak “er a re chedal a Dios” el ki mdak el oumerang el ngar er a beluulechad el rokir.​—1 Petrus 2:17.

Ngmo ngosukemam el menglou er a klemedengei er kemam er a tekingel a Dios. A rechad er a Israel a dirrek el ngilai a klungiolir e le “tulemtab” a Bades el mlocholt er tir. (Nehemia 8:8, 12) Kemam me aki dirrek el oba omereng el saul el kirel aike el osisechakl er a Biblia el ki molai er aika el ongdibel. A derta el prokuram a mengai a uchetemel er a Bades. Me ngoeak a cheldecheduch, uldekdak el cheldecheduch, me a rechad el oltobed a kakerous el olechotel a tekoi el duubech er a klengar er a bek el sils, e aki mesuub el mo meruul a soal a Dios er a klengar er kemam. Aki dirrek el ngmai a omelisiich sel ki morrenges a tekoi el dilubech el mo er tirke el Kristiano el mlo sebechir el outekangel a omelsemai er a klengar er a chelsel aika el meringel el taem. Ngar er aike el meklou el ongdibel, e ngngar er ngii a costume drama el kirel a cheldecheduch er a Biblia el olisechakl er kemam a suobel el sebecham el ousbech er a klengar er kemam. Ngar er aika el ongdibel, e ngngar er ngii a techolb el kirir tirke el sorir el mo tuib a klengar er tir el mo er a Dios.

• Ngera uchul me aika el ongdibel a meskid a deurreng?

• Ke mekerang e ngmai a klungiolem sel obo er aika el ongdibel?

A uchei er a kodellel, e a Jesus a dilu el kmo: “Me tial Ebangkelio el kirel ngii el Renged a mo mosisechakl er a beluulchad el rokir el kirel el mo ocholt el mor a rokui el chad, e sola e ng mochu er ngii a ulebongel er a beluulchad.” (Mateus 24:14) Engdi ngmekerang e meketmokl tia el ureor er a berkel a klumech er a beluulechad el rokir? Ngoeak sel ki moltirakl er a kerebil a Jesus er a lengar tia el chutem.​—Lukas 8:1.

Aki melasem el mengedecheduch er a rechad el ngar er a blirir. A Jesus a ullisechakl er a redisaiplo er ngii el mo oldingel a obliil el omerk er a ungil el chais. (Mateus 10:11-13; Rellir 5:42; 20:20) Tirke el ulemerk a klumech er a irechar a mla er ngii a ileakl el basio el mle kirir el omerk er a klumech er ngii. (Mateus 10:5, 6; 2 Korinth 10:13) Me ngdi osisiu er chelecha el sils, a ureram er a berkel a klumech a ungil kltmokl, me a derta el ongdibel a ngar er ngii a ulterekokl el basio el kirir el oldingel er ngii. Tiang a uchul me ngmo sebecham el oltaut er a omellach er a Jesus el “mo omerk er a klumech el mo er a rechad e mo mesterir a cherrungel el ocholt.”​—Rellir 10:42, New World Translation.

Aki melasem el oldingel er a rechad er aike el basio el sebecham el metik er tir. A Jesus a dirrek el kiltmeklii a kerebai el oeak sel lomerk er a klumech er a buai, el uai sel lengar er a bita er a daob me a lechub e ngchido. (Markus 4:1; Johanes 4:5-15) Kemam a dirrek el mengedecheduch er a rechad el kirel a Biblia el ngar er a bek el basio el ua tkul a rael, basio er a siobai, blil a oililaol, me a lechub e ngokiu a dengua. E sel lengar er ngii a ungil el techall, e aki dirrek el mengedecheduch er a retonari er kemam, rechad er a ureram, tirke el ki mdak el ngar er a skuul, me a rechedemam. Aika el rokui el tekoi a mlo uchul e a rebetok el miliol el chad el meliuekl er a beluulechad a mlo sebechir el rongesii a “ungil chais” er a osobel.​—Psalm 96:2.

Ngsebechem el lotkii a chad el soam el ouchais er ngii el kirel a ungil chais er a Rengedel a Dios me a belkul tia el chais el kirel a ngar medal el klebesei? A leuaisei, e ngungil a omouchais er ngii!

• Ngera el “ungil chais” a kirel el oberk?

• Te mekerang a Resioning er a Jehovah e oukerebai er a rolel a Jesus a lomerk er a klumech?

A tekoi el “pioneer” a blechoel el melekoi el kirel a chad el me a kot e mo er a basio e kutmeklii a rael me bo el sebechir a rebebil el oeak ngii. A Jesus a mle uai a pioneer, e le ngmlodurokl el mei er tia chutem el mo meruul er a omesiungel e mo mesterir a rechad a techall el mo nguu a osobel. (Mateus 20:28) Chelecha el sils, e a rultirakl er a Jesus a oukerebai er ngii el oeak sel lousbech er a klou el temir el meruul er a rechad el mo oltirakl er a Jesus. (Mateus 28:19, 20) Te ngar er ngii a rebebil el mla mo mesiou el pioneer.

A pioneer a omerk er a klumech el mui el taem. A rokui el Sioning er a Jehovah a omerk er a ungil chais. Nguaisei, engdi a rebebil a mla sumechokl a tekoi er a klengar er tir me bo el sebechir el mesiou el regular pioneer, el mengoit a 70 el sikang er a bek el buil el omerk er a klumech. Me a bo loruul el uaisei, e a rebetok a mengesadel a temir el oureor. A rekuk bebil a lolilt er tir el mo mesiou el special pioneer el ngar er aike el basio el ousbech er a rumerk er a klumech er a Renged, el mengoit a 130 me a lechub e ngkuk betok el sikang el oldingel er a bek el buil. Tirka el pioneer a di ungilbesul a rengrir er a beot el rolel a klengar, e ulterekokl a rengrir el kmo a Jehovah a mo omesterir aike el lousbech er a klengar er tir. (Mateus 6:31-33; 1 Timothy 6:6-8) Tirke el diak el sebechir el omerk er a klumech el mui el taem a sebechir el mo auxiliary pioneer, el menglou a temir el omerk er a klumech el mo 30 me a lechub e ng 50 el sikang er a ta el buil.

A pioneer a meruul er tia el ureor e le ngbltkil a rengul er a Dios me a rechad a uchul. El ua Jesus, e aki mesa el kmo a rebetok el chad er chelechang a kmal ousbech el mo medengelii a Dios me a moktek er ngii. (Markus 6:34) Engdi ngngar er ngii a klemedengei el ki mobang el sebechel el ngosuterir er chelechang, e mesterir a ulterekokl el omelatk el kirel a ngar mederir el klebesei. A bltkil a rengul a pioneer el mo er a retonari er ngii a rullii el mo ousbech a temel me a klisichel el olengeseu er a rebebil el mo medengelii a ungil chais. (Mateus 22:39; 1 Thesalonika 2:8) Sel loruul el uaisei, e ngmo kmeed er a Dios, e mo mesisiich a klaumerang er ngii, e dirrek el mo melechesuar a klou el deurreng.​—Rellir 20:35.

• Ngmekerang a omosaod er a pioneer?

• Ngera melisiich er a rebebil el mo omerk er a klumech el mui el taem?

A osisecheklel a Tekingel a Dios a meketeketang el olengchelir a Resioning er a Jehovah. Ngar er ngii a ileakl el skuul el mla meketmokl el kirir tirke el mesiou el mui el taem el kirel a ureor er a berkel a klumech er a Renged me bo el sebechir el ‘churrengelii chomesiungir.’​—2 Timothy 4:5, BT.

Skuul el Kirir a Re Pioneer. A ulebengelel sel kot el rak el losiou a chad el regular pioneer, e ngsebechel el mo soiseb er a skuul el di elolem el sils a klemengetel e locha mo er ngii er sel kot el kmeed el Blil a Ongdibel. A moktek er tia el skuul a mo olengeseu er ngika el pioneer el lmuut el mo kmeed er a Jehovah, e bo el sebechel el mo bekerredechel er a omesiungel, e lolemolem el blak a rengul er a urerel.

Skuul el Kirir a Rumerk er a Rengedel a Dios. Tia el eru el buil el skuul a mileketmokl el mo olisechakl er tirke el regular pioneer el tir a kongei el chemoit a delengcheklir e mo mesiou el ngar er a basio el ngii a ousbech a ngeso. Te oukerebai er ngike el kot el ngarbab el Ulemerk er a Klumech el Jesus Kristus me a uchul e te ua lolekoi el kmo, “Ng ngak a mong! Moderchak!” (Isaia 6:8; Johanes 7:29) Me a bo dolukl el mo cheroid er a delengchekled e nglocha mo ousbech er kid el mo omekbeot er a rolel a klengar er kid. A siukang, me a teletelel a eanged, me a kall a locha dirrek el kmal mo ngodech, e locha dirrek el kired el mo mesuub a beches el omelekoi. Me tia el skuul a ngosuterir a remesobil el rudam me a rudos me a rubekel, el tir a 23 el mo er a 65 a rekrir, el mo omekeroul a blekerdelel a Dios el tir a mo ousbech el mo kutmeklii a ngerechelir me a dirrek el mo er ngii a duch er tir, el ngii a mo ngosuterir me ngmo sebechel a Jehovah me a cheldebechelel el mo mui el ousbech er tir.

Watchtower Bible School of Gilead. Ngar er a tekoi er a Hebru, e a “Gilead” a belkul a kmo “Sioning.” Sera lekot el omuchel a skuul er a Gilead er a rak er a 1943, e a betok er a 8,000 el chad a mla modurokl el missionari el “mora ikel ullebongel ra belulechad” el mo ousioning, e mla metik a betok el ungil el tekoi el dilubech er a omesiungir. (Rellir 13:47, BT) Ngdimlak a ta el ongdibel er a beluu er a Peru er sera lekot el mong a rebebil er tirke el tilobed er tia el skuul. E chelechang e ngmla mo er ngii a kuk betok er a 1,000 el ongdibel. Sera lekot el omuchel a remissionari el mo mesiou er a beluu er a Siabal, e ngdi mle kesai er a teruich el Sioning a mla er sei. E chelechang e te mla mo betok er a 200,000 el Sioning. Tia el eim el buil el skuul er a Gilead a uldimukl er ngii a dmolech el omesubel a Tekingel a Dios. Tirke el mesiou el special pioneer me a lechub e te missionari, me a rengar er a obis er a Resioning er a Jehovah, me a lechub e te oldingel a ongdibel, a longemedaol er tir el mo er tia el skuul el kirel a dmolech el osisechakl me bo el sebechir el oterekeklii e lesisichii tia el ureor er a beluulechad el rokir.

• Ngera moktek er a Skuul el Kirir a Re Pioneer?

• A Skuul el Kirir a Rumerk er a Rengedel a Dios, ngmileketmokl el kirir a rua techang?