• Ngerang a Rengedel a Dios?
    Mkiei el Mo Cherechar!​—Omesubel a Biblia el Di Rolel a Cheldecheduch
    • 31 el suobel. Jesus Kristus el King er a eanged el ngar medal a klebkellel a Jehovah.

      31 EL SUOBEL

      Ngerang a Rengedel a Dios?

      A klumech el kirel a Rengedel a Dios sel kot el klou a ultutelel klumech er a Biblia. Jehovah mo ousbech er tia el Renged el mo otutii sel dimla moktek er ngii. Kede mekera medengei el kmo ngmengedereder er chelechang? Ngera ngmla kutmokl? E ngera ngmo meruul er a ngar medad? Tia el suobel me aike el eru el ongingil a mo onger aika el ker.

      1. Ngerang a Rengedel a Dios, e techa King er ngii?

      Tia el Renged a kabelment el bla leteketekii a Jehovah el Dios. A Jesus Kristus a King er ngii e ngar er a eanged e mengedereder. (Mateus 4:17; Johanes 18:36) A Biblia melekoi el kirel a Jesus el kmo: “Ng mo mengedereder [el King el] . . . diak a ulebengelel.” (Lukas 1:32, 33) Ngmo mengedereder er a rokui el chad el ngar tia el chutem.

      2. Ngtecha mo mengedereder lobengkel a Jesus?

      Te ngar ngii a mo mengedereder lobengkel a Jesus. Te rechad er a “chelsel a bek el kebliil rar chad, ma chomelekoi, ma bliongel rar chad, ma renged . . . [a] mo mengedereder ra belulechad.” (Ocholt 5:9, 10, BT) Me te tela mo mengedereder lobengkel? Sera lemei er tia el chutem a Jesus el mei er chelechang, e te betok el miliol a mla mo oltirakl er ngii. Engdi te di 144,000 er tir a mo mengedereder lobengkel er a eanged. (Monguiu er a Ocholt 14:1-4.) A rokui el Kristiano el ngar er a chutem a mo ngar cheungel a chederedellel tia el Renged.​—Psalm 37:29.

      3. Ngmekera Rengedel a Dios e lmuut el ngarbab er aika el kabelment er a rechad?

      Mo lmuut me a lolasem a rechad el meruul a ungil me tir a diak a klisichir el remuul aike el rokui lolatk. Cherengel a taem e ngngar ngii a kuk ta er a omengedereder el mtechir, el locha diak bo lolatk er a ungil el kirir a rechad. Engdi a Jesus el ngii a mengedereder er a Rengedel a Dios a diak a mo mtechir. A Dios a “mo toketekii a rengedel el mo diak a ulebengelel.” (Daniel 2:44) Jesus a mo mengedereder er a beluulechad el rokir, e di mo osisiu omerellel el mora rokui el chad. Ngika ungil, medemedemek, e melemalt omerellel e mo osisecheklterir a rokui el chad el mo uaisei omerellir.​—Monguiu er a Isaia 11:9.

      BOM DMOLECH EL MERRITER

      Molatk er a uchul a Rengedel a Dios a lmuut el ungil er a ngii di el kabelment er a rechad.

      Jesus Kristus el ngar er a eanged e mengedereder er a beluulechad. Tirke el mengedereder el obengkel el dengchokl er ullel. A Jehovah a dmiich er ullir.

      4. A mesisiich el kabelment a mo mengedereder er a beluulechad el rokir

      Jesus Kristus a lmuut el klou a klisichel er a ngii di el omerreder. Monguiu er a Mateus 28:18 e mosaod er tia el ker:

      • Ngera klekakerous er a klisichel a Jesus er omerreder er a klisichir a rechad?

      A kabelment er a rechad a blechoel el mengodech, e mengedereder er a kuk di telkib er a beluulechad. Engdi a Rengedel a Dios a mekerang? Monguiu er a Daniel 7:14 e mosaod aika el ker:

      • Ngera uchul me ngkmal ungil el tekoi el Rengedel a Dios a “diak a ulebengelel”?

      • Ngera uchul me ngungil el tekoi el Renged a mo mengedereder er a beluulechad el rokir?

      5. Ngkired el mtechei a kabelment er a rechad

      Ngera uchul me a Rengedel a Dios a kirel mtechei a kabelment er a rechad? Momes er a VIDEO e mosaod er tia el ker.

      VIDEO: Ngerang a Rengedel a Dios?​—Excerpt (1:41)

      • A omengederederir a rechad ngngera ngmla rullii?

      Monguiu er a Olisechakl 8:9 e mosaod aika el ker:

      • Omomdasu e ngungil a Rengedel a Dios a le btechei aika el kabelment er a rechad? Ngera uchul me ke melekoi el uaisei?

      6. A remengedereder er a Rengedel a Dios a medengei aike el domelechesiu

      A King er kid el Jesus a mle chad me ngsebechel ‘melechesiu a chelitechetud.’ (Hebru 4:15) Tirke el 144,000 el blak a rengrir el sechal me a redil el mo mengedereder lobengkel a Jesus a lolilt er tir a Jehovah er a “bek el kebliil, ma omelekoi, ma beluu ma bek el bedengir a re chad.”​—Ocholt 5:9.

      • Ngmengelaod er kau sel modengei el kmo a Jesus me tirke el obengkel mengedereder a medengei a lomelechesiu a rechad e le te dirrek el mle chad el uai kid? Ngera uchul me ke melekoi el uaisei?

      Rengellitel el sechal me a redil el chad er a kakerous el taem me a blekerdelel a klengar.

      Jehovah mla melilt er a resechal me a redil el kakerous a bedengel a klengar er tir el mo mengedereder lobengkel a Jesus

      7. A Rengedel a Dios a lmuut el ungil a llechul

      Aika el kabelment a meruul a llach el lekong ngomekerreu er a rechad e mo uchul a klungiolir. A Rengedel a Dios a dirrek el ngar ngii a llechul el kirir tirke el chederedall er ngii loltirakl. Monguiu er a 1 Korinth 6:9-11 e mosaod aika el ker:

      • Omomdasu e a beluulechad ngmo uangerang a lsekum a rechad el rokui oltirakl a llechul a Dios?a

      • Omomdasu e a Jehovah ngngar ngii a llemeltel el mengeriil er tirke el ngar cheungel chederedellel a Renged el mo oltirakl aika el llach? Ngera uchul me ke melekoi el uaisei?

      • Ngera ochotii el kmo a rechad el diak lolengesenges aika el llach a sebechir melodech a blekerdelir?​—Momes er a 11 el bades.

      Bulis el stob er a traffic er a intersection. Rechad el kakerous a rekrir el mo imuul er a rael.

      Kabelment a remuul a llach el mo omekerreu er a rechedal e dirrek el mo uchul a klungiolir. A Rengedel a Dios a lmuut el ngarbab a llechul, el ngii omekerreu er tirke el ngar cheungel, ngdirrek el mo uchul a klungiolir

      A REBEBIL A LOCHA MO OKER: “Ngerang a Rengedel a Dios?”

      • Ngmekera omonger er ngii?

      SUMMARY

      A Rengedel a Dios a mera el kabelment el ngar er a eanged el mo mengedereder er a beluulechad el rokir.

      Review

      • Te rua techa mengedereder er a Rengedel a Dios?

      • Ngmekera Rengedel a Dios e lmuut el ungil er a kabelment er a rechad?

      • Ngera bebil er a tekoi longerechir a Jehovah er tirke el ngar cheungel a chederedellel a Renged?

      Turrekong

      A LSEBECHEM E MOMES

      Morriter a lullisechakl a Jesus el kirel a kmo, a Renged ngngar er ker.

      “Is the Kingdom of God in Your Heart?” (Suobel el ngar er a Internet)

      Ngera uchul me a Resioning er a Jehovah a ngiltii el mo oba blakerreng el mora Rengedel a Dios el ngaruchei er a blakerreng el mora omengederederir a rechad?

      Devoted to God’s Kingdom (1:43)

      Morriter aike el locholt a Biblia el kirir tirke el 144,000 el Jehovah mla melilt er tir el mo mengedereder lobengkel a Jesus.

      “Who Go to Heaven?” (Suobel el ngar er a Internet)

      Ngera ulterekeklii a rengul a redil el mle kelebus el kmo ngdi ta el Dios a sebechel el remuul a rokui el tekoi el mo melemalt?

      “How I Found the Answer to Injustice” (Awake!, November 2011)

      a A bebil er aika el llach a bo dosaod er a 3 el bliongel.

  • A Rengedel a Dios a Mengedereder!
    Mkiei el Mo Cherechar!​—Omesubel a Biblia el Di Rolel a Cheldecheduch
    • 32 el suobel. Jesus Kristus el King er a eanged el oba skersel e mengedereder er a beluulechad.

      32 EL SUOBEL

      A Rengedel a Dios a Mengedereder!

      A Rengedel a Dios a ulemuchel el mengedereder er a eanged er a 1914. Tia dirrek el uchelel a uriul sils er omengederederir a rechad. Kede mekerang e medengei? Molatk a ulaoch er a Biblia me a blekeradel er tia el beluulechad lulemuchel er a 1914 el mei.

      1. Ngera ngouchais a ulaoch er a Biblia?

      A babier er a Daniel a dilu el kmo a Rengedel a Dios a mo omuchel el mengedereder er a ulebengelel a taem el lomekedong er ngii a Biblia el kmo “euid el rak.” (Daniel 4:16, 17) Betok el rak er uriul e a Jesus a milsaod er tiakid el taem el kmo ng “taem rar Chisentail,” e ngii ullisechakl el kmo ngdirkak el bo lemerek. (Lukas 21:24, BT) Kede mo mesa el kmo a euid el rak a mlo merek er a 1914.

      2. Ulemuchel er a 1914 el mei, e ngera el blekeradel a domes er a beluulechad?

      A redisaiplo er a Jesus uleker er ngii el kmo: “Ka msbedemam el kmo ng oingera e a ikal rokui el tekoi a mo duubech, e ngera mo olechotel sel cho mei, e mo oingera ulebongel er a beluulchad.” (Mateus 24:3) Me a Jesus a ulemlaoch el kirel a betok el tekoi el mo duubech sel lomuchel el mengedereder er a Rengedel a Dios. A bebil er ngii a mekemad, bosech er a kall, me a desiu. (Monguiu er a Mateus 24:7.) A Biblia dirrek lulemlaoch a mo blekerdelir a rechad er a “uriul sils” el mo uchul a “ringel.” (2 Timothy 3:1-5, BT) Aika el blekeradel a kmal sebeched el mes, tokubets lulemuchel er a 1914 el mei.

      3. Ngera uchul me sera lomuchel el mengedereder a Rengedel a Dios e a blekeradel a kmal mla mo mekngit?

      Kedeb el taem er uriul er a lebo leking er a Rengedel a Dios a Jesus, e ngmlo oumekemad er a Satan me a remekngit el anghel. A Satan a mlo mechitechut. A Biblia kmo “ng mlechoit el mer a beluulchad ngii ma rokui el anghel er ngii.” (Ocholt 12:9, 10, 12) A Satan a kmal kesib a rengul le ngmedengei el kmo ngdi kmedung e ngmo mokngemed. Sei a uchul me ngomuchel a ringel er a beluulechad el rokir. Tia uchul me a blekeradel a kmal mla mo mekngit! A Rengedel a Dios a mo sumechokl aika el mondai.

      BOM DMOLECH EL MERRITER

      Morriter er a uchul me kede medengei el kmo a Renged ulemuchel el mengedereder er a 1914. E momes a rolel e ngsebeched lochotii el kmo kede oumerang el kmo ngmengedereder er chelechang.

      4. A dorriter a blechebechel a taem el lulemlaoch el kirel a Biblia e ngochotii el kmo a Rengedel a Dios ulemuchel el mengedereder er a 1914

      Momes er a VIDEO.

      VIDEO: God’s Kingdom Began Ruling in 1914 (5:02)

      Ngoeak a berrous e a Dios a milsang a King Nebukadnesar er a Babilon a ulaoch. Tia el berrous me a omesodel el lebeskid a Daniel ochotii el kmo, ngmelutk el kirel omengederederel a Nebukadnesar me a dirrek el Rengedel a Dios.​—Monguiu er a Daniel 4:17.a

      Monguiu er a Daniel 4:20-26 e mousbech er a chart longer aika el ker:

      • (A) Ngera ngmilsa er a berrusel a Nebukadnesar?​—Momes er a 20 me a 21 el kekerei el bades.

      • (B) Ngera mo duubech el mo er tia el kerrekar?​—Momes er a 23 el kekerei el bades.

      • (C) Ngera mo duubech er a ulebengelel a “euid el rak”?​—Momes er a 26 el kekerei el bades.

      Rolel e Tia el Berrous a Melutk el Kirel a Rengedel a Dios

      ULAOCH (Daniel 4:20-36)

      Omengedereder

      (A) Klou el kerrekar

      Klou el metongakl el kerrekar.

      Milterob omengedereder

      (B) “Mukelii ngii el kerrekar,” el “euid el rak”

      Uchul a kerrekar el techull er a deel me a brons.

      Omengedereder a lmuut el meteketek

      (C) “Ke lmuut el mo king”

      Klou el metongakl el kerrekar.

      Ngar er a kot el otutel tia el ulaoch e . . .

      • (D) A kerrekar, ngulemtechei er a ngerang?​—Momes er a 22 el kekerei el bades.

      • (E) Ngmilekera meterob tia el omengedereder?​—Monguiu er a Daniel 4:29-33.

      • (F) Ngera dilubech el mora Nebukadnesar er a ulebengelel a “euid el rak”?​—Monguiu er a Daniel 4:34-36.

      KOT EL OTUTEL

      Omengedereder

      (D) Nebukadnesar, King er a Babilon

      King Nebukadnesar el chansing er ngii el dechor.

      Milterob omengedereder

      (E) Uriul er a 606 B.C.E., e a Nebukadnesar a mlo kebelung me ngmlo diak el sebechel mengedereder el euid el rak

      Nebukadnesar el kora charm el mechiuaiu er a chutem e menga chudel.

      Omengedereder a lmuut el meteketek

      (F) A uldesuel a Nebukadnesar a liluut er a smechel me ngliluut el mo mengedereder

      King Nebukadnesar el oldars a chimal e omes el bedul a eanged.

      Ngar er a ongerung el otutel tia el ulaoch e . . .

      • (G) A kerrekar, ngulemtechei er a ngerang?​—Monguiu er a 1 Kronika 29:23.

      • (H) Ngmilekera meterob tia el omengedereder? Kede mekera e medengei el kmo ngdirk mle telerrob er a lengar tia el chutem a Jesus?​—Monguiu er a Lukas 21:24.

      • (I) Oingerang e ngliluut el mo mengedereder, e liluut el mo mengedereder er ker?

      ONGERUNG EL OTUTEL

      Omengedereder

      (G) Reking er a Israel el ulemtechei er omengederederel a Dios

      Reking er a Israel el blechobech el dengchokl er a kingall er omerreder. Ngdmiich a llomes er tir.

      Milterob omengedereder

      (H) Jerusalem a metemall, e meterob omengederederir a reking er a Israel el 2,520 el rak

      Ngau el melemall er a Jerusalem er a 607 B.C.E. E sola e ngchuib a 2,520 el rak.

      Omengedereder a lmuut el meteketek

      (I) Jesus omuchel el mengedereder el King er a Rengedel a Dios el ngar er a eanged

      Jesus el ngar er a eanged e mengedereder er a beluulechad lomuchel er a 1914 C.E. Ngdmiich a llomes el mla er ngii.

      Ngngua ngera klemengetel a euid el rak?

      A bebil el part er a Biblia ngosukid el mo medengei a belkul aike el kuk bebil el part er ngii. El ua tiang, a babier er a Ocholt a kmo, a edei el rak me a tedobech a 1,260 el sils a klemengetel. (Ocholt 12:​6, 14) Tia belkul a kmo a ulaoch er a rak er a Biblia a 360 el sils a klemengetel. Me a “euid el rak” a 2,520 el sils a klemengetel. A Biblia lebebil e ngousbech er a ta el sils lomtechei er a ta el rak.​—Esekiel 4:6.

      5. A beluulechad a mla mengodech el ulemuchel er a 1914

      Momes er a VIDEO.

      VIDEO: The World Has Changed Since 1914 (1:10)

      Jesus ulemlaoch er a mo teletael er a beluulechad sel lebo el King. Monguiu er a Lukas 21:9-11 e mosaod er tia el ker:

      • Ngera er aika el blekeradel a omues me a lechub e ke mla remenges chisel?

      A apostol Paulus ulemlaoch a blekeradel el mo er ngii er a ulebongel er a omengederederir a rechad. Monguiu er a 2 Timothy 3:1-5 e mosaod er tia el ker:

      • Ngera er aika el blekeradel omomes er a rechad er chelecha el taem?

      Siasing: Siasing lolecholt a teletael me a blekeradel er a uriul sils. 1. Merreder er a resoldau el ngar er a podium e oldiu e a chimal a bedul bab. 2. Building el cheloit er a uriul er a desiu. 3. Skoki er a resoldau. 4. Rechad el merael er rikl el ou mask. 5. Twin Towers er a New York el mengchat er a uriul er a attack er a re terrorist. 6. Chad lousbech a drugs. 7. Bechiil sechal sokol loldechelakl er a bechil e oldiu er ngii. 8. Kakerous el drugs me a mesisiich el ilumel. 9. Teru el redil el meringelchad a bilir e ouberberingel e melai a selfie er tir. 10. Chad er a sound el mengelaod er a rechad er a concert. 11. Chad el omtok el ometech er a Molotov cocktail.

      6. Mochotii el kmo koumerang el kmo a Rengedel a Dios a mengedereder er chelechang

      Monguiu er a Mateus 24:3, 14 e mosaod aika el ker:

      • Ngera el klou a ultutelel lureor ochotii el kmo a Rengedel a Dios a mengedereder er chelechang?

      • Ngmekera sebechem el mo teloi er tia el ureor?

      A Rengedel a Dios a mengedereder er chelechang, e di kmedung e ngmo mengedereder er tia el chutem. Monguiu er a Hebru 10:24, 25 e mosaod er tia el ker:

      • Ngera kirel a derta er kid el meruul er “chelechal domes er sel Sils er a Rubak el olekedang”?

      Siasing: 1. Chad el mesuub a Biblia el mora miting er a Resioning er a Jehovah. 2. Ngika el osisiu el chad el omerk el mora chad el lekaodengei.

      A lsekum ke mlo medengelii a tekoi el sebechel losobel a klengar er a rechad, e ngera ke mo meruul er ngii?

      A REBEBIL A LOCHA MO OKER: “Ngera uchul me a Resioning er a Jehovah a blechoel el di mesaod er a 1914?”

      • Ke mo dmu el mo ngerang?

      SUMMARY

      Ulaoch er a Biblia, sodel a blechebechel er a taem, me a blekeradel er a beluulechad ochotii el kmo a Rengedel a Dios a mengedereder. Kede ochotii el kmo ke doumerang er tiang sel domerk el kirel, e dengar er a miting.

      Review

      • Ngera dilubech er a ulebengelel a euid el rak er a ulaoch el ngar er a babier er a Daniel?

      • Ngera oterekeklii a rengum el kmo a Rengedel a Dios a ulemuchel el mengedereder er a 1914?

      • Ngmekera omochotii el kmo koumerang el kmo a Renged a mengedereder er chelechang?

      Turrekong

      A LSEBECHEM E MOMES

      Morriter aike el lolekoi a rechad er a reksi el kirel a ngeldechel a blekeradel lulemuchel er a 1914.

      “When Morals Declined Dramatically” (Awake!, April 2007)

      Monguiu el kmo ngera ngrirellii el mora ta el chad a ulaoch el ngar er a Mateus 24:14.

      “I Loved Baseball More Than Anything!” (The Watchtower No. 3 2017)

      Kede mekera medengei el kmo a ulaoch el ngar er a 4 el bliongel er a Daniel a melutk el kirel a Rengedel a Dios?

      “A Rengedel a Dios Ngmlo Omuchel el Mengedereder er Oingerang? (Suobel 1)” (Omesiunged el Kirel a Renged, October 2014)

      Ngera ochotii el kmo a “euid el rak” el losaod er ngii a 4 el bliongel er a Daniel a mlo merek er a 1914?

      “A Rengedel a Dios Ngmlo Omuchel el Mengedereder er Oingerang? (Suobel 2)” (Omesiunged el Kirel a Renged, October 2014)

      a Momes aike el last el teblong el suobel el ngar cheungel A Lsebechem e Momes, el ngar tia el suobel.

  • Aike el Bo Loruul a Renged
    Mkiei el Mo Cherechar!​—Omesubel a Biblia el Di Rolel a Cheldecheduch
    • 33 el suobel. Rechad el kiei er a baradis el chutem.

      33 EL SUOBEL

      Aike el Bo Loruul a Renged

      A Rengedel a Dios a mengedereder er chelechang. Ngdi kmedung e ngmo meruul a betok lomelodech er a beluulechad. Me dosaod a bebil er a ungil tekoi el sebechem lomes el beduluchei el kirel el ngar er cheungel omengederederel a Renged.

      1. Ngmekera Rengedel a Dios e lmuut el mo toketekii er a beluulechad a budech me a llemalt?

      Jesus el King er a Rengedel a Dios a mo okngemedeterir a remedengerenger me aika el kabelment, er a mekemad er a Armakedon. (Ocholt 16:14, 16) Seikid e ngmo tmaut tia el telbiil er a Biblia: “Ngdi telkib kung, e a re dengerenger a mo dibus.” (Psalm 37:10) A Jesus a mo oterekeklii loeak a Renged el kmo a beluulechad a mo mui er a budech me a llemalt.​—Monguiu er a Isaia 11:4.

      2. Ngmo uangerang a klengar sel lemeketmokl a moktek er a Dios el kirel tia el chutem?

      Ngar cheungel omengederederel a Rengedel a Dios e a “re melemalt a mo ungilbesrir el kiei er a chelsel a beluu e mo oubeluu er ngii el di blechoel.” (Psalm 37:29) Molatk er kau el kiei er a beluulechad el rokui el chad er ngii a melemalt e betik a rengrir er a Jehovah me a dirrek el tang me a tang! Ngdiak a secher, me a rechad a kiei el mo cherechar.

      3. Ngera ngmo meruul a Rengedel a Dios er a uriul er a lokngemedeterir a remedengerenger?

      Uriul er a lemokngemed a remedengerenger e a Jesus a mo mengedereder el King el 1,000 el rak. Chelsel tiakid el taem e ngii me a re 144,000 el mo mengedereder lobengkel a mo ngosuterir a rechad el mo mecherrungel. A ulebengelel a ta el telael el rak e a beluulechad el rokir a mla mo baradis me a rokui el chad a mo dmeu a rengrir le te olengesenges a llechul a Jehovah. A Jesus a mo lmuut lolutii a Renged el mora Demal er a Jehovah. A Dios a mo “mechedaol a [ngklel].” (Mateus 6:9, 10, BT) Ngmo obeketakl el kmo a Jehovah ungil mengedereder e kmal omekerreu er a rengar cheungel a chederedellel. A Jehovah mo okngemedii a Satan, me a remekngit el anghel, me a ngii di el chad el mo omtok er a omengederederel. (Ocholt 20:7-10) Cherrungel el blekeradel el lebo leketmeklii a Rengedel a Dios a mo diak a ulebengelel.

      BOM DMOLECH EL MERRITER

      Morriter a uchul me ngsebeched loumerang el kmo a Dios a mo ousbech er a Renged el oltaut a rokui el telbiil er a Biblia el kirel a ngar medad.

      4. Rengedel a Dios a mo torob a rokui el kabelment er a rechad

      “A re bebil er a re chad er tial beluulchad a ngar ngii a klisichir, e a re bebil a mo chuarm er tir.” (Olisechakl 8:9) A Jehovah mo ousbech er a Rengedel lomult a rokui el diak el melemalt el omeruul.

      Monguiu er a Daniel 2:44 me a 2 Thesalonika 1:6-8 e mosaod aika el ker:

      • Ngera ngmo meruul a Jehovah me a Ngelekel el Jesus el kirel aika el kabelment er a rechad me tirke el support er tir?

      • Ngmekera tekoi el bla msuub el kirel a Jehovah me a Jesus e oterekeklii a rengum el kmo te mo melemalt e fair omerellir?

      Jesus el King er a eanged e mengedereder er a baradis el chutem.

      5. Jesus ngike el kot lungil el King

      A Jesus el King er a Rengedel a Dios a mo olengeseu er a rechad el ngar er a betok el rolel. Momes er a VIDEO e mesa rolel e a Jesus a mla ochotii el kmo ngngar ngii a urungulel me a klisichel er a Dios el mo olengeseu er a rechad.

      VIDEO: Jesus Ullecholt Aike el Bo Loruul a Renged (1:13)

      A Jesus er a lengar tia el chutem e ngullecholt aike el bo loruul a Renged. Ngera er aike el klengeltengat el lomasech a msal lomes el beduluchei el kirel? Monguiu aike el bades lobengkel aika el klengeltengat.

      A JESUS ER A LENGAR TIA EL CHUTEM E NG . . .

      A JESUS A NGAR ER A EANGED E MO . . .

      • ngulemtebechel er a eanged.​—Markus 4:36-41.

      • sumechokl a telemellel a beluulechad.​—Isaia 35:1, 2.

      • ulemeka er a rebetok el telael el chad.​—Mateus 14:17-21.

      • okngemedii a ngelsengesel a kall er a beluulechad.​—Psalm 72:16.

      • ulemekungil er a rebetok el smecher.​—Lukas 18:35-43.

      • oterekeklii el kmo a rokui el chad a mo cherrungel a klisichel a bedengir.​—Isaia 33:24.

      • ullekiis er a rulekoad.​—Lukas 8:49-55.

      • mult a telemellel a kodall.​—Ocholt 21:3, 4.

      6. A Rengedel a Dios a mo meskid a ungil klengar er a ngar medad

      A Renged a mo kutmeklii a dimla moktek er a Jehovah el kirir a rechad. Te mo kiei el mo cherechar er a baradis el chutem. Momes er a VIDEO e mesa rolel e a Jehovah ousbech er a Ngelekel el Jesus lotaut er a moktek er ngii.

      VIDEO: A Glimpse Into a Wonderful Future (4:38)

      Monguiu er a Psalm 37:4 e mosaod er tia el ker:

      • Ngmo uangerang a uldesuem sel modengei el kmo a Jehovah mo “meskau sel msal oureng er ngii”?

      A REBEBIL A KMO: “A bo dedak loureor el rokui e ngsebeched el sumechokl a mondai er a beluulechad.”

      • Ngera el mondai a bo losmechokl a Rengedel a Dios el diak a ngii di el kabelment er a rechad el sebechel sumechokl?

      SUMMARY

      Rengedel a Dios a mo otutii a moktek er a Jehovah. Ngmo rullii a beluulechad el rokir el mo baradis, el mui er a rungil chad el tir a mo mengull er Ngii el mo cherechar.

      Review

      • Ngmekera Rengedel a Dios e mo chemedolii a ngklel a Jehovah?

      • Ngera uchul me ngsebeched loumerang el kmo a Rengedel a Dios a mo otaut a telbiil el ngar er a Biblia?

      • Ngera el tekoi el bo loruul a Renged a msal lomes el beduluchei el kirel?

      Turrekong

      A LSEBECHEM E MOMES

      Bo modengelii el kmo ngngerang a Armakedon.

      “What Is the Battle of Armageddon?” (Suobel el ngar er a Internet)

      Morriter aike el tekoi el mo duubech er a taem el lomekedong er ngii a Jesus el kmo ng ”kloul ringel.”​—Mateus 24:21, BT.

      “What Is the Great Tribulation?” (Suobel el ngar er a Internet)

      Momes er a rolel e a telungalek a sebechir el dmak el melebedebek a klengeltengat el mo er ngii er a ngar medad loeak a Renged.

      See Yourself in Paradise (1:50)

      Ngar tia el cheldecheduch el “I Was Troubled by Many Questions,” e monguiu el kirel a chad el lulemtok a balatiks el metik er a solution lulsiik er ngii.

      “The Bible Changes Lives” (The Watchtower, January 1, 2012)