Klungiolem er a Ulekerreuil a Dios

A Dios a milebii a bedenged el sebechel di ngii lomekungil er ngii. A bedengel a chad sel lemedobech, lemetabt, me a lechub e ngmetemall “e a bedengel omuchel loureor el omekungil a telemellel.” (Johns Hopkins Medicine) A bedengel a di mereched el mo oureor el stob er a rolel a rasech e docherecherii me ngdiak a me soiseb e lmuut el mo klou a bochel a rasech el mora miltemall el oldechelakl a ngii di el baiking el siliseb, e mekokil lomekungil er a miltemall me ngmo mechubs.

MUTEBENGII TIANG: A lsekum a Ulemeob a milebii a bedenged el sebechel di ngii lomekungil a telemellel, e ngdiak lekirel mo ulterekokl a rengud el kmo ngmo ngosukid el mo mesisiich er a telemellel a rengud? A ta er a milluches er a Psalm a kmo: “Ng omekungil a chelemuul el reng, e omkar a telemall er a bedengir.” (Psalm 147:3) Engdi lsekum ngngar ngii a tekoi el dilubech el mo er kau el uchul a ringelel a uldesuem me a rengum, e ngmekera sebechel mo ulterekokl a rengum el kmo a Jehovah a mo omkar a telemellem er chelechang me a ngar medad?

AIKE EL LOSISECHEKLID A BIBLIA EL KIREL A BLTIKERRENG ER A DIOS

A Dios a tibir el kmo: “Lak medakt e ak ubengkem. Ngak a Dios er kau, me lak a ngeral bo medakt er ngii. Ak mo rullau el mo mesisiich, e ngosukau; ak mo sobecheklau e osebelau.” (Isaia 41:10) A chad el medengei el kmo a Jehovah a omekerreu er ngii a budech a uldesuel e sebechel loutekangel a ringel. A apostol Paulus omekedong er tia el budech el “budech er a Dios, el diak el sebechel a chad el mo cherrungel el medengelii.” Ngdirrek el dilu el kmo: “Ngar ngii a klisichek el remuul aike el rokui el mei er ngak el okiu a klisiich el lomeskak a Jehovah.”—Filipi 4:4-7, 9, 13, NW.

A Bades a ngosukid el mekurulii a klaumerang er kid er a telbilel a Jehovah el kirel a ngar medad. El ua tiang a Ocholt 21:4, 5 (el desa er a ongingil el llel) ouchais er kid aike el bo loruul me a dirrek el uchul e ngsebeched el oumerang er ngii:

“Ng mo smuld a rokui el chiuosech” er a mederir a rokui el chad. A Jehovah a mo okngemed a rokui el ringel me a sebekreng el mo lmuut er aike el kora di mekekerei el tekoi.
“Ngikal dengchokl ra kingall” er a klebkellel er a eanged el King el Lolab a Bek el Klisiich a mo ousbech er a klisichel el torob a ringel e meskid a ngeso el dousbech.
Jehovah tibir el kmo a telbilel a “ulterekokl e klemerang.” A ngklel me a chisel el di ta el mera el Dios a ulekuak er a otutel a telbilel.

“‘Ng mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel. A di mla tekoi a mla mo diak.’ E ngikel dengchokl er a kingall a dilu el kmo, ‘Chelechang e ak remuul a rokui el tekoi el mo beches!’ Ng dirrek el dilu er ngak el kmo, ‘Mlechesii tiang ele ikal tekoi a merang e ulterekokl el mo tmaut.’”—Ocholt 21:4, 5.

A bleob me a Biblia ocholt a blekerdelel a Demad el ngar er a eanged. A blebelel a rullid el mo soad el mo medengelii e mo sechelil e a Biblia mengemedaol er kid el kmo: “Molekeed er kemiu er a Dios, me bo lekeed er kemiu.” (Jakobus 4:8) El ua lolekoi a Rellir 17:27 el kmo: “Dios a diak le cheroid er a derta er kid.”

Sel mongoit a taem el mo medengelii a Dios e ngmo ulterekokl a rengum el kmo “ng kerekikl el omekerreu er [kau].” (1 Petrus 5:7) Ngera klungiolel sel bo doumera el ulsirs er a Jehovah?

Molatk er a Toru el chad er a Siabal. Ngika mlukeroul el ngelekel a Kristiano el redil engdi ngmlo teloi er a re yakuza el tir a Mafia er a Siabal. Ngmelekoi el kmo, “A kuluumerang el kmo a Dios a uluuketui er ngak me a kodellir tirke el iliuekl er ngak tokubets tirke el betik er a renguk a blals el mei er ngak.” Toru a dmu el kmo tia el blekeradel el ble iliuekl er ngii me a uldasu el mla er ngii a uchul e ngmle “ulekoad a rengul.” Ngdmu el kmo, “Ngmle soak el di kekerei el chad e mad er a uriul er a kukodir a chad el lmuut el merael a chisel er ngak e krellii a chisek.”

Me nguaisei engdi sera lomuchel ngii me a bechil er a Hannah el mesuub er a Biblia e ngriruul a meklou el omelodech er a klengar er ngii me a uldesuel. A Hannah kmo, “Ngkmal mle sebechek el mes aika el omelodech.” Chelecha Toru a melekoi el ulterekokl a rengul el kmo: “Ngngar ngii a Dios el mera el omekerreu er a derta er kid. Ngkmal diak el soal a ngii di el chad a lemad e ngbai kongei el lousubes er tirke el mera el lobult er a kngterir. Ngorrenges aike el tekoi el diak el sebeched louchais er a ngii di el chad e diak a chad el sebechir el melechesiu. A ngar medad e a Jehovah a mo choroid a rokui el mondai me a ringel. Mo lmuut er chelechang me ngolengeseu er kid el ngar er a rolel el dimlak delatk. Ngomekerreu er kid e melisiich er kid sel bo lemechitechut a rengud.”—Psalm 136:23.

Me ngua desa er a experience er a Toru, sel dodengei kmo a Dios a sebechel torob a rokui el ringel e smuld a rokui el chiuosech me ngii a di kmedung e ngmo meruul el uaisei, e ngdiak di lebeskid a omelatk ngdirrek el ngosukid el mo ungil a klengar er kid er chelechang. Nguaisei, alta kede kiei er a beluulechad el mui er a ringel engdi ngdirk sebeched el ngmai a klungioled er a ulekerreuil a Dios.