Klengeltengat el Mo er Tirke el Olengesenges er a Dios

A profet Moses a dilu el kmo a dolengesenges er a Dios, e kede ngmai a klengeltengat er Ngii. (Duteronomi 10:13; 11:27) Engdi kid a diak dosiou er a Dios e le kede medakt a lomals er kid. A klebokel el blekerdelel a Dios a melisiich er kid el mo olengesenges er ngii, e le ngbetik a rengud er ngii e diak el soad el meruul a tekoi el mo kingtir a rengul. “Ele bltikerreng er a Dios a belkul a kmo kede oltirakl a llechul.”​—1 Johanes 5:3.

Engdi ngmekera blekongesenges el mora Dios e mo uchul a klengeltengat er ngii? Momtab aika el eru el rolel.

1. A DOLENGESENGES E NGMO MELLOMES A RENGUD

“Ngak a RUBAK el Dios el olsisechakl er kemiu el mo ungilbesmiu, ak . . . omekrael er kemiu er sel rael el kiriu el okiu ngii.”​—ISAIA 48:17.

A Jehovah el Dios el Ngike el Ulemeob er kid a medengelkid e meskid a ulekrael el dousbech. A lsoad a osisecheklel a lengesukid el mo mellomes a rengud el melilt a tekoi, e ngkired el mesuub er a Chedaol Llechukl el mo medengei a soal a doruul e mo oltaut.

2. A DOLENGESENGES E NGMO DMEU A RENGUD

“Ngdmeu a rengrir tirke el rongesii a tekingel a Dios e mo oltirakl!”​—LUKAS 11:28, NW.

Te betok el miliol el chad er chelechang el olengesenges a Tekingel a Dios a mera el dmeu a rengrir. El ua ta el chad el ngar er a Spain el kmal mle bekongesengasech a rengul e mekngit a omerellel el mora rechad, el uldimukl er a bechil. A ta er a klebesei e ngmilenguiu a tekingel a profet Moses el mesaod er a delemedemek el reng el luleba Josef el ngelekel a Jakob. A Josef a mloterau el mo sibai e mlutelechakl e mlekelebus, engdi ngmillemolem loba delemedemek el reng, e meruul a budech, e ousubes. (Genesis, bliongel 37-45) Ngika el chad a dilu el kmo: “Sera kulebedebek er a kerebil a Josef e ngmillisiich er ngak el mo oba delemedemek el reng, blekokuii, me a ulserechakl el reng. Me chelechang e ngar ngii a deurreng er a klengar er ngak.”

A Chedaol Llechukl a meskid a lmuut el betok el ulekrael el kirel a omerelled el mora rebebil. Me bo dosaod er tiang.