Bo Moba Blekeu el Ua Sadok

1-2. Ngtecha Sadok? (1 Kronika 12:​22, 26-28)

KA MLECHESII er a uldesuem. Ngseked er a rebetok er a 340,000 el chad a mla me kldibel el mo meruul er a David el mo king er a beluu er a Israel el rokir. Ngmle edei el klebesei el lekiliei er a bedbeduul el bukl er a bita er a Hebron. Te mle kaderroakl, chadecheduch, e mengitakl a chelitakl er odanges el mora Jehovah. (1 Kr. 12:39) A ta el kekerei el chad el Sadok a ngklel a mle teloi er tir. Nglocha diak el sebechel medangch er tia el seked. Me nguaisei engdi Jehovah ulterekeklii el kmo, kede mo medengei el kmo a Sadok a mla er tiang. (Monguiu er a 1 Kronika 12:​22, 26-28.) Ngtecha Sadok?

² A Sadok a mle prist e uluureor el lobengkel a Ngarbab el Prist Abiathar. A Dios a dirrek el milsa Sadok a llomeserreng me a duch el mo medengei el kmo ngngera soal. (2 Sa. 15:​27, NW) A rechad a blechoel el mora Sadok sel bo lousbech a advice. Ngika dirrek el kmal uleba blekeu. Ngar tia el suobel e kede mo mesaod er a rolel e a Sadok ulechotii a blekeu.

3. (a) Ngera uchul me a remesiungel a Jehovah a kirir el mo oba blekeu? (b) Ngera kede mo mesaod er tia el suobel?

³ Chelsel aika el uriul sils e a Satan a mla lmuut el smisiich a odelecheklel er a rechedal a Dios. (1 Pe. 5:8) Ngkired el mo oba blekeu el mengiil er a Jehovah el mo olekngemed er a Satan me tia el mekngit el beluulechad er ngii. (Psa. 31:​24, NW) Ka me dosaod a edei el rolel e ngsebeched loukerebai er a blekengel a Sadok.

EM SUPPORT ER A RENGEDEL A DIOS

4. Ngera uchul me a rechedal a Jehovah ousbech er a blekeu el mo support er a Rengedel a Dios? (Dirrek el momes er a siasing.)

⁴ Kid el chedal a Jehovah oba rengud el rokir el support er a Rengedel a Dios engdi kede ousbech er a blekeu el mo meruul er tiang. (Mt. 6:33) El ua tiang, chelsel tia el kmal mekngit el beluulechad e kede ousbech er a blekeu el mo kiei el oltirakl a llechul a Jehovah el kirel a ungil me a mekngit e omerk er a ungil chais er a Renged. (1 Th. 2:2) Kede blechoel el lousbech er a blekeu el diak bo domekbitang er a chelsel tia el beluulechad el balatiks a uchul e ngkmal klou a klekakeakl er ngii. (Jn. 18:36) Me a rebetok er a rechedal a Jehovah a chelebangel a ringelel a keizai, me a lechub e te mla mechelebed, e mla mekelebus e le tir el diak el kengei el mo teloi a balatiks me a mekemad.

5. Ngera uchul me a Sadok uluusbech er a blekeu el mo support er a David?

⁵ A Sadok a dimlak di lebora Hebron el kirel a kleking er a David. Ngdirrek el ullab a klekedellel er a mekemad e mle kltmokl el kirel a mekemad. (1 Kr. 12:38) Ngkilengei el mo obengkel a David el mo oumekemad e protect er a Israel er a recheraro. Me alta Sadok a locha dimlak el klou a experience er ngii er a mekemad engdi ngkmal uleba blekeu.

6. Ngmilekera David e kutmeklii a ungil kerebai er a blekeu el sebechel a Sadok loltirakl er ngii? (Psalm 138:3)

⁶ Ngmilekera prist el ua Sadok e suubii el mo oba klou el blekeu? Ngika mle iliuekl er a rechad el mesisiich e bekeu. Ngulterekokl el ngilai a klubelel er a kerebai er tir. El ua tiang, a David el uleba blekeu el ‘mengetakl er a mekemedil a Israel,’ a uchul me a beluu er a Israel el rokir a uleba rengrir el support er ngii. (1 Kr. 11:​1, 2) Me a David a mle blechoel el ultuil er a ngelsuil a Jehovah el mo oldechelakl er a recherrouel. (Psa. 28:7; monguiu er a Psalm 138:3.) Ngdirrek el mla er ngii a lmuut el bebil er a rungil kerebai el mlara bita er a Sadok el ua Jehoiada me a ngelekel er a Benaia me a dirrek el re 22 el mengeteklel a kebliil el mlo olengeseu er a David. (1 Kr. 11:​22-25; 12:​26-28) Tirka el chad a rirellii er a rengrir a mo rullii a David el mo king er tir e mo protect er ngii.

7. (a) Ngera el kerebai er a blekeu er chelecha el taem er kid a sebeched el ngmai a klubeled er ngii? (b) Ngua desa er a video, ngera ke suub er a kerebil a Brother Nsilu?

⁷ Kede nguu a klisiich me a omelisiich sel dorriter a kerebai er tirke el uleba blekeu el support er a omengederederel a Jehovah. A King er kid el Kristus Jesus a kmal dimlak el kengei el mo olsiseb er ngii er a balatiks er tia el beluulechad er a Satan. (Mt. 4:​8-11; Jn. 6:​14, 15) E mle blechoel el ultuil er a klisichel a Jehovah. Ngdirrek el ngar ngii a betok el diak lemochur el ungil example er a remekekerei el odam er chelecha el taem er kid el dimlak el kengei el mo teloi a mekemad me a tekoi er a balatiks. Nglocha sebechem el mo menguiu a bebil er a experience er tir er a jw.org.a

MOLENGESEU ER A RUDAM ER KAU

8. Ngoingerang e a remechuodel a locha mo ousbech er a blekeu el lolengeseu er a rudam er tir?

⁸ A rechedal a Jehovah kmal sorir el kaingeseu er a delongelir. (2 Ko. 8:4) Me nguaisei ngngar ngii aike el taem el bo lousbech er a blekeu el lolengeseu er a tang me a tang. El ua tiang, sera lebo er ngii a mekemad er a beluu, e a remechuodel er ngii el beluu a mlo mtebengii el kmo a rudam me a rudos er tir ousbech omelisiich, support, Biblia, me aika el babilenged me a dirrek el aike el lousbech er a bedengir. Bltkil a rengrir el mora resib a uchul me a remechuodel a mo omesterir aika el ngeso alta nglocha kmal kengaol a loruul el uaisei. (Jn. 15:​12, 13) Ngar tia el rolel e te oukerebai er a blekeu el lulechotii a Sadok.

9. Ngua donguiu er a 2 Samuel 15:​27-29, a David ngdilu er a Sadok me lokerang? (Dirrek el momes er a siasing.)

⁹ A David a mle sebechel loridii a klengar er ngii. A ngelekel er a Absalom a mle soal omekoad er ngii e nguu a kleking. (2 Sa. 15:​12, 13) Me a David a mle kirel mereched el tuobed er a Jerusalem! Ngdilu er a remesiungel el kmo: “Bekiis, e dechiis el mo er cheroid, e le ngdiak a ta er kid el mochib er a chimal a Absalom!” (2 Sa. 15:​14, NW) Me a remesiungel a David a merech er tir el merael e ngmocha mtebengii el kmo ngkirel a chad el di kiei me bo lsebechel louchais er ngii er a plan er a Absalom. Me a David a ulderchii a Sadok me a relmuut el bebil er a prist me lluut el mora mats el mo ourabek. (Monguiu er a 2 Samuel 15:​27-29.) Ngmle kirir el kmal mo kerekikl. A tekoi el lullengit er ngii er tir a David a kmal mle kengaol e le ngmle sebechir loriid a klengar er tir. A Absalom a kmal mle mekngit a blekerdelel e melemall er a rechad e di melatk er a di ngii. Ka di molatk aike el locha bo leruul el mora Sadok me tirke el bebil er a prist omko ngmlo medengei el kmo te omdidm er ngii el kirel a David!

10. Ngmilekera Sadok me a rubengkel e protect er a David?

¹⁰ A David a rirellii a plan el luldimukl er ngii a Sadok me a dirrek el ta er a blak a rengul el sechelil er a Husai. (2 Sa. 15:​32-37) Me a Husai a ultireklii ngii el plan e ngiluu a klaumerang er a Absalom e uluuchais er ngii er a rolel a klaumekemad el ngii a msang a David me a rechedal a taem el mo kutmeklterir el kirel a mekemad. Ongingil, e a Husai uluuchais er a Sadok me a Abiathar er a plan. (2 Sa. 17:​8-16) Me tirka el terung a mle sebechir el odurokl a tekoi el mora David. (2 Sa. 17:17) Ngoeak a ngelsuil a Jehovah e a Sadok me tirke el bebil er a prist a ullengeseu el protect er a David.—2 Sa. 17:​21, 22.

11. Ngmekera sebeched el loukerebai er a blekengel a Sadok sel dolengeseu er a rudam er kid?

¹¹ A lsekum e te olengit er kid el mo olengeseu er a rudam er kid er a chelsel a kengaol el taem, e ngmekera sebeched el lochotii a blekeu lulebang a Sadok? (1) Moltirakl a ulekrael. Ngar er a chelsel chouaika el blekeradel e ngkmal klou a ultutelel a dolemolem el ngar er a kltarreng. Molengesenges a ulekrael er a branch office er kau. (Heb. 13:​17, NW) A remechuodel a blechoel el review a ulekrael el kirel a de prepare er kid el kirel a tellemall el mo duubech er a beluu me aike el kired el meruul sel leduubech er a beluu. (1 Ko. 14:​33, 40) (2) Mochotii a blekeu engdi mdirrek el mo kerekikl. (Osi. 22:3) Moba common sense. Bora tkurrebab el sebechem el meruul a tekoi el ngar er a safe el rolel. (3) Moumera el ulsirs er a Jehovah. Lak mobes el kmo a Jehovah soal kau me a rudam er kau omolemolem el safe. Ngkmal sebechel ngosukau el ngosuterir a rudam er kau el ngar er a safe el rolel.

12-13. Ngera ke suub er a experience er a Viktor me a Vitalii? (Dirrek el momes er a siasing.)

¹² Molatk er a Viktor me a Vitalii, el teru el odam er a klereng el uluureor el deliver a kall me a ralm el mora rekldemir er a klemerang er a Ukraine. A Viktor a kmo: “Aki ulsiik a kall er ker me ker. Aki mle blechoel el mo orrenges a klaibeboes er bita er kemam. A ta el odam a mle donate a kall el ble le save. Tia el donation er ngii a milsterir a rudam me a rudos aike el lousbech el telkib el taem. Aki mle load a kall er a mlai e ngii a ruebet a dub el bekord el 66 el fit a cherridel er kemam engdi ngdimlak lobuu. Ak di milluluuch er tiakid el sils lolengit er a Jehovah me lebeskak a blekeu el mo melemolem lolengeseu er a rudam me a rudos.”

¹³ A Vitalii a kmo: “Tia kmal uluusbech er a klou el blekeu. A kot el omerollek e ngdi mle ngak el tang e mle 12 el sikang a klemengetel. Ak kmal di milluluuch el mora Jehovah er tia el omerollek el rokir.” Me a Vitalii ulechotii a blekeu engdi ngdirrek el mle kerekikl. Ngmelekoi el kmo: “Ak milluluuch el di olengit er a Jehovah me lebeskak a llomeserreng me a tabesul el uldasu. Ak di uleak aike el rael el ble le approve a rebulis. Ngkmal silsichii a klaumerang er ngak er a kumes er a rudam me a rudos el dmak loureor. Te diledesii a rael, mle collect e load a kall, bail, me a lmuut el bebil er a meklou a ultutelel el klalo er a mlai, e kiltmokl a kelam me a basio el sebecham el olengull er ngii.”

MOLEMOLEM EL LOBA BLAKERRENG EL MORA JEHOVAH

14. Ngera ngmo rullii el mei er kid sel bo lak loba blakerreng el mora Jehovah a betik er a rengud?

¹⁴ Sel lechitii a Jehovah a chedal a telungalek er kid me a lechub e ngkmeed el sechelid a ta er a kot el meringel el omelsemai el sebeched el mo chobengelii. (Psa. 78:40; Osi. 24:10) A klisichel a deleuill er kau lobengkel ngii el chad a osisiu el klisichel a ringel el bo moutekangel er ngii. A kerebil a Sadok a kmal sebechel smisichau.

15. Ngera uchul me a Sadok uluusbech er a blekeu el mo melemolem el loba blakerreng el mora Jehovah? (1 King 1:​5-8)

¹⁵ A Sadok a millemolem loba blakerreng alta kmeed el sechelil er a Abiathar a chilitii a Jehovah. Tia dilubech er a ulebengelel omengederederel a David. A David er a lechudelang e lemedkung e a ngelekel er a Adonia mlo melasem el melai er a kleking el Jehovah mla tibir el mora Salomon. (1 Kr. 22:​9, 10) A Abiathar a mlo olab el mora Adonia. (Monguiu er a 1 King 1:​5-8.) A loruul el uaisei e ngmo diak loba blakerreng el mora David me a dirrek el Jehovah! Ngsebechem el omelechesiu er a kngtil a rengul a Sadok? Ngmla mo betok er a 40 el rak el loureor el prist lobengkel a Abiathar. (2 Sa. 8:17) Te dilak el omekerreu er a “blil a telbiil er a mera el Dios.” (2 Sa. 15:​29, NW) E dilak el support er a David el king er tir e meruul a lmuut el betok.—2 Sa. 19:​11-14.

16. Ngera locha ngilsuir a Sadok el mo melemolem el loba blakerreng?

¹⁶ Me a Abiathar a mlo diak loba blakerreng el mora Jehovah er a lotngeklii a David, me nguaisei engdi Sadok a millemolem el loba blakerreng el mora Jehovah. Me a David a dimlak loumededenger er a blakerreng er a Sadok. Sera bo lodengelii a telbilel a Adonia e ngmlora Sadok, Nathan, me a Benaia e melekoi er tir me lerellii a Salomon el mo king. (1 Ki. 1:​32-34) Sadok lulebengterir a reblak a rengrir el mesiungel a Jehovah el ua Nathan me a rebebil el mle support er a King David a ulterekokl el kmal silsichii. (1 Ki. 1:​38, 39) A Salomon er a lebo el king e ngtiltkii a “Prist Sadok [el mora] deruchellel a Abiathar.”—1 Ki. 2:35.

17. Ngmekera sebechem loukerebai er a Sadok a lsekum a chad el close er kau a mo diak loba blakerreng el mora Jehovah?

¹⁷ Ngmekera sebechem el loukerebai er a Sadok? A lsekum a chad el close er kau a ngiltii el mo cheroid er a Jehovah, e beketeklii el mora Jehovah el kmo ke oba blakerreng el mo er ngii. (Jos. 24:15) A Jehovah mo meskau a klisiich me a blekeu el mousbech er ngii. Moumera el ulsirs er ngii loeak a nglunguuch me sel molemolem el kmeed er a reblak a rengrir el mesiungel. A Jehovah mengreos er a blakerreng er kau e mo omekngeltengat er kau el kirel a blakerreng er kau.—2 Sa. 22:​26, NW.

18. Ngera ke suub er a experience er a Marco me a Sidse?

¹⁸ Molatk er a Marco me a bechil er a Sidse el rengelekir el teru el redil el mla mo meklou a mla choitii a klemerang. A Marco a kmo: “Sel sils el lemechell a rengelekem el mong e ngkmal imis el betik a rengum er tir. Ke mo meruul a ngii di el tekoi el omekerreu er tir er a telemall. Me sel lengiltii el mo cheroid er a Jehovah e ngkmal mecham a rengum.” Ngmelemolem el melekoi el kmo: “Engdi Jehovah ngngkaikid er a lengar bita er kemam. Ngmla oterekeklii el kmo sel kmechitechut e a bechik a mesisiich, e sel lemechitechut e ngak a mesisiich.” A Sidse a dochelir el kmo: “Ngdiak el sebecham el loutekangel er ngii okmo Jehovah dimlak el beskemam a klisiich el ki muluusbech er ngii. Ngkmal mle mekngit a renguk, e ulemdasu el kmo tia fault er ngak me a kuluuchais er a Jehovah a feelings er ngak. Kedeb el taem er uriul e a ta el odos el meketeketa el diak kisang a ngilai chimal locha er ongelngelek e omes a chelsul a medak e kmo, ‘Lak mobes e Sidse, ngkmal diak el fault er kau!’ Ngoeak a ngelsuil a Jehovah e ngsebechek el melemolem el oba deurreng el mesiou er ngii.”

19. Ngera ke mla rullii er a rengum el mo meruul er ngii?

¹⁹ A Jehovah a soal a rokui el mesiungel a bo lebekeu el ua Sadok. (2 Ti. 1:7) Me nguaisei engdi ngdiak el soal a dultuil er a di klisiched. Ngsoal a doumera el ulsirs er ngii. Me sel obetik er kau el ngar er a chelsel a blekeradel el lousbech er a blekeu, e mobult el mora Jehovah. Ngkmal sebechel mo ulterekokl a rengum el kmo ngmo rullau el mo oba blekeu el ua Sadok!—1 Pe. 5:10.