1 Korintios

Yuwe fxiysaju weꞌweniꞌ nasatxiꞌ selpiꞌçmeꞌ

14 Nyafxteꞌ peeygãawaꞌjaꞌs khuẽꞌy wejx thaakwe mpaꞌpçxuwe. Txãa eꞌsu mpaakwewe maꞌwẽ selpiwaꞌjaꞌswa Dxus Espiritu ũsuꞌk txãatx. Nawa iꞌkweꞌsxtxi Dxus weꞌweniꞌs ptaꞌsxyaꞌ ãjanisaçxáa wejx seelpisaꞌ. 2 Txãꞌwẽmeꞌ, maawa yuwe fxiysaju weꞌwesaꞌ nasa yakhmée, Dxus yakhçxáa neꞌ weꞌweꞌ jiyuwaꞌjmeesaꞌs Dxus Espiritu kweꞌweꞌjni, açaꞌ kim yuhwa jiyuꞌçmeetaꞌ. 3 Naapkaçxhaꞌ iꞌkweꞌsxtxi Dxus weꞌweniꞌs ptaꞌsxsaꞌ, naa kiwete nasatx kaajiyuꞌjuꞌk Dxus yakh çxhãçxha fxiꞌzewaꞌjaꞌs vxiteꞌ nxuste fxiꞌzeçtewa kvxiisxaꞌjna. 4 Yuwe fxiysaju weꞌwesaꞌ peekíiçxáak Dxus yakh çxhãçxha fxiꞌzewaꞌjaꞌs yaꞌjypaꞌgaꞌ. Nawa Dxus weꞌweniꞌs vxitetx ptaꞌsxsaꞌ, Dxus luuçxtxi kçxhãaçxhaꞌjsaꞌ.

5 Yuwe fxiysaju weꞌweyaꞌ jxukaysa ãjawaçaꞌ, wala yuh ewna sũjuꞌth adxaꞌ. Nawa Dxus weꞌweniꞌs vxitetx ãate ptaꞌsxyaꞌ ãjaniꞌsthu wejx thaakwe jxthãasuꞌ. Txãꞌwẽ yũunisaçxáa thaakwe ewsaꞌ. Meeçxaꞌ txãꞌwẽ yuwe fxiysaju weꞌwesa ũsteꞌ, pukate vxite ãate kaajiyuꞌthe yuꞌ ew yuhna, txãꞌwẽ yuꞌ Dxus luuçx jiyutxna Dxus yakh çxhãçxha fxiꞌzewaꞌjaꞌs.

6 Yakhthẽꞌjweꞌsx, ũus miiyajkxwe: Adx paꞌjçxa yuwe fxiysaju weꞌweteꞌ, iꞌkweꞌsxaꞌ ¿kĩhçxáꞌ jiyuyaꞌ ãjamaꞌkwe? txãꞌwẽ kweꞌsx weꞌwenimée yuwejuçxáa weꞌweteꞌ. Nawa Dxus weꞌweniꞌs ptaꞌsxiççxaꞌ, kweꞌsx weꞌweni yuweju kaapiyaꞌjna ãate kaajiyuꞌthe yuuçxáa iꞌkweꞌsxaꞌ ew jiyuneꞌkwe Dxus jxkaahnitx.

7 Naꞌwẽsatx miiyajkxwe: músika tukanisa kuvxy vxiteꞌ kxtala txãatx maꞌwẽwa ksuusuꞌtheꞌ, yaꞌjiyumeena mem maꞌwẽsaꞌs tukaçtewa. 8 Txãꞌwẽy gweçxate puiiyaꞌ uꞌjwaꞌjaꞌs ew kaajiyuꞌjna kornetaꞌs ãate tujkameeteꞌ, kim yuhwa jiyumeeçxaꞌ pheuꞌjmeetxna puiiwaꞌjaꞌs. 9 Iꞌkweꞌsx yakhwa txãꞌwẽyçxáꞌ. Yuwe fxiysaju weꞌweteꞌ, ¿maꞌwẽ yaꞌjiyukx kĩh weꞌweçtewa? Yaꞌjiyumeena açaꞌ kxul yuh yuuna. 10 Isanaa kiweteꞌ yuwe maꞌwẽsawa ũsyuhtaꞌ. Nawa maa yuhwa txãaweꞌsx pweꞌsx puutx weꞌweyaꞌ ãjanimeesa yuꞌ meetxna. 11 Maawa adx yakh weꞌweççxaꞌ, adx weꞌweni yuwe jiyunisaju weꞌwemeeteꞌ, txãa yakhaꞌ puutx weꞌweyaꞌ ãjameꞌnja nasa fxiysa naꞌwẽ. Açaꞌ txãawa adx yakh puutx weꞌweyaꞌ ãjameena nasa fxiysa naꞌwẽ. 12 Txãa paꞌga iꞌkweꞌsxaꞌ nakwe wala kĩjxaꞌwa ãjawaꞌjaꞌs pakweꞌiꞌkwe naꞌ Dxus luuçxtxi kçxhãaçxhaꞌjwaꞌjsaçxáꞌs mpaakwewe.

13 Txãꞌwẽ yãꞌtheꞌ, yuwe fxiysajuçxáa weꞌwesaꞌ Dxusaꞌs mpiꞌkxwe txãa yuwe fxiysaju weꞌweniꞌs nasatx ãate kaajiyuꞌjyaꞌ ãjayaꞌ. 14 Txãꞌwẽ yuwe jiyunimeesaju Dxusaꞌs orãyçxaꞌ, ũuste yuꞌ Dxusaꞌs yajkxna txãꞌwẽ yaꞌyuuna, nawa kĩh weꞌweçxawa txãa yuꞌsaꞌ yaꞌjiyumeena. 15 Txãꞌwẽteꞌ, ¿maꞌwẽ wejx ewki? Ũusteçxáa Dxusaꞌs yajkxna txãꞌwẽ yũumée, kĩh weꞌweççxawa txãꞌsnawa jii txãꞌwẽ yuuní wejx ewna. Meeçxawa Dxusaꞌs yajkxna memuuççxaꞌ, txãꞌsnawa yuwe jiyunisaju memwaꞌjna. 16 Idxaꞌ txãꞌwẽ yuwe jiyunimeesajuçxáa Dxusaꞌs weçxana tuutheꞌjeneꞌga açaꞌ nasa jiimeekwesa kxte ũssaꞌ idx yakh jaꞌda Dxusaꞌs weçxana tuutheꞌjyaꞌ ãjameetxna, kĩh weꞌweçtewa jiyumeeçxaꞌ. 17 Dxusaꞌs weçxana orãyniꞌ idx yakh yuꞌ wala yuh ewna, nawa vxite yuꞌsaꞌ selpiimeena. 18 Dxus puꞌçxte adxaꞌ vxite yuwe fxiysaju weꞌweyaꞌ iꞌkweꞌsxte jxthaakwe jiith. 19 Nawa yuwe jiyunimeesaju wala jxuꞌj weꞌwena ũs naꞌwẽꞌ, wejxwa Dxus luuçx ksxavxyte ũsçxaꞌ, yuwe jiyunisaju jxuꞌjmeekweçxáa kaapiyaꞌjna weꞌwewaççxáa ewna sũjuꞌth.

20 Yakhthẽꞌjweꞌsx, luuçx leꞌçxkuẽ naꞌwẽ yuuna fxiꞌzenuwe. Naasáa ewmée yũuwaꞌj yuuçxáꞌs kĩh yuhwa yajkxmée mfxiꞌzewe luuçx leꞌçxkuẽ naꞌwẽ. Nawa jxpaꞌyakx fxiꞌzewaꞌj yuꞌs thẽꞌjsa naꞌwẽ ew yajkxna mfxiꞌzewe. 21 Yuwe fxiysaju weꞌweniꞌ thaakwe selpiwaꞌjmeꞌs Dxus librute naꞌjĩꞌk: Vxite ajũweꞌsxtxi kweꞌweꞌjeꞌnja yuwe jiyunimeesaju naa nasatx ptaꞌsxna. Nawa makwe txãꞌwẽ yũutewa, nwẽeseꞌjmeetxna jĩꞌk. 22 Txãꞌwẽ yuwe jiyunimeesaju weꞌwenisaꞌ Dxusaꞌs weeçxsaweꞌsx Dxus ũsyuhna sũhna kaayakiꞌjwaꞌjsaçxáꞌ, saꞌ Dxusaꞌs jiiyãꞌjsaweꞌsx jĩi meꞌ. Naapkaçxhaꞌ Dxus weꞌweniꞌs ptaꞌsxyaꞌ ãjanisaꞌ, Dxusaꞌs jiisa ũstxna txãaweꞌsx jĩiçxáꞌ. Dxusaꞌs weeçxsaweꞌsx jĩi meꞌ.

Kĩh yũuççxawa teeçx teeçxçxah weꞌwewaꞌjaꞌ

23 Txãa paꞌga Dxus luuçx jxukaysa pkhaakheçxa kxazíi yuwe fxiysa yakh susna ũsteꞌ, maaíi yuꞌ Dxus Espiritu kweꞌweꞌjnitewa jiimeesa kũhçxaꞌ, luuku yuuna ũstaꞌ ¿jĩmeemaꞌk? 24 Nawa jxukaysa Dxus weꞌweniꞌs ãate ptaꞌsxna ũsuneꞌkwe açaꞌ maaíi yuꞌ ekajuweꞌsx kũhçxa ũssaꞌ jiyuna txajx pkalte fxiꞌzena ũsniꞌs, iꞌkweꞌsx txãꞌwẽ Dxus weꞌweniꞌs ãate ptaꞌsxna ũspaꞌga. 25 Txãa paꞌgatey iꞌkweꞌsx ãate weꞌweniꞌ txajx ũus yaakxnitxiꞌ kpaakitxna, açaꞌ kĩiçhuçxa Dxusaꞌs naꞌjĩna weçxaana: Dxusaꞌ isa iꞌkweꞌsx yakh yuh ũsuꞌga jĩna.

26 Txãꞌwẽ yãꞌtheꞌ, naꞌwẽ myũuwe yakhthẽꞌjweꞌsx: iꞌkweꞌsx yakh pkhaakhena ũssa maaíi yuꞌ Dxusaꞌs weçxana memwaꞌj wáa jiꞌphtxna, vxiteꞌ kaapiyaꞌjwaꞌj wáa jiꞌphtxna, meeçxawa Dxus weꞌweniꞌs wáa kaajiyuꞌjwaꞌj jiꞌphtxna. Naapkaçxhaꞌ vxiteꞌ yuwe fxiysaju wáa Dxusaꞌs weçxawaꞌj jiꞌphtxna, meeçxaꞌ txãa yuwe fxiysaju weꞌweniꞌs wáa ãate ptaꞌsxwaꞌjsa ũstxna, açaꞌ txãꞌwẽ yũutewa, ew yuhna Dxus luuçxtxi selpiwaꞌjsate yuꞌ. 27 Yuwe fxiysaju weꞌweççxaꞌ, eꞌz meeçxaꞌ tekh kxazçxáa weꞌwewaꞌjaꞌ teeçx teeçxçxah. Nawa txãa yuwe fxiysaju weꞌwenisaꞌs ãate kaajiyuꞌjwaꞌjsa ũsteçxáa txãꞌwẽ yũuwaꞌjaꞌ. 28 Nawa ãate kaajiyuꞌjwaꞌjsa kimwa meeteꞌ, yuwe fxiysaju kuçx weꞌwenuwe txãa pkhaakhenite. Kxãanpasaꞌ yuwe fxiysaju Dxusaꞌs weçxa wẽjeççxaꞌ, iidx ũusteçxáa weçxana mneeyũu. 29 Meeçxaꞌ Dxus weꞌweniꞌs ptaꞌsxwaꞌj wáa yuuna nawa eꞌz tekh kxazçxáa mweꞌwewe, naapkaçxhaꞌ wẽseꞌjna uꞌpsaꞌ jxpaꞌyakx wẽseꞌjetxna Dxus weꞌwenitewa jiyuyaꞌ. 30 Meeçxawa wẽseꞌjna uꞌpsaꞌs Dxus weꞌwewáana ptaꞌsxkahn, açaꞌ yaçte weꞌwesa jxãꞌjpkaçx ũythasçxa weꞌwewaꞌjaꞌ. 31 Txãꞌwẽ Dxus weꞌweniꞌs jxpaꞌgasaꞌ jxukay ptaꞌsxyaꞌ ãjaneꞌkwe, nawa vxite weꞌwena jxãꞌjpkaçx ũythasçxa teeçx teeçxçxah. Txãꞌwẽ yũuteꞌ, jxukaysa piyaçxa Dxus dxiꞌpte wejx çxhãçxha fxiꞌzeneꞌkwe. 32 Txãa paꞌgatey Dxus weꞌweniꞌs jxpaꞌgasaweꞌsxaꞌ txãaweꞌsx ũus yaakxniꞌs jxpaꞌyakxwaꞌjaꞌ, maꞌwẽwa ũusutheniꞌs weꞌwemée. 33 Txãꞌwẽmeꞌ, Dxusaꞌ txãꞌwẽ kaypubaꞌjna susna ũswaꞌjsameꞌ. Maꞌwẽta Dxusaꞌs yaakxsa msuuweꞌsxwa susmée fxiꞌzeꞌ, txãꞌwẽy fxiꞌzewaꞌjaꞌ.

34 Uꞌyweꞌsxaꞌ pkhaakhena ũsni kultoteꞌ paapẽjxna susna ũswaꞌj jiꞌphmeetaꞌ. Txãꞌwẽ yũumée, jxpaꞌyakx wẽseꞌjwaꞌj jiꞌphtaꞌ kulto kiꞌpuçteꞌ, Dxus ley maꞌwẽ jxkaatheꞌ kxtey yuuna. 35 Kĩh paapẽywaꞌj jiꞌphçxaꞌ, yat-su paꞌjçxa txãaweꞌsx nmiꞌtx pẽyitxna. Weh yuhwa ewmeꞌ uꞌyweꞌsx txãꞌwẽ kultote susna ũsteꞌ.

36 Iꞌkweꞌsxaꞌ iiwejçx yajkxna maꞌwẽwa yuuwaꞌj jiꞌphmeeiꞌkwe. Txãꞌwẽ yuukahmeníi Dxus yuweꞌ iꞌkweꞌsx tasxu nyafxçxah kasehmeꞌ, açaꞌ iꞌkweꞌsxçxáa Dxus yuweꞌs jiisa ũsmeeiꞌkwe. 37 Naꞌwẽ weꞌwena fxiꞌjaçthu txãꞌ Dxus jxkaahnitaꞌ, açaꞌ Dxus weꞌweniꞌs jiyusa ũswáꞌkwe meeçxaꞌ Dxus Espiritu kaaũusutheꞌjniꞌs jxpaꞌgasa ũsçxaꞌ, peekx mjiyuwe. 38 Nawa txãꞌwẽ jxkaahna fxiꞌjnitxiꞌ kxtey nwẽeseꞌjmeena açaꞌ txãa nwẽeseꞌjsameꞌs jxpaꞌgameete ewna.

39 Yakhthẽꞌjweꞌsx, naꞌwẽ myũuwe: Dxus weꞌweniꞌs ãate ptaꞌsxwaꞌjçxáꞌs wejx miiyajkxwe. Nawa yuwe fxiysaju weꞌweniꞌs yup yuꞌ meeçxawa, 40 kultote kĩhwa susmée zhiçxkwe teeçx teeçxçxah weꞌwena meswe.