Gálatas

Ley jxkaahnimée fxiꞌzeni

5 Kristoꞌ ley jxkaahnijũ txuhdek, kweꞌsxaꞌ ley jxkaahni fxiꞌzekahmen. Açaꞌ iꞌkweꞌsxaꞌ ewte paꞌjyãꞌjçxaꞌ, peena yuꞌ utxaanuwe ley jxkaahniꞌs nwẽeseꞌjyaꞌ.

2 Ew mjiyuwe: Adxaꞌ naꞌjĩꞌth naꞌ, iꞌkweꞌsxaꞌ cirkuncisionaꞌs jxpaꞌgawáꞌkwe açaꞌ ley jxkaahnijũ Kristo nweꞌwek txãꞌ kxul yuuna. 3 Kiꞌ kaayakiꞌjiçthu: Maa piçthẽꞌjwa yaꞌcirkuncidãy yãꞌjçxaꞌ, txãꞌsçxáana jxpaꞌgamée, Moises leyaꞌs jxuka nwẽeseꞌjwaꞌj jiꞌphtaꞌ. 4 Leyaꞌs jxuka kxtey nwẽeseꞌjçxa yuuçxáa yuuwemée ewte neeyũꞌnja sũhna yaakxsaꞌ, Kristo tasxu txutesáa yuuneꞌkwe, saꞌ Dxus peeygãanijũwa txutesáa yuuneꞌkwe. 5 Nawa kweꞌsxaꞌ Kristoꞌs ũusuh yuuçxáa jxuka yaakxwaꞌjaꞌs Dxus Espiritu puꞌçxteꞌ, txãꞌwẽ yũuçxaçxáa yuuwemée ewsathaꞌw yuu. 6 Txãa paꞌgatey Kristo Jesus yakh fxiꞌzesa yakhaꞌ cirkuncidãyni maꞌk yuu cirkuncidãynimée maꞌk yuu nawa txãꞌwẽsaꞌ peejxmeꞌ, naasáa Kristoꞌs ũuste jxpaꞌganiçxáa txãꞌwẽꞌ, txãa paꞌgatey Kristoꞌs ũuste jxpaꞌganijũꞌ peeygãawaꞌjaꞌs yaꞌjiꞌphuꞌk naa paꞌga.

7 Iꞌkweꞌsxaꞌ ew yãꞌjiꞌkwe fxiꞌzena ũs yuꞌ, açaꞌ ¿kimga nwẽeseꞌkhamen kaypubaꞌjna paꞌj? 8 Iꞌkweꞌsxtxi kaypubaꞌjna paꞌjsaꞌ Dxus kaahnisa yuꞌçmeetaꞌ. 9 Txãa paꞌga mpaꞌyajkxwe. Txãꞌwẽmeꞌ, lewaduraꞌ leꞌçxkuẽeçxawa jxukak pẽethejeꞌ skuutxh ũꞌwe makwetewa. 10 Txãꞌwẽtewa iꞌkweꞌsxaꞌ txakwe yuꞌ jxpubakahmen Kristoꞌ pejka puꞌçxhina sũjuꞌth. Nawa Dxusaꞌ seenaꞌ yuh kastigaĩna kaypubaꞌjsaꞌs kimtewa.

11 Yakhthẽꞌjweꞌsx, miiyajkxwe: Adxaꞌ txãꞌwẽ cirkuncidãywaꞌjaꞌs kaapiyaꞌjwaçaꞌ, judiuweꞌsxaꞌ adxaꞌs ahçemeetxna. Txãꞌwẽ yuuwaç yuꞌ, Kristoꞌ nweꞌweyaꞌ kluuskhẽ uuk jĩna ptaꞌsxnisaꞌ kaaũusçxaꞌjmeena judiuweꞌsxtxiꞌ. 12 Nawa txãꞌwẽ iꞌkweꞌsxtxi kaacirkuncidaĩꞌj wẽena kuçx yuuna fxiꞌzesaꞌ peekx kakweteweꞌsxaꞌs tee jwed jxuka yaꞌspẽꞌthwaçaꞌ, jiyutxna sũjuꞌth adxaꞌ.

13 Iꞌkweꞌsxtxiꞌ cirkuncidãykahmeníi ley jxkaahnijũ nweꞌwenisa yãꞌjiꞌkwe yuu. Nawa txãꞌjĩteꞌ, ãçxhaꞌ leyaꞌ weꞌwewaꞌj jiꞌphmeena sũhçxa peekx maꞌwẽwa ewmée yũuna fxiꞌzewaꞌjmeꞌ, wejxwa vxitetx peeygãhna puutx yaꞌselpiina fxiꞌzewaꞌjaꞌ. 14 Txãa paꞌgatey leyaꞌ txãꞌwẽ yũuwaꞌjaꞌsíiçxáak wejx thaakwe neeweꞌweꞌ naꞌjĩna: Peekíi maꞌwẽga yaꞌpeeygãjaꞌ, txãꞌwẽy mpeeygãh maatxwa jĩꞌk. 15 Nawa txãꞌwẽ yũumée puutx puiina yahçena fxiꞌzesaꞌ jxuka jaꞌdaçxah puutx pçuuneꞌkwe jxpaꞌyakxmeeçxaꞌ.

Kweꞌsx ũus yaakxni vxiteꞌ Dxus Espiritu kaaũusutheꞌjni

16 Txãꞌwẽ yũuweꞌsxte naꞌwẽ yũuwaꞌjaꞌsthu ptaꞌsxiꞌ: Dxus Espiritu ew kaaũusutheꞌjniçxáꞌs kxtey yuuna mfxiꞌzewe, peekx ũusuhçxáa yaakxniꞌs kxtey yuuyaꞌmée. 17 Txãꞌwẽmeꞌ, kweꞌsx ũusuhçxáa yaakxnisaꞌ pejka yuh ewmeesaꞌsku yaakiꞌ. Txãa paꞌga Dxus Espirituꞌ kweꞌsx ũus yaakxniꞌs jxpaꞌgaꞌçmeꞌ, naapkaçxhaꞌ kweꞌsx ũus yaakxniꞌ Dxus Espirituꞌs yupuꞌk. Txãa paꞌga neꞌkwe pejka yuh ewmeesaçxáꞌs kxtey yuꞌ. 18 Nawa Dxus Espiritu iꞌkweꞌsx ũuste jxkaahna ũsteꞌ, jxpubana ley jxkaahnite fxiꞌzewaꞌjsameeiꞌkwe.

19 Dxus Espiritu kaaũusutheꞌjnimée peekx ũusuhçxáa yaakxnisaꞌ naataꞌ: ptamumée pkal yuuni, ptamsaçxawa vxitesa yakh pkal yuuni, maꞌwẽwa kazx pkal yuuni, 20 dxus ĩtximeesatx neeweꞌweni, dxijxuuni, ahçena fxiꞌzeni, puiini, ipxãani, ũusçxani, puiiwaꞌjaꞌs maꞌwẽwa yũuna pakwení, pkhaakhesa yakhthẽꞌjweꞌsx puutx puiiçxa txutení, 21 vxitesa jiꞌphunitx açeni, nasa ikhni, tũuna fxiꞌzeni, tũusáa pweꞌsx maꞌwẽwa kazx yuuni, pkal maꞌwẽsawa ũstaꞌ txãatx kxtey yuuni. Txãꞌwẽ yũusatxiꞌ adxaꞌ ãate ptaꞌsxiçthu: Txãaweꞌsxaꞌ Dxus jxkaahna ũsnite uꞌkawaꞌjsameetaꞌ. Txãꞌsaꞌ nyafxíiwa ptaꞌsx yãꞌth.

22 Ãçxhaꞌ Dxus Espiritu kaaũusutheꞌjniꞌ naataꞌ: peeygãani, weçx weçxa fxiꞌzeni, ũuste ewçxáa yaakxni, ũusçxa yajkxmée fxiꞌzeni, maatxwa peeygãhna fxiꞌzeni, vxitesatx puꞌçxna fxiꞌzeni, waꞌlmée nwẽeseꞌjna fxiꞌzeni, 23 iiwejçx yajkxmée fxiꞌzeni, ũuste ewmée ũusutheniꞌs nwẽeseꞌjmée fxiꞌzeni. Txãꞌwẽ ew yãꞌj fxiꞌzesaꞌs leyaꞌ thegwaꞌj jiꞌphmeꞌ. 24 Kristo nasa yãꞌjaꞌ, peekx ũus yaakxni ewmeesaꞌs kxtey yuuna fxiꞌzewaꞌj jiꞌphmeetaꞌ.

25 Dxus Espiritu txãꞌwẽ ew fxiꞌzewaꞌjaꞌs ũsteꞌ, txãa yakh yuuçxáa fxiꞌzewaꞌj jiꞌpthaꞌw nwẽeseꞌjna. 26 Iiwejçx yajkxna puutx puiina ahçena fxiꞌzewaꞌj jiꞌphmeethaꞌw.