1 Tesalonicenses

5 Nawa bagaçx kĩi ente kĩiwaꞌthewa txãa yuꞌsaꞌ ptaꞌsxna fxiꞌjwaꞌj peejxmeꞌ yakhthẽꞌjweꞌsxtxi. 2 Iꞌkweꞌsxaꞌ ew jii iꞌkwe Kristoꞌ kĩh entewa kĩhçxáa yũuna yajkxmée ũsiyna, pesweewa maꞌwẽga kus pxãh yaakxnimeete paꞌjaꞌ txãꞌwẽy. 3 Nasa weꞌweçxaꞌ: Kĩhwa yuumeena, jxuka ewçxáa ũsthaꞌw jĩna ũsiyna, txãa dudte Dxus kastigãywaꞌj enaꞌ paꞌjana, uꞌy nasate ãçaꞌaçte maꞌwẽ akasa paꞌjakx txãꞌwẽy, açaꞌ íyuyaꞌ ãjameetxna. 4 Nawa Kristo kĩiwaꞌjaꞌs jiimée çxhiꞌdxte yuꞌ ũsmeeiꞌkwe, txãa paꞌga iꞌkweꞌsx jxpaꞌyakxmée ũsiyna Kristoꞌ kpajkxmeena peswée naꞌwẽ. 5 Txãa paꞌgatey iꞌkweꞌsx jxukaysa jiisa eenaꞌteweꞌsxiꞌkwe, kweꞌsxaꞌ jiimeesa çxhiꞌdxte fxiꞌzesa naꞌwẽsameethaꞌw. 6 Txãa paꞌga vxite nasa deesa naꞌwẽ fxiꞌzewaꞌjsameethaꞌw, wejxwa maꞌwẽ fxiꞌzewaꞌjaꞌswa jxpaꞌyakx ũsuga. 7 Kusçxáa deenisaꞌ açaꞌ tũusaꞌ kusteweꞌsxçxak tũꞌ. 8 Nawa kweꞌsxaꞌ eenaꞌteweꞌsxthaꞌw naꞌ jxpaꞌyakx fxiꞌzega, txãa paꞌgatey Dxusaꞌs ũuste peçxkanamée yaakxwaꞌjaꞌs jxpaꞌgaçxa peeygãawaꞌjaꞌswa jiꞌpthaꞌw, saꞌ ewte neeyũuwaꞌjaꞌs ũuste ew jiithaꞌw naa paꞌga. 9 Dxusaꞌ kweꞌsxtxiꞌ kastigãyyaꞌ sũhçxa nvxihtmeꞌ, wejxwa Jesukristo nweꞌwete ewte neeyũuwaꞌjaꞌs jiꞌphukahnku txãꞌwẽ nvxiht. 10 Txãa paꞌgak Jesukristoꞌ kweꞌsx paꞌgate paa yaꞌdukhçxa uu, açaꞌ ãçxhaꞌ ĩtxi mthaꞌw yuu meeçxaꞌ uuníi mthaꞌw yuu nawa bagaçxte yuhwa txãa yakh txutemeꞌnjaꞌw. 11 Txãa paꞌga nxusmée mfxiꞌzewe. Puutx teeçxsa naꞌwẽçxah kçxhãaçxhaꞌjna naꞌwẽ yũuna ũsiꞌkwe txãꞌwẽçxáa meswe.

Dxus yakh fxiꞌzesatx Pablo yuꞌkxpehni

12 Yakhthẽꞌjweꞌsxtxi neeweꞌweçthaꞌw iꞌkweꞌsxtxi yuꞌkxpehna: Dxus yakh fxiꞌzewaꞌjaꞌs puꞌçxsatxiꞌ ew miipeꞌjwe. 13 Txãꞌwẽ puꞌçxna ũspaꞌga txãaweꞌsxtxiꞌ wala weçxana mpeeygãhwe. Txãꞌwẽy vxitesa yakhwa puutx ewçxáa mfxiꞌzewe.

14 Naꞌwẽ yũuwaꞌjaꞌswa neeweꞌweçthaꞌw yakhthẽꞌjweꞌsxtxi: Mjĩiyaꞌ waꞌlsatx myuꞌkxpehwe. Dxusna açxamée çxhãçxha yaakxsatxiꞌ mekçxhãaçxhaꞌjwe. Dxusna ew jiimeesatxwa mpuꞌçxwe. Jxukaysatx peeygãawaꞌjaꞌs mjiꞌphuwe.

15 Mpaꞌyajkxwe puutx ewmeeçxáa yũuna fxiꞌzemée, wejxwa iꞌkweꞌsxaꞌ puutx teeçxsa naꞌwẽçxah ew myũuwe naa kiwete jxukaysa yakh.

16 Bagaçxtewa weçxana wẽtçxáa mfxiꞌzewe. 17 Een isa Dxus yakh puutx weꞌwena mfxiꞌzewe. 18 Kĩh nxus en paꞌthewa, Dxusaꞌsçxáa weçxana meswe, txãa paꞌgatey Dxusaꞌ txãꞌwẽk fxiꞌze jxthãasuꞌ iꞌkweꞌsx Kristo Jesusaꞌs jxpaꞌgasatx.

19 Dxus Espirituꞌs ivxiitunuwe. 20 Dxus kaaũusutheꞌjniꞌs ptaꞌsxniꞌs weeçxnuwe. 21 Wala jxpaꞌyakx pakwena atxahçxa ewsaçxáꞌs mpaꞌgawe. 22 Kĩhwa ewmeesajũ yuꞌ jxuka mtxuteewe.

23 Dxus ewte kaafxiꞌzeꞌjsa kĩh pkal yuhwa jiꞌphmée vxitna paꞌjana iꞌkweꞌsx kakwe maꞌk yuu, iꞌkweꞌsx ũus maꞌk yuu, iꞌkweꞌsx yaakxni maꞌk yuu nawa jxuka, kxah Jesukristo kĩi ente yuuwemeesa yuuneꞌkwe. 24 Iꞌkweꞌsxtxi paꞌyasaꞌ ĩsxiiwaꞌjsameꞌ naꞌ txãꞌ kxtey yuuna.

Pablo yuwe weçxaa kaahni

25 Iꞌkweꞌsxaꞌ Dxus yakh meen puutx weꞌwewe kweꞌsx paꞌgate.

26 Yakhthẽꞌjweꞌsx jxukaysatx meen weçxawe Dxusçxáana yajkxna.

27 Jesukristo jxkaatheꞌ, txãꞌwẽ iꞌkweꞌsxtxi neeweꞌweçthu naa kartaꞌs lẽeykahn jxukaysa yakhthẽꞌjweꞌsx ksxavxyte.

28 Kweꞌsxtxi jxpeꞌjsa Jesukristoꞌ iꞌkweꞌsxtxi puꞌçxhina.