2 Juan

Dxus weꞌweni isasaꞌs jiisaꞌ peeygãawaꞌjaꞌs jiꞌphuꞌtx

1 Naa kartaꞌs fxiꞌjsaꞌ naꞌwẽ thẽꞌj jĩna kxsusuꞌtx txãath fxiꞌjaꞌ, peꞌsx Dxus txhitxhnisa vxiteꞌ iꞌkwe luuçxtxi. Adxaꞌ txãaweꞌsxtxiꞌ isa peeygãayujuꞌth. Açaꞌ adxçxáa txãꞌwẽ yuꞌçmeeth. Dxus weꞌweni isasaꞌs jiyusa yuꞌ jxukaysatx txãꞌwẽ peeygãjaꞌ. 2 Dxus weꞌweni isasaꞌ kweꞌsx yakh nesku yuꞌ, saꞌ bagaçxtewa kweꞌsx ũuste nes yuuna. Txãꞌwẽ Dxus weꞌweni isasaꞌs ũuste jiꞌphçxath iꞌkweꞌsxtxi peeygãjaꞌ. 3 Kweꞌsx Tata vxiteꞌ txajx nçxiꞌk Jesukristo txãa eꞌzsa wala peeygãhçxa iꞌkweꞌsxtxi puꞌçxhitxna ewçxáa fxiꞌzekahn.

4 Txãꞌwẽ luuçx maaíi yuꞌ Dxus kweꞌsx Tata jxkaahniꞌs kxtey nwẽeseꞌjna fxiꞌzena ũste uyçxaꞌ wala weçxaꞌth. 5 Saꞌ ãçxhaꞌ, peꞌsx, mpaꞌyajkxwe, puutx yaꞌpeeygãhna fxiꞌzewaꞌjaꞌs neeweꞌweçthu. Naꞌwẽ fxiꞌjniꞌ uꞌse jxkaahnisameꞌ. Nyafxíi jiyuthaꞌw txãaíiçxáꞌ. 6 Dxus jxkaahnitxiꞌ kxtey nwẽeseꞌjna fxiꞌzeteꞌ, puutx yaꞌpeeygãhna fxiꞌzewaꞌj kasejena. Iꞌkweꞌsxaꞌ nyafxíi iiwẽseꞌjyãꞌjiꞌkwe Dxus jxkaahnitxiꞌ txãꞌ puutx yaꞌpeeygãhna fxiꞌzewaꞌjaꞌ.

Ĩsxiina uꞌjusa

7 Naa kiwete ĩsxiisa wala kuh kasehçxa uꞌjutaꞌ. Txãaweꞌsxaꞌ Dxus Nçxiꞌk Jesukristoꞌ kweꞌsx naꞌwẽy nasaa yuuçxak vxyaa jĩꞌçmeetaꞌ. Txãꞌwẽ weꞌwesaꞌ ĩsxiisa yuuna, saꞌ Kristoꞌs açesaçxa txãꞌwẽ yuuna. 8 Txãa paꞌga iꞌkweꞌsxaꞌ mpaꞌyajkxwe, Dxus yakh fxiꞌzepaꞌga cielute dukhwaꞌjaꞌs ivxiitumée, wejxwa makwetewa jxuka jxpaꞌgawaꞌjaꞌsçxáa myajkxwe.

9 Kristo maꞌwẽ kaapiyaꞌtheꞌ maawa txãꞌwẽy kaapiyaꞌjsameꞌ Dxus yakh fxiꞌzesameeçxa txãꞌwẽ yuuna. Nawa Kristo kaapiyaꞌjniçxáꞌs nwẽeseꞌjna fxiꞌzesaꞌ, Dxus yakh fxiꞌzesaçxa txãꞌwẽ yuuna, saꞌ Dxus Nçxiꞌk yakhwa txãꞌwẽy fxiꞌzesa yuuna. 10 Txãꞌwẽ maawa iꞌkweꞌsx yat-su paꞌjçxawa Kristo kaapiyaꞌjniꞌsçxáa ptaꞌsxsameꞌs weçxana jxpaꞌganuwe. 11 Txãꞌwẽ weçx uꞌjweꞌga jĩna txãaweꞌsxtxi jxpaꞌgasaꞌ ewmée yũuyaꞌ puꞌçxsa yuuna.

Pablo yuu puutx uyyaꞌ uꞌjyaꞌ yaakxni

12 Iꞌkweꞌsxtxi wala weꞌwewaꞌj jiꞌpthu, nawa eçte txãꞌwẽ weꞌwena fxiꞌjyaꞌwameeth. Adx yuu peekx yujxaꞌwath iꞌkweꞌsx yakh teeçxsa naꞌwẽçxah puutx uyyaꞌ, saꞌ puutx uyçxaꞌ jxukaysa weçxweçxa yaakiꞌnjaꞌw.

13 Iꞌkwe yakhthẽꞌjwa Dxus txhitxhnisaꞌ açaꞌ txajx luuçxaꞌ yuwe weçxaa kajaꞌtx. Txãꞌwẽçxáa fxiꞌjaçthu.