Judas
Dxus paꞌyanisaweꞌsxtxi Judas fxiꞌjni
1 Jesukristoꞌs selpisáa Jakobo nyakh Judas naa kartaꞌs fxiꞌjaçthu Dxus paꞌyanisaweꞌsxtxi. Iꞌkweꞌsxaꞌ Jesukristo jxpeꞌjni wala ew ũsiꞌkwe. 2 Txãasa Dxus peeygãani wẽt yuuçxáa mfxiꞌzewe.
Ĩsxiina fxiy kaapiyaꞌjsa ũstaꞌ
3 Kweꞌsxtxi naꞌwẽ Dxus nweꞌwek txãꞌsçxáana wejx ãate kaapiyaꞌjna fxiꞌjyaꞌwath yuꞌ iꞌkweꞌsxtxi. Nawa txãꞌwẽ yũumée fxiy yuꞌkxpehwaꞌkh kaseh txãꞌsna wejx dud fxiꞌjaçthu iꞌkweꞌsxtxi neeweꞌwena, naꞌwẽ Jesukristoꞌs ũuste jxpaꞌgaçxa nwẽeseꞌjwaꞌjaꞌs kaapiyaꞌjni yuuk txãꞌsaꞌ jxpaꞌgayãꞌjçxaꞌ, weh yuhwa yuꞌpthejkahmen. 4 Txãꞌwẽmeꞌ maa nasaíi yuꞌ ĩsxiina fxiy kaapiyaꞌjsa ũsyãꞌthaꞌ, nawa txãꞌwẽ yũusaꞌ Dxus kastigo seenaꞌte khẽeyaꞌ uꞌjwaꞌjsataꞌ jĩna txãniitey ptaꞌsxni yãꞌkh yuꞌ Dxus librute. Txãa nasaꞌ wala kazx ewmeesataꞌ, txãꞌwẽçxaíitx kweꞌsxtxi takiꞌsa Dxusnawa weeçxna naa kiwete ewmeesa yuuçxáana kxtey yuuna fxiꞌzeꞌ. Saꞌ kweꞌsxtxi jxpeꞌjsa Jesukristonawa txãꞌwẽytxi weeçxiꞌ.
5 Iꞌkweꞌsxaꞌ jiiyãꞌjneꞌkwe nawa kiꞌ kaayakiꞌjyaꞌwath naꞌwẽ yũuniꞌs: Dxusaꞌ Israelweꞌsxtxi Egipto kiweju kutxiꞌjçxawa, maaíi yuutxiꞌs ivxiituk nwẽeseꞌphaꞌgamée. 6 Txãꞌwẽy angelesweꞌsxwa jxpaꞌyakxpaꞌgamée txãaweꞌsx yujuniꞌs nvxihttxi, açaꞌ Dxusaꞌ txãaweꞌsxtxiꞌ preesuꞌjçxa jiꞌphaꞌ çxhiꞌdx walate kastigãywaꞌj en ãhteweꞌsx. 7 Txãꞌwẽy Sodoma Gomoçxa vxiteꞌ txãa jaꞌdasuweꞌsx çxhabwa iiméh kazxsateçxáatx fxiꞌzena ũsuꞌ peekx kakweꞌs suwsaçxáana nwẽeseꞌjna. Txãꞌwẽ kazx yũupaꞌga bagaçxte yuhwa pçuwaꞌjmée ipx wala seenaꞌte kastigãynitx yuu txãa angelesweꞌsx naꞌwẽy. Txãꞌwẽ kastigãynisaꞌ kaajiyuꞌjsataꞌ maawa txãꞌwẽy yũukahmen.
8 Txãꞌwẽtewa txãa nasa ĩsxiisaweꞌsxaꞌ ewmée yajkxna txãaweꞌsx kakweꞌs pkaltetx kaafxiꞌzeꞌjeꞌ, saꞌ jxkaahsaweꞌsxtxiwa weeçxna wẽesxuna Dxusnawa weeçxiꞌtx. 9 Angel npiiçthẽꞌj Migwel yuhwa txãꞌwẽ yuꞌ wẽesxumeeaꞌ Moises kakweꞌs eçxthẽꞌj jxũna uꞌj wẽjeçte, txãa yakh puutx weꞌwena ũsçxawa. Naasáa idxaꞌs Dxus jiina jĩnaçxáak weꞌwe. 10 Nawa txãa piçthẽꞌj ĩsxiisaweꞌsxaꞌ jiimeeweete ewmeetx açeweꞌweꞌ. Txãaweꞌsxaꞌ tajkx naꞌwẽçxáawa yajkxyaꞌ ãjani yuꞌsaꞌ txãaweꞌsx ivxiituwaꞌthe íiçxáatx kaaselpiꞌjiꞌ.
11 Kainwa maꞌwẽga yuu txãꞌwẽyçxáa yũusaataꞌ naa paꞌga txãaweꞌsxaꞌ wala yuh nxuste paꞌjwaꞌjsataꞌ. Vxyu wala jiꞌphu wẽeçxa Balaan naꞌwẽytxi jxpuba. Saꞌ Koréwa maꞌwẽga ewmée açeweꞌwepaꞌga uu txãꞌwẽy vxitutxna. 12 Iꞌkweꞌsx weçxana pkhaakhenisu kaythameꞌjyaꞌ paꞌjsaçxáataꞌ. Txãaweꞌsxaꞌ kxsũ paꞌjçxa thaamewaꞌjaꞌs jiꞌphmeetx ũꞌna tudxna fxiꞌzeꞌ, iꞌkweꞌsx ksxavxyte thaamewaꞌjmée. Txãaweꞌsx ew fxiꞌzewaꞌjçxáꞌstxi yaakiꞌ vxite yuutxiꞌs peeygãhmée. Tãaphaꞌs wejxa mteewa jxũna uꞌjnisa naꞌwẽsaçxáataꞌ seelpimeesa. Fxtũu tasx yũnsamée naꞌwẽsataꞌ. Txãa fxtũu tasxaꞌswa maꞌwẽ peena yuꞌ yeꞌçxkahmén petx weçe jxuka khubeni yuukx txãꞌwẽsaçxáataꞌ. 13 Mar weeswée seenaꞌ buꞌçxisa naꞌwẽtx yuꞌ txãaweꞌsx ewmée thaampaꞌ yũuni yakh. Estrelxa txajx uꞌjwaꞌj dxiꞌjaꞌs jxpubasáa naꞌwẽsataꞌ. Bagaçxteçxáa yuhwa kasehwaꞌjmée ewmée seenaꞌ nxusnxus çxhiꞌdxte nvxiitni yuuwaꞌjsataꞌ.
14 1:14-15 Adan nçun sieteteweꞌsx Enokhaꞌ naꞌjĩk Dxus kaaũusutheꞌjniꞌs: Txãꞌwẽ ewmée yũuniꞌs jxukaysatx paapẽjxçxa nasa seenaꞌ ewmeesatxiꞌs jxukaysatx kastigãyyaꞌ Dxusaꞌ txajx nasa iiméh wala kuhsa yakh yuhte uythu, txãaweꞌsx makwethẽꞌjneꞌta ewmée yũuna fxiꞌzeçxa txãꞌwẽy Dxusnawa açeweꞌwe txãa paꞌga kastigãyyaꞌ jĩꞌk Enokhaꞌ. 15 — 16 Nasa txãꞌwẽsaꞌ eꞌsga nuyweꞌwena fxiꞌzesaçxáataꞌ, saꞌ peekx kakwete wẽt fxiꞌzewaꞌjaꞌsçxáatx pakweꞌ, txãꞌwẽ eꞌsga yuꞌ açeweꞌweççxawa ãate yuꞌ ewçxáatx weꞌweꞌ, txãaweꞌsxtxi waꞌlmée puꞌçxkahn.
Dxus yakh fxiꞌzesatx neeweꞌweni jxpaꞌyakxkahn
17 Nawa yakhthẽꞌjweꞌsx miiyajkxwe: Jesukristo jxkaahnisaweꞌsxaꞌ nyafxíi ptaꞌsxtxi naꞌjĩna: 18 Nmeh en yuuçteꞌ nasaꞌ paꞌjatxna Dxus jxkaahni yuꞌsaꞌ weeçxna txãaweꞌsx ũus yaakxni ewmeesaçxáꞌs nwẽeseꞌjsaweꞌsx jĩnatx weꞌwe. 19 Txãaweꞌsx txãꞌwẽ nasatx kaapuiꞌjsa yuutxna, txãaweꞌsx ũus yaakxni ewmeesaꞌs nwẽeseꞌjsa, Dxus Espiritu yuꞌs ũuste jiꞌphmeesa.
20 Nawa yakhthẽꞌjweꞌsx, iꞌkweꞌsxaꞌ Jesukristoꞌs ũuste jxpaꞌgaçxa nwẽeseꞌjwaꞌjaꞌs kaapiyaꞌjni yuuk txãꞌsaꞌ jii yãꞌjçxaꞌ, txãajũ yuꞌ peena kasehnuwe. Dxus Espirituꞌs jxpiꞌkxçxa, Dxus yakh mpuutxweꞌwewe. 21 Dxus peeygãanijũ txutemée ũythasna meswe, kweꞌsx ãhmeekwetewa Jesukristo peeygãhçxa bagaçxte yuhwa pçumée ĩtxi fxiꞌzewaꞌjaꞌs ũswaꞌj en ãhpkaçx.
22 Vxitewa jxpubaweꞌsxte ew mkaajiyuꞌjwe. 23 Vxitetx peeygãhçxa menweꞌwewe ipx walate khẽeyaꞌ yãꞌj ũssatx. Nawa ewmeesaꞌs jxpaꞌyakx. Txãꞌwẽmeꞌ ropa yuhwa jxuka ewmeesaçxáa pẽethenitaꞌ.
Dxusaꞌs weçxana fxiꞌjni
24 1:24-25 Dxus kweꞌsxtxi nweꞌwesa txãa yuuçxáa kĩhte yuhwa sxiigmée jxpeꞌjsa iꞌkweꞌsx ewmeete wetekahmen ewte jxpeꞌjyaꞌ ãjawaꞌjsaꞌ. Txãꞌwẽ yũuçxa iꞌkweꞌsxtxi kĩh pkal yuhwa jiꞌphmée txajx weçxana ũsnite nuypaꞌjana. Txãa yuuçxáa jxtuhthesaꞌ, maatewa jxthaakwe walasa, kĩhtewa jxuka ãjasaꞌ. Txãa yuuçxáa jxkaahsaꞌ. Saꞌ Dxus ũsnite iꞌkweꞌsx paꞌjyaꞌ ãjakahn kweꞌsxtxi jxpeꞌjsa Jesukristoꞌ puꞌçxhina. Nyafxiiteywa txãꞌwẽk puꞌçx naꞌ ãçxwa txãꞌwẽy íiçxáa puꞌçxhina, saꞌ bagaçxtewa puꞌçxna nes yuuna. 25 —