Apocalipsis

Dxus angelesweꞌsx siete kastigotx jiꞌphsa

15 Vxite seenaꞌ ũukhũukhsa cielute uythu: siete angelesweꞌsxaꞌ siete kastigoꞌs ptaꞌsxsatx yuꞌ. Txãa siete kastigosaꞌ nmehsatx yuꞌ Dxus kastigo.

2 Mar ipx kaꞌdni naꞌwẽsa zhiçxkwe speeju naꞌwẽ khikhyna ũste uythu. Açaꞌ eçx seenaꞌsa vxiteꞌ txãa eçx naꞌwẽy piisani yuuk vxiteꞌ txajx yase numero txãꞌwẽsatx nwẽeseꞌjsameeweꞌsx yuꞌ txãa mar pukate yujuçxatx ũsuꞌ, tukani arpatx Dxus ũsku txãatx atçxa. 3 Saꞌ Dxusna selpisáa Moises memaꞌs memuꞌtx, vxiteꞌ Piisxakuẽ jĩnisaꞌswa weçxana memuꞌtx naꞌjĩna:

Dxus, kĩhtewa jxuka ãjãsa,

Seenaꞌ yuh wala puꞌçxgu kĩhtewa jxuka.

Naa kiwete jxuka jxkaahsa iidx mjĩiniꞌ jxuka ewçxaçxáataꞌ.

4 Kweꞌsxtxi jxkaahsag açaꞌ ¿idxaꞌs kim ũukhmée yuukx?

Saꞌ ¿kim idxaꞌs tuutheꞌjmée yuukx?

Idx yuuçxáa pkal jiꞌphmée atesag, açaꞌ maa kiwejuweꞌsxwa jxuka idxçxaçxáꞌs neeweꞌwetxna,

Txãa paꞌgatey idx ew yũunisaꞌ ãatek yuu jĩnatx memuꞌ.

5 Txãꞌwẽ yũunijũꞌ kiꞌ vxite uythu, cielute Dxus ũsnite Dxus leytxi jxaawni vxitx phateeçte. 6 Açaꞌ txãa Dxus ũsnijũ yuꞌ siete angelesweꞌsxtxi kaseh, siete kastigo seenaꞌsatx jxũçxa. Txãaweꞌsxaꞌ athni ropa ate kwentetesatx jiꞌphuꞌ. Saꞌ jxtudnisa yuꞌ vxyuu behçxaçxáa peçxun kãhsatx jiꞌphuꞌ. 7 Txajũꞌ Dxus vxitni ĩtxĩsa pahzsateweꞌsx teeçxsaꞌ vxyuu bee kopa ũsku teeçxsa naꞌwẽçxah txãa siete angelesweꞌsxtxi. Kxtee yuꞌ kastigo seenaꞌsaçxaçxáa utatx jiꞌph yuꞌ Dxus bagaçxtewa nes yuuwaꞌjsa kaahni. 8 Açaꞌ txãa Dxus ũsnite yuꞌ jxuka ahçxaçxáa utak, Dxus kĩhtewa jxuka ãjãwaꞌjsa tasxu yuusak yuꞌ. Açaꞌ kxtee yuꞌ kim yuhwa uꞌkayaꞌ ãjãꞌçmeetaꞌ, siete kastigo siete angelesweꞌsx jiꞌphuꞌtx txãa pçumeyna yuꞌ.