2 Korintios

Yuꞌkxpehna yuwe weçxaa kaahni

13 Naa yakhaꞌ tekh us iꞌkweꞌsx tasxna paꞌjyaꞌ yuuwaꞌjaꞌs yaakiçthu. Kxtee paꞌjçxaꞌ, kĩh yuweꞌs pheuꞌjuꞌççxawa, jiisa eꞌz meeçxawa tekh txahçxa yuuwesaꞌs kastigãywaꞌj yuuna. 2 Iꞌkweꞌsx yakh kxtee nyafxíi ũsçxaꞌ, jxpaꞌyakx fxiꞌzekahn dxiikhẽy weꞌweth pkalte fxiꞌzesatx maatxwa naꞌjĩna: Iꞌkweꞌsx tasxte kiꞌkin paꞌjçxaꞌ, peltunaĩmeꞌnja jĩniꞌs ãçxhaꞌ kiꞌ kaayakiꞌjiçthu nee jxuꞌthe ũsíi. 3 Iꞌkweꞌsxaꞌ adxaꞌs jiyu wẽena ũsiꞌkwe Kristo kaahnisa dxihtewa, txãꞌsaꞌ adx paꞌthe jiyuneꞌkwe. Iꞌkweꞌsx ãhmée yũusatxiꞌs Kristoꞌ juunaꞌmeekuẽ jxkajaꞌçmeꞌ, txãasa txajx juunaꞌ jxkaahniꞌs iꞌkweꞌsx ksxavxyte kaavxyaꞌjaꞌjyaꞌ ũsaꞌ. 4 Txãꞌ naa kiwete çxhãçxhameekuẽ fxiꞌzesa naꞌwẽ yuh kluuste fxuçni uuk, nawa ĩtxĩ yuuk seenaꞌ çxhãçxha yuuwaꞌjaꞌs Dxus ũste. Adxwa txãa naꞌwẽy naa kiwete çxhãçxhameekuẽ fxiꞌzeniꞌs jiꞌphuçxawa, txãa yakh fxiꞌzeçxaꞌ, Dxus kçxhãaçxhaꞌjnith fxiꞌzeꞌ iꞌkweꞌsxtxi yuꞌkxpehwaꞌjsa.

5 Txãa paꞌga ¿maꞌwẽ ũskxthaꞌw? sũhna meswe, aan Dxus yakh fxiꞌzena ũsneꞌkwe. Ĩsxiisamée Dxus luuçx dxihçxaꞌ, ¿Jesukristoꞌs ũuste jiꞌphkweꞌ? 6 Jesukristoꞌs ũuste jiꞌphdxihçxaꞌ, adxaꞌs ew jiyuneꞌkwe, Dxus luuçxthu jĩna isath weꞌweꞌ naa paꞌga. 7 Txãasath iꞌkweꞌsx paꞌgate Dxus yakh puutx weꞌweꞌ, kĩhwa ewmée yũuna fxiꞌzekahmen. Adxaꞌ ĩsxiiçxa txãꞌjĩꞌçmeeth, naasáa iꞌkweꞌsx ewçxáa fxiꞌze jxthãasçxath txãꞌjĩꞌ. Adxaꞌ ĩsxiisa naꞌwẽ wáꞌntka, nawa txãa yuꞌ kĩh yuumeena. 8 Txãa paꞌgatey isasaꞌs kxtey nwẽeseꞌjwaꞌjçxáa jiꞌpthu. 9 Dxus yakh iꞌkweꞌsx çxhãçxha fxiꞌzeçteꞌ, adxaꞌ weçxaꞌth. Adx yuꞌ çxhãçxhameekuẽçxawa, Dxus yakh puutx weꞌwena nes yuꞌnja, iꞌkweꞌsxaꞌ Dxus yakh çxhãçxha fxiꞌzeyaꞌ ãjãkahn. 10 Iꞌkweꞌsx tasxna yuhmey, naa kartaꞌs fxiꞌjçxa yaçte kajaçthu, kxah adx paꞌjçxaꞌ, iꞌkweꞌsxtxi juunaꞌ yuuwaꞌj jiꞌphumeꞌnja. Txãꞌwẽ juunaꞌ yũuwaꞌjaꞌs Kristok adxaꞌs neeweꞌwe, iꞌkweꞌsxaꞌ Dxus yakh txutemée jweeíiçxáa çxhãçxha fxiꞌzewaꞌjaꞌs jiꞌphukahn. Iꞌkweꞌsxtxi wejx yuuwa kçxhãaçxhaꞌjnath txãꞌwẽ yũꞌ.

11 Ãçxhaꞌ yakhthẽꞌjweꞌsxtxi neeweꞌweꞌth ewçxáa fxiꞌzekahn. Kĩhtewa jxpubamée fxiꞌzewaꞌjçxáꞌs mpaakwewe. Kvxiisxaꞌjni myũuwe. Kxteeçxah zhiçxkwe puiimée mfxiꞌzewe. Açaꞌ ew kaafxiꞌzeꞌjsa Dxusaꞌ iꞌkweꞌsx yakh nes yuuna peeygãhna. 12 Ũusuh jxuka yajkxçxa puutx teeçxsa naꞌwẽçxah yuwe mweeçxawe. 13 Dxusaꞌs jiisa yakhthẽꞌjweꞌsx jxukaysatx yuwe weçxaakajaꞌ.

14 Dxus yakhçxáa mfxiꞌzewe. Jesukristo puꞌçxhina, Dxus Espiritu yakh txutemée fxiꞌzekahn.