Romanos

Kweꞌsx ĩtxi fxiꞌzeniꞌs Dxus kusete dukhni

12 Adx yakhthẽꞌjweꞌsxtxi neeweꞌweꞌth: Dxusaꞌ txakwe wala peeygãapaꞌga, ãçxhaꞌ iꞌkweꞌsx ĩtxi fxiꞌzeni petx kakweyãꞌjçxa jxuka kĩh pkal yuhwa jiꞌphmée txajx kuseteçxaçxáa yaꞌmdukhwe, Dxusaꞌs yuuçxáa selpiina fxiꞌzeyaꞌ. Dxusaꞌ txãꞌwẽ yũuniꞌsku jxthãasuꞌ naa paꞌga kxtey yuuwaꞌj jiꞌpthaꞌw. 2 Ãçxhũyãꞌjaꞌ naa kiweteweꞌsx naꞌwẽy yuꞌ fxiꞌzenuwe, wejxwa iꞌkweꞌsx fxiꞌzeni iꞌkweꞌsx ũus yaakxni txãatx jxuka myuꞌpthehwe, kĩhtewa jxuka uꞌse yuuna paꞌjyaꞌ. Txãꞌwẽ yũuçxa Dxus jxthãasni ewsa, txajx dxiꞌpte zhiçxkwe wẽt fxiꞌzeniçxáꞌs jiyuneꞌkwe.

3 Dxusaꞌ peeygãhçxa adxaꞌs neeweꞌwek iꞌkweꞌsxtxi yuꞌkxpejkahn, txãa paꞌga yuꞌkxpehwaꞌj jiꞌpthu: Adxçxáath thaakwe selpiꞌ sũhna maa yuhwa iiwejçx yaakxwaꞌj jiꞌphmée iꞌkwe, naasáa kĩhte selpiwaꞌjsa neꞌ Dxusaꞌ nvxiht txãꞌs yuuçxáana kxtey myũuwe, wala jxpaꞌyakxna. 4 Nasaa kakweꞌs miiyajkxwe: Txãꞌ teeçxçxáaçxawa wala kuh jwed jiꞌphaꞌ, saꞌ fxiyfxiyçxahtx selpiꞌ, teeçx kakweteweꞌsxçxáa weꞌsxçxawa. 5 Txãꞌwẽy kweꞌsxwa wala kuhçxawa, jxukaysa Kristo yuuçxáꞌsthaꞌw selpiꞌ, jxukaysa kxteeçxah fxiyfxiyçxah selpiina.

6 Kweꞌsx selpiiyaꞌ ãjawaꞌjaꞌs Dxusaꞌ fxiyfxiyçxajk ũs, kĩhteçxah selpiiyaꞌ ãjawaꞌjsa neꞌtkaꞌw yuꞌ txãa yuꞌsaꞌ jxukak ũs. Açaꞌ txãatxiꞌ wala jxpaꞌyakx iijxũwaꞌj jiꞌpthaꞌw. Meeçxawa Dxusaꞌ txajx yuweꞌs ptaꞌsxyaꞌ ãjawaꞌjaꞌs ũsteꞌ, txajx kaajiyuꞌjniçxáꞌs kxtey yuuwaꞌj jiꞌpthaꞌw. 7 Vxitesatx selpiina fxiꞌzewaꞌjaꞌs ũsteꞌ, txãꞌsnawa kxtey yuuwaꞌj jiꞌpthaꞌw. Saꞌ maawa kaapiyaꞌjyaꞌ ãjasaꞌ txãꞌsaꞌ kxtey yuuwaꞌjaꞌ. 8 Nxuste fxiꞌzesatx puutx puꞌçxyaꞌ ãjasaꞌ txãꞌwẽ yũuwaꞌjaꞌs nvxiitwaꞌjmeꞌ. Peesyaꞌ yaakiççxaꞌ, kaasxweduꞌjuna sũhmée txãꞌwẽ peeswaꞌjaꞌ. Dxus luuçxtxi jxpeꞌjsaꞌ, wala jxpaꞌyakx jxpeꞌjwaꞌjaꞌ. Peejiina fxiꞌzesatx puꞌçxsaꞌ, weçxana puꞌçxwaꞌjaꞌ.

Dxusaꞌs jiisaꞌ naꞌwẽ yũuwaꞌjaꞌ

9 Teeçxsa naꞌwẽçxah puutx yaꞌpeeygãawaꞌjaꞌs mjiꞌphuwe, ĩsxiimée ũusuh jxuka yajkxna. Ewmeesaꞌs nwẽeseꞌjmée ewsaçxáꞌs kxtey myuuwe. 10 Yakhthẽꞌjaꞌs juunaꞌ yuumée wejxwa yakhthẽꞌjaꞌ thaakwe walasaꞌ sũhna puutx yaꞌmpeeygãhwe.

11 Dxusaꞌs selpiwaꞌjaꞌsçxáa ũusuh jxuka weçxana mpaꞌpçxuwe, waꞌl yajkxmée.

12 Ewte paꞌjwaꞌjaꞌs jii iꞌkwe txãa paꞌga weçxana mfxiꞌzewe. Nxuswaꞌj en paꞌthewa txãꞌsaꞌ yajkxmée, bagaçxtewa Dxus yakh yuuçxáa puutx weꞌwena mfxiꞌzewe.

13 Yakhthẽꞌjweꞌsx peejiina fxiꞌzesaweꞌsxtxiꞌ mpuꞌçxwe. Iꞌkweꞌsx yatte paꞌjsatxwa waꞌlmée mpaꞌgawe.

14 Iꞌkweꞌsxtxi ahçena pkxuusatx kaꞌtu yuꞌ ewçxáa myũuwe, wejx yuuwa txãaweꞌsx paꞌgate Dxusaꞌs mneeweꞌwewe nweꞌwekahn.

15 Weçxasáa yakh iꞌkweꞌsxwa weçxaa mpuꞌçxwe, saꞌ nxussa yakh iꞌkweꞌsxwa nxus mpuꞌçxwe.

16 Puutx jaꞌdaçxah ewçxáa mfxiꞌzewe. Jxthaakwe jiith sũhçxa iiwejçx yajkxmée, ãhmeekwesa naꞌwẽyçxáa mfxiꞌzewe.

17 Makwe ewmée yũusaatewa, kaꞌtu yuꞌ ewmée yuuwaꞌjmeꞌ. Ew yuuwaꞌjçxáꞌs paꞌpçxuwaꞌjaꞌ jxukaysatx.

18 Jxukaysa yakh ew fxiꞌzewaꞌjçxáꞌs mpaakwewe, iꞌkweꞌsxtxi maꞌwẽ wejx ew theguna txãa yuꞌsaꞌ jxuka kxtey yuuna. 19 Yakhthẽꞌjweꞌsxtxi neeweꞌweꞌth iꞌkweꞌsxtxi ewmée yũusaatx kaꞌtuwa ewmée yũuwaꞌjaꞌs pakwena fxiꞌzekahmén. Txãꞌwẽ yũumée wejxwa idxna ewmée yũusaꞌs kuçx yuunu, Dxus kastigãywaꞌjsaꞌ naa paꞌga. Txajíik Dxus librutewa naꞌwẽ weꞌweꞌ: Ewmée yũusatx kastigãywaꞌjsaꞌ adxthu. Adx jiineꞌtka jĩꞌk. 20 Txãꞌwẽ kaꞌtu ewmée yũuwaꞌjaꞌs yajkxmée naꞌwẽ myũu: Idxna açesa ũꞌwaꞌj jiꞌphmée wẽena fxiꞌzeçteꞌ, ũꞌ mpuuç. Saꞌ yũꞌwẽena fxiꞌzeçteꞌ, tudxwaꞌjwa mes. Idxaꞌ txãꞌwẽ yũuçxaꞌ, kaythameꞌjeneꞌga jĩꞌk. 21 Idxna ewmée yũusaꞌs kaaknayuꞌjnu, wejxwa idx khuẽꞌy meknay, kaꞌtuꞌ ew yũuçxa.