Juan

Treinta y oçxo anxu ãçãꞌna ũssaꞌs Jesus nuykatxhini

5 Txãa eꞌsuꞌ judiuweꞌsx fxiesta en ãjaçku yuꞌ, açaꞌ Jesusaꞌ Jerusalenna kiꞌ uꞌkh. 2 Txãa çxhabteꞌ ĩikhaꞌjni yuꞌ jiꞌphuꞌtx piisxáa kaꞌgaꞌjni vxitx utxate. Txãꞌ Betesda yaaseꞌ hebreo yuwete. Ãçaꞌsa paꞌjçxa ũswaꞌj tahç ahtek txudeni yuꞌ, yat pwaꞌ naꞌwẽsa. 3 Kxteꞌ wala kuh ãçaꞌsa ũsuꞌtx, uyyaꞌ ãjasamée, çxida puuplesa, vxiteꞌ ẽseyaꞌ ãjasamée txãꞌwẽsatx ũythasna ũsuꞌ, yuꞌ ẽseçpkaçxhaꞌ kxtee khẽeyaꞌ sũhna. 4 Txãꞌwẽ maa enteyaꞌ Dxus angel kĩhçxa yuꞌaꞌs kẽeseꞌjeꞌk, naapkaçxhaꞌ maa yaçte khẽjena txãꞌ jxuka katxhiçxak neeyũꞌ kĩh wee jiꞌphçxawa. 5 Kxteeaꞌ teeçx piçthẽꞌj treinta y oçxo anxu ãçaꞌna ũssak txkaa ũsuꞌ. 6 Açaꞌ txãꞌsna Jesus uyçxaꞌ txakwe txaçx ãçaꞌna ũste jiyuçxaꞌ, pẽjxku:

—¿Katxhi wẽegaꞌ? jĩteꞌ, 7 ãçaꞌsa pasçxaꞌ:

—Yuꞌ ẽseçpkaçxhaꞌ yuꞌte adxaꞌs akhwaꞌjsa kim yuhwa meetaꞌ. Adx khẽe wẽjeçpkaçxhaꞌ vxite khuẽꞌy khẽjeꞌtx jĩteꞌ, 8 Jesusaꞌ naꞌjĩnak jxkaah:

—Kiiteçxa iidx pusçxa deeniꞌs tũꞌsçxa meꞌj jĩçpkaçxhaꞌ, 9 naa dudtey txãa piçthẽꞌjaꞌ katxhiyãꞌjçxak neeyũu. Saꞌ txajx pusçxa deeniꞌs tũꞌsçxa uꞌkh.

Nawa judiuweꞌsx kiꞌsni ente txãꞌwẽ dee pusniꞌs tũꞌsçxa uꞌjweçte uyçxaꞌ, 10 judiuweꞌsxaꞌ naꞌwẽtx pẽjx txãa piçthẽꞌj katxhisaꞌs:

—Ãçxhaꞌ kiꞌswaꞌj enaꞌ açaꞌ txãꞌwẽ tũꞌsçxa uꞌjuwaꞌj jiꞌphmeeg jĩteꞌ, 11 txãa piçthẽꞌjaꞌ pasçxa naꞌjĩk:

—Adxna nuykatxhisaíik txãꞌwẽ jxkaah: Iidx pusçxa deeniꞌs tũꞌsçxa meꞌj jĩpaꞌga txãꞌwẽ tũꞌsçxa uꞌjweçthu.

12 Açaꞌ judiuweꞌsxaꞌ kiꞌkin paapẽjxtxi:

—Txãꞌwẽ jxkaahsaꞌ ¿kimga yuꞌ? jĩteꞌ, 13 txãa piçthẽꞌj katxhisaꞌ jiyuyaꞌ ãjameꞌ kim txãꞌwẽ nuykatxhitewa. Kxteeaꞌ nasa wala kuh ũsteꞌ, txãa katxhisaꞌ jiimeek yuꞌ maa dxiꞌj kasehçxa Jesusaꞌ uꞌthewa.

14 Txãa eꞌsuꞌ Jesusaꞌ dxuus yatte txãa piçthẽꞌj katxhisaꞌs puutx uyçxaꞌ, naꞌjĩk:

—Ãçxhaꞌ katxhgu neeyũu naꞌ, naa weete jxthaakwe nxussa paꞌkhamen paꞌyajkx mfxiꞌze, ewmée yũuna uꞌjumée jĩteꞌ, 15 txãa piçthẽꞌj uꞌjçxaꞌ judiuweꞌsxtxi ptaꞌsxku:

—Adxna nuykatxhisaꞌ Jesusga yuꞌ jĩna. 16 Txãa paꞌgatx judiuweꞌsxaꞌ Jesusaꞌs ahçeçxa ikh wẽe, kiꞌsni ente txãꞌwẽ ãçaꞌsaꞌs nuykatxhipaꞌga.

17 Txajũꞌ Jesusaꞌ judiuweꞌsxtxi naꞌwẽk weꞌwe:

—Adx Tataꞌ naa entewa mjĩina ũsaꞌ, txãa paꞌgath adxwa mjĩꞌ. 18 Txãꞌjĩteꞌ, judiuweꞌsxaꞌ jweeíiçxáatx Jesusaꞌs ikh wẽena kiite. Txãꞌwẽ kiꞌswaꞌjaꞌ jĩna jxkaahni leyçxáꞌs nwẽeseꞌjmée adx Tataꞌ Dxusaꞌ jĩꞌk naꞌ txãawa Dxus naꞌwẽysath jĩꞌneꞌ sũhçxatx txãꞌwẽ ikh wẽena kiite.

Dxusaꞌ Nçxiꞌkaꞌs ĩtxi vxit-yaꞌ ãjawaꞌjaꞌs ũsni

19 Txajũꞌ Jesusaꞌ naꞌwẽk ptaꞌsx:

—Isath weꞌweꞌ, adxaꞌ Dxus Nçxiꞌkthu, nawa adxçxáa yuꞌ mjĩiyaꞌ ãjameꞌnja. Adx Tata maꞌwẽ mjĩiteꞌ, txajx mjĩiniꞌs thegçxa yuuçxáath txãꞌwẽy mjĩiyaꞌ ãjaꞌ. 20 Txãa paꞌgatey Tataꞌ adxaꞌs peeygãhçxa txãa kĩh mjĩiççxawa jxuka ptaꞌsxiꞌk adxaꞌs. Txãasa ãçxh uyiꞌkwe txãate jweeíiçxáa walasatx kaavxyaꞌjaꞌjana, açaꞌ txãatx uyçxaꞌ iꞌkweꞌsxaꞌ kuh yajkxna neeyũuneꞌkwe. 21 Tataꞌ maꞌwẽga uusaatx ĩtxi vxituꞌ, txãꞌwẽy adxwa ĩtxi vxituꞌnja maatxwa. 22 Ãçxhaꞌ Tataꞌ yuuwesatx kastigãywaꞌjaꞌs jxuka adxçxaçxáanak nvxiht, txãasa ãçxhaꞌ yuuwesatx kastigãywaꞌjaꞌs Tataꞌ kim yuhtxwa thegwaꞌjsameꞌ. 23 Tataꞌswa maꞌwẽta nwẽeseꞌjeꞌ, txãꞌwẽy adxnawa jxukaysa nwẽeseꞌkhanku txãꞌwẽ yũu. Adxna nwẽeseꞌjsameꞌ adxna kaahsa Tataꞌswa nwẽeseꞌjsameeçxa txãꞌwẽ yuutxna. 24 Isath weꞌweꞌ: Maawa adx ptaꞌsxniꞌs jxpaꞌyajkx wẽseꞌjçxa adxna kaahsaꞌs ũuste jxpaꞌgasaꞌ, bagaçxte yuhwa pçumée ĩtxĩ fxiꞌzewaꞌjaꞌs jiꞌphutxna. Txãꞌwẽ yũusaꞌ ewmeete nvxiitni yuumée, uuwaꞌju kutxiꞌjçxa bagaçxte yuhwa pçumée ĩtxi fxiꞌzewaꞌthe nvxiitnisa yuuna. 25 Isath weꞌweꞌ: Pçumée ĩtxi fxiꞌzewaꞌj en paꞌjana jĩꞌth txãa enaꞌ ãçxhíiaꞌ. Açaꞌ uusaaweꞌsxaꞌ Dxus Nçxiꞌk weꞌweniꞌs wẽseꞌjçxa kxtey yuusáꞌ ĩtxi fxiꞌzewaꞌjaꞌs jiꞌphutxna. 26 Txãa paꞌgatey adx Tataꞌ ĩtxĩ vxit-yaꞌ ãjãwaꞌjaꞌs jiꞌphaꞌ, saꞌ adxnawa ũsku txãꞌwẽ ĩtxi vxit-yaꞌ ãjãwaꞌjaꞌs. 27 Saꞌ yuuwesatx kastigãywaꞌjaꞌswa adxaꞌsíiçxáak ũs, adxaꞌ Dxus Nçxiꞌk Nasa Yuusath naa paꞌga. 28 Txãꞌwẽ Dxus Nçxiꞌk weꞌweni pthũuseteꞌ, uusaaweꞌsxaꞌ pedaniijũ kasehwaꞌj en paꞌjana jĩna ptaꞌsxteꞌ, fxiy yuh weꞌweꞌk sũhna yaakxnuwe. 29 Txãa en ãhteꞌ, uusaaweꞌsxaꞌ pedaniijũ ĩtxi yuuçxa kasejetxna, ew yũuna fxiꞌzesaꞌ ewte uꞌjyaꞌ, naapkaçxhaꞌ ewmée yũuna fxiꞌzesaꞌ ewmeete uꞌjyaꞌ ĩtxi yuutxna.

Jesus kimtewa kaajiyuꞌjsa

30 Adxçxáa yuꞌ kĩjxaꞌwa ãjameꞌnja. Adx Tata jxkaatheçxáath yuuwesatx kastigaĩꞌ. Adx ũuste peekxçxáa yajkxçxa txãꞌwẽ yuꞌçmeeth, txãasa adx kastigãyniꞌ isasataꞌ. Adxna kaahsa maꞌwẽ jxthãasteꞌ txãaçxáꞌsthu kxtey yuꞌ. 31 Adx maꞌwẽsatewa kimwa ptaꞌsxwaꞌjsa jiꞌphmée peekxçxáa txãꞌwẽsath jĩteꞌ, isa yuhna sũhwaꞌjaꞌs yaꞌjiꞌphuꞌçmeꞌ. 32 Nawa txãꞌwẽ ãjawaꞌjsa yujaꞌ jĩna adx juꞌgu weꞌwesa ũsaꞌ, açaꞌ adxaꞌ jiith txajx weꞌweniꞌ isasa yujaꞌ. 33 Iꞌkweꞌsxaꞌ Juan tasxte paapẽjxyaꞌ kaajiꞌkwe, açaꞌ txãꞌ isa yuh ptaꞌsxku adx kimtewa. 34 Adxaꞌ naa kiweteweꞌsx adx juꞌgu weꞌweniꞌs peejxmeeth. Nawa iꞌkweꞌsxaꞌ Juan ptaꞌsxniꞌs jiiyãꞌjçxaꞌ, thẽymée ewte neeyũuwaꞌjaꞌs pakwekahnçxáath txãꞌjĩ. 35 Juanaꞌ eenaꞌte kaafxiꞌzeꞌjwaꞌjsaꞌs tuutheꞌjsak yuꞌ, açaꞌ iꞌkweꞌsxaꞌ waꞌlmée iꞌkwe Juan ptaꞌsxniꞌs jxpaꞌgana ũsuꞌ maz ençxáawa. 36 Nawa adxna tuutheꞌjna isa ptaꞌsxsa yuꞌ mazwa jiꞌpthu, Juan ptaꞌsxnite jxthaakwesa. Adx mjĩiniꞌ adxna tuutheꞌjna isa ptaꞌsxsataꞌ. Naꞌwẽ mjĩith nawa adx Tata jxkaahniçxáatxthu txãꞌwẽ yuꞌ, Dxus kaahnisa yuh yuꞌneꞌ sũjkahn. 37 Txãꞌwẽy adxna kaahsawa isak ptaꞌsxiꞌ adxaꞌs tuutheꞌjna. Txãꞌwẽtewa, iꞌkweꞌsxaꞌ bagaçxte yuhwa txajx weꞌweniꞌs iiwẽseꞌjmeeneꞌkwe, saꞌ txãꞌsaꞌ iiuywameeneꞌkwe. 38 Saꞌ txajx kaapiyaꞌjniꞌswa iꞌkweꞌsx ũuste jiꞌphmeeneꞌkwe, txãasa iꞌkwe jxpaꞌgayaꞌ ãjãꞌçmée, adxaꞌs Tata kaathewa. 39 Iꞌkweꞌsxaꞌ jxpaꞌyajkx iꞌkwe leeĩꞌ, pçumée ĩtxĩ fxiꞌzewaꞌjaꞌs jiꞌphuyaꞌ. Açaꞌ txãa libruꞌ adxaꞌs ptaꞌsxsaíiçxáꞌ. 40 Makwe txãꞌwẽçxawa, iꞌkweꞌsxaꞌ adx tasxte utxaꞌçmeeiꞌkwe ĩtxi fxiꞌzewaꞌjaꞌs jiꞌphuyaꞌ.

41 Naa kiwete nasa adxaꞌs tuutheꞌjniꞌs jxthãasuꞌçmeeth. 42 Adxaꞌ iꞌkweꞌsxtxi ew jiith, iꞌkweꞌsxaꞌ Dxusaꞌs wedxiꞌçmée iꞌkwe. 43 Tata kaatheꞌ yuweꞌth, nawa iꞌkweꞌsxaꞌ adxaꞌs jxpaꞌgaꞌçmée iꞌkwe. Nawa Dxus kaahnisamée vxite paꞌjwaçaꞌ, txãa yuꞌsaꞌ jxpaꞌganeꞌkwe. 44 ¿Maꞌwẽ yũuçxa adxaꞌs jxpaꞌgayaꞌ ãjakiꞌkwe, nasaa pweꞌsx puutx ew tuutheꞌjniçxáana jxthãasçxa, Dxus teeçxçxáasa tuutheꞌjni yuꞌsaꞌ jxpaꞌgameeçxaꞌ? 45 Adx Tata tasxte iꞌkweꞌsxtxi ewmée yuwe ũswaꞌjsana sũjuwáꞌkwe adxaꞌ txãꞌwẽmeeth. Txãꞌwẽ iꞌkweꞌsx maꞌwẽsatewa adx Tata tasxte ptaꞌsxsaꞌ Moisesíiçxáꞌ, iꞌkweꞌsx nakwe wala ewçxáa weꞌweꞌiꞌkwe txãa. 46 Moises weꞌweniꞌs jiyuwaçaꞌ, adxaꞌs jxpaꞌganeꞌkwe, Moisesaꞌ adxnaíiçxáak tuutheꞌjna fxiꞌj naa paꞌga. 47 Nawa txajx fxiꞌjniꞌs jxpaꞌgameeçxaꞌ, ¿maꞌwẽ adx weꞌweniꞌs jxpaꞌgayaꞌ ãjakiꞌkwe?