1 Korintios
Iꞌkweꞌsx yuuwe yuuniꞌs Dxusaꞌs jiimeesa khuẽs tasxsu paatxhĩꞌkhni
6 Iꞌkweꞌsx pweꞌsx yuwe susniꞌs ¿kĩh yũuçxakwe Dxusna jiimeesa khuẽs tasxsu paatxhĩꞌkhyaꞌ uꞌjweꞌ, wejxwa yuwe susniꞌs Dxusaꞌs jiisa pweꞌsx iꞌkweꞌsxçxáa pheuꞌjupkaçxte. 2 Iꞌkweꞌsxaꞌ jiimeewáꞌkwe Dxus luuçxyãꞌjaꞌ naa kiwe yuhnawa kweꞌsx jxkaahwaꞌjsameewáꞌntkaꞌw. Txãꞌwẽ naa kiwe yuhnawa iꞌkweꞌsx jxkaahwaꞌjsaçxaꞌ ¿kĩh yũuçxakwe yuwe thẽymeesa yuꞌs pheuꞌjyaꞌ ãjaꞌçmée? 3 Iꞌkweꞌsxaꞌ jiimeewáꞌkwe kweꞌsxaꞌ angelesweꞌsx yuhtxwa yuꞌkxpehwaꞌjsameewáꞌntkaꞌw. Txãꞌwẽçxaꞌ, kweꞌsx pweꞌsx yuwe susniꞌs wejx ũukhmée pheuꞌjwaꞌj jiꞌpthaꞌw. 4 Iꞌkweꞌsx pweꞌsx kazxthẽꞌj susna puiiniꞌs ¿kĩjxaꞌkwe paatxhĩꞌkhyaꞌ uꞌjweꞌ Dxusaꞌs jiimeesa tasxsu? 5 Naꞌwẽth weꞌweꞌ iꞌkweꞌsx thaamekahn: ¿Yakhthẽꞌjweꞌsx pweꞌsx yuwe susniꞌs pheuꞌjwaꞌjsa teeçxçxáawa jiisameewáana açneꞌkwe txãꞌwẽ vxitetx piꞌkxyaꞌ uꞌjweꞌ? 6 Yakhthẽꞌj pweꞌsx yuwe susniꞌs Dxusna jiimeesa khuẽs tasxsu paatxhĩꞌkhteꞌ ¿ewmanx?
7 Txãꞌwẽ iꞌkweꞌsx pweꞌsxíiçxáa puutx puiina fxiꞌzeniꞌ kazx thaampaꞌsaꞌ, açaꞌ ¿mjĩitekwe iꞌkweꞌsxtxi pesweena maꞌwẽwa pthãaweçtewa Dxusaꞌs jiimeesa tasxsu yuꞌ paatxhĩꞌkhyaꞌ uꞌjmée sxuunaꞌ neeyũꞌçmée? 8 Txãꞌwẽ yũumée iꞌkweꞌsxtxi pesweeteꞌ, iꞌkweꞌsxwa yakhthẽꞌj jĩitxíiçxáa pesweena kĩhwa ewmée iꞌkwe yũꞌ.
9 6:9-10 Jiimeewáꞌkwe Dxus jxkaahna ũsnite uꞌkayaꞌ ãjawaꞌjsameetaꞌ txãꞌwẽ ewmée yũusaꞌ jĩniꞌs. Jxpubanuwe, txãꞌwẽ yũusaꞌ Dxus jxkaahna ũsnite uꞌkayaꞌ ãjawaꞌjsameetaꞌ: Pkal kazxsate fxiꞌzesa, dxus ĩtximeesaꞌs neeweꞌwesa, ptamçxawa vxite yakh fxiꞌzesa, piçthẽꞌj pweꞌsxíiçxáa pkal yuuna fxiꞌzesa, pesweesa, vxitee jĩitx kusaꞌj wẽesa, tũusáa, wẽesxuusáa, ĩsxiiçxa vxitee jĩꞌs iiyamusa txãaweꞌsxaꞌ Dxus jxkaahnite uꞌkayaꞌ ãjameetxna. 10 — 11 Iꞌkweꞌsxaꞌ nyafxíi yuꞌ txãꞌwẽsa iꞌkwe yuꞌ. Nawa ãçxhaꞌ Dxus peltunãyteꞌ, jxuka yaateni iꞌkwe, saꞌ Jesukristo vxiteꞌ kweꞌsx Dxus Espiritu puꞌçxteꞌ, Dxus yakh yuuçxáa fxiꞌzesaiꞌkwe.
Peekx kakweꞌs pkalte kaafxiꞌzeꞌjwaꞌjmeꞌ
12 Kweꞌsxtxi maꞌwẽ yũuweçxtewa maꞌwẽwa fxiꞌzeꞌnjaꞌw nawa kweꞌsx fxiꞌzeniꞌs kim yuhwa yupmeena jĩꞌtx txãꞌ isa yujaꞌ. Nawa jxuka yuutxiꞌs nwẽeseꞌjwaꞌj jiꞌphmeethaꞌw, maaíi yuꞌ seelpimeesataꞌ txãa paꞌga. 13 Isatx weꞌweꞌ: Ũꞌaꞌ tutxhteweꞌsxaꞌ, naapkaçxhaꞌ tutxhaꞌ ũꞌ jxpaꞌgawaꞌjsaꞌ, açaꞌ txãatxiꞌ ¿kim yupuukx? jĩꞌtx. Isatxãa eꞌzsaꞌ txãꞌwẽteweꞌsx yuhtaꞌ, açaꞌ txãatxiꞌ weꞌwewaꞌj jiꞌphmeethaꞌw, pçuwaꞌjsaçxáataꞌ naa paꞌga. Nawa kakweꞌs ptammeesa yakh pkalte kaafxiꞌzeꞌjwaꞌjmeꞌ, txãa paꞌgatey kweꞌsx kakweꞌ Kristo jĩꞌ, naapkaçxhaꞌ Kristoꞌ kweꞌsx kakweꞌs jxpeꞌjsaꞌ naa paꞌga. 14 Dxusaꞌ maꞌwẽga Kristoꞌs ĩtxi vxit, txãꞌwẽy kweꞌsx kakweꞌswa thẽymée ĩtxi vxit yaꞌwaꞌ, naa paꞌga pkalte fxiꞌzewaꞌjsameꞌ.
15 Iꞌkweꞌsx kakweꞌ teeçxsa naꞌwẽçxah Kristo kakweíiçxáꞌ, açaꞌ txãꞌsaꞌ jiimeewáꞌkwe. Txãꞌwẽteꞌ, Kristo kakweꞌs uweçxa uꞌy ewmeesa yakh utxaate ¿ewmanx? Weh yuhwa txãꞌwẽ yũuwaꞌjmeꞌ. 16 Meeçxaꞌ iꞌkweꞌsxaꞌ jiimeewáꞌkwe, uꞌy ewmeesa yakh pkal yũunijũꞌ teeçx kakweçxáak yuuna paꞌjaꞌ jĩniꞌs. Txãꞌsna weꞌweçxak Dxus librute naꞌjĩꞌ: Eꞌzsa teeçx kakweçxáa yuuna paꞌjana jĩꞌk. 17 Txãa paꞌgak maawa Kristo yakh utxaateꞌ, Kristo yakh teeçx kakweçxáa yuuna paꞌjaꞌ Dxus dxiꞌpte.
18 Maꞌwẽ yuhwa nyumeesa yakh kazx pkal yuuwaꞌjmeꞌ. Pkal maꞌwẽsawa ũstaꞌ, nawa peekx kakwe yakh yuꞌ meek pkal yuꞌ. Nawa ptammeeçxa kazx pkal yuuna fxiꞌzesaꞌ txajx kakweꞌs íiçxáak suwuꞌ, pkalte jxũna uꞌjçxa. 19 Jiimeewáꞌkwe iꞌkweꞌsx kakweꞌ Dxus Espiritu uꞌpwaꞌjaꞌ, txãa paꞌga iꞌkweꞌsx ũusteꞌ Dxus Espiritu uꞌpaꞌ, açaꞌ kakweꞌ iꞌkweꞌsx jĩi meꞌ. 20 Iꞌkweꞌsxaꞌ Dxus weynisaiꞌkwe wala paꞌgate. Txãꞌwẽyãꞌtheꞌ, kazx yũumée Dxus dxiꞌpte ewçxáa yũuna mfxiꞌzewe iꞌkweꞌsx kakwe yakh vxiteꞌ iꞌkweꞌsx ũus yaakxni yakhwa txãꞌwẽy. Txãꞌwẽmeꞌ, eꞌzíi Dxus jĩiçxaçxáataꞌ.