PEꞌLA 47
¿Idxaꞌ yaꞌbautisãyyaꞌwaga?
Idxyuꞌ Dxus eçte piyan ũsçxa Jeuwate wala jiyuneꞌga, açyu Dxusaꞌs nwẽeseꞌjçxa idx ĩtxi fxiꞌzeniꞌs yuꞌptheꞌjwaꞌj jiꞌphneꞌga. Vxiteyuꞌ Jeuwan selpii wẽeçxawa wala ũukhuneꞌta, nawa naa leccionte piyaçxa ew txhitxhyaꞌ ewuuneꞌga, txaꞌwẽy dedicaĩna, yaꞌbautisãyyaꞌ ewuuneꞌga.
1. ¿Yaꞌbautisaĩ wẽeçxa, Dxus yuweꞌs makwe jiyuwaꞌj jiꞌphguigk?
Yaꞌbautisãyyãꞌjçxayuꞌ, Dxus eçaꞌs ew jiyuwaꞌj jiꞌphneꞌga (1 Timoteo 2:4). Nawa txãa jĩnisayuꞌ jxuka paapẽynisaꞌs paswaꞌj jiꞌphuwameeneꞌga. Cristiano wala txeçxhyã piyan ũsna, txãaweꞌsxwa piyaniçxa ũstxina (Kolosenses 1:9, 10). Nawa wehkweçxawa piyaçxayuꞌ, wejxkwe jxthuhtheꞌs piyawaꞌj jiꞌphneꞌga. Congregacionte thẽꞌjsaweꞌsx puꞌçxhiyã, maꞌw jiitewa, Dxus yuweꞌs ew piyate jiyuwaꞌj.
2. Yaꞌbautisãymey, ¿kĩh yũuwaꞌj jiꞌphguigk?
Dxus yuwe naꞌjĩꞌk: “Dxus tasxte sxawedçxa iꞌkweꞌsx pkalpaꞌga perdon mpẽjxwe” (lẽeywe Hechos 3:19). Yaꞌbautisãymeyna txãꞌw yũuwaꞌj jiꞌphneꞌga, ¿maꞌw yũuwaꞌj jiꞌphguigk? Nyaafxte ewmee yũun fxiꞌzeniꞌs, nvxihtwaꞌj jiꞌphuneꞌga, kĩhçxa Jeuwaꞌs perdón pẽhywaꞌj jiꞌphuneꞌga. Dxusaꞌs wẽdxçxa, txãjx jxthaasniꞌsçxathaꞌw kxtey yuun fxiꞌze. Txaꞌwẽy, Jeuwa kaajiyuꞌjsaweꞌsxtxiꞌ pkhakhenite pkhakheçxa, Dxus yuweꞌs ptaꞌsxwaꞌj jiꞌphuneꞌga yaꞌbautisãymey.
3. Bautisaĩ wẽeçxa ũukhwaꞌj jiꞌphmeeneꞌga
Maii nasayuꞌ ũukhuneꞌta Jeuwa jxthaasniꞌs kxtey yuuyaꞌ ãjameenaꞌw sũhçxa. Isateyuꞌ, idxaꞌ ewmee yũuniꞌs nvxihtyaꞌ ãjaneꞌga, nawa kweꞌsxyuꞌ ãhmeekwesatewa Jeuwayuꞌ jiina (lẽeywe Salmo 103:13, 14). Jeuwayuꞌ wala weçxan ũsna, idx ew yũun fxiꞌze wẽete, txãayuꞌ puꞌçxhina. Jeuwayuꞌ isateyuꞌ naꞌjĩꞌk: Txãjx peeykãhniꞌs kim yũhwa txuhdeyaꞌ ãjameena jĩꞌk (lẽeywe Romanos 8:38, 39).
WEJXKWEÇXA PIYAN UꞌJWEKA
Jeꞌz puꞌçxhwaꞌjaꞌs: Teeçx, Jeuwan wejxkwe ew jiyuna. Jeꞌz, Jeuwa puꞌçxhniꞌs jxpaꞌkana. Txãꞌw yũuçxa yaꞌbautisãyneꞌga.
4. Jeuwaꞌs wejxkwe jiyuneꞌga
Yaꞌbautisãymey, ¿Jeuwaꞌs mtee paꞌj jiyuwaꞌj jiꞌphguigk? Jeuwaꞌs wejxkwe jiyuçxa, txãꞌs peeykãjxaꞌ ãjaneꞌga, açyu txãjx weꞌwnisaꞌs kxtey yuuneꞌga. Txãa VIDEUꞌS thegwe. Naa videute uyçxa jiyuneꞌga, Dxus eçte piyan ũssaweꞌsxtxiꞌs, kĩh kĩtx yũu yaꞌbatuisãywaꞌj. Txajuꞌ naa paapẽynisatxis paswe:
Dxus yuwe piyaçxa, ¿maꞌw pheuꞌjutxki, txãjx ĩtxi fxiꞌzeniꞌs yaꞌbautisãywaꞌj?
Lẽeywe Romanos 12:2, txajuꞌ naa paapẽynisatxis paswe:
¿Idxyuꞌ paapẽynisa jiꞌphga, Dxus yuweꞌs wejxkwe jiyu wẽeçxa?
¿Jeuwa kaajiyuꞌjsaweꞌsxaꞌ isayuꞌ kaapiyaꞌjmanx? Isasaꞌs jiyu wẽeçxa, ¿idxyuꞌ kĩh yũuwaꞌj jiꞌphguigk?
5. Yaꞌbautisaĩ wẽeçxa makwe thẽysa paꞌjtewa jxpubanu
Dxusaꞌs dedicaĩçxa vxiteꞌ bautisãyte. Isateyuꞌ, jxukasay thẽysa jiꞌphunaꞌw. Wejxkwe jiyu wẽeçxa, naa ejemplote thegwe. Txãa VIDEUꞌS thegwe, txajuꞌ naa paapẽynisatxis paswe:
¿Naranguerel kĩh thẽysaꞌs kik jiꞌphuꞌ, Jeuwaꞌs wejxkwe selpii wẽeçxayuꞌ?
Jeuwaꞌs peeykãhn ũsçxa txãa uꞌyaꞌs, ¿maꞌw kik puꞌçxh?
Lẽeywe Proverbios 29:25 vxiteꞌ 2 Timoteo 1:7, txajuꞌ naa paapẽynisatxis paswe:
Makwe thẽysaꞌs jiꞌphun ũstewa kweꞌsxtxiꞌs, ¿kim kik puꞌçxh?
6. Jeuwa puꞌçxhwaꞌjaꞌs konfiaywe
Idxyuꞌ kũj yahkxnu Jeuwaꞌs weçxa wẽeçxa, Jeuwayuꞌ puꞌçxhina. Txãa VIDEUꞌS thegwe, txajuꞌ naa paapẽynisatxis paswe.
¿Txãa piçthẽꞌja kĩh yũuçxa kik ũukhu yaꞌbautisãywaꞌj?
¿Kĩh kik puꞌçxh Jeuwate wejxkwe konfiayaꞌ?
Lẽeywe Isaías 41:10, 13, txajuꞌ naa paapẽynisatxis paswe:
Dedicacionte weꞌwnisa kxtey yuuyã ãjaneꞌga, ¿maꞌw jiyuyaꞌ ãjaguigk?
7. Jeuwa peeykãaniꞌs wala weçxawe
Dxusna peeykãhçxa wala weçxaneꞌga, açyu txãꞌsçxa selpiineꞌga, bagaçxtewa. Lẽeywe Salmo 40:5, txajuꞌ naa paapẽynisatxis paswe:
¿Jeuwa peesniꞌs maasga wejxkwe wẽdxi?
Jeremiasyuꞌ Jeuwaꞌs wala peeykãhne, Dxus weꞌwnisa wala wẽdxine. Txãa paꞌka Jeuwa yaseꞌs ptaꞌsxne. Txãayuꞌ naꞌjĩꞌne: “Idx weꞌwni adx ũuste paꞌj wala weçxaniꞌkyuꞌ. Idx yaseꞌs ptaꞌsxthu, Dxus Jeuwa” (Jeremías 15:16). Naa paapẽynisatxis paswe:
¿Wala jxthuhthesa yũumanx, Jeuwa kaajiyuꞌjsa yũute?
Jeuwa kaajiyuꞌjsa yũu wẽeçxa, ¿yaꞌbautisãymag?
¿Yaꞌbautisãyyaꞌ kĩh thẽysa jiꞌphga?
¿Kĩh yũuwaꞌj jiꞌphguigk, yaꞌbautisaĩ wẽeçxa?
MAII NASAWEꞌSXA NAꞌJĨTX: “Jeuwa kaajiyuꞌjsa yũuyaꞌ ũukhuth, ewmeewa yũun sũhçxa”.
¿Idxwa txaꞌwẽyga yahkxyaꞌ?
¿AYTE PAꞌJ KĨHKXTHAꞌW PIYA?
Kĩh thẽysa jiꞌphtewa Jeuwayuꞌ puꞌçxhina, yaꞌbautisãywaꞌj.
¿Kĩh pasuguigk?
Yaꞌbautisaĩ wẽeçxa, ¿Dxus yuweꞌs makwe jiyuwaꞌj jiꞌphguigk?
Yaꞌbautisãymey, ¿kĩh yũuwaꞌj jiꞌphguigk?
¿Ũukhuneꞌga yaꞌbautisaĩ wẽeçxa?, ¿kĩh yũuçxa txãꞌw yahkxwaꞌj jiꞌphmeeguigk?
WEJXKWE PIYAYA ÃJANEGA
Theguka, kĩh yũuwaꞌj jiꞌphguigk yaꞌbautisaĩ wẽeçxa.
Yaꞌbautisãywaꞌj thẽysa jiꞌphga, ayte mtheg.
“¿Kĩh thẽysa jiꞌphun ũsthu yaꞌbautisaĩ wẽeçxa?” (Ptaꞌsxnĩ, marzo 2019te)
Teeçx piçthẽꞌj wala thẽysa jiꞌphuneꞌ, yaꞌbautisãywaꞌj. Jiyu wẽeçxa, naa videuꞌs mtheg.
Thegyaꞌ ãjaneꞌga Ataa maꞌw kik yaꞌbautisãyya ãjane.