LESSON 8
Abraham and Sarah Obey God
Ur na another place wey no too far from Babel, and people dey worship many many gods for there. But e get one man wey dey worship only Jehovah. Im name na Abraham.
Jehovah tell Abraham sey: ‘Comot for your house and leave your people, and go the land wey I go show you.’ God come promise am sey: ‘You go be big country, and I go do better thing for many people for the whole earth because of you.’
Abraham no know where Jehovah sey make e go, but e believe sey to do wetin Jehovah want na im better pass. So Abraham, im wife Sarah, im papa Terah, and im brother pikin Lot pack all their things come start to dey travel.
Abraham dey 75 years when im and im family reach the land wey Jehovah want make dem stay. The land na Canaan. Na there God for promise Abraham sey: ‘You see all this land wey dey around you, I go give am to your children.’ But Abraham and Sarah don old and dem never born any pikin. So how Jehovah promise go take happen?
‘Na with faith Abraham take obey God, to go the place wey e go give am; e start to dey go even as e no know where e dey go.’—Hebrews 11:8