Hannah Beg Jehovah for Pikin

Elkanah wey be Israel person marry two wife. Their name na Hannah and Peninnah, but na Hannah e like pass. Peninnah dey use Hannah do yeye everytime because Hannah no get pikin but e get many pikin. Every year, Elkanah dey carry im family go worship Jehovah for tabernacle wey dey Shiloh. When dem dey there, e see am sey Hannah no happy. E come sey: ‘Abeg no cry. I dey with you. I love you!’

Later, Hannah comot go pray. E dey cry as e dey beg Jehovah make e help am. E promise Jehovah sey: ‘Jehovah, if you give me pikin, I go give you back, and e go use all im life serve you.’

Eli wey be high priest see Hannah dey cry come out, e come think sey e don drink. Hannah come tell am sey: ‘No be so my lord, I never drink. I get big problem and I dey tell Jehovah about am.’ Eli come see sey wetin e dey think no be true. E come tell Hannah sey: ‘God go give you wetin you want.’ Hannah mind come down, e come comot. After some time, e come born boy and give am Samuel. You no think sey Hannah go happy well well?

Hannah no forget wetin e don promise Jehovah. As Samuel grow small, e carry am go tabernacle. E tell Eli sey: ‘Na the pikin wey I pray make God give me be this. E go use all im life work for Jehovah.’ Elkanah and Hannah dey go visit am every year and dem dey buy new coat for am. Jehovah make Hannah born three boys and two girls join Samuel.