Devil Come Test Jesus

After Jesus baptize finish, holy spirit lead am go desert. Because Jesus no chop anything for 40 days, e come dey hungry. Devil come test am. E tell Jesus sey: ‘If you sey you be really God Son, turn all this stone to bread.’ But Jesus tell am wetin dem don write before, when e sey: ‘Dem don write am sey, “No be only food go give you life, but na to listen to all the things wey Jehovah talk.”’

Devil come still tell Jesus sey: ‘If you sey you be really God Son, jump go down from the temple. Dem don write am sey God go send im angel come catch you.’ But Jesus still tell am wetin dem don write before, when e sey: ‘Dem don write am sey make you no test Jehovah.’

Satan come still test Jesus again. E show am all the kingdom wey dey the world and the fine fine things wey dey. E tell am sey: ‘I go give you all this kingdom and the fine things wey dey, if you bow down for me only once.’ But Jesus answer am sey: ‘Comot for here Satan! Dem don write am sey na only Jehovah you go worship.’

Satan come waka leave Jesus. God come send some angel come give Jesus food chop. Na from that time Jesus come dey preach the good news about God Kingdom. Na that work God send am come do for earth. People like wetin Jesus dey teach dem no be small, na im make dem dey follow am go anywhere e go.