God Make Heaven and Earth

Na Jehovah make us. E make everything wey we dey see and wey we no dey see. But before Jehovah make the things wey we dey see, e first make many angel. You know who angel be? Angel na people wey Jehovah make wey be like am. We no fit see dem as we no fit see God. The first angel wey Jehovah make help am make many things, like star and many other things. E still make this earth fine for us to stay.

Because Jehovah want make human being and animal live for this earth, e come make sun to give us light. E still make mountain, big river and small river.

Jehovah come talk sey: ‘I go make grass, plant, and tree.’ So different different kind of fruit, vegetable and flower come start to dey grow. Jehovah come make all the animal​—like the one wey dey fly, the one wey dey swim and even the one wey dey waka small small for ground. E still make small animal like rabbit and big animal like elephant. Which animal you like pass?

Jehovah come tell the first angel sey: ‘Make we make man.’ Human being go dey different from animals. Dem go fit use sense make things. Dem go fit talk, laugh, and pray. Dem go take care of the earth and all the animal. You know who the first man be? Make we see.