From September, the example wey we fit follow, wey dey our Meeting Book go get another new topic wey be “Teach the Truth.” Wetin we want do na to use one question and one Bible verse take teach people truth from Bible.

If we see sey the person like our message and e go want make we come back, we fit give am book or we fit show am video for jw.org. Make we try see the person again after small time to continue from where we stop. The point wey we go talk for this new style and the assignment wey we go dey do for meeting, na from inside What Can the Bible Teach Us? book we carry am. We go fit see other question and Bible verse for there wey go help us if we want use only Bible for return visit or Bible study.

Na only one road fit carry us reach life wey no go end. (Mt 7:13, 14) As e be sey we dey talk to people for different different religion and different different tribe, na wetin go touch their mind we go use teach dem one by one. (1Ti 2:4) As we dey learn different different topic for Bible, and as we dey ‘sabi use Bible well,’ we go dey happy well well, and we go fit dey teach people the truth well.—2Ti 2:15.

People for the whole world need wetin go make their mind come down. (Ec 4:1) For September, we go try give people The Watchtower pass as we dey do before, this watchtower go talk about wetin fit make people mind come down. Share this magazine reach everywhere for your territory. But no leave the magazine for person door if the person no dey house because wetin we really want na to meet the people and tell dem wetin go make their mind come down.

WETIN YOU GO TALK

“Everybody need wetin go make their mind come down. But where we go see am? [Read 2 Corinthians 1:3, 4.] This Watchtower talk about how God dey give us wetin go make our mind come down.”

If the person like our message and e collect the magazine, . . .

SHOW AM THIS VIDEO WHY E GOOD MAKE WE LEARN BIBLE?

After, ask am whether e go like study Bible.

TELL AM WETIN UNA GO TALK ABOUT WHEN YOU COME BACK

Ask am one question wey you go answer when you come back, you fit ask am sey: “Why God allow us make we dey suffer?”