Wetin We Go Do To Make How We Dey Preach Better​—Use Question Well

WHY E DEY IMPORTANT: If “the thinking wey dey person heart be like water wey deep,” question be like bucket wey dem take dey fetch the water come out. (Pr 20:5) Question dey help person put mind for wetin we dey tell am. If we choose our question well, we go get better result. Jesus use question well. How we fit copy im example?

HOW YOU GO TAKE DO AM:

• Ask question wey go help am think. Jesus ask different different question to know wetin im disciples dey think. (Mt 16:13-16; be 238 ¶3-5) Which question you fit ask to know wetin the person wey you dey preach to dey think?

• Ask question wey go help am get the answer. Jesus help Peter correct how e dey think. E ask Peter question, come still give am idea wey help am get the correct answer. (Mt 17:24-26) Which question you fit ask, to help the person wey you dey preach to get the correct answer?

• Thank am for im answer. When one scribe answer Jesus question well, Jesus thank am for im answer. (Mr 12:34) If person wey you dey teach answer question, how you go take show sey you happy?

WATCH THE FIRST PART OF THE VIDEO: DO THE WORK WEY JESUS DO​—TEACH, AND AFTER, MAKE UNA ANSWER THIS QUESTION:

• Even though sey wetin the brother dey teach correct, why we no suppose follow im example?

• Why we fit talk sey to teach person no be just to explain?

WATCH THE SECOND PART OF THE VIDEO, AND AFTER, MAKE UNA ANSWER THIS QUESTION:

• How the brother take use question well?

• Which other thing we fit copy from the way e take dey teach?