You No Think Sey You Need to Do Well?

1, 2. (a) How wetin dey Isaiah 60:22 take dey happen for our time? (b) Wetin we need now for inside congregation?

‘THE one wey no reach anything go turn to one thousand and the one wey small go turn to big country.’ (Isa. 60:22) Wetin dey this Bible verse dey happen for this last days. How? For 2015 service year, na 8,220,105 publisher join preach for the whole world! The last part for that verse suppose touch all of us one by one because Jehovah our Papa for heaven talk sey: ‘Me, Jehovah, go quick do am by myself when the time reach.’ Like passenger wey dey inside motor wey the driver dey fire speed, na so our preaching work take dey fire speed dey go. How e take concern us? We dey do everything wey we fit do to preach well well? Many brothers and sisters dey fill form sey dem want be regular or auxiliary pioneer. And, e no dey sweet us as many of dem dey go preach for where publishers no too many? Or even when dem dey do other things for Jehovah work?

² Even with this one, we still dey see sey we need more people to do this work. Na around 2,000 new congregation dey come out every year. If 5 elders go dey this new congregation dem, e mean sey na 10,000 ministerial servant go be elder every year. So, this one show sey many brothers need to try make dem fit be ministerial servant. Another thing be sey, whether we be brother or sister, all of us get plenty work to do for God work.—1 Cor. 15:58.

WETIN E MEAN TO DEY DO WELL FOR GOD WORK?

3, 4. Wetin e mean for you to do well for God work?

³ Read 1 Timothy 3:1. The Greek word wey dem translate as ‘dey try’ mean sey person go stretch hand to collect something; e fit be something wey no near am. This word wey apostle Paul use, show sey for us to fit dey do well for God work, we must try. Think am sey one brother dey reason how e fit dey do well for congregation. E fit no be ministerial servant now, but e come see sey e need to get the kind character wey go make am fit be ministerial servant. When e don be ministerial servant, e go still get the mind to do wetin go make am fit be overseer. Whether na elder or ministerial servant e want be, e go try well well to get the kind character wey go help am fit do this work for congregation.

⁴ Na so e still be for brothers and sisters wey want be pioneer, Bethelite, or Kingdom Hall construction worker. Dem go need to try well well so that their plan go work. Make we come see how Bible take dey help all of us to fit dey do well for God work.

TRY MAKE YOU FIT DEY DO WELL FOR GOD WORK MORE MORE

5. How young people fit use their power for God work?

⁵ Young people get the kind power wey person need to fit do more for God work. (Read Proverbs 20:29.) The work wey some young brothers wey dey Bethel dey do, na to print and bind Bible and other book dem. Many young brothers and sisters dey join build Kingdom Hall and dey take care of am. When something like heavy rain or breeze scatter property, young people dey join other brothers and sisters wey get experience pass dem, do work. We still get many young pioneer wey dey go preach give people wey dey speak another language.

6-8. (a) Wetin help one young brother change how e dey feel about Jehovah work and wetin e gain? (b) How we go fit see by ourself sey Jehovah good?

⁶ Na true sey you know why e good to use all your mind do Jehovah work. But what if wetin dey do you, na wetin do one brother wey im name na Aaron? Im papa and mama na Jehovah Witness, but see wetin e talk, “Study and preaching no dey sweet me.” E want enjoy to serve Jehovah but e no know why e no dey happy. Wetin e come do?

⁷ Aaron arrange im time well so that e go fit dey do im Bible reading, dey prepare for meeting, and dey answer question for meeting. E come dey pray pass before. This things wey e dey do help am to love Jehovah more more. So e come dey do well for congregation and Jehovah work come dey sweet am. E pioneer, e join hand go help brothers and sisters wey something like heavy rain, scatter their property; e still go another country go preach. Aaron dey Bethel now, and na elder. How Aaron see wetin e do with im life? “I don ‘taste Jehovah and I don see sey Jehovah dey good.’ Because Jehovah don bless me, I feel sey I dey owe am and this one dey make me work well well for am, and e dey bless me more more.”

⁸ Psalm 34:10 sey: ‘People wey dey put mind for Jehovah side no go stop to get good thing.’ (Read Psalm 34:8-10.) True true, Jehovah no dey fail people wey dey serve am. If we do everything wey we fit do for God work, we go see by ourself sey Jehovah good. And when we use all our mind take serve am, belle go dey sweet us.

NO STOP, NO TIRE

9, 10. Why e good make you ‘no tire to wait’?

⁹ As you dey try to do wetin you get for mind for Jehovah work, make you ‘no tire to wait.’ (Mic. 7:7) Jehovah dey always help people wey dey serve am, even if dem need to wait reach when dem go fit make dem regular pioneer, ministerial servant or elder. God promise Abraham sey e go give am pikin, but Abraham need to show sey e get faith and sey e fit wait. (Heb. 6:12-15) Even if many years pass before e born Isaac, Abraham no tire to wait. This one make Jehovah come bless am.—Gen. 15:3, 4; 21:5.

¹⁰ E no easy for person to wait. (Prov. 13:12) But if we too dey think about our condition, e fit make us tire to wait. So make we use the time wey we take dey wait, to get the kind character wey go make Jehovah fit use us for congregation more. How we fit do am? Make we see three way.

11. Which kind character go help us? Wetin make this character good?

¹¹ Get character wey go help you. When we dey read Bible and dey think about wetin we dey read, we go get good sense and we go wise; we go know how to think well before we do things and we go sabi use sense choose better thing wey God like. For person wey want be overseer for congregation, this kind character need to show for the person body. (Prov. 1:1-4; Titus 1:7-9) Our book dem dey help us know wetin God want make we do for matter like, the kind film and music wey we dey like to play; how we dey dress; how we dey use money; and how we dey treat other people. Na when we dey do wetin we don learn from Bible and our book dem, we fit do wetin go make Jehovah happy with us.

12. How brothers and sisters for congregation fit show sey person fit trust dem?

¹² Show sey person fit trust you. Whether we be brother or sister, make we do everything wey we suppose do to make sure sey we no play with any assignment or work wey dem give us for congregation. Because Nehemiah na governor that time, e need to choose people wey go do Jehovah work. Which kind people e choose? Na people wey dey fear God, wey person fit trust. (Neh. 7:2; 13:12, 13) Na so e still be today. Wetin ‘dem want from servant be sey, make e be person wey dem fit trust.’ (1 Cor. 4:2) People dey see the better work wey you dey do.—Read 1 Timothy 5:25.

13. Like Joseph, wetin you go do if person no treat you well?

¹³ Make Jehovah clean your dirty comot. Wetin you go do if person no treat you well? E for good make you quick go talk about am with the person. But if you go there go dey tell the person sey na im fault, water fit pass garri. Bible tell us sey Joseph brothers no treat am well, but that one no make am come dey carry dem for mind. After, because another person lie for Joseph head, dem come put am for prison. Even with all this suffer, e let Jehovah guide am. Wetin e gain? ‘Na the thing wey Jehovah talk na im clean im dirty comot.’ (Ps. 105:19) When all this suffer don end, Joseph come reach to do one special work. (Gen. 41:37-44; 45:4-8) You go fit handle problem wey dey worry you for mind if you (1) pray to Jehovah make e give you better sense and power, and (2) dey gentle for character and how you dey talk. Jehovah go help you.—Read 1 Peter 5:10.

PREACH WELL PASS AS YOU DEY PREACH NOW

14, 15. (a) Why e good make we ‘dey check how’ we dey preach? (b) How your area fit make you change the way you dey preach? (Go check the first picture and the box “Try Use Another Way Take Preach.”)

¹⁴ Paul tell Timothy sey: ‘Continue to dey put your mind for how you dey read for where people dey, how you dey give advice, how you dey teach. Dey check how you take dey live your life and wetin you dey teach.’ (1 Tim. 4:13, 16) E don tey wey Timothy start to preach. But for Timothy to get result for im preaching, e need to ‘dey check how’ e dey teach. Make e no think sey the one style wey e dey use go dey work every time. If e want make wetin e dey preach touch people mind, e suppose dey change the style wey e take dey teach because people different. Since we self dey preach, make we do wetin Paul tell Timothy.

¹⁵ No be every time we dey see people for house when we dey preach from house to house. Because of the kind house wey dey some area, we no fit enter go preach. If na so e be for your area, why you no try another style?

16. Wetin we fit do to get better result when we dey preach for open place?

¹⁶ To preach for open place, na one fine way to take preach to people. Many of us don dey get better result from this kind preaching and e dey sweet us. Brothers and sisters dey talk to people for bus stop, where train dey drop people; inside market, for park and for other open place. Before some brothers start to preach to person for this kind place, dem fit use wetin dem hear for news, better thing about the person pikin, or question about the person work. As dem dey talk, the publisher go carry one verse for Bible enter the matter, wey go make the person talk. Many times, wetin the person go talk fit make dem continue to talk about Bible.

17, 18. (a) Wetin fit make you get mind to preach for open place? (b) Wetin you learn, from the way David take praise Jehovah, wey fit help you for your preaching?

¹⁷ If e dey hard you to preach for open place, no tire. Still dey try. E dey hard Eddie, one pioneer for New York City, to preach for open place. But as time dey go, e come dey get mind small small. Wetin help am? E talk sey na the research wey im and im wife dey do for their family worship. Dem go find different different way wey dem fit answer different people wey no want listen to dem. And dem still dey meet other publishers wey go tell dem wetin dem fit talk. Eddie don dey enjoy to preach for open place.

¹⁸ As we dey try to sabi preach pass before and as we dey gather mind to preach, people dey see us. (Read 1 Timothy 4:15.) Apart from that one, you fit even help other people come serve Jehovah. And you go praise our Papa wey dey heaven like David, wey sing sey: ‘I go praise Jehovah every time; I no go stop to praise am with my mouth. I go use Jehovah make mouth; people wey no dey carry body up go hear and dem go happy.’—Ps. 34:1, 2

GOD DEY HAPPY WHEN YOU DEY DO WELL

19. Why Jehovah servant fit still dey happy even if im condition no easy?

¹⁹ David still sing sey: ‘Everything wey you make go praise you, O Jehovah. And your people wey hold you tight go praise you. Dem go talk about how you dey rule as king and talk about the power wey you get, to tell people about the thing wey you take your power dey do and how your kingdom fine reach.’ (Ps. 145:10-12) David talk wetin dey the mind of all Jehovah servant. But what if you no fit preach reach as you want preach, because of sickness or old age? Make you no forget sey, as you dey preach to people wey dey come take care of you and other people, you still dey praise Jehovah. Na so e still be for Jehovah servant wey dey prison. If dem give you chance for there, make you dey preach. Jehovah mind dey sweet am for wetin you dey do. (Prov. 27:11) And Jehovah still dey happy if you dey do wetin e like even if your people no be Jehovah Witness. (1 Pet. 3:1-4) Even if things no easy for your side, you fit still dey do wetin e like and serve am well.

20, 21. If Jehovah organization give you more work, how people fit gain from you?

²⁰ Jehovah go help you if you continue to do well. E fit be sey you need to arrange yourself well so that you fit dey get time to help people learn wetin dey Bible. And even your brothers and sisters fit gain well well from you. Because you no dey carry shoulder up as you dey do your work for congregation, brothers and sisters go love you and thank you well well.

²¹ Whether e don tey wey we dey serve Jehovah or we just start, all of us go fit continue to do well. But, how people wey don dey serve Jehovah well tey tey fit help new ones? Na wetin we go talk about for our next topic be that.