Jehovah Go Make Your Plan Get Head

1. Wetin young people need to sitdown do? But wetin go help dem make dem no too dey worry? (Check the first picture.)

BEFORE person travel, e dey first sitdown plan how e go waka. No be so? Na so life still be. Na when you dey young you go plan wetin you want use your life do. But the truth be sey, e no easy to choose wetin we go use our life do. One young sister wey im name na Heather, talk sey: “E no easy for person to sitdown plan wetin e want use im life do. E dey make person fear sometimes.” But you no need to let am fear you. Jehovah tell im people sey: ‘No worry because I be your God. I go make you strong, yes, I go help you.’​—Isa. 41:10.

2. How we take know sey Jehovah want make our tomorrow better?

² Jehovah want make we plan our life well. (Eccl. 12:1; Matt. 6:20) E want make we dey happy. The things wey e dey do for us show sey na true. For example, we dey see, hear and taste the things wey e make. Jehovah still dey take care of us. And e dey teach us wetin we go do to make our life better. Jehovah tell people wey no gree follow wetin e talk sey: ‘See! My servant dem go dey happy, but shame go catch una. See! My servant dem go happy well well because their mind dey sweet dem.’ (Isa. 65:12-14) So if you plan your life well, Jehovah go happy.​—Prov. 27:11.

BETTER PLAN WEY GO MAKE YOU HAPPY

3. Wetin Jehovah want make you get for mind before you plan?

³ Wetin Jehovah want make you get for mind before you plan? We need to know Jehovah and serve am well. This one go make us happy. Na so God take make us. (Ps. 128:1; Matt. 5:3) The only thing wey animal know na to chop, drink water, and born pikin. But God no make human being like animal. E want make you plan better thing wey you go use your life do. Bible talk sey God dey show people love, and e dey happy. E come still talk sey God make us ‘to be like am.’ (2 Cor. 13:11; 1 Tim. 1:11; Gen. 1:27) If you show people love like God, you go happy. Bible talk sey: ‘Na when we give we dey happy pass when dem give us.’ (Acts 20:35) Wetin that place talk don happen to you before? Na the truth about life be that. So, make anything wey you dey plan show sey you love God and people. Na wetin Jehovah want be that.​—Read Matthew 22:36-39.

4, 5. Wetin make Jesus happy?

⁴ Jesus show young people better example. We know sey children like to play. So when Jesus be small pikin, im self go like to play. Bible talk sey ‘time dey to laugh and time dey to dance.’ (Eccl. 3:4) Jesus still study Bible. This one help am near Jehovah more more. When Jesus dey 12 years, the people wey dey teach for temple surprise as ‘e take dey understand things and the way e dey answer’ question about Bible.​—Luke 2:42, 46, 47.

⁵ When Jesus don grow, e happy because e dey do wetin Jehovah want make e do. For example, God want am ‘to preach good news to poor people and tell blind people sey dem go see again.’ (Luke 4:18) Psalm 40:8 tell us sey e dey sweet Jesus to do wetin God want. No wonder e dey like to teach people about im Father. (Read Luke 10:21.) After Jesus teach one woman about the correct way to serve God, e come tell im disciple dem sey: ‘My food na to do wetin the Person wey send me want and to finish im work.’ (John 4:31-34) Jesus happy because e do wetin show sey e love God and people. So when we dey do like Jesus, we self go happy.

6. Why e good make you talk to other people about wetin you plan to do?

⁶ Many people start to dey pioneer when dem dey young. This one really make dem happy no be small. You fit tell dem your plan. Bible talk sey: ‘Plan dey fail when dem no talk am together. But wetin you plan go get head if plenty people advice you.’ (Prov. 15:22) This brothers and sisters fit tell you sey pioneer na something wey go help you for life. When Jesus dey heaven, im Father teach am many things. Even when e come this earth, e no stop to learn. For example, Jesus see sey to help people learn the good news dey really sweet. E still see sey e dey sweet to do wetin Jehovah want even when e dey face wahala. (Read Isaiah 50:4; Heb. 5:8; 12:2) Make we see how full-time service (like regular pioneer, Bethelite and people wey dey build Kingdom Hall) fit make you happy well well.

WETIN MAKE PREACHING WORK SWEET?

7. Why e be sey many young people dey like preach?

⁷ Jesus talk sey make we ‘go make people’ im disciple and make we ‘dey teach dem.’ (Matt. 28:19, 20) You want join do this work? If your answer na yes, e mean sey na better thing you choose. E go make your life better, and e go make Jehovah happy. So like person wey dey learn work, e good make you learn how to preach well. E get one brother wey im name na Timothy. E dey 19 years when e start to pioneer. E talk sey: “I like full-time service because I dey see am as way to show Jehovah sey I love am. When I first start, I no even get one Bible student. But later, I go another place go preach. Before one month, I start to study Bible with different people. One of my student come start to come Kingdom Hall. After I go Bible School for Single Brothersa for two months, dem come send me go another place. For that place I come get four Bible student. I like to dey teach people. And e dey make me happy to see how Jehovah dey use im holy spirit change their life.”​—1 Thess. 2:19.

8. Wetin some young people don do to fit preach more?

⁸ Some young people don go learn another language. Na wetin one brother wey im name na Jacob do. Na United State e from come. E talk sey: “When I dey seven years, many of my classmate for school come from Vietnam. I want tell dem about Jehovah before, but I no fit. So after sometime, I come talk sey I go learn their language. So as I dey read English Watchtower, I dey check Vietnamese Watchtower. I still make friends for one congregation wey dey use Vietnamese language near my area. When I dey 18 years, I start to pioneer. Later, I come go Bible School for Single Brothers. This one help me for the new area wey dem send me go. For the Vietnamese language group wey dey there, na only me be the elder. E dey surprise many Vietnam people sey I don sabi their language. Dem dey invite me come their house. And many times I dey fit study Bible with dem. Some of dem don even baptize.”​—Check Acts 2:7, 8.

9. How preaching work take dey help you?

⁹ Preaching dey help us no be small. E dey help us talk to people well and get better character wey go make people like us for working place. E still dey help us get mind and use sense do things with people. (Prov. 21:5; 2 Tim. 2:24, ftn.) But the one wey dey make person happy pass be sey, preaching dey help us fit use Bible show people wetin we believe. And e still dey help us learn how to take work with Jehovah more more.​—1 Cor. 3:9.

10. Even when e hard to see people study with for your area, wetin fit still make you happy?

¹⁰ Even if many people for your area no want study Bible, preaching fit still dey sweet you. To help person come serve Jehovah, na everybody for congregation dey join hand do the work. E fit be sey before the person baptize, na only one brother or sister study with am. Na all of us dey go preaching. So all of us go still happy together if the person come serve Jehovah. For example, e get one brother wey im name na Brandon. Na nine years e take preach for area wey many people no want study Bible. The brother talk sey: “I like to preach because na wetin Jehovah sey make we do. Na when I just finish school I start to pioneer. E dey sweet me to advice the young brothers for congregation. I dey happy when I dey see dem dey do well. After I don go Bible School for Single Brothers, dem come send me go another area go pioneer. Na true sey I never study person wey later baptize. But other people don do am. I happy sey I plan well to fit do more for the preaching work.”​—Eccl. 11:6.

WHERE YOUR PLAN FIT CARRY YOU REACH

11. Which kind work many young people don enjoy?

¹¹ E get many work wey you fit do for Jehovah. For example, many young people dey join build place like, Kingdom Hall and Assembly Hall. Jehovah organization still need many Kingdom Hall. People dey praise Jehovah for this kind place. So when you join build am, you self go happy. As you dey work with other brothers and sisters, belle go dey sweet you. You go still learn many things. For example, you go learn to work well so that nobody go injure. And you go still learn how to obey people wey dey direct the work.

12. How pioneer work fit help person do other things for Jehovah?

¹² One brother wey im name na Kevin, talk sey: “Since I small, e dey my mind to do full-time work for Jehovah. I come start to pioneer when I dey 19 years. Sometimes, I dey follow one brother go build people house so that I fit support myself. I learn how to roof house, fix window, and door. Later, I join one group wey dey help brothers and sisters wey things like heavy breeze, scatter their property. We dey help dem build their house and Kingdom Hall wey scatter. I spend two years with the group. When I hear sey dem need people for South Africa, I come fill form and dem invite me. For Africa, after we use some weeks take build one Kingdom Hall finish, we go comot go another one. We be like one family for the group wey I dey. We dey stay together, we dey study Bible together and we dey work together. I still dey like to preach with the brothers for the area. Wetin I plan to use my life do when I still be boy, make me happy. I no know sey e go sweet me reach like this.”

13. Why Bethel work dey make young people happy?

¹³ Some people wey plan to use their life do full-time work for Jehovah, don dey Bethel now. Bethel work dey sweet because everything wey you dey do for there na for Jehovah. Brothers and sisters for Bethel dey help do Bible and other book dem, wey people go use learn the truth. One Bethelite wey im name na Dustin, talk sey: “Na when I dey nine years I plan sey I go do full-time service. As I finish school, I start to pioneer. After one and half year, dem come invite me come Bethel. Na for Bethel I learn how to use different different machine wey dem take dey print. Later, dem come still teach me how to do computer program. For Bethel, e dey sweet me to hear about the better things wey dey come out from our preaching work for the whole world. Wetin we dey do for Bethel dey help people near Jehovah. Na this one make me like to dey serve Jehovah for Bethel.”

WETIN YOU PLAN TO TAKE YOUR LIFE DO?

14. How you go take plan to do full-time work for Jehovah?

¹⁴ How you go take plan to do full-time work for Jehovah? You need to get better character wey Christian suppose get to fit serve Jehovah full-time. Na this one go make your plan get head pass. So, make you dey study Bible well. Dey think well about wetin you dey study, and try dey answer question for meeting. When you still dey school, you fit learn how to preach to people. Show people sey you love dem. How? Learn to use sense ask people question to know wetin dey their mind, and listen to dem when dem dey answer you. You fit still use your mind do other things for congregation. You fit join clean and repair Kingdom Hall. Jehovah like to use people wey dey carry body down, and people wey dey use their mind work for am. (Read Psalm 110:3; Acts 6:1-3) Apostle Paul tell Timothy make e follow am go dey preach because ‘brothers dey talk well about Timothy.’​—Acts 16:1-5.

15. How you go take get work wey go help you pioneer?

¹⁵ Many people wey dey pioneer still dey work. (Acts 18:2, 3) You fit use small time learn something wey go help you get part-time work. As you dey plan, talk with circuit overseer and other pioneer for your circuit. Ask dem the kind work wey pioneer fit do. After that one, Bible talk sey make you ‘put everything wey you dey do for Jehovah hand, and your plan go get head.’​—Prov. 16:3; 20:18.

16. Wetin you go gain If you join do full-time service when you dey young?

¹⁶ Jehovah want make you ‘hold the real life tight’ so that your tomorrow go better. (Read 1 Timothy 6:18, 19.) Full-time service dey make you know other people wey dey full-time. And e go still help you dey do well as you dey serve Jehovah. Many people don see sey, when dem join do full-time service when dem young, e dey make their marriage get head. Many times, people wey pioneer before dem marry, still continue the pioneer work with their husband or wife.​—Rom 16:3, 4.

17, 18. If you love Jehovah, wetin e go make you do for am?

¹⁷ Na the love wey you get for Jehovah go make you plan wetin you go do for am. When you plan am well, Psalm 20:4 talk sey, Jehovah go ‘give you wetin dey your mind, and let everything wey you want do get head.’ So e good make you think about wetin you want use your life do. Think about the things wey Jehovah dey do today, and how you fit take do more for im work. Then plan wetin you go do to make am happy.

¹⁸ If you enter full-time service, Jehovah go happy. This kind thing go make life sweet you well well. So, ‘dey happy because of Jehovah, and e go give you wetin you want.’​—Ps. 37:4.