Question From People Wey Dey Read Our Book

Why Jehovah Witness dey draw apostle Paul as person wey no get plenty hair for head?

The truth be sey, nobody today fit talk how apostle Paul really be. Apostle Paul picture wey we dey draw for our book na just picture wey artist draw. E no get anything wey science people don see wey show how Paul really be.

But e get some things wey fit help us know how apostle Paul be. For example, March 1, 1902 Zion’s Watch Tower talk about one book wey dem dey call ‘Acts of Paul and Thecla.’ Na around 150 A. D. dem write this book. The way this book take describe Paul fit be the best, and many people believe wetin dey the book. The book talk sey Paul ‘short, e no get plenty hair for head, e get bow leg, e get muscle, e eyebrow near each other, and e nose long.’

The Oxford Dictionary of the Christian Church (1997 edition) still talk something about this book wey describe Paul. E sey: “E dey possible sey some of the things wey dey ‘Acts of Paul and Thecla’ na things wey really happen.” For olden days, people value ‘Acts of Paul and Thecla’ well well. Na im make 80 of this book dey for Greek language, and other language still get this book. So, Paul picture wey we dey draw for our book match with how dem describe Paul for olden days.

But remember sey the things wey Paul do dey important pass how e body be. When Paul dey do Jehovah work, some people wey no like im message come dey talk sey: “If you see am face to face, e no strong and wetin e dey talk no dey make sense.” (2 Cor. 10:10) But no forget sey na Jesus Christ appear to Paul wey make am become Christian. Make we still think about all the things wey Jesus use Paul do. Bible talk sey Jesus ‘select Paul make e carry im name go meet people for plenty country.’ (Acts 9:3-5, 15; 22:6-8) Still think about the better things wey we fit gain from the books wey God use Paul write for Bible.

Paul no boast about the things wey e do before e become Christian. And for Bible, e no talk how im body be. (Acts 26:4, 5; Phil. 3:4-6) When e dey talk about imself, e carry body down and e sey: ‘I be the apostle wey small pass. And I no reach person wey dem suppose dey call apostle.’ (1 Cor. 15:9) Later, e still talk sey: “Na me, person wey no even reach any of the holy ones, dem come give this kind favor, so that I go fit preach the good news about the better better things wey Christ get wey nobody fit understand.” (Eph. 3:8) So, the message wey Paul preach dey important pass the kind body and face wey e get.