Woo kjennen Vodasch met äare Säns veeent bliewen?

HAFT dien Sän die mol soowaut jefroacht aus: “Pape, woo weet jie soo väl?” Dan deetst die secha gaunz brow, dän siene Pape to sennen. Oba du woascht die secha noch dolla freien, wan dien Sän werkjlich no die horcht un daut uk nokjemt, waut du dän lieescht, daut am daut kaun togood komen (Spricha 23:15, 24).a

Wan dien Jung oba ieescht jrata woat, haft dee dan uk noch soo väl Respakjt fa die? Ooda späat sikj die daut soo, daut et nich mea soo es? Woo kaust du met dienen Sän veeent bliewen, wan hee ella woat? Well wie ieescht mol seenen, woosoo daut kaun schwoa sennen.

Dreeatlei, wuarom daut kaun schwoa sennen

1. NICH JENUACH TIET: En väl Lenda sent de Vodasch dee, waut daut mieeschte Jelt vedeenen motten toom fa de Famielje sorjen. Un wäajen dee äare Oabeit, motten dee meist emma dän Dach äwa von tus sennen. Opp eenje Städen sent de Vodasch mau sea weinich Tiet met äare Kjinja toop. En waut Lenda biejlikj kjemren de Vodasch sikj nich mol 15 Minuten dän Dach om äare Kjinja.

TOOM NODENKJEN: Woo väl Tiet best du met dienen Sän toop? Schriew die daut mol fa eent ooda twee Wäakj opp, woo väl Tiet du jieda Dach met dienen Sän toop waut deist ooda met dän vetalst. Veleicht woascht die wundren motten, woo weinich Tiet du mau met dän toop best.

2. DIEN VODA WIA NICH EEN GOODET VÄABILT: Eenje Mana hauden nich väl met äaren ieejnen Voda to doonen. Jean-Marie, waut en Frankreich wont, sajcht: “Ekj haud mau weinich met mienen Voda to doonen”. Waut deed daut aun am? Hee sajcht: “Biejlikj es mie daut schwoa, met miene ieejne Säns, äwa wichtje Sachen to räden.” Eenjemol es daut uk soo, daut de Voda un Sän sikj goot kjanen, oba dee woaren nich goot foadich. Philippe, waut 43 Joa es, sajcht: “Mienen Voda wia daut sea schwoa, mie to wiesen, daut hee mie leewd. Un doawäajen mott ekj mie sea aunstrenjen, mienen Sän to wiesen, daut ekj am leew.”

TOOM NODENKJEN: Jleefst du, daut daut, woo du to dienen Sän best, waut doamet to doonen haft, woo dien Voda to die wia? Best du enjeworden, daut du dienen Voda sien goodet ooda schlajchtet Biespel nodeist? Wan jo, opp waut vonne Wajch?

3. ORRAJCHTE IEDEEEN, WAUT DE MENSCHEN HABEN: En eenje Lenda denkjen de Menschen, daut et nich wichtich es, daut de Vodasch halpen de Kjinja opptrakjen. Luca, waut von Europa es, sajcht: “Doa, wua ekj oppwoss, denkjen de Menschen, daut et bloos de Mames äare Veauntwuatunk es, sikj om de Kjinja to kjemren.” En aundre Lenda jleewen de Menschen, daut Vodasch bloos de Oppgow haben, de Kjinja trajchttowiesen. Biejlikj sajcht George, waut en een Launt en Afrika oppwoss: “Doa, wua ekj groot wort, es daut soo, daut de Vodasch nich wellen met äare Kjinja spälen, wäajens dee haben Angst, daut dee an dan nich respakjten woaren. Un doawäajen es daut fa mie emma schwoa jewast, met mienen Jung bloos fa Scheengonen toop to sennen.”

TOOM NODENKJEN: Waut denkjen de Menschen doa, wua du wonst, waut de Vodasch doonen sellen? Denkjen dee, daut et de Frues äare Oabeit es, de Kjinja opptrakjen? Woat de Vodasch toojerot, daut dee sellen äare Säns Leew wiesen un sikj om dee kjemren ooda denkjen de mieeschte, daut dit nich fa Vodasch es?

Haft die daut aus Voda uk mol soo jegonen? Waut kaust du dan doonen, daut du un dien Sän dolla veeent woaren? See mol disen Rot, waut hia aunjejäft es.

Fang aun, wan dien Sän noch junk es

Säns wellen von kjlien aun äare Vodasch nodoonen. Soo, nuzt daut ut, wan dien Jung noch kjlien es, toom met dän toop sennen. Woo kaust du daut doonen? Un wua kaust du de Tiet häanämen doatoo?

Lot dienen Sän die emma halpen, wan daut schauft. Biejlikj wan du wua fäjen deist, jäw dän eenen kjlienen Bassem, daut dee die halpen kaun. Ooda wan du wua growen deist, jäw dän eene kjliene Scheffel. Dee woat secha sea schaftich sennen, wan dee kaun met die toop schaufen un die nodoonen. Daut dieet dan veleicht een bät lenja, oba jie woaren junt mea räakjnen un du woascht dän lieren een gooda Oabeida to sennen. De Schreft rod de Vodasch aul lang trigj too, daut dee sullen met äare Kjinja toop schaufen un dee Tiet utnutzen toom met dee räden un dee belieren (5. Mose 6:6-9). Dis Rot es vondoag dän Dach uk noch jeltich.

Oba daut jeit nich bloos om schaufen; nemm die uk Tiet toom met dienen Jung toop spälen. Toop to spälen, es väl mea aus bloos Scheengonen haben. Forscha haben rutjefungen, daut wan Junges met äaren Voda toop spälen, dan woagen dee sikj mea un dee wellen niee Sachen proowen.

Doa es noch eene Uasoak, wuarom daut wichtich es, daut Vodasch un Säns toop spälen. De Jelieeda Michel Fize sajcht, daut dän Sän daut biem spälen leichta es, sienen Voda to sajen, waut dee denkjt. Un de Voda kaun sienen Sän dan uk leichta wiesen, daut dee am väl räakjent, derch daut, waut hee sajcht un deit. Un soo lieet hee sienen Sän uk, woo dee kaun Leew wiesen. Soo deed André daut, een Voda von Dietschlaunt, aus sien Sän noch kjlien wia. Hee sajcht: “Wie deeden foaken toop spälen. Ekj pakt am om un soo lieed hee, mie uk goot to sennen”.

Verem schlopen gonen es noch eene goode Jeläajenheit, waut Vodasch kjennen utnutzen toom bätre Frind woaren met äare Säns. Läs dienen Jung foaken eene Jeschicht väa un horch, wan dee die vetalt, waut dän äwadach haft scheen ooda schlajcht jegonen. Wan du daut deist, dan woat daut leichta sennen, daut dee uk noch well met die räden, wan dee ieescht jrata woat.

Doot wieda Sachen toop

Wan sikj die daut soo späat, daut dien jugentlicha Sän nich well no die horchen ooda nich mol auntwuat, wan du dän waut frajchst, jleew doawäajen nich, daut dee verheipts nich well met die räden. Finj ut, woo du met dän räden kaust, om daut dee die sajcht, waut dee denkjt.

Jacques, een Voda, waut en Frankreich wont, wia daut eenjemol schwoa, met sienen Sän Jérôme to räden. Oba enne Städ dän bemotten, met am to räden, deed hee sestwaut: Hee späld Footbaul met dän toop. Jacques sajcht: “No daut Gäm sad wie ons bloos oppem Grauss toop dol toom een bät vereiwen. Un daut wia dee Tiet, wua mien Sän foaken säd, waut hee docht. Dise Tiet, wua wie auleen toop wieren, holp ons, bätre Frind to woaren.”

Waut, wan dien Sän nich Sport jleicht? André denkjt daut noch goot, daut hee un sien Sän sea foaken aum Zeowes buten no de Stierns kjikjten. André sajcht: “Wie rolden ons en woame Dakjen en, hauden een Kuffel Tee enne Haunt un kjikjten nom Himmel. Wie räden von dän Schepfa von de Stierns, wie räden äwa daut, waut ons Sorjen muak un waut ons scheen jinkj, wie räden äwa meist aules” (Jesaja 40:25-26).

Un waut es, wan die nich daut intressieet, waut dienen Sän intressieet? Dan motst du daut doawäajen veleicht doonen, waut dee jleicht (Filippa 2:4). Ian, waut en Sied-Afrika wont, sajcht: “Ekj jleicht väl dolla Sport aus mien Sän Vaughan”. Ian sajcht uk noch von sienen Sän: “Hee jleicht Äarpläns un Komputasch. Un doawäajen strenjd ekj mie aun, mie uk fa daut to intressieren. Ekj neem am met doahan, wua hee seenen kunn, woo se met Äarpläns flieejen un späld met dän toop Komputa-Gäms. Ekj denkj, wäajens wie toop Scheengonen hauden, wia daut fa Vaughan leichta, gaunz op met mie to räden.”

Halp dän, sikj wieetvoll to feelen

Wan dien kjliena Jung mol waut freschet jelieet haud, dan kjeem dee secha fuaz no die un säd: “Kjikj mol, Pape!” Oba wan hee nu een Jugentlicha es, dan deit dee daut veleicht nich mea. Oba doawäajen fält dän daut noch emma to weeten, daut du daut fa goot talst, waut hee deit.

See mol, waut Jehova Gott to eent von siene Säns säd. Aus Jesus hia oppe Ieed wia un met waut sea besondret wull aunfangen, wees Gott, daut hee am leewd. Hee säd: “Dit es mien leewa Sän, met däm ekj sea tofräd sie” (Matäus 3:17, PB; 5:48). Daut stemt, daut es diene Veauntwuatunk, dienen Sän trajchttowiesen un to belieren (Efeesa 6:4). Oba du saust uk no Jeläajenheiten sieekjen, dän fa daut to lowen, waut dee goot deit un sajcht.

Fa eenje Mana es daut schwoa, äare Säns to lowen un Leew to wiesen. Daut kaun doawäajen sennen, wiels dee äare Elren veleicht dolla no dee äare Fäla kjikjten, enne Städ dee to lowen. Wan daut bie die soo wia, dan woascht du die motten sea aunstrenjen, daut du dienen Sän lowen kaust. Woo wurscht du daut doonen kjennen? Luca, von dän wie ea aul räden, schauft foaken tus met sienen 15-joaschen Sän Manuel toop. Hee sajcht: “Ekj saj to Manuel, daut hee met eene Oabeit saul aunfangen un wan am Help fält, saul hee mie sajen. Mieeschtens kjricht hee de Oabeit auleen jedonen. Wan hee de Oabeit goot deit, dan feelt hee sikj goot äwa sikj selfst un waut wieet. Un ekj low am doafäa, daut hee daut soo fein jedonen haft. Un wan hee daut nich soo kunn, aus hee sikj jewenscht haud, dan low ekj am doawäajen noch doafäa, daut hee sikj soo aunjestrenjt haft.”

Woo kaust du dienen Sän noch halpen, sikj waut wieet to feelen? Unjastett dän, wichtje Sachen notokomen, waut dee sikj väajenomen haft. Oba waut, wan dän daut lenja dieet, daut to volbrinjen, aus du jedocht hautst? Ooda waut, wan daut, waut dee sikj väajenomen haft, waut aundret es, aus daut, waut du die fa am jewescht hautst? Dan woascht du daut veleicht eefach motten soo aunnämen. Jacques, von dän wie aul ea räden, sajcht: “Ekj proow, mienen Sän to halpen, sikj soont väatonämen, waut dee uk volbrinjen kaun. Oba ekj proow uk doano to seenen, daut daut soont es, waut hee well doonen un nich daut, waut ekj mie wensch. Un ekj hool uk em Denkj, daut hee daut mott soo doonen, aus hee kaun, wan sikj mie daut uk langsom ooda bosich väakjemt.” Wan du dienen Sän siene Entscheidungen achten deist un am lowen deist, fa waut hee goot deit, un am Moot toosprakjst fa daut, waut nich soo goot utkjemt, dan halpst du am, daut to volbrinjen, waut hee sikj väajenomen haft.

Eenjemol woat daut schwoa sennen tweschen Voda un Sän. Oba oppe Lenjd woat dien Sän gaunz secha wellen met die veeent bliewen. Wäajens wäa wudd nich jleichen, met wäm veeent to bliewen, waut eenem halpt wiedatokomen?

[Footnoot]