Wuarom trakj wie ons fa de Toopkomes aunstendich un schmock aun?

Veleicht hast du opp de Bilda en dit Heft aul jeseenen, daut Jehova siene Zeijen sikj fa de Toopkomes emma schmock un ordentlich auntrakjen. Wuarom sent wie doarom bedocht, woo ons lat?

Wie wellen onsen Gott ieren. Gott kjikjt nich daut ieeschte doano, woo ons von buten lat (1. Samuel 16:7). Oba wiels wie am un onse Gloowesbreeda achten, see wie doano, woo wie ons fa onse Toopkomes auntrakjen. Wan eena mol sull ver eenen Rechta komen, wudd eena dan nich uk doaropp achten, daut eenem ordentlich sach? Jehova es “de Rechta fa de gaunze Ieed”, un en de Vesaumlunk doo wie am aunbäden (1. Mose 18:25). Doawäajen pauss wie opp, woo ons bie de Toopkomes lat.

Wie wellen daut nokomen, waut wie von de Schreft jelieet haben. De Schreft sajcht, daut Christen “sikj aunstendich un schmock [ooda veninftich] kjleeden” sellen (1. Timotäus 2:9-10). Wan wie daut nokomen, dan woa wie ons nich soo auntrakjen, daut wie väl Hut wiesen, daut aundre daut oppreizen saul ooda daut aule no ons kjikjen sellen. Daut bediet uk, daut wie ons nich soo kjleeden, daut daut endoontich lat, oba uk nich too oppjedrest. De Gruntsauzen ut de Schreft loten ons doawäajen oba väl Frieheit, selfst to entscheiden, woo wie ons auntrakjen ooda oppfiksen wellen. Wan ons ordentlich lat, kjenn wie “de Lia von Gott . . . doaderch auntrakjent moaken” un am veharlichen (Titus 2:10; 1. Petrus 2:12). Soo kjenn wie uk methalpen, daut aundre goodet von Jehova siene Deena denkjen.

Eena brukt nich von de nieste un dieeschte Kjleeda haben, om nom Vesaumlungshus to komen. Eenem saul eefach rein un ordentlich loten.

• Wuarom es daut nich endoont, woo eena sikj fa de Toopkomes auntrakjt?

• No woone Gruntsauzen kjenn wie ons rechten, wan daut doarom jeit, woo ons loten saul?