Gumonesa Gudi Yone

10 Ngamonele muanjelo muko wa ngolo wakhalele mukatuga mu dilu mu bulumuga, wakhalele wa gusudiga* dituta, wakhalele nu khongolo holu dia muto wenji, phala yenji yakhalele mumonega gifua kumbi, malu* enji akhalele gifua makunji a tshuya, 2 wakhalele nu rulo yazonda ya gukangula ha koko dienji. Wahagele kulu dienji dia madia mu kianga, uvi kulu dienji dia mahidi wahagele mu mavu, 3 wazuelele mu dijui diakola gifua muana bala khoshi. Hazuelele muene mu dijui diakola, ngavile majui a miandu sambadi muzuela.

4 Tangua miandu sambadi yazuelele, ngakhalele mutshigina gusonega, uvi ngavile dijui mukatuga mu dilu muzuela egi: “Bamba gisuegi gia ndaga jiazuedi miandu sambadi, ujisonega ndo.” 5 Muanjelo munu ngamonele ya gumagana mu kianga nu ha mavu wathuphuile koko guenji gua madia mu dilu, 6 muene wadilogele mu jina dia Muthu wana khala nu monyo ivo nu ivo, munu wafugile dilu nu ima yana khala guene, nu mavu nu ima yana khala hene, nu kianga nu ima yana khala muene. Wazuelele egi: “Nzambi mbagashigo munengena luko muavula. 7 Mu masugu anyi muanjelo wa sambadi mbawukhala hehi ha gushiga phungi yenji, gisuegi gia gijila gia Nzambi mbagitagenesewa, gisuegi giene gidi lukuma luabonga lunu luawambelele muene gudi ahiga enji anyi akhalele baprofete.”

8 Ngavile dijui mukatuga mu dilu munguwambela luko egi: “Nda uzule rulo ya gukangula idi ha koko dia muanjelo munu udi ya gumagana mu kianga nu ha mavu.” 9 Ngayile gudi muanjelo, ngamulombele ha gunguhana rulo yazonda. Wanguwambelele egi: “Zangula uyidie, idi mubuisa vumo diaye dialula, uvi mukano diaye udi guyivua ya mbemba gifua wigi.” 10 Ngazudile rulo yazonda ha mago a muanjelo nu ngayidile, mu kano diami yakhalele ya mbemba gifua wigi, uvi tangua ngayidile, vumo diami dialudile. 11 Anguwambelele egi: “Udi naye guzuelela luko profesi jiatadila athu nu ifutshi nu mazuelelo nu mafumu avula.”