Yoshua
18 Gungima enya Isalele agasue adibungishile gu Shilo, ajigile tenta ya gudibungishila guene handaga gifutshi giabuile giawo. 2 Uvi guasalele nu iphuta 7 ya enya Isalele inyi yakhalele khenji iheta galego khapho diawo. 3 Hene Yoshua wawambelele enya Isalele egi: “Itshi mudi munenga ha guya muzula mavu amihanele Yehowa Nzambi wa akhakh’enu? 4 Nguhanenu mala thathu mu giphuta nu giphuta hagula nguatume, aye awende mu mavu agasue ha guatala, asonege nji luholo mavu ene adi ha gutadila khapho didi naye guzula giphuta nu giphuta. Gungima mbaavutuga gudi ame. 5 Mbaakhapha mavu ene mu itshinyi 7. Enya giphuta gia Yuda mbaasala mu mavu awo gu khanda ya sud, ajigulu a Yozefe nji mbaasala mu mavu awo gu khanda ya nord. 6 Uvi enue mbamusonega luholo mavu ene adi, muakhaphi mu itshinyi 7, gungima mungubatela ndaga muasonega. Ame mbanguta mubela haha gutuama dia Yehowa Nzambi wetu mukunda nu enue. 7 Uvi enya Levi mbaashigo muheta khapho mukatshi dienu, handaga mudimo wa unganga-nzambi wa Yehowa wene khapho diawo. Enya giphuta gia Gade nu gia Ribene nu gitshinyi gia giphuta gia Manase ahetele gale khapho diawo gu khanda ya mazogelo a kumbi a Yordane, khapho diaahanele Moize muenya mudimo wa Yehowa.”
8 Mala ene adilondele ha guya. Yoshua wawambelele athu akhalele naye gusonega luholo mavu akhalele egi: “Ndenu muwende mu mavu ene, muatale, musonege luholo adi, gungima muvutuge gudi ame. Ame mbanguta mubela haha gu Shilo gutuama dia Yehowa mukunda nu enue.” 9 Mala ene ayile, awendele mu mavu ene agasue, asonegele luholo mavu ene akhalele nu membo awo, akhaphele mavu ene mu itshinyi 7, asonegele ndaga yene gu mukanda. Gungima avutugile gudi Yoshua mu phundo gu Shilo. 10 Yoshua watele mubela gu Shilo gutuama dia Yehowa mukunda nu ene. Guene Yoshua wakhaphele enya Isalele mavu, giphuta nu giphuta giahetele shinda diawo.
11 Atele mubela, gitshinyi gia thomo gia mavu giahanewe enya giphuta gia Benjame gifua muakhalele fami jiawo. Mavu a ahanewe gungima dia guta mubela akhalele hakatshi dia mavu a enya Yuda nu a ajigulu a Yozefe. 12 Gu khanda ya nord, mudidilo wawo wakhalele musendesa gu Yordane, wayile uu nu gu mbongo ya Yeliko gu khanda ya nord; wakandugile gu mulundu gu khanda ya mayilo a kumbi, wayile uu nu mu mavu a luselenga a Bete-Avene. 13 Mudidilo wayile uu nu gu mbongo ya Luze, gu khanda ya sud ya Luze, yakotelesa egi Betele; mudidilo wene wabulumugile gu Atalote-Adale gu mulundu udi gu khanda ya sud ya Bete-Holone ya gu Mbongo. 14 Mudidilo wayile gu khanda ya mayilo a kumbi, wakondomogele gu khanda ya sud gu mulundu udi ha sambua dia Bete-Holone gu khanda ya sud; wasugile gu Kiriyate-Bale, yakotelesa egi Kiriyate-Yalima, dimbo dia enya giphuta gia Yuda. Wene mudidilo wa gu khanda ya mayilo a kumbi.
15 Gu khanda ya sud, mudidilo wakhalele musendesa gu Kiriyate-Yalima, wayile gu khanda ya mayilo a kumbi, gungima wayile uu nu gu gito gia meya gia gu Nefetoa. 16 Mudidilo wene wabulumugile uu nu gu suga ya mulundu udi ha sambua dia baba dia mun’a Hinoma, suga ya mulundu wene idi mu baba dia Refayime gu khanda ya nord. Wabulumugile mu baba dia Hinoma gu songi ya dimbo dia enya Yebuse gu khanda ya sud, wayile uu nu gu Ene-Logela. 17 Wabalegele gu khanda ya nord uu nu gu Ene-Shemeshe, wayile gu Gelilote idi ha sambua dia Mulundu wa Adumime, gungima wabulumugile gu seso dia Bohana mun’a Ribene. 18 Mudidilo wene wayile gu khanda ya nord ya tumilundu tudi ha sambua dia Araba, wabulumugile gu Araba. 19 Gungima wayile gu khanda ya nord gu mbongo ya Bete-Hogela, wasugile mu khulo ya gu khanda ya nord ya Kianga gia Mungua,* gu suga ya Yordane gu khanda ya sud. Wene mudidilo wa gu khanda ya sud. 20 Gu khanda ya mazogelo a kumbi, mudidilo wakhalele Yordane. Yene mididilo ya gu khanda jiagasue jia mavu ahanewe ajigulu a Benjame gifua muakhalele fami jiawo.
21 Membo ahanewe giphuta gia Benjame gifua muakhalele fami jiawo enyawa: Yeliko, Bete-Hogela, Emeke-Kesisi, 22 Bete-Araba, Semalayime, Betele, 23 Avime, Pala, Ofela, 24 Kefale-Amona, Ofeni nu Geba; membo akoma 12 nu membo azonda-zonda akhalele hehi.
25 Gibeona, Rama, Belote, 26 Mispa, Kefila, Mosa, 27 Lekeme, Ilephele, Talala, 28 Zela, Elefe, Yebuse, yakotelesa egi Yelusalema, Gibea nu Kiriyate; membo akoma 14 nu membo azonda-zonda akhalele hehi.
Diene diakhalele khapho dia ajigulu a Benjame gifua muakhalele fami jiawo.