Mukanda wa Thomo wa Gudilanduluila
27 Owu mutango wa enya Isalele, yakotelesa egi mafumu a fami jiawo, mafumu a athu 1 000 nu mafumu a athu 100, nu mafumu a masuta akhalele mutshitshila fumu mudimo, anyi akhalele mutadila ndaga jiagasue jia mahunji a athu akhalele muza, nu anyi akhalele muya mbeji nu mbeji ya givo giagasue; hunji diagasue diakhalele nu athu 24 000.
2 Yashobama mun’a Zabadiele wakhalele fumu wa hunji dia thomo mu mbeji ya thomo; hunji dienji diakhalele nu athu 24 000. 3 Wakhalele mujigulu wa Phelese. Muene wakhalele fumu wa mafumu agasue a thundu jia athu atombewe ha gutshita mudimo mu mbeji ya thomo. 4 Dodayi mujigulu wa Ahohi wakhalele fumu wa hunji mu mbeji ya mbadi; Mikelote wakhalele mutuameji, hunji dia Dodayi diakhalele nu athu 24 000. 5 Benaya mun’a Yoyada, fumu wa nganga-nzambi, muene wakhalele fumu wa hunji dia thathu, wakhalele naye gutshita mudimo mu mbeji ya thathu; hunji dienji diakhalele nu athu 24 000. 6 Benaya muene wakhalele suta dia ngolo, wakhalele mukatshi dia masuta 30, muene nji wakhalele guatuameza. Mun’enji Amizabada wakhalele nji mutuameji mu hunji dienji. 7 Asaele phangi’a Yoabe wakhalele fumu wa nguana mu mbeji ya nguana; hunji dienji diakhalele nu athu 24 000. Gungima mun’enji Zebadia wabuile fumu ha fundo dienji. 8 Shamehuta muenya Izelehiya wakhalele fumu wa thano mu mbeji ya thano; hunji dienji diakhalele nu athu 24 000. 9 Ira mun’a Ikeshi wa gu Tekoa wakhalele fumu wa 6 mu mbeji ya 6; hunji dienji diakhalele nu athu 24 000. 10 Helese muenya giphuta gia Efrayime wa gu Phelone wakhalele fumu wa 7 mu mbeji ya 7; hunji dienji diakhalele nu athu 24 000. 11 Sibekayi muenya gu Husha mujigulu wa Zela wakhalele fumu wa 8 mu mbeji ya 8; hunji dienji diakhalele nu athu 24 000. 12 Abiezele wa gu Anatota muenya giphuta gia Benjame wakhalele fumu wa 9 mu mbeji ya 9; hunji dienji diakhalele nu athu 24 000. 13 Mahalayi muenya gu Netofa mujigulu wa Zela wakhalele fumu wa 10 mu mbeji ya 10; hunji dienji diakhalele nu athu 24 000. 14 Benaya muenya gu Philatona mujigulu wa Efrayime wakhalele fumu wa 11 mu mbeji ya 11; hunji dienji diakhalele nu athu 24 000. 15 Heledayi muenya gu Netofa mujigulu wa Otenyele wakhalele fumu wa 12 mu mbeji ya 12; hunji dienji diakhalele nu athu 24 000.
16 Atuameji a iphuta ya Isalele enyawa: mu giphuta gia Ribene, mutuameji wakhalele Eliezele mun’a Zikri; mu giphuta gia Simeone, Shefatia mun’a Maka; 17 mu giphuta gia Levi, Hashabiya mun’a Kemuele; mukatshi dia ajigulu a Alona, Zadoke; 18 mu giphuta gia Yuda, Elihu munu wakhalele phangi’a Davidi; mu giphuta gia Isakale, Omeli mun’a Mikaele; 19 mu giphuta gia Zabulona, Ishemaya mun’a Obadia; mu giphuta gia Nefetali, Yelimota mun’a Azeliyele; 20 mu giphuta gia Efrayime, Hoshea mun’a Azaziya; mu gitshinyi gia giphuta gia Manase, Yowele mun’a Phedaya; 21 mu gitshinyi gia giphuta gia Manase giakhalele gu Gileade, Ido mun’a Zakaliya; mu giphuta gia Benjame, Yasiele mun’a Abnere; 22 mu giphuta gia Dane, Azalele mun’a Yelohama. Ene akhalele mafumu a iphuta ya Isalele.
23 Davidi gatangelego athu akhalele nu ivo 20 nu goshi handaga Yehowa walayele egi mbawubuisa enya Isalele avula gifua themua mu dilu. 24 Yoabe mun’a Seluya wasendesele gutanga athu, uvi gamaneselego guatanga handaga Nzambi wavuidile enya Isalele khabu mukunda nu ndaga yene. Mutango wa athu ene wasonegewego mu mukanda wa mene jia Fumu Davidi.
25 Azemavete mun’a Adiele wakhalele mutadila sugu akhalele mubambela umonyi wa fumu. Yonatana mun’a Oziase wakhalele mutadila jinzo akhalele mubambela ima* mu temu, mu membo akoma, mu membo azonda nu mu jinzo jialeha. 26 Ezeli mun’a Keluba wakhalele mutadila athu akhalele mudima mahia. 27 Shimeyi muenya gu Rama wakhalele mutadila ilanga ya vinyo; Zabedi muenya gu Sifemota wakhalele mutalela jinzo akhalele mubambela matombe. 28 Bale-Hanana muenya gu Gedele wakhalele mutadila mitshi ya olive nu mitshi ya sikomole ya gu Shefela; Yoashe wakhalele mutalela fundo akhalele mubamba maji. 29 Shitalayi wa gu Shalona wakhalele mubamba ngombe jiakhalele mudia muangu gu Shalona; Shafata mun’a Adelayi wakhalele mubamba ngombe jiakhalele mu mababa. 30 Obile muenya Ishemayele wakhalele mutadila shamo; Yehedeya muenya gu Melonota wakhalele mutadila phunda.* 31 Yaziza mujigulu wa Hagale wakhalele mutadila imeme nu khombo. Mukut’awo agasue akhalele mafumu akhalele mutadila ima ya fumu Davidi.
32 Yonatana muehu wa Davidi, muenya ndunge, wakhalele muhanyi wa malongo, wakhalele nji sekretere; Yehiele mun’a Hakemoni wakhalele mutadila ana a fumu. 33 Ahitofele wakhalele muhanyi wa malongo wa fumu; Hushayi muenya Aleka wakhalele futa* dia fumu. 34 Yoyada mun’a Benaya nu Abiatare abuile ahanyi a malongo gungima dia Ahitofele; Yoabe wakhalele fumu wa masuta a fumu Davidi.