MBIMBI JIA GISENDESELO

Biblia yasonegewe mu ukuateshi wa nyuma ya Nzambi hagula yajiya gutukuatesa ha guta maga nu Nzambi. Tudi naye guyilonguga ha gujiya Fumi’a naye muabonga. (Yone 17:3; 2 Timote 3:16) Mukatshi dia Biblia, Yehowa wana monesa felela dienji mukunda nu athu nu mavu.—Gisendeselo 3:15; Gumonesa 21:3, 4.

Gushigo nu mukanda uko wana kuatesa athu gifua Biblia. Biblia yana gutukuatesa ha gulandula makalegelo abonga a Yehowa, gifua guzumba, khenda nu gudisha ha fundo dia athu ako. Yana gutuhana felela, yana kuatesa nji athu ha gukolesela mu malamba akola. Yana gutukuatesa nji ha gumonesa ndaga jiabola jia ha mavu awa jinyi jianago gudivua nu gutshigina gua Nzambi.—Ngimbo 119:105; Hebelu 4:12; 1 Yone 2:15-17.

Mu gisendeselo, Biblia yasonegewe mu zuelelo dia Hebelu, dia Araméen, nu dia Greke; gungima yabalumuiwe ya mudidi nga gitshinyi mu mazuelelo gubalega 3 000. Biblia idi mukanda wana balumuiwa nu gukhaphewa muavula ha mavu agasue. Idi diago ngenyi, handaga Biblia yadiangele guzuela egi: “Lukuma elu luabonga lua Ufumu [lukuma lua ndando ludi mu Biblia] mbalulongesewa nji ha mavu agasue gifua gijiyishilo gudi ifutshi yagasue, gungima gisugishilo mbagiza.”—Matayo 24:14.

Luholo tuana zula lukuma lua Biblia nu ndando, tuazudile tangua dia gubalumuna luko Biblia muabonga gifua luholo athu ana zuela mangino, uvi tuasombegeselego ndaga jidi mukatshi. Tumujiya egi idi ginemo giakoma ha gubalumuna Biblia mu luholo luatagana. Biblia eyi tuabalumuna gifua luholo athu ana zuela mangino idi gudivua nu Biblia Saintes Écritures. Traduction du monde nouveau, jinyi jiazogele ivo 60 nu holu yabalega gale. Uvi gungima dia ivo yavula, zuelelo dia Anglais diasombegesele muavula. Ndaga yene yatshitshile egi aphangi a gu Komite ya Biblia Gubalumuna gua Mavu Ahe-Ahe azule desizio dia gubalumuna luko Biblia gifua luholo athu ana zuela mangino. Felela dietu diakhalele dia gubalumuna Biblia gifua luholo yasonegewe mu mazuelelo a gishina, nu ikhale yaleba ha gutanga nu ha gukotelesa. Malongo adi mu ba Appendice adi muzuela egi: “Mikhuala Yatadila Luholo lua Gubalumuna Biblia,” “Ndaga Jiko jia Ndando Jidi mu Biblia Eyi,” nu “Luholo Tuahetele Biblia” adi mumonesa ndaga jiko asombegesele mu Biblia eyi mu ndaga yatadila luholo athu ana zuela mangino.

Athu ana zumba Yehowa Nzambi nu ana gumukombelela adi nu funu ya Mbimbi ya Nzambi inyi idi ya gubalumuna mu luholo luatagana hagula ajiya gukotelesa mu luholo luabonga. (1 Timote 2:4) Hene, tuabalumuine Biblia eyi ya Anglais gifua luholo athu ana zuela mangino, ngenyi yajiya gubalumuiwa mu mazuelelo ako avula gula luholo ludi guene. Tudi mukombelela nu tudi gudifelela egi athu mbaatanga Biblia eyi mbaakotelesa egi Biblia eyi mbayaakuatesa ha ‘gukamba Nzambi . . . nu ha gumumona.’—Makalegelo 17:27.