Luholo Lutshi Tuajiya Gukuata Mitshima ya Athu Tuana Gulongesa
1. Malongo a Yesu akhadile gukalagala itshi mu mitshima ya athu akhadile gumutegelela?
1 Yesu Klisto wakhadile gukuata mitshima ya athu akhadile gumutegelela. Lusugu luko, mitshima ya alandudi enji “yakhalele mulemuga tshuya” hakhadile muene guawambela mbimbi ya Nzambi. (Luka 24:32) Gutumagela Nzambi gudi naye gukatuga gu mutshima. Hakiene, luholo lutshi tuajiya gukuatesa athu tuana gulongesa Biblia ha gubalumuna makalegelo awo?—Lomo 6:17.
2. Luholo lutshi gutema guajiya gutukuatesa ha gukuata mitshima ya athu?
2 Kalegela Ndaga nu Gutema Guagasue: Athu ako ajiya gukotelesewa ndaga jiabonga nu jiabola, uvi yanako guatuma ha gubalumuna khadilo diawo. Hakiene, gukalegela Biblia ha guamonesa egi malongo a mangumba awo ashiko atagana, guajiya guatuma atune gutuyamba. Ha gukuatesa athu ene, tudi naye gujiya thomo mukunda natshi ana gutshigina nu ana gukalagala milonga luholo adi guyikalagala. Hagula egi azole matangi awo a mutshima, tudi naye guahula mihu yabonga nu gutema guagasue. (Ish. 20:5) Gungima dia gukalagala luholo luene, tuajiya gutomba malongo a mbimbi ya Nzambi ha gukuata mitshima yawo. Hakiene, tudi naye guamonesa egi tuana guatangiza, tudi naye luko kukhala nu guhuiminyina. (Ish. 25:15) Jiya egi athu ana gukula mu nyuma mage mage. Tushile nyuma ya Yehowa tangua dia gutuameza matangi nu makalegelo awo.—Mako 4:26-29.
3. Luholo lutshi tuajiya gukuatesa athu tuana gulongesa Biblia akudise makalegelo abonga?
3 Akuatese akudise makalegelo abonga: Baverse a Biblia anyi ana gumonesa gubonga nu guzumba gua Yehowa ajiya gukuatesa athu tuana gulongesa akudise makalegelo abonga. Tuajiya gukalegela baverse gifua Ngimbo 139:1-4 nga Luka 12:6, 7 ha gumonesa luholo Nzambi ana gutangiza muthu mumoshi mumoshi mukatshi dietu. Gila athu ene asendesa gusuanguluga ha gumona luholo Yehowa ana gutumonesela mutshima wabonga, guzumba guawo nu gudihana guawo gudi Nzambi mba gukula. (Lomo 5:6-8; 1 Yone 4:19) Gila athu ene ajiya luko egi makalegelo awo ajiya gusuanguluisa Yehowa nga gumuhana gikenene, yajiya guakuatesa ha gukalagala ndaga jiana gumutumbuisa nu gumusuanguluisa.—Ngi. 78:40, 41; Ish. 23:15.
4. Hatuana gulongesa athu mbimbi ya Nzambi, luholo lutshi tuajiya gumonesa egi tuana gunemesa njila ya muthu ya gudizudila badesizio?
4 Yehowa anako gushinjiga athu ha gunemesa mikhuala yenji ndo. Uvi, wana gusuenesa athu hehi n’enji, mu luholo ana guamonesa egi gula alandula malongo enji mba aheta gubonga. (Yesh. 48:17, 18) Hatudi gulongesa athu, gila tuabembela njila ya gudizudila badesizio, tudi gukalagala luholo lumoshi nu Yehowa. Gila athu adizudila badesizio a gubalumuna monyo wawo, gutshigina guawo guana guzola mbuto yabonga. (Lomo 12:2) Guana luko guasuenesa hehi nu Yehowa, muthu wana ‘gutala mitshima ya athu.’—Ish. 17:3.