Yesu “Walongugile Luholo lua Gutumaga”

Yesu wana tumagela Yehowa sendese mualeha. (Yone 8:29) Na mukunda natshi Biblia yana zuela egi: “Walongugile luholo lua gutumaga mu malamba amonele muene”?​—Heb. 5:8.

Ndaga jiataganele najio Yesu hakhalele muene ha mavu jiakhalele jia gudisha nu ndaga jiana kalegewa mu dilu. Ha gufezegesa, mvuaji jienji jiakhalele muzumba Yehowa uvi akhalelego athu atagana. (Luka 2:51) Mafumu a ikombelelo nu mafumu a leta akhalele gumukalegela ndaga jiabola. (Mat. 26:59; Mako 15:15) Muene nji “wadibulumuishile, watumagele Nzambi uu nu mu gufua guenji,” gufua gumoshi gua lamba diago.​—Fili. 2:8.

Ndaga jiene jiagasue jiakuatesele Yesu ha gujiya luholo luhe-luhe lua gutumagela Yehowa lunu gakhalelego mujiya hakhalele muene mu dilu. Jiamukuatesele nji ha gubua Fumu watagana nu Nganga-nzambi Wakoma munu wana gutuvuila khenda. (Heb. 4:15; 5:9) Yesu wabuile nu ndando yavula gubalega gu meso a Yehowa gungima dia gulonguga luholo lua gutumaga mu malamba amonele muene. Esue nji tuajiya gubua nu ndando yavula gu meso a Yehowa nu wajiya gutukalegela mu midimo yenji gula tudi nu khadilo dia gutumaga ikhale tudi mutagana nu malamba.​—Yak. 1:4.